Ko Te Kau Taupau Feʼaluʼaki—ʼE Ko Te ʼu Kaugā Gāue ʼi Te Moʼoni

ʼI te kokelekasio faka Kilisitiano ʼo te ʼuluaki sēkulō, neʼe ʼi ai te ʼu taupau feʼaluʼaki neʼe nātou ʼaʼahi te ʼu kokelekasio moʼo fakaloto mālohiʼi ʼo nātou. Neʼe nātou foaki tonatou temi, ʼo mole nātou faiga ke totogi ia nātou, kae neʼe nātou tokoni kia nātou fuli ʼaē ʼi te kokelekasio ke nātou haga haʼele fakapotopoto ia muʼa ʼo te ʼAtua.—Gāue 11:23, 24; 14:21, 22; 15:32; 20:2, 31-35; Filipe 2:20-22, 29; 1 Tesalonika 2:5-12.

Ia ʼaho nei ko te ʼu kokelekasio ʼo te kau Fakamoʼoni ʼa Sehova ʼe nātou maʼu foki te ʼu tapuakina mai te ʼu ʼaʼahi ʼa te kau taupau feʼaluʼaki. Ko te ʼu tagata ʼaia kua lahi te ʼu taʼu kua nātou māhani ai ʼi te gāue fai faka mafola ʼa te kau Fakamoʼoni ʼa Sehova, ʼo feiā aipe mo tanatou gāue ʼaē ko te kau tagata taupau. Kua nātou mavae mai ʼanatou ʼu gāue fakamālama pea mo tonatou ʼu maʼua faka famili, ke feala ai hanatou foaki tonatou temi ki te fagonogono ʼi te temi katoa ʼi te minisitelio. Kia nātou ʼaē kua ʼohoana, ʼi te agamāhani ʼe kau foki mo tonatou ʼu ʼohoana ki te fagonogono ʼi te temi katoa ʼi te minisitelio.

Ko he tagata taupau faka silikosikilipisio ʼe hinoʼi ki he silikosikilipisio ke tokaga ki he ʼu kokelekasio e 18 ki te 25. ʼE ina ʼaʼahi te ʼu kokelekasio takitahi ʼo tuʼa lua ʼi te taʼu pea ʼi te hili ʼo te ʼu taʼu e lua peʼe tolu, ʼe hinoʼi ia ki he tahi silikosikilipisio. ʼI te faʼahi ʼaia ʼe feala ai ke maʼu e te ʼu kokelekasio he fua lelei ʼi te poto pea mo te ʼu fealagia ʼo te kau taupau faka silikosikilipisio kehekehe.

Ko te taupau faka silikosikilipisio ʼe tokaga ki te tuputupu fakalaumālie ʼo te kokelekasio pea mo tana gāue. ʼE lahi te ʼu akonaki ʼe ina fai ki te kokelekasio pea ʼe fakatahitahi foki ia mo te ʼu tagata ʼāfea pea mo te ʼu tagata faifekau faka minisitelio ke feala ai hanatou vakavakaʼi peʼe feafeaʼi te faigaʼi ke toe lelei age tanatou gāue ʼi te kokelekasio.

ʼI te lolotoga ʼo te vāhaʼa ko ia pea mo tona ʼohoana, mokā kua ʼohoana, ʼe nā kaugā gāue mo te kau Fakamoʼoni ʼo te kokelekasio, ʼo nā tokoni kia nātou ke nātou laka ki muʼa ʼi tonatou minisitelio fai faka mafola ʼi te ʼu ʼapi. Ko ia pea mo tona ʼohoana ʼe nā ʼaʼahi anai te hahaʼi ʼaē neʼe hoki fia logo ki te moʼoni moʼo fakaloto mālohiʼi ʼo tanatou tui. ʼE feala ke koutou kole ke nā ʼaʼahi koutou.

Ko te taupau faka tisitilike ʼe ina maʼu te ʼu kalitate fakalaumālie pea mo te māhani ʼe tatau mo te tagata taupau faka silikosikilipisio. ʼE feʼaluʼaki ia ʼi te ʼu silikosikilipisio, ʼo ina fai he fakatuʼutuʼu ʼo ʼuhiga mo te fakatahi faka silikosikilipisio. Ko ia pea mo tona ʼohoana ʼe nā gāue ʼi te fai faka mafola mo te kau Fakamoʼoni ʼo he kokelekasio ʼo te silikosikilipisio ʼaē ʼe nā lolotoga ʼaʼahi. ʼE ina vakaʼi te teuteu fakaʼosi ʼo te polokalama ʼo te fakatahi faka silikosikilipisio pea ʼe lahi te ʼu akonaki ʼe ina fai lolotoga te fakatahi, ʼo kau ai mo te akonaki ki te hahaʼi fuli.

Ka ʼosi ʼaʼahi e te kau taupau feʼaluʼaki he kokelekasio peʼe ko he silikosikilipisio, pea ʼe hoko atu tanatou ʼaʼahi ki he tahi kokelekasio peʼe ko he tahi silikosikilipisio, ʼo mulimuli aipe ki te polokalama, ʼo aʼu ki tanatou ʼaʼahi te ʼu kokelekasio peʼe ko te ʼu silikosikilipisio fuli lolotoga māhina e ono; ʼosi ʼaia pea nātou toe kamata.

ʼE lahi ʼaupito te ʼu fenua ʼe feʼaluʼaki ai te kau taupau feʼaluʼaki ʼi he ʼu motokā peʼe nātou fakaʼaogaʼi te ʼu papikā. ʼI ʼihi fenua ʼe nātou fakaʼaogaʼi te lelue peʼe nātou ʼolo lalo. ʼE tokoni te Sosiete ki te feʼaluʼaki ʼa te taupau feʼaluʼaki pea ʼe ina foaki ki ai pea mo tona ʼohoana te kiʼi foʼi falā moʼo huʼi ʼo te falā ʼaē neʼe nā fakaʼaogaʼi ki te ʼu meʼa ʼaē ʼe ʼaoga kia nāua. ʼI te agamāhani ko te taupau feʼaluʼaki pea mo tona ʼohoana ʼe foaki tonā nofoʼaga pea mo tana meʼa kai e te hahaʼi ʼo te ʼu kokelekasio.

Ko te gāue ʼaia ʼe ʼaoga ke maʼu he loto faka sakilifisio. Ko te kau taupau feʼaluʼaki pea mo tonatou ʼu ʼohoana kua nātou fakapapau ke nātou gāue ki te ʼu kokelekasio ka mole nātou fakamaʼua kia nātou he kavega ʼe totogi kovi.—1 Tesalonika 2:9.

• Neʼe koteā te meʼa neʼe fai e te kau taupau feʼaluʼaki ʼi te kokelekasio faka Kilisitiano ʼo te ʼuluaki sēkulō?

• E feafeaʼi koa te liliu ʼo te kau taupau feʼaluʼaki ʼo poto ia ʼaho nei pea mo nātou faka ʼāteaina ia nātou moʼo fai ʼo te minisitelio ʼaia?

• Fakamatalatala te gāue ʼa te kau taupau faka silikosikilipisio pea mo te kau taupau faka tisitilike pea e feafeaʼi tonatou maʼuli.

[Paki ʼo te pasina 20]

Te taupau faka tisitilike ʼe ina fai te akonaki ʼi te fakatahi faka silikosikilipisio

[Paki ʼo te pasina 21]

Ko te kau taupau faka silikosikilipisio ʼe nātou ako te hahaʼi ʼi te fai faka mafola ʼi te ʼu ʼapi, ʼe nātou fai palalau mo te ʼu tagata ʼāfea ʼo te kokelekasio, ʼe nātou ʼaʼahi te ʼu ako faka Tohi-Tapu ʼaē ʼe fai mo te hahaʼi ʼaē ʼe fia logo ki te moʼoni, pea ʼe nātou palalau ki te ʼu kokelekasio