Te Laga ʼo Te ʼu Fale ʼo Te Puleʼaga—Ko He Faʼahi Maʼuhiga ʼo Te Tauhi Taputapu
1. Koteā ʼaē kua ʼosi fai e te gāue laga Fale ʼo te Puleʼaga, kae koteā ʼaē ʼe kei tonu ke fai?
1 ʼI te ʼu taʼu e nima ʼaenī kua hili, ʼi tatatou telituale neʼe laga te ʼu Fale ʼo te Puleʼaga e 4, neʼe fai te ʼu fetogi ʼi te ʼu fale e 2, pea neʼe toe fakafoʼou ke lelei te ʼu fale e 4. Neʼe lahi te ʼu gāue ʼaē neʼe fai ʼaki te takitaki ʼa te Komite Laga Fale Fakakolo. ʼE tou loto fakafetaʼi moʼoni ʼo ʼuhiga mo te gāue kinakina ʼo te Komite Laga Fale Fakakolo pea mo te ʼu Komite Laga Fale ʼi Te ʼu Kokelekasio, ʼo feiā mo nātou fuli ʼaē neʼe tokoni kiā nātou. Logola kua fai te ʼu tuʼuga gāue, kae ʼe kei toe lahi te ʼu gāue ʼaē ʼe tonu ke fai moʼo laga ʼo te ʼu Fale ʼo te Puleʼaga. ʼE lava feafeaʼi kiā tatou fuli ke tou lagolago ki te faʼahi maʼuhiga ʼaia ʼo tatatou tauhi taputapu ʼaē kiā Sehova?—Apk. 7:15.
2. ʼE tou lava tokoni feafeaʼi ki te laga ʼo te ʼu Fale ʼo te Puleʼaga?
2 Tou Fia Tokoni: Kapau kua koutou papitema, ʼe mātou fakaafe atu koutou ke koutou fakatuʼutuʼu hokotou temi faigamālie moʼo gāue mo te Komite Laga Fale Fakakolo, ʼo koutou tohi te pepa Construction des Salles du Royaume — Questionnaire pour les volontaires. (Pes. 110:3) Ko nātou fuli ʼaē ʼe nātou tohi te pepa ʼaia ʼe tonu ke nātou tali lelei ia te ʼu gāue pea mo nātou fia fetokoniʼaki. (Pes. 133:1) Tatau aipe peʼe mole koutou popoto ʼi te laga fale, kae ʼe feala pe ke koutou tokoni lahi ki tona fakaʼosi. ʼE toe feala foki ke akoako ai ke koutou popoto ʼi he faʼahiga gāue, ke feala he toe fakaʼaoga lahi ʼo tokotou faiva ʼaia ʼi he tahi temi.
3. Koteā te tahi faʼahi ʼe feala ke tou fakahā ai tatatou lagolago ki te laga ʼo he Fale ʼo te Puleʼaga?
3 Kapau ʼe mole maʼu hakotou temi ki te ʼu gāue ʼaia, ʼe feala hakotou fakaloto mālohiʼi ia nātou ʼaē ʼe lava kau ki te gāue ʼaia. ʼE feala ʼi te kokelekasio, ke koutou fakahoko ia te ʼu maʼua gāue ʼa nātou ʼaē ʼe maʼumaʼua ʼi te ʼu gāue laga fale ʼo te ʼu Fale ʼo te Puleʼaga. ʼAki he ʼu fakatuʼutuʼu neʼe fai fakatomuʼa, ʼe feala ki te ʼu tagata ʼāfea ke nātou tōkakaga ke fakahoko fuli te ʼu gāue ʼi te kokelekasio, mokā gāue ʼihi ʼi te laga ʼo he Fale ʼo te Puleʼaga. ʼE mahino papau ia, ʼe fiafia ia Sehova mokā tou gāue fakatahi ʼi te logo tahi, moʼo fakahaʼele ki muʼa ia te ʼu gāue ʼa te Puleʼaga.—Hep. 13:16.
4. ʼE tou lava fakaloto mālohiʼi feafeaʼi ia nātou ʼaē ʼe nātou kau ki te laga ʼo te ʼu Fale ʼo te Puleʼaga?
4 Tou Fakaloto Mālohi: Ko te laga ʼo he ʼu fale tauhi ʼe ko he gāue kinakina pea ʼe lahi te temi ʼaē ʼe fakaʼaogaʼi kiai. Koia ʼe mahino ia, ko nātou ʼaē neʼe fakaafe ke nātou tokoni ki te laga ʼo he fale, ʼi ʼihi temi ʼe nātou nonofo mamaʼo anai ʼi tanatou kokelekasio. Tou fakamālo pea mo fakaloto mālohi te kau gāue laga fale, ʼaē ʼe nātou maʼuli faka sākilifisio moʼo fai ia te “gāue maʼuhiga” ʼaia.—Gaue 6:3, MN; Loma 14:19.
5. ʼE fakahā feafeaʼi e te kau gāue laga fale tanatou fakapotopoto?
5 Tou Fakapotopoto: Ko te faka mafola ʼo te Puleʼaga ʼa te ʼAtua ʼe ko te gāue tāfito ʼaia ʼi tatatou tauhi. (Mko. 13:10) ʼE manatuʼi e te ʼu Komite Laga Fale Fakakolo te faʼahi ʼaia, koia ʼe nātou faiga ai ke nātou fai he ʼu fakatuʼutuʼu ke mole mavae te kau gāue ʼi tanatou kokelekasio kae mole hona ʼaoga. Pea ʼe faiga e te kau gāue laga fale ke nātou fakapotopoto mokā nātou fai tonatou ʼu tuʼuga maʼua. ʼE nātou vakavakaʼi fakalelei ke fakahoko e he tahi kehe tonatou maʼua ʼi te kokelekasio mo kapau ʼe tonu ke nātou ʼolo ki te gāue laga fale.
6. Koteā ʼaē ʼe hoko mokā gāue fakatahi ia te kokelekasio kātoa moʼo fakahaʼele ki muʼa te tauhi moʼoni?
6 Neʼe ʼui e te ʼapositolo ko Paulo ʼo ʼuhiga mo nātou ʼaē ʼe kau ki te kokelekasio, ʼe nātou gāue fakatahi ʼi te logo tahi “ki tona tuputupu mo tana lagai ake iaʼia i te ofa.” (Ef. 4:16) Ko totatou ʼofa kiā Sehova pea mo te tauhi moʼoni, ʼe ina uga tatou ke tou gāue fakatahi moʼo lagolago ki te fai faka mafola pea mo tokoni ki te laga ʼo te ʼu Fale ʼo te Puleʼaga.