Te ʼu Tonu
◼ Te tufa ʼo te ʼu māhina ʼo Sepetepeli: Te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼE tou faiga tāfito anai ke tou kamata he ʼu ako Tohi-Tapu ʼi te ʼuluaki ʼaʼahi. Kapau kua maʼu e te hahaʼi hanatou tohi, tou fakahā age te ʼaoga ʼo te tohi ʼaia kiā nātou, ʼaki hatatou faʼifaʼitakiʼi fakanounou ia te fai ʼo he ako Tohi-Tapu. ʼOketopeli: Te Tule Leʼo pea mo te Réveillez-vous ! Kapau ʼe fia logo he tahi, kotou fakahā age ia te kiʼi pepa lotu ʼE Koutou Fia Mahino Lahi Koa Ki Te Tohi-Tapu? pea mo fai palalau kiai ʼaki te fakatuʼutuʼu ʼaē ke kamata he ako Tohi-Tapu. Novepeli: Te tohi ʼAtamai Mālama peʼe ko te tohi Te Tagata ʼAē ʼe Lahi Tokotahi ʼi Te ʼu Temi Fuli. Tesepeli: Te Tagata ʼAē ʼe Lahi Tokotahi ʼi Te ʼu Temi Fuli. Peʼe feala ke kotou tufa ia te tohi Te Kalavi ʼo Te Manuʼia Faka Famili.
◼ Mai tona ʼaluʼaga ʼaē ko fakaʼosi vāhaʼa e nima ʼi te māhina ʼo Sepetepeli, ʼe ko he māhina lelei ʼaia moʼo toʼo te selevisi pioniē vaeluaʼi temi.
◼ ʼE tonu ke kamata fakaʼui e te ʼu kōkelekāsio te ʼu foʼi tohi ʼo Te Tule Leʼo pea mo te Réveillez-vous ! ʼo te taʼu 2007, mo te Index des publications Watch Tower 2007, pea mo te pā CD-ROM Watchtower Library—Edition 2007. ʼE tuʼu anai ʼi te pepa “Te Logo Ki Te ʼu Kōkelekāsio Fuli,” ʼaē ʼe momoli atu ʼi te māhina fuli, te lisi ʼo te ʼu lea ʼaē ʼe maʼu ai te ʼu tohi ʼaia. Kotou fakatokagaʼi ko te Watchtower Library—Edition 2007 ʼe foaki pē kiā nātou ʼaē kua papitema, pea ʼe maʼu ʼi te ʼu kōkelekāsio.
◼ Ko te ʼata viteo Les Témoins de Jéhovah : organisés pour prêcher la bonne nouvelle ʼe talanoa anai kiai ʼi te Fono Gāue ʼi Tesepeli. Kapau ʼe ʼaoga, ʼe tonu ke foimo fakaʼui te ʼata ʼaia ʼi te kōkelekāsio.
◼ Ko te akonaki makehe ki te hahaʼi fuapē ʼaē kā fai ʼi te temi ʼo te ʼAho Fakamanatu ʼo te taʼu 2008, ʼe fai anai lolotoga te vāhaʼa ʼo te ʼaho 31 ʼo Malesio 2008. ʼE hoki tala atu anai te kupu tāfito ʼo te akonaki. Ko te ʼu kōkelekāsio ʼaē ʼe lolotoga ʼaʼahi e te taupau faka silikō peʼe natou kau ʼi he fakatahi lahi ʼi te fakaʼosi vāhaʼa ʼaia, ʼe fai anai tanatou akonaki makehe ʼi te vāhaʼa ʼaē kā hoa mai kiai. ʼE mole fai anai e he kōkelekāsio te akonaki makehe ʼi muʼa ʼo te vāhaʼa ʼo te ʼaho 31 ʼo Malesio 2008.
◼ ʼE tonu anai ki te taupau pelesitā peʼe ko he tahi neʼe ina hinoʼi, ke ina vakaʼi ia te falā ʼo te ʼu māhina ʼo Sūnio, mo Sūlio pea mo ʼAukusitō. Kā ʼosi anai ia te faʼahi ʼaia, pea ʼe tala anai ki te kōkelekāsio ʼi te vāhaʼa ʼaē kā lau ai te falā.—Vakaʼi ia te pepa Instructions pour la comptabilité des congrégations (S-27).