Tou Fakaʼapaʼapa Ki Niʼihi—ʼUluaki Faʼahi
1 ʼE tou fiafia ʼi tatatou sio ki te tuputupu ʼo te hahaʼi ʼa Sehova, ʼo lahi ʼaupito ai te tuputupu ʼo te ʼu kokelekasio. ʼI ʼihi koga meʼa, tāfito ʼi te ʼu fenua lalahi, ʼe lahi ʼaupito te fakaʼaogaʼi ʼo te ʼu Fale ʼo te Puleʼaga, ʼi ʼihi temi ʼe lahi te ʼu kokelekasio ʼe nātou fakaʼaogaʼi te Fale ʼo te Puleʼaga pe e tahi. Ko te faʼahi ʼaia ʼe ʼaoga ke lahi te tokaga kiai ʼa nātou fuli ʼaē ʼe kau kiai.
2 Ko te ʼu kokelekasio fuli ʼaē ʼe nātou fakaʼaogaʼi te Fale ʼo te Puleʼaga ʼe tonu ke nātou fakamaʼa pea mo fakatokatoka te Fale fono ki te ʼu tēhina ʼaē ʼe fakatahitahi ki muli mai. ʼE tonu ke fakatokatoka te ʼu hekaʼaga, ʼe mole ʼi ai anai he tohi ʼe hilihili ʼi te faʼahi ʼaē ʼe hili ai te ʼu tohi, pea ko te meʼa ʼaē ʼe galo, ʼe tae anai ʼo tuku ʼi he faʼahi ʼo te Fale ʼo te Puleʼaga. ʼE tonu anai ke fakamaʼa te ʼu fale vao, mo ai kiai he foʼi topa, he tauveli moʼo holoholo ʼo te ʼu nima, pea mo te ʼu pepa ʼe ʼaoga ki te fale vao pea mo huʼai te ʼu pupele.
3 Kapau ʼe fakatuʼutuʼu ke kamata he tahi fono ʼi te hili pe ʼo he kiʼi temi nounou, ko nātou ʼaē ʼe mavae fakamulimuli ʼi te ʼuluaki fono ʼe mole tonu anai ke nātou fakatuatuai, heʼe feala ke nātou fakaʼefihi ki te teuteu ʼo te fono ʼaē ka hoa mai. Ko te loaloaga fau ʼo te ʼu fai palalau ʼe feala ke fakaʼefihi ki te hūʼaga ki te fale fono pea ʼe fakatupu tuai ki te ʼu tēhina ʼaē ʼe nātou fakatuʼutuʼu te fono ʼaē ka hoa mai. Ko te faʼahi tauʼaga motokā e lagi ʼe faka tuʼakoi, pea koia ʼe ko he meʼa lelei anai te mavae fakavilivili, ke faka fealagia kia nātou ʼaē ʼe ʼōmai ke maʼu he faʼahi moʼo tau ai ʼo tanatou motokā. Tahi ʼaē meʼa, ko nātou ʼaē ʼe kau ki te fono ʼaē ka hoa mai ʼe mole tonu anai ke nātou ʼōmai fakatomuʼa, heʼe feala ke nātou fakaʼefihi ia te hūʼaga, pea mo te tauʼaga motokā.
4 Kapau ʼe lahi te ʼu kokelekasio ʼe nātou fakaʼaogaʼi te fale fono, ʼe ʼaoga tāfito ke nātou felogoi lelei ʼo ʼuhiga mo he ʼu fakatuʼutuʼu ki te fakamaʼa ʼo te Fale ʼo te Puleʼaga ʼi te vāhaʼa fuli. ʼI te agamāhani, ko te ʼu kokelekasio ʼe nātou feliuliugaʼaki tanatou fakamaʼa ia te fale fono. Mokā ko tokotou kokelekasio ʼaē ʼe ina fakamaʼa, ke koutou tokakaga ʼo fai fakalelei pea mo fai fakavilivili. Ko ʼihi age ʼu kokelekasio ʼaē ʼe nātou fakaʼaogaʼi te fale fono ʼe mole feala anai hanatou muhumuhu.
5 ʼI ʼihi temi ʼe ʼaoga ki te kokelekasio fuli ke fetogi te hola ʼo tanatou ʼu fono, mokā ʼaʼahi nātou e te tagata taupau faka silikosikilipisio. Kapau ʼe kau kiai he kokelekasio, ʼe tonu anai ke faka felogoi fakatomuʼa te ʼu tagata ʼāfea ki te ʼu kokelekasio ʼaē ke feala hanatou fakahā fakatomuʼa ki te kau fai faka mafola. Koia, kapau ʼe fakaʼaogaʼi te fale fono ki he tahi age faʼahi, ohage ko te Ako ʼa te kau Pionie, te fono ʼa te ʼu tagata ʼāfea ʼo te silikosikilipisio, peʼe ko he fai ʼohoana, ʼe tonu anai ke fakahā fakatomuʼa ki te ʼu kokelekasio ʼaē ʼe fakatahitahi ʼi te fale fono ʼaia pea mo te ʼu tagata taupau faka silikosikilipisio; ke feala hanatou fai he fakatuʼutuʼu ke ʼaua naʼa nātou fakaʼaogaʼi te Fale ʼo te Puleʼaga ʼi te moʼi temi pe e tahi.
6 ʼE lahi te ʼu Fale ʼo te Puleʼaga ʼe fakaʼaogaʼi e te ʼu kokelekasio ʼo te ʼu silikosikilipisio kehekehe. ʼE maʼuhiga ki te ʼu tagata taupau feʼaluʼaki ʼaē ʼe nātou ʼaʼahi te ʼu kokelekasio ke nātou fefakahāʼaki te ʼu ʼaho ʼaē ʼe nātou fakatuʼutuʼu ai ke nātou ʼaʼahi te kokelekasio. Ko te ʼu fetogi ʼe fai tauhala peʼe ko he tahi ʼu faigataʼaʼia ʼe feala ke hoko, mokā ʼe fakatuʼutuʼu e te ʼu tagata taupau feʼaluʼaki e toko lua ke nā ʼaʼahi he kokelekasio ʼi he vāhaʼa e tahi.
7 Ko te ʼofa ki niʼihi, mo te felogoi lelei, mo te fai fakatomuʼa ʼo te polokalama, pea mo te faifaitahi ʼe tokoni anai ki te ʼu kokelekasio ke nātou taupau he felogoi fakafiafia pea ʼe nātou ʼiloʼi papau ʼe nātou “fai fakapotopoto ia meʼa fuli pea ʼaki te loto fakatokatoka.”—1 Ko. 14:40.