Te Tali Ki ʼAkotou ʼu Fehuʼi
◼ ʼE lagolago koa ia “te tagata kaugana agatonu mo poto” ki te ʼu kūtuga Fakamoʼoni ʼa Sehova ʼaē ʼe natou fakatahitahi ki tuʼa atu ʼo te kautahi ʼa Sehova moʼo fai he ʼu kumi faka Tohi-Tapu peʼe fai palalau ki te Tohi-Tapu?—Mat. 24:45, 47.
Kailoa ia. Kae ʼi te ʼu potu kehekehe ʼo te mālamanei, ko ʼihi ʼi totatou ʼu tehina neʼe natou faʼufaʼu ʼi tuʼa atu ʼo te kautahi ia he ʼu kūtuga moʼo fai he ʼu kumi ʼo ʼuhiga mo he ʼu manatu faka Tohi-Tapu. Ko ʼihi neʼe natou mulimuli ki he kūtuga ʼi tuʼa atu ʼe natou ako ia te ʼu Koga Tohi-Tapu Faka Hepeleo pea mo Faka Keleka, moʼo sivisivi peʼe totonu te Tohi-Tapu Traduction du monde nouveau. Ko ʼihi ʼe natou kumi he ʼu manatu ʼo ʼuhiga mo te ʼu meʼa fakapoto lalahi ʼaē ʼe pipiki ki te Tohi-Tapu. Neʼe natou fai tanatou ʼu polokalama ʼi te Internet pea mo he ʼu faʼahi ke natou fai palalau ai ʼi te olotinatea, moʼo fevaevaeʼaki ai he ʼu manatu pea mo fai palalau ʼo ʼuhiga mo tanatou ʼu manatu ki he puani. Neʼe natou fai mo te ʼu fono pea mo tā te ʼu tohi moʼo fakahā ai tanatou ʼu kumi pea faka kātoa ki te ʼu meʼa ʼaē ʼe akoʼi mai ʼi tatatou ʼu fono faka Kilisitiano pea mo tatatou ʼu tohi.
ʼI te kele kātoa, ʼe foaki e te kautahi ʼa Sehova ki tana kau Fakamoʼoni ia he ako lahi ʼi te faʼahi fakalaumālie, pea mo he ʼu fakaloto mālohi ʼi te ʼu fono, ʼi te ʼu fakatahi, pea ʼi te ʼu tohi ʼa te kautahi ʼa Sehova. ʼAki te takitaki ʼo tona laumālie māʼoniʼoni pea mo tana Folafola moʼoni, ʼe foaki e Sehova te meʼa ʼaē ʼe ʼaoga ki tana hahaʼi ke feala ai hanatou “logo tahi fakalelei ʼi he laumālie pē e tahi pea mo he manatu pē e tahi” pea mo natou nonofo “mālolohi ʼi te tui.” (1 Ko. 1:10; Kol. 2:6, 7) ʼE mahino ia, ʼe tou loto fakafetaʼi ki te meʼa kai fakalaumālie ʼaē ʼe foaki mai e Sehova ʼi te ʼu ʼaho fakaʼosi ʼaenī. Koia ʼe mole lagolago e “te tagata kaugana agatonu mo poto” ki te ʼu tohi ʼaē neʼe tā, peʼe ko te ʼu fono, peʼe ko te ʼu polokalama ʼi te Internet ʼaē neʼe mole ina fakagafua ke fakatuʼu.—Mat. 24:45-47.
ʼE vikiʼi te hahaʼi ʼaē ʼe natou fia fakaʼaogaʼi tonatou poto moʼo lagolago ki te logo lelei. Kae ʼe mole tonu ki he tahi ke ina tāʼofi te gāue ʼaē ʼe fai e Sesu Kilisito ʼaki tana kōkelekāsio ʼi te kele iā ʼaho nei. ʼI te ʼuluaki sēkulō, neʼe fai e te ʼapositolo ko Paulo te fakatokaga ʼo ʼuhiga mo te fai palalau ki he ʼu manatu fakatupu vaivai pea mo fakapuli temi, ohagē lā ko “he ʼu hōloga ʼaē ʼe mole iku ki he meʼa, kae lagaʼi ai he ʼu fehuʼi moʼo fai he ʼu kumi, kae mole ko he tufa ʼo he meʼa mai te ʼAtua ʼo ʼuhiga mo te tui.” (1 Tim. 1:3-7) ʼE tonu ki te kau Kilisitiano fuli ke natou “tekeʼi te ʼu fehuʼi fakavale, te ʼu hōloga, te ʼu kē, te ʼu fihi ʼo ʼuhiga mo te Lao, heʼe mole ʼi ai honatou ʼaoga pea ʼe vaʼiganoa.”—Tito 3:9.
Kiā nātou ʼaē ʼe natou loto ke lahi age tanatou ako ia te Tohi-Tapu pea mo fai he ʼu kumi, ʼe matou fakaloto mālohiʼi ia nātou ke natou fai he ʼu kumi ki te ʼu tohi Étude perspicace des Écritures, “ Toute Écriture est inspirée de Dieu et utile ” pea mo tamatou tahi ʼu tohi, ohagē ko te ʼu tohi ʼa Taniela, mo Isaia pea mo Fakahā ʼaē ʼe fakamahino ai te ʼu lea faka polofetā ʼaē ʼi te Tohi-Tapu. ʼI te ʼu tohi ʼaia, ʼe tou maʼu ai te ʼu tuʼuga manatu ke tou ako pea mo metitāsioʼi te Tohi-Tapu, pea ke feala ai hatatou ‘fonu ʼi te ʼatamai mālama totonu ki te finegalo ʼo te ʼAtua, ʼaki te poto pea mo te mahino fakalaumālie, ke feala hatatou haʼele ʼi he ʼaluʼaga ʼe tau mo feʼauga mo Sehova, ke tou lelei kātoa kiā te ia, ʼi tatatou haga fakatupu he fua ʼi te gāue lelei fuli pea mo tuputupu ʼi te ʼatamai mālama totonu ʼa te ʼAtua.’—Kol. 1:9, 10.