Ke Tou Maliu Kia Sehova Ia Meʼa Fuli ʼe Tou Fakatuʼutuʼu Ke Fai

¹ ʼE ʼaoga ke ia tatou te tapuakina ʼa Sehova ia meʼa fuli ʼe tou fakatuʼutuʼu ke tou fai. ʼE ko he agapoto tatatou manatuʼi te talanoa ia Pesalemo 127:1: “Kapau ʼe mole faʼu totonu e Sehova te fale, ʼe noa te gāue kinakina ʼa te kau faʼu fale. Kapau ʼe mole taupau totonu e Sehova te kolo, ʼe noa te leʼoleʼo ʼo te kolo.” Koia, ʼe tonu ai ke tou ʼiloʼi papau ʼe tou tokagaʼi totatou Tupuʼaga ia meʼa fuli ʼe tou fai.

² ʼE sioʼi tatou: Ia ʼaho nei, ko te ʼu faʼu fale fakavilivili ʼo te ʼu Fale ʼo te Puleʼaga ʼaē ʼe faʼu e te kau Fakamoʼoni ʼa Sehova ʼe fakapuna’maʼuli kia nātou ʼaē ʼe nātou ʼiloʼi te ʼu faʼahiga fakatuʼutuʼu faʼu fale. Ohage la, ʼi Falani, neʼe talanoa te sulunale ki te fakatuʼu ʼo te Fale ʼo te Puleʼaga ʼi Chalon-sur-Saône ohage “ko he toe hahaʼi e tahi ʼiloʼi pe tana gāue ka ina fai”. ʼO ʼuhiga mo te fakatuʼu ʼo te Fale ʼo te Puleʼaga ʼi Millau, neʼe tohi fēnei e te sulunale Midi-Pyrénées: “ ʼI tanatou kua māhani neʼe heʼeki tuʼutāmaki tanatou gāue ko te vaevae totonu ʼaē ʼo te ʼu faʼahiga gāue pea mo tona fefakahoahoa ʼaki lelei, neʼe mole puli te gāue pea mo te temi.”

³ ʼI Amelika, neʼe ʼui fēnei e te sulunale: “Neʼe mole heʼeki tou sio ki he tuʼuga piliki pea mo te ʼu pou kua fakaliliu ko he fale ʼo aʼu ki tatatou sio ki te kau Fakamoʼoni ʼa Sehova ʼi tanatou gāueʼi te hamale. ʼI ʼo mātou muʼa, ko te kau Fakamoʼoni neʼe nātou fakaliliu he tale sima ko he fale mo tona ʼu kaupā neʼe teuteuʼi lelei, mo tona ʼu senipa pea mo tona ʼato ʼi he kiʼi temi nounou.”

⁴ Tuʼumaʼu aipe ʼi Amelika, ʼaē neʼe fakatatau ai he fakatuʼu fale feiā ki he faleoko, neʼe tala fēnei e te tagata fai sulunale: “Ko te fakatuʼu koa ʼo te faleoko? ʼE mahalo, kae neʼe tatau mo te foʼi pulu neʼe ʼalu ki te lagi, pea mo te gāue fakapotopoto ʼa te hahaʼi mekanisia e 500 ʼi he koga meʼa lele motokā ʼi Indianapolis.”

⁵ ʼE ko he meʼa lelei tatatou sio ki te tokolahi ʼe nātou foaki ia nātou moʼo lagolago ki te fakatuʼu ʼo te ʼu Fale ʼo te Puleʼaga. Ko te fakavilivili moʼoni ʼaia ʼe lelei pea ʼe ʼalu tahi mo te talanoa ia Pesalemo 110:3: “Tau hahaʼi ʼe nātou foaki faʼitaliha anai nātou ki te gāue.” Ko he tagata taupau ʼo he kolo ʼo Falani neʼe ina ʼui fēnei: “ ʼE mātou fakatahi ko he foʼi famili ʼe gāue tahi ki te fakatuʼu ʼo he Fale ʼo te Puleʼaga.” Kae, koteʼuhi ʼe hoko atu nei te fakatuʼu ʼo te ʼu Fale ʼo te Puleʼaga, ʼe ʼaoga ki te gāue ʼaia ke ʼi ai he ʼu tagata faiva ʼi te gāue pea mo niʼihi ʼe mole poto gāue. Ko te manatu ʼaenī neʼe fakatuʼu matalalahi ʼi te sulunale: “Te mālohi ʼe hau mai te gāue fakatahi.”

⁶ Ko te kau ʼaē ki he fakatuʼu fale ʼe ko he meʼa ʼe mole feala ke galo! Neʼe fēnei te tohi ʼe he tēhina: “ ʼI te ʼosi ʼo te fakatuʼu fale, ko te meʼa ʼaē ʼe faigataʼa ko te mavete ʼi te ʼahotapu afiafi. Neʼe feiā pe te manatu neʼe ia mātou ʼi te ʼosi ʼaē ʼo he fakatahi. ʼI te ʼu ʼaho ʼaia e tolu, neʼe nātou mahino ki te maʼuli ʼi te Palatiso tamatou gāue fakatahi. Neʼe mātou leleiʼia te poto, te faiva pea mo te poto fakalaumālie ʼo te ʼu tēhina pea mo te ʼu tuagaʼane: neʼe hoko ia meʼa fuli ʼi te tokalelei pea mo te loto fiafia. ‘Mole he meʼa ʼe faigataʼaʼia’ ko te kupu ʼaia neʼe tautau logo ki ai mokā tou kole he faʼahiga meʼa. Ko te falala kia Sehova ʼe ina uga tatou. Kua tou ʼiloʼi ko te gāue ʼaē kia Sehova ʼe mole ʼi ai he meʼa ʼe faigataʼa.” ʼI te ʼosi gāue ʼi te fakatuʼu ʼo te Fale ʼo te Puleʼaga, neʼe tohi ʼe he tahi: “ ʼE ʼau ako nei te tohi ʼaē Logo tahi ʼi te tauhi. Ko te fakatuʼu fale ʼaenī ʼe ko he fakamoʼoni taulekaleka ʼo te faifaitahi ʼaē ʼe talanoa ki ai te tohi. ʼE mole fai he mahalohalo ia ki ai. Ko te gāue fakatahi ʼaē mo te ʼu tēhina, neʼe ʼau logoʼi ku ʼau ōvi kia nātou. ʼE hage kia ʼau kua ʼau kau ki te kautahi ʼaia. ʼE mole he maʼuli matamata lelei ʼi te maʼuli ʼaia. ʼI te ʼosi ʼo he gāue feiā, ʼe mole feala ke kita ʼui ʼe kita tokotahi. Ko te laumālie ʼo Sehova ʼe ʼi heni.”

⁷ ʼI Amelika, neʼe ʼiloʼi totonu e te sulunale: “Ko te fāiva ʼo te kau Fakamoʼoni ʼa Sehova ʼi te ‘fakatuʼu fale fakatavili’ ʼi tonatou ʼu faʼahi tauhi neʼe mole hoko pe ʼuhi he neʼe nātou fetokoniʼaki, kae ʼe toe kau ki ai tanatou agaʼi lotu.” Ko he tagata faiako ʼo te fale ako lalahi neʼe ʼalu ki te fakatuʼu ʼo te fale ʼe ōvi mai ki tona ʼapi neʼe ina fai te talanoa ʼaenī: “ ʼE ko he meʼa fakatalakitupua! ʼI taku aʼu atu, neʼe ʼau sio ki te ʼu pano minéralogiques ʼo te Nebraska katoa ʼo feiā foki ki ʼihi ʼatu ʼu koga meʼa. ʼE koutou ʼiloʼi, ʼe feala ke tou tahi lau ni ʼu meʼa ʼo ʼuhiga mo te lotu; kae ko he meʼa ʼe mole feala ke fakafihi: ʼe ia nātou te manatu faka kilisitiano moʼoni.” ʼI Niu-Kaletonia, logope tatatou mole fakaʼaogaʼi te faʼahiga fakatuʼu fale fakatavili, kae ko he ʼu fakavikiviki neʼe fai mai kia tatou lolotoga te ʼu fakatuʼu fale kua ʼosi.

⁸ Ko ʼihi hahaʼi ʼe feala ke uga nātou ke nātou lagolago ki te fakatuʼu fale. Neʼe ko te meʼa ʼaia neʼe fai ʼe he tagata fai gāue ʼi te fakatuʼu ʼo he Fale ʼo te Puleʼaga ʼi tona kolo. ʼI te ʼosi ʼo te fakatuʼu ʼo te fale, neʼe haʼu ia ʼi te ʼahotapu ʼi muʼa ʼo te fai ʼo te fono pea, neʼe ina fakahā age tona loto ʼaē ke liliu ia ko he vāhaʼa fale agalelei, neʼe ina foaki tona meʼa ʼofa ko he falā moʼo lagolago ʼo te fakatuʼu fale.

⁹ Faʼahiga pea mo te faʼahi ʼe fakatuʼu ai te ʼu Fale ʼo te Puleʼaga: Moʼo fakaʼaogaʼi fakapotopoto te ʼu meʼa ʼofa ʼaē neʼe foaki ki te ʼAtua, ʼe tonu ke fai he fakasiosio makehe ki te faʼahiga pea mo te faʼahi ʼe fakatuʼu ai te Fale ʼo te Puleʼaga. Ko te ʼu fale ʼe tonu ke ʼaua naʼa fai ke hā. Ko te tohi Notre ministère ʼi te pasina 61 ʼe ina fakatokagaʼi mai ko te “Fale ʼo te Puleʼaga, ʼaē ko te faʼahi ʼe tou tauhi ai, ʼe mole tonu ko he fale ʼe fakatuʼu moʼo fakahāhā ki ʼotatou ʼu vāhaʼa fale. (...) ʼE tonu ke fakaʼaogaʼi lelei (vakaʼi ia Gāue 17:24). ʼE tonu ko he faʼahi ʼe lelei ki te nofoʼi pea mo ʼaoga ki te ʼu fono faka kilisitiano, ko tona ikuʼaga tāfito ko te tokoniʼi ʼotatou ke tou tuputupu fakalaumālie pea mo lahi age hatatou ako ʼo ʼuhiga mo Sehova, ʼo feiā foki ki te fakaloto mālohiʼi ʼo tatou ke tou kau ki te gāue ʼo te Puleʼaga.” ʼE fakahā ʼaki mai ko he Fale ʼo te Puleʼaga ʼe ʼaoga tāfito ia ki te kau faka mafola mokā ʼe fakatuʼu ʼi he fahaʼi ʼe ōvi mai ki te koga meʼa ʼe nātou nonofo ai.

¹⁰ ʼE lelei ke ʼi ai he ʼu Fale ʼo te Puleʼaga e lua ʼe tuʼu ʼi he ʼu fahaʼi kehekehe ʼi he fale e lua ʼe pipiki tahi. Ko te ʼu fale ʼaia ʼe feala ke na fakatahiʼi mai ki ai he ʼu kokelekasio e lua peʼe lahi mo kapau neʼe fili lelei te koga meʼa ʼaē ʼe fakatuʼu ai. Kae, ʼi ʼihi fahaʼi, ko te ʼu Fale ʼo te Puleʼaga e lua ʼe fakatuʼu ʼi te koga meʼa e tahi. Ko te meʼa ʼaia neʼe ʼaoga ʼuhi ko te totogi kovi ʼo te kele ʼaē ʼi ʼihi koga meʼa ʼe lahi tona nofoʼi.

¹¹ ʼE tonu ke fakasiosio te ʼatu faʼahiga ʼaluʼaga kehekehe ʼi muʼa ʼo te fakatuʼu ʼo he fale e lua ʼe pipiki tahi: ʼE feafeaʼi tona vaha mo te ʼatu telituale ʼa te kokelekasio? ʼE faigafua koa te ʼalu ki ai? Ko te hahaʼi ʼaē ʼe nātou ako te Tohi-Tapu pea mo nātou kei foʼofoʼou ki te moʼoni ʼe feala anai ke nātou ʼolo ki te ʼu fono mokā ʼe tuʼu mamaʼo te Fale ʼo te Puleʼaga mo tonatou ʼapi? ʼE feala anai koa ke puli te fiafia ʼa te kau faka mafola, mo kapau ʼi he temi loaloaga ʼe nātou fakaʼaogaʼi tanatou falā pea mo tonatou temi ki te ʼalu ʼaē ki te Fale ʼo te Puleʼaga? Koteā te ikuʼaga ʼo he fale ʼe piki lua ki te hahaʼi ʼo te vāhaʼa fale? Kapau ʼe lahi he ʼu kokelekasio ʼe nātou fakaʼaogaʼi te Fale ʼo te Puleʼaga, ʼe lahi te feʼaluʼaki haʼele ʼi te ala. Ko te meʼa koa ʼaia ʼe mole faigataʼa anai ki te hahaʼi ʼo te vāhaʼa fale, tāfito ʼi te ʼu kolo ʼaē ʼe lahi tona nofoʼi? ʼE mata faigataʼa anai koa te feʼaluʼaki mo te tau ʼo ta kita motokā? Kapau ʼe fakatuʼutuʼu ʼe he ʼu kokelekasio ke nātou fakatuʼu he Fale ʼo te Puleʼaga ke lahi te ʼu kokelekasio ʼe nātou fakaʼaogaʼi, ʼe tonu ʼi muʼa ke nātou fakasiosio te ʼu faʼahi ʼaia ʼe maʼuhiga.

¹² Ko te meʼa ʼaē neʼe kua ʼosi fai: Ko te ʼu paʼaga ʼaē moʼo fakatuʼu ʼo te ʼu Fale ʼo te Puleʼaga ʼi Niu-Kaletonia neʼe faka paʼaga ʼe ʼihi filiale. Ko te fakatuʼu ʼo te Kesi ʼo te Sosiete ki te ʼu Fale ʼo te Puleʼaga ʼe ko he faka fealagia ʼi he temii ka haʼu te fakatuʼu ʼo he ʼu fale peʼe ko he fakafoʼou ʼo ni ʼu fale. ʼE hā mai ai te ʼofa faka kilisitiano! ʼE tokolahi te ʼu tēhina pea mo te ʼu tuagaʼane ʼe nātou foaki ia nātou ʼaki tonatou ʼofa moʼo tokoni ki te ʼu kokelekasio ke nātou fakatuʼu tonatou Fale ʼo te Puleʼaga (Filp. 2:4). Tokolahi ia nātou ʼaia ʼe nātou toe foaki foki tonatou temi ʼi te ʼu fakatahi faka tisitilike mo te ʼu fakatahi faka silikosikilipisio. Ko te Sosiete neʼe ina foaki ki ʼihi tēhina he ʼu faʼahiga gāue makehe, ohage la ko te komite felogoi tahi mo te lopitali pea mo te komite ʼo te Fale ʼo te ʼu fakatahi.

¹³ Ko nātou ʼaē ʼe kau ki te komite fakatuʼu fale ʼe tonu ke fai he fakamālo kia nātou ʼo ʼuhiga mo tonatou manavaʼofa pea mo tonatou fakavilivili ʼo tali ki te ʼu faʼahiga meʼa ʼe ʼaoga ki te fai ʼo te gāue ʼo te kautahi ʼa Sehova ʼaē ʼo ʼuhiga mo te fakatuʼu fale. Ko te ʼu kokelekasio ʼo Païta, Masanita pea mo Lasipata ʼe ʼi ai tanatou ʼu fakatuʼutuʼu ʼo ʼuhiga mo te fakatuʼu ʼo tonatou ʼu fale. Ko te kokelekasio ʼi Luganville ʼi te motu ʼo Santo ʼi Vanuatu ʼe ina fakatuʼutuʼu te fakafoʼou ʼo te Fale ʼo te Puleʼaga ʼi te fakaʼosi ʼo te taʼu ʼaenī. Ko te ʼu fakatuʼutuʼu ʼe fai nei ʼi Lifou, Male pea mo te potu Hihifo. Ko he gāue lahi kei toe ke fai ʼi te faʼahi ʼaē ʼo te ʼu fakatuʼu fale ʼi Niu-Kaletonia. Ka na neʼe mole kau te komite fakatuʼu fale, mo tana ʼu tokoni, mo tana ʼu fakatuʼutuʼu, ʼe mata faigataʼa anai ki te ʼu kokelekasio ʼaia ke nātou fakahoko fakaleleiʼi tanatou ʼu fakatuʼutuʼu ʼo ʼuhiga mo te fakatuʼu fale.

¹⁴ ʼE tonu ke lahi he hahaʼi moʼo gāue: Koteʼuhi kua lahi te ʼu kokelekasio, koia ʼe tonu ai ke lahi te ʼu Fale ʼo te Puleʼaga, ke toe lahi foki mo te falā pea mo te hahaʼi gāue. ʼI te taʼu gāue ʼaē kua ʼosi, ko te ʼu kokelekasio foʼou e 3 neʼe fakatuʼu ʼi Niu-Kaletonia. Koia, ʼe tonu ai ke lahi he ʼu Fale ʼo te Puleʼaga moʼo talifaki ʼo te ʼu kokelekasio foʼou ʼaia.

¹⁵ Logope ʼe tokolahi te ʼu tēhina pea mo te ʼu tuagaʼane ʼe hoholo atu tanatou lagolago te fakatuʼu ʼo te ʼu Fale ʼo te Puleʼaga, ʼo foaki tonatou temi pea mo gāue fakamālohi, ko he tokoni ʼaoga ʼe maʼuhiga ʼe tonu ke fai, ohage pe ko te ʼaoga ʼaē ʼo te hahaʼi ʼe tokolahi ki te gāueʼaga (Mat. 9:37, 38). Ko te komite fakatuʼu fale ʼe ina tala fēnei kapau ʼe tokolahi ia nātou ʼaē ʼe foaki tonatou temi ki te fakatuʼu ʼo te ʼu Fale ʼo te Puleʼaga, ko nātou ʼaē ʼe fakasiosio ki te fahaʼi ʼaia ʼe maʼamaʼa anai kia nātou tanatou gāue. — Is. 6:8; Kal. 6:2.

¹⁶ Ko te ʼu tēhina ʼaē ʼe nātou tohi ʼonatou higoa ki te gāue ʼaia ʼe tonu ke nātou fakatokaga lelei ʼo fai tanatou ʼu fakapapau ʼaia (Mat. 5:37; Kol. 3:23, 24). Ko nātou ʼaē ʼe takitaki ki te ʼu kaugā gāue kehekehe ʼe nātou faka felogoi ki te ʼu hahaʼi gāue moʼo fakahā kia nātou te ʼu ʼaho ʼaē neʼe kua fakatuʼutuʼu ki ai te gāue. Ko te polokalama ʼe fai ʼo fakatuʼutuʼu ki te ʼāteaina ʼo te hahaʼi gāue. Koia, ʼe maʼuhiga ai ke ʼolo ia nātou fuli neʼe tohi ki te gāue ʼaia ʼi te ʼu ʼaho ʼaē kua fakatuʼutuʼu ki ai. Ko te faʼahiga fai ʼaia ʼe faigafua ai leva ki te hahaʼi gāue ke nātou fakatahi mo tonatou famili pea mo tanatou kokelekasio ʼi te ʼosi ʼo tanatou gāue.

¹⁷ Ko te komite fakatuʼu fale ʼe tokaga ki te kau gāue katoa ʼi totatou telituale. Ko te ʼu tēhina ʼaē ʼe takitaki ʼe nātou fai anai he polokalama ke ʼaua naʼa taʼomia fau te ʼu tēhina ʼi te gāue.

¹⁸ Ko ai ʼaē ʼe fia gāue? ʼI te temi fuli pe ʼe tou fakatuʼutuʼu ke fakatuʼu he Fale ʼo te Puleʼaga, ko te kau gāue ʼaē ʼo te kokelekasio ʼaē ʼe nātou fakaʼaogaʼi anai te fale foʼou peʼe neʼe fakafoʼou, peʼe ko ni hahaʼi ʼe kau ki niʼihi kokelekasio ʼe ōvi mai ʼe tokoni ki te fakatuʼu ʼo te fale ʼaia tatau aipe peʼe mole nātou poto gāue. Ia nātou ʼaia, ʼe ʼi ai ʼihi ʼe poto gāue, ʼo nātou liliu ʼo faiva ʼi te gāue. ʼE feala leva ke nātou tali ki te pepa Fehuʼi ʼo ʼuhiga mo te ʼu hahaʼi gāue ki te fakatuʼu ʼo te ʼu Fale ʼo te Puleʼaga.

¹⁹ Ko te komite fakatuʼu fale ʼe ina fakaʼaogaʼi ʼi te māhina pea mo te māhina ia nātou ʼaē ʼe poto gāue ʼi te ʼu faʼahiga fakatuʼu fale pea mo nātou ʼaē ʼe ʼāteaina moʼo lagolago ki te ʼu fakatuʼu ʼo te ʼu Fale ʼo te Puleʼaga. ʼE tonu ke ʼiloa nātou ko ni hahaʼi ʼe lelei tonatou maʼuli ʼi te kokelekasio pea ke hinoʼi nātou e te kolesi ʼo te ʼu tagata ʼafea. Kapau ʼe koutou fai fuli te ʼu meʼa ʼaia, ʼe feala koa hakotou fakatuʼutuʼu ke koutou lagolago ki te faʼahi ʼaia ʼo te gāue kia Sehova (Neh. 4:6)? Kapau ʼe koutou ʼio ki ai, koutou toʼo he pepa ʼe tuʼu ai te ʼu Fehuʼi ʼo ʼuhiga mo te ʼu hahaʼi gāue ki te fakatuʼu ʼo te ʼu Fale ʼo te Puleʼaga ʼi te taupau pelesita peʼe ko te sikalaipe ʼo tokotou kokelekasio pea koutou tohi fakavilivili ke katoa.

²⁰ Pea, ko ʼihi tēhina fakapotopoto fakalaumālie, ko te ʼu tagata ʼafea peʼe ko te ʼu faifekau faka minisitelio, ʼe feala tanatou fai te gāue fakasiosio ʼaia. Logope peʼe mole nātou faʼa faiva ʼi te fakatuʼu fale, ʼe feala pe hanatou tohi he pepa fehuʼi. Ia nātou ʼaia, tokolahi ʼe gāue ʼi te ʼu selevisi ʼe pipiki ki ai. Ko ʼihi ʼe akoʼi nātou ke feala he fakaʼaogaʼi ʼonatou ki muli mai. Ko te ʼu tagata ʼāfea pea mo te ʼu faifekau faka minisitelio ʼe fakaloto malohiʼi nātou ke nātou fakasiosio fakamalotoloto peʼe feala tanatou ʼolo ki he fahaʼi ʼo kau ki te gāue ʼaia ʼe ina fakavikiviki totatou Tāmai, ia Sehova. — Vakaʼi 1 Samuele 3:8; Mateo 4:20.

²¹ ʼE feala ke tou kau fuli ki te gāue: Ko tatou fuli ʼe feala hatatou fakahā he fakakaukau lelei ʼo ʼuhiga mo te gāue tāfito ʼaia ʼo tou gāue ʼi te kokelekasio mokā ʼe ʼolo niʼihi kau faka mafola ʼi te fakaʼosi vāhaʼa ki te fakatuʼu ʼo te Fale ʼo te Puleʼaga. ʼE moʼoni, ʼe mole tou loto fia fakaloto vaivai anai te hahaʼi ʼaē ʼe fai gāue, ke nātou meʼa noaʼi te gāue ʼaē ʼe nātou fai ʼaki tonatou ʼofa ʼi te fakatuʼu ʼo te ʼu Fale ʼo te Puleʼaga ke nātou ʼui ai ʼe mole kau te faʼahi ʼaia ki te ʼu meʼa taputapu (Taag. 24:10; Hep. 6:10). ʼE moʼoni, ʼe tonu ke tou maʼu he fakasiosio poto. Koia ʼaē neʼe fai ai te fakatuʼutuʼu e te komite fakatuʼu fale te polokalama ʼo ʼuhiga mo te fahaʼi ʼaia ke ʼaua naʼa lahi fau te mavae ʼa te kau gāue ʼi tonatou kokelekasio.

²² Tatau aipe peʼe mole feala ke tou kau ki te gāue ʼo te fakatuʼu fale, ʼe feala pe he foaki ʼo hatatou tokoni ki te fahaʼi ʼaia, ʼaē ko te tauhi kia Sehova “ ʼaki ʼotatou ʼu koloā”. (Taag. 3:9.) Ke tou ʼiloʼi papau ko Sehova ʼe fiafia lahi ki te ʼofa ʼe tou fakahā mokā ʼe tou tokoni paʼaga ki te fakatuʼu ʼo he ʼu Fale ʼo te Puleʼaga. Ko te ʼu meʼa ʼofa neʼe fai ki te Kesi ʼo te Sosiete ki te ʼu Fale ʼo te Puleʼaga ʼe ko he meʼa ʼe lelei, pea ʼuhi ko te lahi ʼaē ʼo te ʼu kokelekasio kua fakatuʼu, ʼe tonu ke hoko atu te fakatuʼu pea mo fakafoʼou ʼo he ʼu fale (Gāue 20:35; 2 Ko. 9:6, 7). ʼI te ʼuluaki sēkulō, ka ʼaoga te paʼaga ki he fahaʼi, neʼe fai pe e te ʼapositolo ko Paulo te tokoni ʼaenī ki te kau Kolonito: “Ohage pe ko takotou lahi ʼi te meʼa fuli, ʼi te tui, ʼi te lea, ʼi te mālama, ʼi te fakavilivili katoa pea ʼi te ʼofa ʼaia kia koutou ʼaē ʼe mātou maʼu, ʼofa pe foki ke koutou toe lahi ʼi te gāue ʼaē ko te foaki ʼaki he lotolelei!” — 2 Ko. 8:7.

²³ Te ʼu manuʼia lahi: Ko te ʼu kokelekasio ʼaē ʼe fakatuʼu peʼe fakafoʼou te ʼu Fale ʼo te Puleʼaga ʼe nātou maʼu he ʼu manuʼia ʼi tanatou kole he tokoni ki te komite fakatuʼu fale, heʼe ko ia ʼaia ʼe ina maʼu mai te ʼu fakatuʼutuʼu mai te Sosiete. Ko te ʼu tagata ʼāfea ʼe nātou aga fakapotopoto anai mokā ʼe nātou faka felogoi muʼa ki te komite fakatuʼu fale ʼi muʼa ʼo te totogi ʼo he kele, ʼo feiā mo te temi ka nātou gāue fakatahi mo te ʼu tēhina faiva ʼaia ʼi te ʼu faʼahi fuli ʼo te fakatuʼu fale. — Taag. 15:22.

²⁴ ʼE moʼoni, ko Sehova ʼe ko he tokoni lahi ʼo ʼuhiga mo te fakatuʼu ʼo te ʼu fale moʼo tauhi ʼo fakavikiviki kia te ia. Ko te ʼu tēhina pea mo te ʼu tuagaʼane ʼe nātou faiga ʼo fakahā tonatou ʼofa moʼoni, tāfito te ʼofa ʼaē, neʼe fakahā mai e Sesu, ʼe ʼiloʼi lelei ai tana ʼu tisipulo moʼoni (Soane 13:34, 35). ʼE nātou aga ohage ko Sesu ʼaē neʼe tokaga muʼa ia kia meʼa ʼe ʼaoga ki te hahaʼi. Ko te fakavilivili pea mo te poto ʼa te ʼu kaugana ʼa Sehova ʼe fakaʼaogaʼi lelei anai ʼo lahi age ʼi te mālama foʼou ʼa te ʼAtua.

²⁵ Io, ko nātou ʼaē ʼe kau ki te fakatuʼu ʼo te ʼu fale ki te tauhi ʼaē kia Sehova ʼe nātou fakamoʼoni ki te ʼu palalau ia Pesalemo 127:1. ʼE moʼoni, ko te ʼu kau gāue faiva ʼe nātou foaki tonatou temi pea mo tonatou mālohi moʼo fakatuʼu ʼo te ʼu Fale matalelei ʼo te Puleʼaga, kae ko te tapuaki tokotahi ʼa Sehova ʼaē ʼe ina faka fealagia ke haʼele lelei te gāue ʼaia. Ia ʼaho nei, ʼe lahi te ʼu Fale ʼo te Puleʼaga ʼe ʼaoga lelei. Ke hoholo atu tatatou foaki fuli totatou temi pea mo “mo ʼatatou ʼu koloā”, ʼo tou maliu kia Sehova ke ina tapuakiʼi ʼatatou ʼu faiga! — Taag. 3:9.