Tou Tuku He Faʼifaʼitaki Lelei ʼAki Te ʼu Palalau Pea Mo Te Aga
1 Neʼe fakaloto mālohi e te ʼapositolo ko Paulo ia Timoteo ke ina tuku he faʼifaʼitaki lelei ʼi tana ʼu palalau pea mo tana aga. (1 Tim. 4:12) ʼO feiā mo tatou, ʼe tonu ke tou tuku he faʼifaʼitaki lelei ʼi tatatou ʼu palalau pea mo tatatou aga, tāfito la mokā tou faka mafola, heʼe kapau ʼe tou fai feiā pea ʼe feala anai peʼe kailoa ke malave ki te loto ʼo te hahaʼi ʼaē ʼe tou felāveʼi mo nātou.
2 ʼE tonu ke tou fakahāhā te ʼu agaaga fuli ʼaē ʼe lelei, ohage ko te aga fakaʼapaʼapa, te loto tokaga, te agalelei, pea mo te fakaʼeteʼete ʼi tatatou ʼu palalau. Kapau ʼe tou maʼu te ʼu kalitate ʼaia, pea ʼe tou fakahā ai ʼe tou tokakaga ki te malave ʼo tatatou aga ki te loto ʼo te hahaʼi. Ko te ʼu aga ʼaē ʼe lelei ʼi te minisitelio, ʼe lava fakatatau ki te ʼu meʼa faka magoni meʼa kai. Kapau ʼe mole tou ʼai te ʼu meʼa faka magoni ʼaia, pea ʼe mole tou faʼa fia kai anai pea ʼe mole hifo lelei anai takita kai. ʼE toe feiā mo tatatou ʼu felogoi mo te hahaʼi, mo kapau ʼe mole tou fai te ʼu aga ʼaē ʼe lelei kia nātou.—Kol. 4:6.
3 Tou Tuku He Faʼifaʼitaki Lelei ʼAki Te ʼu Palalau: Ko he malimali pea mo he fakamālo ʼe maʼuhiga moʼo fakahā te logo lelei. Kapau ʼe tou kamata tatatou ʼu ʼuluaki palalau ʼaki he lotomāfana pea mo tou fakamalotoloto, pea ʼe tou fakahā ki te tagata ʼo te ʼapi, ʼe tou fia tokoni moʼoni kia ia. Ka palalau te tagata ʼaia, pea koutou fakalogo lelei pea mo fakaʼapaʼapa ki tana manatu. Ka koutou palalau, koutou palalau lelei pea mo tokaga naʼa koutou fai he ʼu palalau ʼe lavea ai anai tona loto.—Vakaʼi ia Gaue 6:8.
4 ʼI ʼihi temi ʼe tou felāveʼi mo te ʼu hahaʼi ʼe nātou agakovi, pea mo fakafeagai mai. Koteā ʼaē ʼe tonu ke tou fai? Neʼe uga tatou e Petelo ke tou palalau ʼaki “he agamālū pea mo he fakaʼapaʼapa lahi.” (1 Pet. 3:15, MN; Loma 12:17, 18) Neʼe ʼui e Sesu, kapau ʼe fakafisi he tahi ki te logo ʼo te Puleʼaga, pea ʼe tonu ke tou ‘tū te efu ʼo totatou ʼu vaʼe.’ (Mat. 10:14) Kapau ʼe tou agalelei ʼi te ʼu ʼaluʼaga ʼaia, pea ʼe feala anai ke ina fakamalū te loto ʼo te tagata ʼaē ʼe fakafeagai mai.
5 Tou Tuku He Faʼifaʼitaki Lelei ʼAki Te Aga: Ka tou faka mafola te logo lelei ʼi te ʼu ala pea mo te ʼu koga meʼa ʼaē ʼe kaugamālie ai te hahaʼi, pea ʼe tonu ke tou aga fakaʼapaʼapa, ke ʼaua naʼa tou kalaga ki te hahaʼi peʼe tou fakakinauʼi nātou, peʼe tou tāʼofi tanatou feʼoloʼaki. Ka fakahū tatou e he tahi ki tona ʼapi, pea ʼe tonu ke tou tokakaga ki te ʼu meʼa ʼo tona loto fale, mo aga fakaʼapaʼapa, pea mo fakamālo ki tana tali kāiga. Kapau ʼe tou kaugā ʼolo mo he tamasiʼi, pea ʼe tonu ke fakaʼapaʼapa ki te ʼu hahaʼi pea mo tonatou ʼapi, pea ke nofo maʼu ʼo fakalogo ki te fai palalau. Kapau ʼe pago te fānau, pea ʼe mole ko he faʼifaʼitaki lelei anai.—Taag. 29:15.
6 ʼAki tatatou agaaga ʼo tuʼa, ʼe tonu ke ʼiloʼi ai e te hahaʼi ko tatou ko te ʼu minisi ʼo te Folafola ʼa te ʼAtua. Tou faiga tuʼumaʼu ke maʼa mo fakapoipoi tatatou ʼu teu pea mo fakamolemole lelei, pea ke maʼa mo totatou ulu. ʼE tonu tuʼumaʼu ki tatatou ʼu mutuʼi meʼa “ke tāu mo te logo lelei.” (Vakaʼi ia Filipe 1:27, MN ) Kapau ʼe tou tokaga lelei ki totatou ʼu teu pea mo tatatou ʼu tohi, pea ʼe mole tou fakatupu tūkia anai ki he tahi, peʼe laukoviʼi ai tatatou minisitelio. (2 Ko. 6:3, 4) Kapau ʼe tou tuku he faʼifaʼitaki lelei ʼi tatatou ʼu palalau pea mo tatatou aga, pea ʼe tou hikihiki ai te logo ʼo te Puleʼaga, pea mo tou fakavikiviki ai kia Sehova.—1 Pet. 2:12.