Tou Fakaʼapaʼapa Ki Te Koga Meʼa ʼAē ʼe Fai Ai Te Tauhi Kia Sehova
1 Ka fakaafe tatou ki he ʼapi ʼo he tahi, ʼe tou fakaʼapaʼapa ki tana ʼu meʼa, ʼo mole tou maumauʼi he meʼa pea mole tou fakalelu ki te fakatuʼutuʼu māhani ʼo te loto fale. ʼE tonu ke toe lahi age tatatou fakaʼapaʼapa mokā fakaafe tatou e Sehova! ʼE tonu ke tou ʼiloʼi te faʼahiga aga ʼaē ʼe tonu ke tou fai ʼi tona ʼapi. (Pes. 15:1; 1 Tim. 3:15) Peʼe tou fai tatatou ʼu fono ʼi te Fale ʼo te Puleʼaga, ʼi he loto fale, peʼe ʼi he koga meʼa ʼe kaugamālie ai te hahaʼi, tokolahi ia tatou ʼe tou fakaʼapaʼapa tuʼumaʼu ki te ʼu koga meʼa ʼaē ʼe tou fai ai tatatou tauhi, ohage pe ʼe ko he ʼapi ʼa Sehova, ʼaē “ko tona fakaʼaliʼaliki ʼe māʼoluga ake ia ʼi te kele pea mo te lagi.”—Pes. 148:13.
2 Ko ʼihi tēhina ʼe mole nātou aga fakaʼapaʼapa ʼi te ʼu fono, heʼe nātou logoaʼa peʼe nātou feʼoloʼaki, ohage kia nātou ʼe mole faʼa maʼuhiga te ʼu akonaki ʼaē ʼe fai. Ko ʼihi hahaʼi lalahi ʼe nātou fai palalau ki he ʼu meʼa noa ʼi te loto fale fono, ʼi te hūʼaga ʼo te Fale ʼo te Puleʼaga, ʼi te ʼu fale vao, peʼe ʼi tuʼa ʼo te Fale ʼo te Puleʼaga kae lolotoga fai te fono. Ka tuku ki he tamasiʼi kua lahilahi ke ina leʼoleʼo te tamasiʼi ʼaē ʼe kei veliveli, ʼi ʼihi temi ʼe nā kamata gaoʼi, pea ʼe mole he ʼaoga ʼo te polokalama kia nāua. ʼI te ʼu hili fono, neʼe tou sio ki ʼihi kau tūpulaga ʼi tuʼa ʼo te Fale ʼo te Puleʼaga ʼe nātou gaoʼi, mo logoaʼa mālohi, pea mo nātou fai kalate. ʼI ʼihi lakaga neʼe nātou fakatupu hohaʼa ki te ʼu vāhaʼa fale, peʼe nātou gaohaʼa ki te feʼoloʼaki ʼo te ʼu motokā ʼi te taulaga motokā peʼe ʼi te ala.
3 ʼE Lava Feafeaʼi Hatatou Tekeʼi Te ʼu Aga Heʼe Fakaʼapaʼapa: Kapau ʼe mahino kia tatou te maʼuhiga pea mo te ʼuhiga taputapu ʼo tatatou tauhi, ʼe mahino papau ia ʼe mole tou fia fakaleluʼi anai ʼihi ʼaki hatatou fai fanafana, peʼe tou kakai, peʼe tou gau kamu, peʼe tou numinumi he ʼu moʼi pepa, peʼe tou hoko ʼolo ki te fale vao, peʼe ko tatatou tauhala tuʼumaʼu mai ki te ʼu fono. Ko te ʼu mātuʼa ʼaē ʼe aga fakaʼapaʼapa pea mo loto fakafetaʼi, ʼe mole nātou tuku anai tanatou fānau ke nātou ʼulihi te carrelage, te ʼu hekaʼaga, peʼe ko te ʼu kaupā ʼo te Fale ʼo te Puleʼaga peʼe ko te ʼapi ʼaē ʼe fai ai te ako tohi. Pea ʼe mahino ia ʼe tou loto tahi fuli anai ke ʼaua naʼa fai ʼi te fale fono he ʼu aga fakaufiufi, he ʼu palalau vale, pe ko he fakahuahua heʼeʼaoga.—Efesi 5:4.
4 Kapau ʼe tou manatuʼi tuʼumaʼu te fakatuʼutuʼu ʼo tatatou ʼu fono faka Kilisitiano, pea ʼe tou tokaga anai kia tatou pea mo tatatou fānau ke tou fakahā he aga fakaʼapaʼapa ʼe tāu mo te tauhi kia Sehova, ʼi te potu ʼaē neʼe tou ‘fili ke tou tutuʼu ai.’—Pes. 84:10.