Tou Mulimuli Ki Te Faʼifaʼitaki ʼAē Neʼe Tuku Mai e Sesu
1. Koteā te faʼifaʼitaki ʼaē neʼe tuku mai e Sesu?
1 Kā tou fakahoko ia te gāue ʼaē ko te fai ʼo ni ʼu tisipulo, ʼe tonu ke tou manatuʼi ʼe feala ke malave mālohi tatatou faʼifaʼitaki kiā nātou ʼaē ʼe sisio mai. Neʼe akoʼi e Sesu ia te hahaʼi ʼaki tana ʼu palalau pea mo tana aga. Ko nātou ʼaē neʼe sisio kiā te ia, neʼe feala ke natou tokagaʼi tana faʼa gāue, tona ʼofa ki te hahaʼi, tana fia tokaga ʼāteaina pē ki te tapuhā ʼo te huafa ʼo tana Tamai, pea mo tana loto moʼoni ʼaē ke ina fakahoko ia te finegalo ʼo tona Tamai.—1 Pet. 2:21.
2. Ko te ʼu ʼaluʼaga fea ʼaē ʼe feala ai ki tatatou faʼifaʼitaki ke malave kiā nātou ʼaē ʼe kaugā gāue mo tātou ʼi te minisitelio?
2 ʼI Te Temi ʼAē ʼe Tou Fai Faka Mafola ʼi Te ʼu ʼApi: Ohagē ko Sesu, ʼe malave tatatou faʼifaʼitaki kiā nātou ʼaē ʼe kaugā gāue mo tātou ʼi te minisitelio. Ko te kau fai faka mafola foʼou peʼe ko nātou ʼaē ʼe mole heʼeki faʼa māhani ʼi te fai faka mafola, kā natou tokagaʼi tatatou faʼafai ʼi te minisitelio, pea ʼe natou fakakaukauʼi anai ia te maʼuhiga ʼaē ʼo tanatou fai faka mafola. Kā natou sisio ki totatou fiafia pea mo tatatou tōkakaga moʼoni ki te hahaʼi, pea ʼe natou manatuʼi anai ia te maʼuhiga ʼaē ke natou fakahā te ʼu kalitātē ʼaia ʼi tanatou minisitelio. Kā natou tokagaʼi tatatou fakaʼaogaʼi tuʼumaʼu ia te Tohi-Tapu ʼi tatatou fai te ʼu ʼaʼahi, pea mo he ʼu ako Tohi-Tapu, ʼe uga ai anai ia nātou ke natou faʼifaʼitakiʼi te faʼahi ʼaia.
3. ʼE tou akoʼi feafeaʼi te ʼu ako Tohi-Tapu ʼaki tatatou faʼifaʼitaki, pea koteā ʼaē ʼe feala ke natou ako ai?
3 ʼI Te Temi ʼAē ʼe Tou Fai Ai Te ʼu Ako Tohi-Tapu: Ko tatatou kau ako Tohi-Tapu ʼe natou tokagaʼi tāfito anai tatatou aga. Ohagē lā, lagi neʼe kua tou fakamahino age kiā nātou ia te maʼuhiga ʼaē ʼo te teuteuʼi ʼo te ako, mo te vakaʼi ʼo te ʼu vaega, pea mo te fakaʼiloga ʼo te ʼu manatu tāfito, kae ko te faʼahi ʼaē kā natou fakatokagaʼi tāfito, pe neʼe teuteuʼi e tātou ia te ako. (Loma 2:21) Kapau ʼe tou ʼomai ʼi te hola ʼaē neʼe tou fakatuʼutuʼu ke fai ai te ako, pea ʼe natou tuku anai he tahi ʼu gāue kae natou fai tanatou ako Tohi-Tapu. ʼE mahino ia, ʼe natou toe tokagaʼi mo te ʼu sākilifisio ʼaē ʼe tou fai ʼi te minisitelio pea mo te mālohi ʼo tatatou tui. Koia, ʼe mole tou punamaʼuli ai, ʼi te agamāhani ko te kau ako ʼo nātou ʼaē ʼe mulimuli lelei ki te faʼifaʼitaki ʼa Sesu, ʼe natou liliu ko he kau fai faka mafola evaselio faʼafai pea mo maʼu he ʼu fua ʼi tanatou gāue.
4. Kā tou kau ki te ʼu fono, koteā ʼaē ʼe tou akoʼi ki te hahaʼi ʼaki tatatou faʼifaʼitaki?
4 ʼI Tatatou ʼu Fono: Ko nātou fuli ʼi te kōkelekāsio faka Kilisitiano ʼe natou tokoni ki te akoʼi ʼo te hahaʼi ʼaki te faʼifaʼitaki ʼaē ʼe natou tuku ʼi te ʼu fono. Ko te hahaʼi ʼaē ʼe fia logo pea mo ʼomai ki te ʼu fono, ʼe fua lelei kiā nātou te faʼifaʼitaki lelei ʼaē ʼe natou sisio kiai ʼi te kōkelekāsio. ʼE natou tokagaʼi ia te ʼofa fakatautehina, te logotahi faka Kilisitiano, pea mo te fakaʼapaʼapa ʼo tanatou teuteu pea mo te faʼu ʼo tonatou lauʼulu. (Pes. 133:1) ʼE natou toe tokagaʼi anai mo te faʼifaʼitaki ʼaē ʼe tou tuku, ʼi tatatou fono tuʼumaʼu pea mo tatatou fakahā iā muʼa ʼo te hahaʼi tatatou tui. Ko te tagata neʼe haʼu ki tatatou tahi fono, neʼe ina fakatokagaʼi te maʼu vave e te kiʼi taʼahine te vaega ʼi tana Tohi-Tapu pea mo tana mulimuli fakalelei ki tona lau. Ko te faʼifaʼitaki ʼa te kiʼi taʼahine, neʼe ina uga ia ia ke ina kole hana ako Tohi-Tapu.
5. He koʼē ʼe mole tonu ke tou meʼa noaʼi te maʼuhiga ʼo te faʼifaʼitaki ʼaē ʼe tou tuku ki ʼihi?
5 ʼE fakaloto mālohiʼi tātou e te Tohi-Tapu ke tou mulimuli ki te faʼifaʼitaki lelei ʼa ʼihi. (Filp. 3:17; Hep. 13:7) Koia, ʼe tonu ke tou manatuʼi kapau ʼe tou mulimuli fakalelei ki te faʼifaʼitaki ʼaē neʼe tuku mai e Sesu, pea ʼe fakatokagaʼi anai e ʼihi pea ʼe feala ke fua lelei kiā nātou. ʼI tatatou ʼiloʼi te faʼahi ʼaia, ʼofa pē ke tou mulimuli ki te ʼu palalau ʼaē ʼe tou maʼu iā 1 Timoteo 4:16: “Tokaga tuʼumaʼu kiā koe, pea mo tau faiako.”