Tou Taupau Fakalelei Tatatou ʼu Fale Fono
1. ʼE fakaʼaogaʼi kiteā ia te Fale ʼo Te Puleʼaga?
1 ʼI te malamanei katoa, ko te ʼu kokelekasio e 94 000 tupu ʼa te kau Fakamoʼoni ʼa Sehova. ʼE lahi te ʼu kokelekasio ʼe nātou fakatahitahi moʼo ako te Tohi-Tapu pea mo fai ʼonatou fono ʼi te Fale ʼo Te Puleʼaga, ko he fale ʼe fakaʼaogaʼi ʼāteaina pe ki te tauhi maʼa.
2. He koʼe koa ʼe maʼuhiga ke tou faiga ke maʼa pea ke matalelei te Fale ʼo Te Puleʼaga?
2 Ko He Fakamaʼa ʼe Fai Tuʼumaʼu: Ko te gāue fakamaʼa ʼo te Fale ʼo Te Puleʼaga ʼe ko he koga maʼuhiga ʼo tatatou tauhi taputapu. ʼE ʼui fēnei e te tohi Notre ministère ʼi te pasina 61: “ ʼE tonu ke mahino ki te ʼu tēhina, ʼe ko he pilivilesio te fealagia ʼaē ʼe tuku age ke nātou taupau te Fale ʼo Te Puleʼaga, ʼo mole gata pe ʼi te faʼahi faka paʼaga, kae ke nātou kau foki ki te ʼu gāue fuli ʼaē ʼe maʼua ke fakahoko moʼona taupau ke maʼa, mo matalelei, pea mokā maumau. ʼAki tona agaaga ʼaē ʼi loto pea mo tuʼa, ʼe tonu ki te Fale ʼo Te Puleʼaga ke ina fakafofoga lelei te kautahi ʼa Sehova.” ʼUhi heʼe fakaʼaogaʼi putuputu ʼi te vāhaʼa fuli, koia ʼe tonu ai ki te Fale ʼo Te Puleʼaga ke fakamaʼa tuʼumaʼu pea mo gaohi ke lelei. ʼI te agamāhani, ʼe ʼi ai pe te kau gāue lotolelei mai te ʼu kokelekasio ʼaē ʼe nātou fakaʼaogaʼi te Fale ʼo Te Puleʼaga, ʼe nātou tokakaga ki te fakahoko ʼo te ʼu gāue ʼaia. Ohage pe ko te temi muʼa, ʼo toe feiā pe mo te temi nei ʼe tonu ki te kau kaugana ʼa Sehova ke nātou tokakaga ʼo “fakafoʼou” te fale ʼe fai ai tanatou tauhi.—2 Fkma. 34:10.
3. E feafeaʼi te fakaʼaluʼalu ʼo te fakamaʼa ʼo te Fale ʼo Te Puleʼaga, pea ko ai ʼaē ʼe lagi feala ke kau ki te pilivilesio ʼaia?
3 ʼE tonu ke fakapipiki ki te lauʼi papa ʼaē ʼi muli ia te polokalama ʼo te fakamaʼa ʼo te Fale ʼo Te Puleʼaga ʼaē ʼe fai ʼi te vāhaʼa fuli. Ko ʼihi kokelekasio ʼe nātou fakatuʼutuʼu ke nātou fakahoko te faʼahi ʼaia ʼi te māhina fuli. ʼE tonu ke fakahoahoa te ʼu ako tohi fuli ki te fakamaʼa ʼo te fale ʼi te vāhaʼa fuli, ʼo mulimuli ki te lisi ʼo te ʼu gāue ʼaē ʼe tonu ke fai. Ko nātou fuli ʼaē ʼe nātou fealagia, ʼe tonu ke nātou kau ki te fakamaʼa ʼo te Fale ʼo Te Puleʼaga ʼi te vāhaʼa fuli. ʼAki te takitaki ʼa te ʼu mātuʼa, ʼe feala ki te tamaliki ke nātou ako te leleiʼia ʼo te pilivilesio ʼaia. Ka lahi he ʼu kokelekasio ʼe nātou fakaʼaogaʼi he Fale ʼo Te Puleʼaga, ʼe ʼaoga tāfito ke ʼi ai he faifaitahi ki te fakahoko lelei ʼo te koga ʼaia ʼo tatatou tauhi, kae mole tonu pe ke fakahoko e he tokosiʼi.
4. Koteā ʼaē ʼe tonu ke fai, ke ʼiloʼi ai e te kokelekasio te ʼu faʼahiga gāue ʼe tonu ke fai moʼo fakamaʼa ʼo te Fale ʼo Te Puleʼaga?
4 ʼE tonu ke fakapiki he lisi ʼo te ʼu gāue ʼaē ʼe tonu ke fai ʼi te puha ʼaē ʼe tuku ai te ʼu meʼa gāue ki te fakamaʼa. ʼE tonu ke fakamahino e te lisi ʼaia te ʼu gāue ʼaē ʼe tonu ke fai ʼi te vāhaʼa fuli, ohage la ko te fakamaʼa ʼaki te masini ʼe ina homi te ʼotaʼota, te holo ʼo te ʼu matapā fakamālama, te tafi ʼo te efu, mo te huaʼi ʼo te ʼu tuka, mo holo ia lalo, pea mo fakamaʼa te ʼu sioʼata. Ko ʼihi gāue ʼe mole leva maʼua ke fai tuʼumaʼu ohage ko te fakagigila ʼo te ʼu puha papa, pea mo te fakamaʼa katoa ʼo te ʼu hekaʼaga, mo te ʼu lito, pea mo te meʼa hila. ʼE tonu ke tuku te ʼu meʼa gāue chimiques ʼi he faʼahi ʼe mole kaku kiai te tamaliki, pea ʼe tonu ke tohi fakalelei tonatou ʼaoga. ʼE tonu ke ʼi ai mo he fakamahino fakanounou peʼe feafeaʼi te fakaʼaogaʼi ʼo te ʼu meʼa ʼaia ki te fakamaʼa.
5. He koʼe ʼe maʼuhiga ke tou tokaga naʼa hoko he tuʼutāmaki, pea koteā te ʼu meʼa ʼe tonu ke vakaʼi tuʼumaʼu? (Vakaʼi te talanoa ʼi te pasina 4.)
5 ʼE maʼuhiga ʼaupito ke tou tokaga naʼa hoko he tuʼutāmaki ʼi te Fale ʼo Te Puleʼaga. (Teu. 22:8) ʼO ʼuhiga mo te faʼahi ʼaia, ʼe fakahāhā mai e te talanoa ʼaē ʼe tuʼu ʼi te pasina 4 ia te ʼu meʼa ʼe tonu ke vakavakaʼi tuʼumaʼu ke ʼaua naʼa hoko he ʼu tuʼutāmaki.
6. ʼE fakaʼaluʼalu feafeaʼi te taupau fakalelei ʼo te Fale ʼo Te Puleʼaga?
6 Ko Te Taupau ʼo Te Fale ʼo Te Puleʼaga: ʼE ko te maʼua ʼa te kolesi ʼa te kau tagata ʼāfea te vakavakaʼi ia te ʼu gāue moʼo taupau ʼo te Fale ʼo Te Puleʼaga. ʼI te agamāhani, ʼe hinoʼi he tagata ʼāfea peʼe ko he tagata faifekau faka minisitelio ke ina vakavakaʼi te gāue. ʼE ina fakatuʼutuʼu te gāue ʼaē ʼe tonu ke fai ʼi te ʼaho fuli ʼi te Fale ʼo Te Puleʼaga, ʼo tokaga ke maʼa te fale peʼe kua gaohi te ʼu meʼa ʼaē kua maumau, pea ke ʼi ai tuʼumaʼu te ʼu meʼa ʼaē ʼe ʼaoga ki te taupau fakalelei ʼo te fale. ʼE maʼuhiga ke ʼaua naʼa ʼi ai he ʼu meʼa fakatupu tuʼutāmaki ʼi te fale fono peʼe ʼi te malaʼe. Ka fakaʼaogaʼi te fale fono e he ʼu kokelekasio e lua peʼe laka atu, ʼe hinoʼi e te ʼu kolesi ʼa te kau tagata ʼāfea he komite gāue ke ina fai he ʼu fakatuʼutuʼu moʼo taupau te fale pea mo te lotoʼā. ʼE gāue te komite ʼaia ʼo fakalogo ki te takitaki ʼa te ʼu kolesi ʼa te kau tagata ʼāfea.
7. (a) Koteā te puleʼaki ʼe fai ʼi te taʼu fuli ke ʼiloʼi papau ai kua gaohi ke lelei te Fale ʼo Te Puleʼaga? (b) Koteā te ʼu meʼa ʼe fakamaʼua ke vakaʼi tuʼumaʼu? (Vakaʼi te talanoa ʼi te pasina 5.)
7 ʼI te taʼu fuli, ʼe tonu ke vakavakaʼi fakalelei te ʼu potu fuli ʼo te Fale ʼo Te Puleʼaga. ʼE ko te maʼua ʼa te kau tagata ʼāfea ke nātou fai he ʼu fakatuʼutuʼu ki te gaohi katoa ʼo he meʼa ʼe tonu ke fai he puleʼaki kiai. ʼE feala ke fakaafe te kau fai faka mafola ke nātou tokoni ki te gaohi ʼo te ʼu meʼa ʼaē kua maumau peʼe mole kei haʼele. ʼE tonu ke tou tokaga fuli ki te ʼu kiʼi faʼahiga meʼa pe ʼe tou sio kiai pea mo foimo gaohi ke lelei.
8. Ko te temi fea ʼaē ʼe tonu ai ke fai he felogoi ki te Komite Laga Fale Fakakolo ʼo ʼuhiga mo te gaohi ʼo te fale?
8 Kapau ʼe ʼaoga ki te kau tagata ʼāfea ia he tokoni ʼo ʼuhiga mo te ʼu meʼa ʼe tonu ke gaohi ʼi te Fale ʼo Te Puleʼaga, ʼe feala ke nātou felogoi mo te Komite Laga Fale Fakakolo. ʼI te ʼu meʼa ʼaē ʼe tonu ke gaohi, ʼe lagi kau ai te gāueʼi ʼo te fāliki, mo te mono ʼo te ʼu makafaʼafaʼa ʼo te fale pea mo he ʼu puleʼaki ʼo ʼuhiga mo he ʼu faʼahi ʼe limulimua ʼi te fale.
9. Koteā te fakatuʼutuʼu ke mulimuli kiai mo kapau ʼe tonu ke totogi he tagata gāue?
9 Te Fakaʼaogaʼi Fakapotopoto ʼo Te Falā ʼo Te Kokelekasio: ʼE lahi te ʼu gāue ʼi te Fale ʼo Te Puleʼaga ʼe fakahoko e he kau gāue lotolelei. Ko tanatou faiga ʼaia ʼaki he loto faka sakilifisio ʼe ko he fakahā ʼaia ʼo tonatou ʼofa pea ʼe mole lahi he falā ʼe fakaʼaogaʼi moʼo totogi ʼo he kau gāue. Kae kapau leva ʼe tonu ke totogi he tahi ki he faʼahiga gāue, ohage ko te fana ʼo te kiʼi manu liliki, ʼe kumi e te kau tagata ʼāfea he tahi ʼe totogi lelei ki te taʼi gāue ʼaia. ʼE nātou fai te faʼahi ʼaia ʼo nātou ʼuluaki teuteuʼi muʼa he pepa ʼe tohi ai te ʼu gāue kehekehe ʼe nātou fakaʼamu ke fai, pea mo te ʼu meʼa gāue ʼe ʼaoga maʼa te ʼu gāue ʼaia. Ko he tahi ʼu pepa feiā neʼe hiki kehe, ʼe ʼave anai ki te hahaʼi ʼaē ʼe nātou lava fai te gāue ʼaia ke nātou fai mai he ʼu pepa moʼo fakafuafua te totogi ʼo te ʼu gāue ʼaia. ʼI tanatou ʼosi maʼu te ʼu pepa moʼo fakafuafua te totogi ʼo te ʼu meʼa ke fai mai he kau gāue kehekehe, pea ʼe lava filifili leva e te kau tagata ʼāfea peʼe ko ai anai ka nātou totogi moʼo fakahoko te ʼu gāue. ʼE tonu ke muliʼi te fakatuʼutuʼu ʼaia māʼiape la mokā ko he tēhina ʼe ina fakafuafua ʼe ina lava fai te gāue ʼaia ʼo totogi lelei age.
10. Koteā te puleʼaki ke fakaʼaogaʼi fakalelei te falā ʼo te kokelekasio?
10 ʼE toe fai pe foki e te kau tagata ʼāfea he fakatuʼutuʼu ke nātou maʼu te pepa ʼaē ʼe ina fakagafua ke mole totogi te ʼu tukuhau ʼo ʼuhiga mo te kele ʼaē ʼe tuʼu ai te fale, mo kapau ko he faʼahi ʼe fealagia. Ka fakaʼaogaʼi te Fale ʼo Te Puleʼaga e he ʼu kokelekasio, ko te komite gāue ʼe ina tuku keheʼi he falā ki te fale paʼaga, pea ʼe ina tohi ʼi te māhina fuli te ʼu meʼa ʼaē neʼe totogi ʼo fakahā ki te ʼu kolesi ʼa te kau tagata ʼāfea ʼo te ʼu kokelekasio takitahi, ke ʼiloʼi ai e te kau tagata ʼāfea peʼe koteā ʼaē ʼe tonu ke totogi. ʼE ko te maʼua ʼa te kau tagata ʼāfea ke nātou tokakaga ke fakaʼaogaʼi lelei te falā ʼo te kokelekasio.
11. Koteā ʼaē ʼe tonu ke fai mo kapau ʼe lahi te ʼu gāue moʼo taupau te fale peʼe ko tona fakafoʼou?
11 Ko Te ʼu Gāue Lalahi Pea Mo Te Fakafoʼou: Ka tokagaʼi e te komite gāue ʼe tonu ke fai he gāue lahi ki te Fale ʼo Te Puleʼaga moʼo taupau ke lelei, ʼe ina fakahā te gāue ʼaia ki te ʼu kolesi ʼa te kau tagata ʼāfea ke nātou fai he tonu. Kapau ʼe fakafuafua ʼe maʼua ke gaohi peʼe fakafoʼou te fale peʼe maʼua ke tokoni mai te tahi ʼu kokelekasio ʼaē ʼe fakatahi ʼi te Fale ʼo Te Puleʼaga ʼaia, pea ʼe tonu ke felogoi te kau tagata ʼāfea mo te Komite Laga Fale Fakakolo. ʼE fai anai e te ʼu tēhina ʼaia kua faiva pea mo māhani ki te gāue ia he ʼu tokoni ʼaoga pea mo he faʼahiga fakaʼaluʼalu ʼo te gāue ʼe tonu ke fai. Kapau ʼe lahi te totogi ʼo te gāue ka fai, pea ʼe tonu anai ke tohi he fakafuafua totonu ʼo te totogi ʼaia pea ke fakaʼui ki te kokelekasio ke fai he tonu kiai.—Vakaʼi ʼi Te Minisitelio ʼo Te Puleʼaga, ʼo Fepualio 1994 Ko Te ʼu Tali Ki ʼAkotou ʼu Fehuʼi.
12. ʼE tou lava fakahā feafeaʼi ʼe tou leleiʼia tatatou pilivilesio ʼaē ke tou kau ki te ʼu fono ʼi te Fale ʼo Te Puleʼaga?
12 ʼE maʼuhiga kia tatou te pilivilesio ʼaē ke tou fakatahi fuli ʼi te Fale ʼo Te Puleʼaga! ʼE mole tou loto anai ʼi he temi ke tou tōtō ʼi tatatou ʼu fono peʼe ke tou meʼa noaʼi. ʼE tou lava kau fuli ki te taupau ʼo tatatou Fale ʼo Te Puleʼaga. ʼE faka kolōliaʼi ai te tauhi maʼa pea mo faka maʼuhigaʼi te huafa ʼo Sehova. Tou fakatotonu ke tou taupau fakalelei tatatou fale fono.
[Talanoa ʼo te pasina 4]
Te Lisi ʼo Te ʼu Meʼa ʼe Tonu Ke Vakavakaʼi Fakalelei
◻ ʼE tonu ke maʼu gafua te ʼu meʼa tamate afi pea ʼi te taʼu fuli ke vakaʼi peʼe haʼele.
◻ ʼE tonu ke vakavakaʼi tuʼumaʼu peʼe pipiki maʼu te ʼu hekaʼaga.
◻ ʼE tonu ke fakaʼiloga lelei te ʼu hūʼaga pea mo te ʼu tuʼuga, ke mālama lelei, pea ke faigafua te feʼoloʼaki ʼi ai, pea ʼe tonu ke ʼi ai he ʼā puipui ʼo te tuʼuga.
◻ ʼE tonu ke maʼa te koga fale tānakiʼaga meʼa pea mo te ʼu fale mamaʼo, pea mo tokalelei, pea ke ʼaua naʼa ʼi ai he ʼu meʼa ʼe hoko vela, mo he ʼu meʼa ʼa niʼihi pea mo he ʼu ʼotaʼota.
◻ ʼE tonu ke vakavakaʼi te ʼato pea mo te fakatalitaliʼaga vai, pea mo fakamaʼa tuʼumaʼu.
◻ Ko te ʼu vaʼe ala pea mo te ʼu taulaga motokā ʼe tonu ke mālama lelei pea ke ʼaua naʼa fakahekeheke.
◻ ʼE tonu ke vakavakaʼi fakalelei te ʼu meʼa hila pea mo te ʼu meʼa fakamokomoko pea mo sivi peʼe haʼele lelei.
◻ ʼE tonu ke foimo gaohi he tuio ʼe mama naʼa fakatupu ai he limulimua.
◻ ʼE tonu ke lokaʼi te fale mo kapau ʼe mole ʼi ai he tahi ʼi loto.
[Talanoa ʼo te pasina 5]
Ko Te Tokaga Fakalelei Ki Te Fale Pea Mo Tona Fakamaʼa
◻ Ia tuʼa: ʼE maʼa koa te ʼato, mo te ʼu vaʼe ala, pea e feafeaʼi te pena, mo te ʼu matapā fakamālama, pea mo te pano ʼaē ʼe tohi ai te higoa ʼo te Fale ʼo Te Puleʼaga?
◻ Ia lalo: ʼE maʼa lelei koa ia lalo? ʼE lelei koa te ʼu faʼahi ʼaē ʼe tou haʼele ai, mo te ʼā pea mo te taulaga motokā?
◻ Ia loto: ʼE maʼa koa te fāliki ʼo lalo, mo te ʼu lito, mo te ʼu hekaʼaga, pea mo te pepa fakamatalelei ʼaē ʼe fakapiki ki te ʼu kaupā, pea mo te ʼu puha tohi?
◻ Ia te ʼu meʼa teuteu ʼo te fale: ʼE mū lelei koa te ʼu hila, pea ʼe haʼele lelei koa te fakatagi, pea mo te ʼu meʼa fakamokomoko?
◻ Te ʼu fale vao: ʼE maʼa koa te ʼu fale pea mo haʼele lelei?
◻ Te ʼu pepa ʼo te kokelekasio: ʼE tokalelei koa te ʼu pepa ʼo ʼuhiga mo te lao pea mo totonu tona tohi?