Te Kau Tagata Taupau Feʼoloʼaki—Ko He ʼu Meʼa ʼOfa
“ ʼI te temi ʼaē neʼe hake ai ki ʼoluga, neʼe ina ʼave mo ia te kau popūla; neʼe ina foaki he ʼu meʼa ʼofa ko he ʼu tagata.”—Efesi 4:8.
1. Koteā te gāue foʼou ʼaē neʼe tala ʼi Te Tule Leʼo ʼo te taʼu 1894?
KUA hili kiai te sēkulō, neʼe tala e Te Tule Leʼo te meʼa foʼou. Neʼe ina fakahā ko te “Tahi Koga ʼo Te Gāue.” Neʼe koteā te koga foʼou ʼaia ʼo te gāue? Neʼe ko te fakatuʼu ʼo te gāue ʼa te kau tagata taupau feʼoloʼaki. Neʼe fakamahino e Te Tule Leʼo ʼo te ʼaho 1 ʼo Sepetepeli 1894, ʼe ʼaʼahi anai e te ʼu tēhina kua fakapotopoto ʼi te faʼahi fakalaumālie te ʼu kūtuga ʼo te kau Ako Tohi-Tapu, ‘moʼo fakaloto mālohiʼi nātou ʼi te moʼoni.’
2. Koteā te ʼu gāue ʼa te ʼu tagata taupau faka silikosikilipisio pea mo tisitilike?
2 ʼI te ʼuluaki sēkulō ʼo totatou temi, neʼe ʼaʼahi te ʼu kokelekasio faka Kilisitiano e te ʼu tagata taupau ohage ko Paulo pea mo Palenapasi. Neʼe fakatuʼutuʼu e te kau tagata agatonu ʼaia ke nātou ‘fakaloto mālohiʼi’ te ʼu kokelekasio. (2 Kolonito 10:8) Ia ʼaho nei, ʼe tou maʼu te ʼu tapuakina mai te ʼu lauʼi afe tagata ʼaia ʼaē ʼe nātou fai te gāue ʼaia. Neʼe fakanofo nātou e te Kolesi Pule ʼo te kau Fakamoʼoni ʼa Sehova, ko he kau tagata taupau ʼo te ʼu silikosikilipisio pea mo te ʼu tisitilike. ʼE gāue te tagata taupau faka silikosikilipisio kia kokelekasio e 20, ʼo ina fai tuʼa lua ʼi te taʼu ʼi te vāhaʼa katoa, pea ʼe ina vakavakaʼi te ʼu tosie ʼo te kokelekasio, mo faiakonaki, pea mo kau ki te minisitelio mo te ʼu kaugā fai faka mafola ʼo te Puleʼaga. Ko te tagata taupau faka tisitilike ʼe pelesita ʼi te ʼu fakatahi faka silikosikilipisio ʼaē ʼe fai ʼi te taʼu fuli, ki te ʼu silikosikilipisio ʼaē neʼe hinoʼi kiai, mo kau ʼi te fai faka mafola mo te ʼu kokelekasio ʼaē ʼe ina ʼaʼahi ʼi muʼa ʼo te fakatahi, pea mo ina fakaloto mālohiʼi nātou ʼaki he ʼu akonaki ʼe fakatafito ki te Tohi-Tapu.
Ko Tonatou Loto Faka Sakilifisio
3. He koʼe ʼe tonu ke maʼu e te kau tagata taupau feʼoloʼaki he loto faka sakilifisio?
3 ʼE feʼoloʼaki tuʼumaʼu te kau tagata taupau feʼoloʼaki ʼo ʼaʼahi te ʼu kokelekasio. Moʼo fakahoko te meʼa ʼaia, ʼe tonu ke nātou maʼu he loto faka sakilifisio. Ko te feʼoloʼaki mai he tahi kokelekasio ki he tahi kokelekasio, ʼi ʼihi temi ʼe feala ke faigataʼa, kae ʼe fai e te kau tagata ʼaia pea mo tonatou ʼu ʼohoana te faʼahi ʼaia ʼaki he loto fiafia. Neʼe ʼui fēnei e te tagata taupau faka silikosikilipisio: “ ʼE faʼa kātaki lahi toku ʼohoana pea ʼe mole he temi ʼe meo ai . . . ʼE ʼau fakamālo kia ia ki tona loto faka sakilifisio ʼaia.” Ko ʼihi ʼu tagata taupau faka silikosikilipisio ʼe nātou fai ia kilometa e 1 000 ʼi tanatou feʼoloʼaki ʼo ʼaʼahi te ʼu kokelekasio. Ko te tokolahi ʼo nātou ʼe ʼi ai tanatou ʼu motokā, kae ko ʼihi ʼe nātou ʼolo kā, peʼe ʼolo lelue, peʼe heka hōsi, peʼe nātou ʼolo lalo. Ko te tagata taupau faka silikosikilipisio ʼi Afelika, neʼe tonu ke ina ʼamo tona ʼohoana ʼi tona ʼu fugaʼuma, ke feala hanā fakalaka ʼi te vaitafe, pea ke nā tau ki te kokelekasio ʼaē neʼe tonu ke nā ʼaʼahi. ʼI tana ʼu folau faka misionea, neʼe tonu ke kātakiʼi e te ʼapositolo ko Paulo te velahia pea mo te momoko, te fia kai pea mo te fia ʼinu, te ʼu ʼala pōʼuli, te ʼu tuʼutāmaki kehekehe, pea mo te ʼu fakataga fakamataku ʼaē neʼe hoko kia ia. Tahi ʼaē meʼa, neʼe toe “tuʼania ʼo ʼuhiga mo te ʼu kokelekasio fuli”—pea ʼe ko te meʼa ʼaia ʼaē ʼe tuʼania kiai te ʼu tagata taupau feʼoloʼaki ia ʼaho nei.—2 Kolonito 11:23-29.
4. Koteā te meʼa ʼaē ʼe feala ke hoko mo kapau ʼe mahahaki te kau tagata taupau feʼoloʼaki pea mo tonatou ʼu ʼohoana?
4 Ohage ko te kaumeʼa ʼo Paulo ko Timoteo, ʼi ʼihi temi ko te ʼu tagata taupau feʼoloʼaki pea mo tonatou ʼu ʼohoana ʼe nātou mahahaki. (1 Timoteo 5:23) ʼE ko he tahi ʼaia meʼa fakatupu lotohoha. ʼE fakamahino fēnei e te ʼohoana ʼa te tagata taupau faka silikosikilipisio: “Ko te fakatahi tuʼumaʼu mo te ʼu tēhina ʼe feala ke liliu ko he meʼa faigataʼa ʼi te temi ʼaē ʼe ʼau logo kovi ai. ʼE faigataʼa tāfito te faʼahi ʼaia kia ʼau, heʼe ʼau kamata aʼu ki te temi ʼo te ménopause. ʼE ko he meʼa faigataʼa kia ʼau te teuteuʼi ʼo tamā pasikete ʼi te vāhaʼa fuli pea ke ma ʼolo ki he tahi koga meʼa. ʼI ʼihi temi, ʼe ʼau tuʼu muʼa pea ʼe ʼau faikole kia Sehova ke ina foaki mai te mālohi ke ʼau hoko atu.”
5. Logope la te ʼu ʼahiʼahiʼi kehekehe ʼaē ʼe hoko kia nātou, koteā te loto ʼaē ʼe maʼu e te kau tagata taupau feʼoloʼaki pea mo tonatou ʼu ʼohoana?
5 Logope la tonatou ʼu mahaki pea mo ʼihi ʼatu ʼu fihifihia, ʼe fiafia te ʼu tagata taupau feʼoloʼaki pea mo tonatou ʼu ʼohoana ʼi tanatou selevisi pea ʼe nātou fakahā tonatou ʼofa ʼi tanatou loto faka sakilifisio. Ko ʼihi neʼe feala hanatou mamate ʼi tanatou ʼolo ʼo tokoni, ʼi te temi ʼaē neʼe hoko ai he ʼu fakataga pea mo te tau. ʼI tanatou ʼaʼahi te ʼu kokelekasio, ʼe nātou maʼu te manatu ʼaē neʼe maʼu e Paulo, ʼaē neʼe ina ʼui fēnei ki te kau Kilisitiano ʼo Tesalonika: “Neʼe mātou agamālū ʼi te lotolotoiga ʼo koutou, ohage ko he faʼe ʼe tokaga fakalelei ki tana fānau ʼaē ʼe ina fafaga. ʼI tamatou ʼofa ʼaē kia koutou, ko tomatou fiafia neʼe mole gata ʼaki pe tamatou fakahā atu te logo lelei ʼa te ʼAtua, kae neʼe toe kau ai mo tomatou ʼu nefesi totonu, koteʼuhi kua koutou liliu maʼa mātou ko he kau ʼofaina.”—1 Tesalonika 2:7, 8.
6, 7. Koteā te ʼu fua lelei ʼaē ʼe feala ke maʼu ʼaki te ʼu tagata taupau feʼoloʼaki ʼaē ʼe gāue kinakina?
6 Ohage ko ʼihi tagata ʼāfea ʼi te kokelekasio faka Kilisitiano, ko te ʼu tagata taupau feʼoloʼaki ʼe nātou “gāue kinakina ʼi te akonaki pea mo te faiako.” Ko te ʼu tagata ʼāfea ʼaia ʼe tonu ke “tau mo [nātou] he fakaʼapaʼapa lahi.” (1 Timoteo 5:17) ʼE feala ke ʼaoga kia tatou tanatou faʼifaʼitaki mo kapau, ʼi tatatou ʼosi ‘metitasio ki tanatou aga, ʼe tou faʼifaʼitakiʼi tanatou tui.’—Hepeleo 13:7.
7 Neʼe lave feafeaʼi te aga ʼa ʼihi ʼu tagata taupau feʼoloʼaki ki te ʼu tēhina mo tuagaʼane? Neʼe tohi fēnei e te Fakamoʼoni ʼa Sehova: “Neʼe lave ki toku maʼuli te aga ʼa te tēhina ko P——! Neʼe ko te tagata taupau feʼaluʼaki ʼi Mekesike talu mai te taʼu 1960. ʼI taku kei veliveli, neʼe ʼau fakaʼamu ke hoko vave mai la tana ʼu ʼaʼahi pea neʼe ʼau loto fiafia. ʼI toku taʼu hogofulu, neʼe ina ʼui fēnei mai, ‘ ʼE ke liliu anai mo koe ko he tagata taupau faka silikosikilipisio.’ Lolotoga te ʼu taʼu faigataʼaʼia ʼo toku temi tūpulaga, neʼe ʼau kumi tuʼumaʼu ia ia, koteʼuhi neʼe ina foaki tuʼumaʼu mai he ʼu palalau fakapotopoto. Neʼe tokaga tāfito ki tana ʼu faga ōvi! ʼI te temi ʼaenī, kua ʼau liliu ko he tagata taupau faka silikosikilipisio, pea ʼe ʼau faiga tuʼumaʼu ke ʼau fakaʼaogaʼi he temi ki te kau tūpulaga pea mo ʼau fakaloto mālohiʼi nātou ke nātou fai he ʼu fakatuʼutuʼu faka teokalatike, ohage pe ko te meʼa ʼaē neʼe ina fai mo ʼau. Māʼiape la mo te ʼu taʼu fakaʼosi ʼo tona maʼuli, logope la tana mahamahaki, neʼe kumi tuʼumaʼu e te tēhina ko P—— ke ina foaki he ʼu palalau fakaloto mālohi. ʼI te tahi ʼaho ʼi muʼa ʼo tana mate ʼi Fepualio 1995, neʼe ma ʼolo ki te fakatahi makehe ʼaē ʼaho tahi, pea neʼe ina fakahā age te ʼu fakatuʼutuʼu maʼuhiga ki te tēhina neʼe ko te architecte. Mole tuai, pea neʼe kole e te tēhina ke gāue ʼi te Petele.”
ʼE Tou Leleiʼia Te ʼu Tēhina ʼAia
8. Ko ai ‘te ʼu tagata ʼaē neʼe foaki ko he ʼu meʼa ʼofa’ ʼaē ʼe talanoa kiai ia Efesi kapite 4, pea koteā tonatou ʼaoga ki te kokelekasio?
8 Ko te ʼu tagata taupau feʼoloʼaki pea mo ʼihi ʼu tagata ʼāfea ʼaē ʼe nātou maʼu te pilivilesio ʼaē ko te tauhi ʼaki te ʼofa makehe ʼa te ʼAtua, ʼe fakahigoaʼi nātou ko te ‘ ʼu meʼa ʼofa.’ ʼI tona ʼuhiga fakafofoga ʼa Sehova pea mo te Pule ʼo te kokelekasio, neʼe foaki mai e Sesu te ʼu tagata ʼaia ʼaē ʼe nātou tokaga ki te ʼu meʼa fakalaumālie, ke nātou fakaloto mālohiʼi tatou, pea mo nātou tokoni kia tatou ke tou liliu ʼo fakapotopoto ʼi te faʼahi fakalaumālie. (Efesi 4:8-15) ʼE tou loto fakafetaʼi mokā foaki mai kia tatou he meʼa ʼofa. ʼE moʼoni tāfito te faʼahi ʼaia mo kapau ko he meʼa ʼofa ʼe ina fakaloto mālohiʼi tatou ke tou haga tauhi kia Sehova. Koia, ʼe lava feafeaʼi hatatou fakahā tatatou loto fakafetaʼi ki te gāue ʼa te kau tagata taupau feʼoloʼaki? Ko te ʼu faʼahi fea ʼaē ʼe feala ai ke tou fakahā ʼe tou ‘haga ʼofa mamahi ki te ʼu faʼahiga tagata ʼaia’?—Filipe 2:29.
9. Ko te ʼu ʼaluʼaga fea ʼaē ʼe feala ke tou fakahā ai totatou loto fakafetaʼi ki te ʼu tagata taupau feʼoloʼaki?
9 ʼI te fakahā mai ʼaē ʼo te vāhaʼa ka ʼaʼahi ai tatou e te tagata taupau faka silikosikilipisio, ʼe feala ke tou kamata fai he ʼu fakatuʼutuʼu ke tou kau katoa ki te ʼu gāue ʼo te kokelekasio lolotoga te vāhaʼa ʼaia. ʼE lagi feala ke tou fakaʼaogaʼi hotatou temi moʼo lagolago ki te ʼu fakatuʼutuʼu ʼo ʼuhiga mo te fai faka mafola ʼaē ka fai lolotoga te vāhaʼa ʼaia ʼo tana ʼaʼahi. ʼE lagi feala ke tou toʼo te selevisi pionie lolotoga te māhina ʼaia. ʼE mahino papau ia, ʼe tou fia maʼuliʼi anai te ʼu tokoni ʼa te tagata taupau faka silikosikilipisio ke hikihiki ai totatou minisitelio. Ko te taʼi manatu ʼaia ʼe fua lelei anai kia tatou, pea ʼe fīmālie anai tona loto ʼi tana sio ʼaē ʼe ʼi ai te ʼu fua lelei ʼo tana ʼaʼahi. Ei, ʼe ʼaʼahi e te kau tagata taupau feʼoloʼaki te ʼu kokelekasio moʼo fakaloto mālohiʼi ʼo tatou, kae ʼe toe ʼaoga foki mo nātou ke fakaloto mālohiʼi nātou ʼi te faʼahi fakalaumālie. Neʼe ʼi ai te ʼu temi neʼe ʼaoga ai kia Paulo he ʼu fakaloto mālohi, pea neʼe ina tautau kole ki tona ʼu tēhina Kilisitiano ke nātou faikole maʼa ia. (Gāue 28:15; Loma 15:30-32; 2 Kolonito 1:11; Kolose 4:2, 3; 1 Tesalonika 5:25) ʼO toe feiā aipe, ʼe ʼaoga ki te ʼu tagata taupau feʼoloʼaki ʼo totatou temi, ke tou faikole ʼo ʼuhiga mo nātou pea mo fakaloto mālohiʼi nātou.
10. ʼE tou lava tokoni feafeaʼi ki he tagata taupau feʼaluʼaki ke fiafia ʼi tana gāue?
10 ʼE tou fakahā koa ki te tagata taupau faka silikosikilipisio pea mo tona ʼohoana ʼe tou leleiʼia tanā ʼu ʼaʼahi? ʼE tou fakamālo koa kia ia ʼo ʼuhiga mo te ʼu tokoni ʼaoga ʼaē ʼe ina foaki mai kia tatou? ʼE tou fakahā koa kia ia ʼe tuputupu tatatou fiafia ʼi te minisitelio ʼuhi ko te ʼu tokoni ʼaē ʼe ina fai mai ʼo ʼuhiga mo te fai faka mafola? Kapau ʼe tou fai feiā, pea ʼe tokoni anai te faʼahi ʼaia ke ina fakahoko tana gāue ʼaki he loto fiafia. (Hepeleo 13:17) Neʼe talanoa tāfito te tagata taupau faka silikosikilipisio ʼi Sepania ki tanā leleiʼia mo tona ʼohoana ia te ʼu tohi ʼaē neʼe fai age kia nāua ʼi tanā ʼosi ʼaʼahi te ʼu kokelekasio. ʼE ina ʼui fēnei: “ ʼE ma taupau te ʼu tohi ʼaia pea ma lau ʼi te ʼu temi ʼaē ʼe ma logo vaivai ai. Ko te ʼu tohi ʼaia ʼe ko he ʼu meʼa fakaloto mālohi kia māua.”
11. He koʼe ʼe tonu ke tou fakahā ki te ʼu ʼohoana ʼo te kau tagata taupau faka silikosikilipisio pea mo faka tisitilike ʼe tou ʼoʼofa pea mo tou loto fakafetaʼi ki te ʼu meʼa ʼaē ʼe nātou fai?
11 ʼE mahino papau ia ʼe feala ke tou fai he ʼu palalau fakavikiviki ki te ʼohoana ʼo te tagata taupau feʼaluʼaki. ʼE tonu ke ina fai he ʼu sakilifisio lahi moʼo tokoni ki tona ʼohoana ʼo ʼuhiga mo te gāue ʼaē neʼe hinoʼi ki ai. Neʼe līaki e te ʼu tuagaʼane agatonu ʼaia tanatou holi ʼaē ke nātou maʼu honatou ʼapi pea, maʼa te tokolahi ʼo nātou ʼaia, neʼe nātou līaki te holi ʼaē ke nātou maʼu fānau. Ko te ʼofafine ʼo Sefeteo neʼe ko te taʼahine kaugana ʼa Sehova, neʼe ina tali ke ina fakafisi ki te fealagia ʼaē ke ʼohoana pea mo maʼu hona famili, ʼuhi ko te fakapapau ʼaē neʼe fai e tana tāmai. (Kau Fakamāu 11:30-39) Neʼe faka ʼuhiga feafeaʼi te loto faka sakilifisio ʼaē neʼe ina maʼu? ʼE ʼui fēnei ia Kau Fakamāu 11:40: “ ʼI te taʼu fuli neʼe ʼolo te ʼu taʼahine ʼo Iselaele ʼo fakavikiviki ki te ʼofafine ʼo Sefeteo te Kileate, ia ʼaho e fā ʼi te taʼu.” ʼE ko he meʼa lelei mokā tou faiga ke tou fakahā ki te ʼu ʼohoana ʼo te ʼu tagata taupau faka silikosikilipisio pea mo faka tisitilike ʼe tou ʼoʼofa pea mo tou leleiʼia ia nātou!
“Ke ʼAua Naʼa Galo Ia Koutou Te Tali Kāiga”
12, 13. (a) Koteā te ʼu vaega faka Tohi-Tapu ʼaē ʼe fakahā ai ʼe tonu ke tou fai te tali kāiga ki te ʼu tagata taupau feʼoloʼaki pea mo tonatou ʼu ʼohoana? (b) Koutou fakahā peʼe lava feafeaʼi ke fua lelei te taʼi tali kāiga ʼaia kia tatou fuli.
12 Ko te fai ʼo te tali kāiga ʼe ko te tahi faʼahiga fai ʼaia moʼo fakahā ʼo tatatou ʼofa pea mo tatatou loto fakafetaʼi ki te ʼu tēhina ʼaē ko te ʼu tagata taupau feʼoloʼaki. (Hepeleo 13:2) Neʼe vikiviki e te ʼapositolo ko Soane ia Kaiusi ki tana faka fālahi tana tali kāiga kia nātou ʼaē neʼe nātou ʼaʼahi te kokelekasio, te kau misionea feʼoloʼaki. Neʼe tohi fēnei e Soane: “E ʼofaina, ʼe ke gāue agatonu ʼi te ʼu gāue fuli ʼaē ʼe ke fai maʼa te ʼu tēhina, logope la ko nātou ko te ʼu matāpule, ʼaē neʼe nātou fakamoʼoni ki tau ʼofa ʼi muʼa ʼo te kokelekasio. Ko nātou ʼaia, fakalelei age siʼi ʼou loto, ʼe ke fakaʼalu anai ia nātou ʼi tonatou ala, ʼaki he aga ʼe tau mo feʼauga mo te ʼAtua. He neʼe nātou ʼōmai ʼuhi ko tona huafa, ʼo mole nātou tali he meʼa mai te hahaʼi ʼo te ʼu puleʼaga. Koia, ʼe maʼua foki kia tatou ke tou tali te ʼu taʼi tagata ʼaia ʼaki he tali kāiga, koteʼuhi ke tou liliu ai ko he ʼu kaugā gāue ʼi te moʼoni.” (3 Soane 5-8) Ia ʼaho nei, ʼe feala ke tou fakahaʼele ki muʼa te gāue fai faka mafola ʼo te Puleʼaga ʼo tou fakahā te taʼi tali kāiga ʼaia ki te ʼu tagata taupau feʼoloʼaki pea mo tonatou ʼu ʼohoana. ʼE mahino ia, ʼe tonu ke ʼiloʼi papau e te ʼu tagata ʼāfea peʼe lelei te faʼahi ʼaē ka nā nonofo ai, kae neʼe ʼui fēnei e te tagata taupau faka tisitilike: “Ko tamatou fakatahi mo te ʼu tēhina ʼe mole feala ke fakatafito ki te manatu ʼaē, pe ko ai ʼaē ʼe feala ke ina fai he meʼa maʼa mātou. ʼE mole mātou loto ke nātou manatu feiā. ʼE tonu ke mātou tali ʼaki he lotolelei te tali kāiga ʼo tomatou ʼu tēhina fuli, tatau aipe peʼe nātou koloaʼia peʼe nātou māsisiva.”
13 ʼE feala ke fua lelei te fai ʼo te tali kāiga kia tatou fuli. ʼE manatuʼi fēnei e Jorge, ko te tagata taupau faka silikosikilipisio talu mai fualoa, ʼe gāue ʼi te temi nei ʼi te Petele: “ ʼI toku famili, neʼe ko te aga māhani tamatou fakaafe te kau tagata taupau feʼoloʼaki ke nātou nonofo mo mātou. ʼI taku manatu neʼe tokoni lahi te ʼu ʼaʼahi ʼaia kia ʼau. ʼI taku kei tūpulaga, neʼe ʼi ai toku ʼu fihifihia ʼi te faʼahi fakalaumālie. Neʼe tuʼania taku faʼe ʼo ʼuhiga mo te faʼahi ʼaia, kae neʼe mole ina ʼiloʼi he faʼahiga tokoni kia ʼau, pea neʼe ina kole ai ki te tagata taupau faka silikosikilipisio ke palalau mo ʼau. ʼI te kamata, neʼe mole ʼau fia palalau mo ia, he neʼe ʼau mataku naʼa ina valoki te ʼu meʼa ʼaē ʼe ʼau fai. Kae ki muli age, ko tana agalelei neʼe ina uga ai ʼau ke ʼau palalau faʼitaliha kia ia. Neʼe ina fakaafe ʼau ʼi te tahi Mōnite ke ma kakai fakatahi, pea neʼe ʼau fakahā ai te ʼu meʼa ʼaē ʼi toku loto, he neʼe ʼau ʼiloʼi papau neʼe mahino kia ia te ʼu meʼa ʼaia. Neʼe fakalogo lelei ki te ʼu meʼa ʼaē neʼe ʼau palalau age ki ai. Neʼe ʼaoga moʼoni tana ʼu tokoni ʼaē neʼe ina foaki mai, pea neʼe ʼau kamata tuputupu ai ʼi te faʼahi fakalaumālie.”
14. He koʼe ʼe tonu ke tou loto fakafetaʼi ki te ʼu tagata taupau feʼoloʼaki kae mole tonu ke tou fatufatuʼi ia nātou?
14 ʼE faiga e te tagata taupau feʼaluʼaki ke liliu ko he tokoni ʼi te faʼahi fakalaumālie ki te kau tūpulaga ʼo toe feiā aipe mo te kau matutuʼa. ʼE mahino ia, ʼe tonu ke tou fakahā tatatou loto fakafetaʼi ki tana ʼu faiga. Kae, ʼe feafeaʼi anai mo kapau ʼe tou fatufatuʼi ia ia ʼuhi ko tana ʼu hala, peʼe tou valoki ia ia ʼo tou fakatatau mo te tahi ʼu tagata taupau feʼoloʼaki ʼaē ʼe nātou ʼaʼahi te kokelekasio? ʼE mahino ia, ʼe ko he meʼa fakatupu lotovaivai ʼaupito. Neʼe mole ko he meʼa fakaloto mālohi kia Paulo tana fagono ki te fatufatuʼi ʼo tana gāue. ʼE hā mai, ko ʼihi ʼu Kilisitiano ʼo Kolonito neʼe nātou fatufatuʼi tona agaaga pea mo tana ʼu faʼahiga faiakonaki. Neʼe talanoa totonu ia ia ki te ʼu fatufatu ʼaia, ʼi tanatou ʼui fēnei: “Ko tana ʼu tohi ʼe maʼuhiga pea mo mālohi, kae ko tana ʼi henī ʼa ia totonu ʼe vaivai ia pea ko tana palalau ʼe kovi ia.” (2 Kolonito 10:10) Kae ʼe ko he meʼa fakafiafia, heʼe ʼi te agamāhani ʼe fai tuʼumaʼu ki te ʼu tagata taupau feʼoloʼaki he ʼu palalau ʼe hā ai tona ʼofainaʼi pea mo te loto fakafetaʼi ʼaē ʼe fai kia nātou.
15, 16. ʼE lave feafeaʼi ki te kau tagata taupau feʼoloʼaki pea mo tonatou ʼohoana te ʼofa pea mo te fakamalotoloto ʼaē ʼe fakahā e tonatou ʼu tēhina mo tuagaʼane?
15 ʼE feʼaluʼaki kinakina te tagata taupau faka silikosikilipisio ʼi Amelika Latina ʼi te ʼaho katoa, ʼo ʼalu ʼi te pela moʼo ʼaʼahi ki tona ʼu tēhina mo tuagaʼane fakalaumālie ʼaē ʼe nonofo ʼi te potu ʼaē ʼe nofoʼi e te hahaʼi tau. ʼE ina tohi fēnei: “ ʼE lave ki toku loto te loto fakafetaʼi ʼo te ʼu tēhina ki taku ʼaʼahi ʼaē ia nātou. Logope la ʼe faigataʼa ʼaupito taku aʼu ki te faʼahi ʼaia, ʼuhi ko te ʼu tuʼutāmaki pea mo te ʼu faigataʼaʼia, kae ʼe fakapale te ʼu faʼahi fuli ʼaia ʼaki te ʼofa pea mo te fakamalotoloto lahi ʼaē ʼe fakahā e te ʼu tēhina.”
16 ʼE tohi fēnei e te tagata taupau faka silikosikilipisio ʼi Afelika: “Neʼe ma leleiʼia ʼaupito te telituale ʼo Tanzanie ʼuhi ko te ʼofa ʼaē neʼe fakahā mai e te ʼu tēhina kia māua. Neʼe tali e te ʼu tēhina ke ma akoʼi ia nātou, pea neʼe nātou fiafia ʼi tamā nonofo mo nātou ʼi tonatou ʼu ʼapi.” Neʼe maʼu e te ʼapositolo ko Paulo pea mo te taumatuʼa Kilisitiano ʼo te ʼuluaki sēkulō, ia Akila pea mo Pilisila, he ʼu felogoi ʼofa pea mo fakafiafia. ʼIo, neʼe ʼui fēnei e Paulo ʼo ʼuhiga mo nāua: “ ʼOʼofa age kia Pilisila mo Akila, toku ʼu kaugā gāue ia Kilisito Sesu, ʼaē neʼe meʼa pe ke nā mamate ʼuhi ko toku nefesi, pea ʼe ʼau fakamālo kia nāua, ʼo mole ko ʼau tokotahi pe, kae ʼe toe kau ai mo te ʼu kokelekasio fuli ʼo te ʼu puleʼaga.” (Loma 16:3, 4) ʼE loto fakafetaʼi te kau tagata taupau feʼoloʼaki pea mo tonatou ʼu ʼohoana, heʼe nātou maʼu he ʼu kaumeʼa ʼi te temi ʼaenī ohage ko Pilisila pea mo Akila, ʼe nātou faiga fakamalotoloto ke nātou fakahā te tali kāiga pea mo lagolago kia nātou.
ʼE Nātou Fakaloto Mālohiʼi Te ʼu Kokelekasio
17. He koʼe ʼe feala ke tou ʼui ʼe fakapotopoto te ʼu fakatuʼutuʼu ʼaē ʼe fai e te kau tagata taupau feʼoloʼaki, pea ʼe nātou maʼu maifea tanatou ako?
17 Neʼe ʼui fēnei e Sesu: “Ko te poto neʼe hā mai ia ʼe tonu ʼaki tana ʼu gāue.” (Mateo 11:19) Ko te poto ʼaē ʼe hā ʼi te ʼu fakatuʼutuʼu ʼaē ʼe fai e te tagata taupau feʼaluʼaki, ʼe tokoni ki te fakaloto mālohiʼi ʼo te ʼu kokelekasio ʼo te hahaʼi ʼa te ʼAtua. Lolotoga te lua folau faka misionea ʼa Paulo, ko ia mo Silasi neʼe fua lelei tanā “fakalaka ʼi Silia pea mo Silisia, ʼo nā fakaloto mālohiʼi te ʼu kokelekasio.” ʼE ʼui fēnei mai kia tatou ʼi te tohi ʼo Gāue: “ ʼI tanā fakalaka ʼaē ʼi te ʼu kolo, neʼe nā tuku age kia nātou ʼaia ʼaē neʼe nonofo ai, koteʼuhi ke nātou tauhi te ʼu fakatotonu ʼaē neʼe fakatuʼu e te kau ʼapositolo pea mo te kau tagata ʼāfea ʼaē neʼe ʼi Selusalemi. Koia, neʼe hoko atu te mālohi ʼo te ʼu kokelekasio ʼi te tui pea mo tuputupu tonatou kaugamālie ʼi te ʼaho fuli.” (Gāue 15:40, 41; 16:4, 5) Ia ʼaho nei, ʼe maʼu e te kau tagata taupau feʼoloʼaki te ʼu fakatonutonu fakalaumālie ʼi te Tohi-Tapu, pea mo te ʼu tohi ʼa te “tagata kaugana agatonu mo poto,” ohage ko te ʼu Kilisitiano fuli.—Mateo 24:45.
18. ʼE fakaloto mālohiʼi feafeaʼi e te kau tagata taupau feʼoloʼaki te ʼu kokelekasio?
18 Ei, ʼe tonu ki te kau tagata taupau feʼoloʼaki ke nātou hoko atu tanatou kai ʼi te laupapa fakalaumālie ʼa Sehova. ʼE tonu ke nātou ʼiloʼi lelei te ʼu faʼahiga fai pea mo te ʼu takitaki ʼaē ʼe muliʼi e te kautahi ʼa te ʼAtua. ʼE feala ai ke liliu te ʼu tagata ʼaia ko he ʼu tapuakina ki te ʼu tēhina mo te ʼu tuagaʼane. ʼAki te faʼifaʼitaki lelei ʼo tanatou gāue mālohi ʼi te fai faka mafola, ʼe feala ke nātou tokoni ki tonatou ʼu tēhina mo te ʼu tuagaʼane ke hikihiki te fai ʼo tonatou minisitelio faka Kilisitiano. Ko te ʼu akonaki ʼaē ʼe fakatafito ki te Tohi-Tapu ʼaē ʼe fai ʼi te ʼu ʼaʼahi ʼaia ʼa te ʼu tagata ʼāfea, ʼe nātou fakaloto mālohiʼi ʼi te faʼahi fakalaumālie ia nātou ʼaē ʼe fagono ki te ʼu akonaki ʼaia. ʼI tanatou tokoniʼi te kokelekasio ke nātou maʼuliʼi te ʼu tokoni ʼa te Folafola ʼa te ʼAtua, mo nātou tauhi ʼo fakatahi mo te hahaʼi ʼa Sehova ʼaē ʼi te kele katoa, pea mo nātou fakaʼaogaʼi te ʼu meʼa kai fakalaumālie ʼaē ʼe foaki e te ʼAtua ʼaki te “tagata kaugana agatonu,” ʼe fakaloto mālohiʼi ai e te kau tagata taupau feʼoloʼaki te ʼu kokelekasio ʼaia ʼaē ʼe ko he pilivilesio kia nātou tonatou ʼaʼahi.
19. Koteā te ʼu fehuʼi ʼaē ʼe kei toe ke tou vakaʼi?
19 ʼI te temi ʼaē neʼe fakatuʼu ai e te kautahi ʼa Sehova te gāue ʼa te kau tagata taupau feʼoloʼaki ʼi te kau Ako Tohi-Tapu, kua hili nei kiai taʼu e teau, neʼe ʼui fēnei e te nusipepa ʼaenī: “ ʼE tonu anai ke mātou talitali ke mātou sio pe koteā tona ʼu fua pea mo talitali ki te takitaki ʼa te ʼAliki.” Neʼe hā lelei neʼe ko Sehova ʼaē neʼe ina takitaki te faʼahi ʼaia. ʼAki tana tapuakina pea mo te takitaki ʼa te Kolesi Pule, neʼe mafola te gāue ʼaia pea ʼaki te ʼu taʼu neʼe toe ʼāsili age tona lelei. Koia, ko te ʼu kokelekasio ʼo te kau Fakamoʼoni ʼa Sehova ʼi te malamanei katoa, ʼe nātou liliu ʼo mālolohi ʼi te tui pea mo kaugamālie ʼi te ʼaho fuli. ʼE mahino papau ia, ʼe tapuakina e Sehova te loto faka sakilifisio ʼaē ʼe fakahā e te ʼu tagata ʼaia ʼaē neʼe foaki ko he ʼu meʼa ʼofa. Kae ʼe lava feafeaʼi ke fakahoko lelei e te kau tagata feʼoloʼaki tanatou gāue? Koteā koa tanatou ʼu fakatuʼutuʼu? ʼE lava feafeaʼi ke toe ʼāsili lelei age te gāue ʼaē ʼe nātou fai ʼi te ʼu kokelekasio?
ʼE Koutou Tali Feafeaʼi Anai?
◻ Koteā te ʼu gāue ʼa te kau tagata taupau faka silikosikilipisio pea mo faka tisitilike?
◻ He koʼe ʼe ʼaoga ke maʼu e te kau tagata taupau feʼoloʼaki he loto faka sakilifisio?
◻ ʼE lava feafeaʼi hatatou fakahā totatou loto fakafetaʼi ki te kau tagata taupau feʼoloʼaki pea mo tonatou ʼu ʼohoana?
◻ Koteā ʼaē ʼe feala ke fai e te kau tagata taupau feʼoloʼaki moʼo fakaloto mālohiʼi ʼo te tui ʼa te ʼu kokelekasio?
[Paki ʼo te pasina 10]
ʼE tonu ke maʼu he loto faka sakilifisio ki te gāue ʼaē ko te tagata taupau feʼaluʼaki
[Paki ʼo te pasina 13]
Neʼe koutou fakahā koa te tali kāiga ki te ʼu tagata taupau feʼoloʼaki pea mo tonatou ʼu ʼohoana?