Te Tauhi ʼa Te Kau Tagata Taupau Feʼoloʼaki ʼi Tonatou ʼUhiga Tagata Tauhi ʼApi

“ ʼO mulimuli ki te ʼu fealagia ʼaē ʼe koutou maʼu takitokotahi, ke koutou fakaʼaogaʼi te fealagia ʼaia, ʼo koutou fetauhiʼaki, ohage ko he kau tagata tauhi ʼapi lelei ʼo te ʼofa makehe ʼo te ʼAtua, ʼaia ʼe hā ʼi he ʼu agaaga kehekehe.”​—1 Petelo 4⁠:10.

1, 2. (a) ʼE feafeaʼi anai hakotou fakamahino te kupu “tagata tauhi ʼapi”? (b) Ko ai ʼaē ʼe kau ki te kau tagata tauhi ʼapi ʼaē ʼe fakaʼaogaʼi e te ʼAtua?

ʼE FAKAʼAOGAʼI e Sehova te kau Kilisitiano agatonu fuli ohage ko he kau tagata tauhi ʼapi. Ko te tagata tauhi ʼapi ʼe ko he tagata faifekau ʼe tokaga ki he loto fale. ʼE toe feala foki ke tokaga ki te ʼu koloā ʼo tona tagata pule. (Luka 16:​1-3; Kalate 4:​1, 2) Neʼe fakahigoaʼi e Sesu tana hahaʼi fakanofo agatonu ʼaē ʼi te kele ko tana “tagata tauhi ʼapi agatonu.” Ki te tagata tauhi ʼapi ʼaia neʼe ina foaki age ‘tana ʼu meʼa fuli,’ ʼo kau ai mo te gāue fai faka mafola ʼo te Puleʼaga.​—Luka 12:42-​44; Mateo 24:14, 45.

² Neʼe ʼui e te ʼapositolo ko Petelo ko te kau Kilisitiano fuli ʼe ko he kau tagata tauhi ʼapi ʼo te ʼofa makehe ʼo te ʼAtua, ʼaia ʼe hā ʼi te ʼu faʼahiga agaaga kehekehe. ʼE maʼu e te kau Kilisitiano fuli te tuʼulaga, ʼe feala ke nātou fakahoko ai tanatou gāue ʼi tonatou ʼuhiga tagata tauhi ʼapi agatonu. (1 Petelo 4:​10) Ko te kau tagata ʼāfea ʼe ko he kau tagata tauhi ʼapi, pea ʼe kau ia nātou ʼaia te kau tagata taupau feʼoloʼaki. (Tito 1:7) ʼE tonu ke tou faka ʼuhiga feafeaʼi te kau tagata taupau feʼoloʼaki ʼaia? Koteā te ʼu kalitate pea mo te ʼu fakatuʼutuʼu ʼaē ʼe tonu ke nātou maʼu? Pea ʼe lava feafeaʼi hanatou fakahoko he gāue ʼe lelei ʼaupito?

Tou Loto Fakafetaʼi Ki Tanatou Gāue

3. He koʼe ʼe feala ke fakahigoaʼi te kau tagata taupau feʼoloʼaki ko he ʼu “tagata tauhi ʼapi lelei”?

³ ʼI tanā faitohi ki te tagata taupau feʼaluʼaki pea mo tona ʼohoana, neʼe ʼui fēnei e te taumatuʼa Kilisitiano: “ ʼE ma fia fakahā atu tomā loto fakafetaʼi ʼo ʼuhiga mo te temi pea mo te ʼofa ʼaē neʼe koulua fakaʼaogaʼi kia māua. ʼI tomā ʼuhiga taumatuʼa, neʼe fua lelei ʼaupito kia māua te ʼu fakaloto mālohi pea mo te ʼu tokoni ʼaē neʼe koulua foaki mai. ʼE ma ʼiloʼi ʼe tonu ke ma tuputupu ʼi te faʼahi fakalaumālie, kae ʼaki te tokoni ʼa Sehova pea mo te tokoni ʼo te ʼu tēhina mo tuagaʼane ohage ko koulua, kua maʼamaʼa age te ʼu tuʼania ʼaē ʼe tau mo māua.” ʼE tautau fai te ʼu palalau ʼaia koteʼuhi ʼe tokaga lelei te kau tagata taupau feʼoloʼaki ki tonatou ʼu tēhina mo tuagaʼane ʼi te tui, ohage pe ko te tokaga lelei ʼa he tagata tauhi ʼapi lelei ki te ʼu meʼa ʼaē ʼe ʼaoga ki he loto fale. Ko ʼihi ʼe ko he kau tagata faiakonaki faiva. Ko te tokolahi ʼe nātou popoto lelei ʼi te fai faka mafola, kae ko ʼihi ʼe ko he ʼu hahaʼi fakaloto fiafia pea mo loto manavaʼofa. ʼI tanatou maʼuliʼi pea mo fakaʼaogaʼi te ʼu fealagia ʼaia moʼo tauhi ki te hahaʼi, koia ʼe feala ai ke fakahigoaʼi te kau tagata taupau feʼoloʼaki ʼe ko he ʼu “tagata tauhi ʼapi lelei.”

4. Koteā te fehuʼi ʼaē ka tou vakaʼi ʼi te temi nei?

⁴ Neʼe tohi fēnei e te ʼapositolo ko Paulo: “Ko te meʼa ʼaē ʼe tou kumi ʼi te kau tagata tauhi ʼapi ʼe ko he tagata ʼe maʼu ʼe agatonu.” (1 Kolonito 4:2) Ko tanatou gāue maʼa tonatou ʼu tēhina mo tuagaʼane ʼi te tui ʼi te ʼu kokelekasio kehekehe, ʼi te ʼu vāhaʼa fuli, ʼe ko he pilivilesio makehe pea mo fakafiafia. Kae tahi ʼaē meʼa, ʼe ko he maʼua mamafa. Koia, ʼe lava feafeaʼi ki te kau tagata taupau feʼoloʼaki ke nātou nonofo agatonu ʼi tonatou ʼuhiga tagata tauhi ʼapi, pea mo fua lelei tanatou gāue ʼaia?

ʼE Nātou Fakahoko Lelei Tanatou Gāue ʼi Tonatou ʼUhiga Tagata Tauhi ʼApi

5, 6. He koʼe ʼe maʼuhiga te faikole pea mo te loto falala ʼaē kia Sehova ʼi te maʼuli ʼo he tagata taupau feʼaluʼaki?

⁵ ʼE maʼuhiga te faikole pea mo te loto falala ʼaē kia Sehova, mo kapau ʼe fia maʼu e te kau tagata taupau feʼoloʼaki he ʼu fua lelei ʼi tonatou ʼuhiga tagata tauhi ʼapi. ʼUhi ko tanatou polokalama pea mo te lahi ʼo tonatou ʼu maʼua, ʼe feala ke nātou logoʼi ʼi ʼihi temi kua nātou ogosia ai. (Vakaʼi ia 2 Kolonito 5:⁠4.) Koia, ʼe tonu ke nātou gāue ʼo mulimuli ki te hiva ʼaenī ʼa te tagata fai pesalemo ʼaē ko Tavite: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina tuku anai ke tūkia ia ia ʼaē ʼe agatonu.” (Pesalemo 55:22) ʼE toe fakaloto fīmālie foki mo te ʼu palalau ʼaenī ʼa Tavite: “Fakafetaʼi kia Sehova ʼaē ʼe ina ʼamo te kavega maʼa tatou ʼi te ʼaho fuli pe.”​—Pesalemo 68:19.

⁶ Neʼe maʼu koa ʼifea e Paulo te mālohi moʼo fakahoko ʼo tona ʼu maʼua ʼi te faʼahi fakalaumālie? Neʼe ina tohi fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.” (Filipe 4:​13) ʼIo, neʼe haʼu mai ia Sehova ʼAtua te mālohi ʼaē neʼe maʼu e Paulo. ʼO toe feiā aipe, neʼe fai e Petelo te tokoni ʼaenī: “Ka tauhi he tahi, ke tauhi ohage ko he tahi ʼe fakalogo ki te mālohi ʼaē ʼe foaki e te ʼAtua; koteʼuhi ke faka kolōliaʼi ai te ʼAtua ia meʼa fuli ʼaki ia Sesu Kilisito.” (1 Petelo 4:​11) Ko te tēhina neʼe ko te tagata taupau feʼaluʼaki lolotoga ni ʼu taʼu, neʼe ina faka maʼuhigaʼi te ʼaoga ʼaē ke falala ki te ʼAtua, ʼi tana ʼui fēnei: “Koutou pāui tuʼumaʼu kia Sehova mokā koutou fakatokatoka he ʼu fihifihia pea mo koutou kumi te ʼu tokoni ʼo tana kautahi.”

7. He koʼe ʼe ʼaoga ke fakafuafua lelei e te tagata taupau feʼaluʼaki te ʼu meʼa ʼaē ʼe ina fai ʼi tana gāue?

⁷ Ke fua lelei te gāue ʼa he tagata taupau feʼaluʼaki, ʼe ʼaoga ke ina fakafuafua lelei te ʼu meʼa ʼaē ʼe ina fai. Ohage ko te kau Kilisitiano fuli, ʼe faiga ke ina “ ʼiloʼi papau te ʼu meʼa ʼaē ʼe maʼuhiga tāfito.” (Filipe 1:​10)a Kapau ʼe ʼi ai he ʼu fehuʼi ʼa te kau tagata ʼāfea ʼo ʼuhiga mo he faʼahi, ʼe lelei ke nātou kumi tokoni ki te tagata taupau faka silikosikilipisio ʼaē ʼe ina ʼaʼahi ia nātou. (Tāʼaga Lea 11⁠:14; 15⁠:22) ʼE mahino ia, ko tana ʼu manatu ʼaē ʼe fakapotopoto pea mo tana ʼu tokoni faka Tohi-Tapu, ʼe ʼaoga moʼoni anai ki te kau tagata ʼāfea ke hoko atu tanatou tokakaga ki te ʼu meʼa ʼo te kokelekasio, mokā mavae ia nātou. ʼO mulimuli ki te manatu ʼaia, neʼe ʼui fēnei e Paulo kia Timoteo: “Ko te ʼu meʼa ʼaē neʼe ke logo ʼo ʼuhiga mo ʼau ʼaki te fakamoʼoni ʼa te tokolahi, foaki te ʼu meʼa ʼaia ki he ʼu tagata agatonu, ʼaia ka liliu anai mo nātou [ko he ʼu tagata] kua popoto moʼo akoʼi ʼo ʼihi.”​—2 Timoteo 2:2.

8. He koʼe ʼe maʼuhiga te ako ʼo te Tohi-Tapu, te fai ʼo he ʼu kumi, pea mo te metitasio?

⁸ Moʼo foaki ʼo he ʼu tokoni fakapotopoto, ʼe tonu ke nātou ako te Tohi-Tapu, ke nātou fai he ʼu kumi, pea mo nātou metitasio. (Tāʼaga Lea 15:28) Neʼe ʼui fēnei e te tagata taupau faka tisitilike: “ ʼI te temi ʼaē ʼe mātou fono ai mo te kau tagata ʼāfea, ʼe mole tonu ke mātou tuʼania ʼi te ʼui fakahagatonu ʼe mole mātou ʼiloʼi te tali ki he faʼahiga fehuʼi.” Ko tanatou faiga mālohi ʼaē ke nātou maʼu “te manatu ʼa Kilisito” ʼo ʼuhiga mo te fehuʼi ʼaia, ʼe faka fealagia ai kia nātou ke nātou foaki he ʼu tokoni ʼe fakatafito ki te Tohi-Tapu moʼo tokoni ki te ʼu tēhina mo tuagaʼane ke nātou mulimuli ki te finegalo ʼo te ʼAtua. (1 Kolonito 2:​16) ʼI ʼihi temi ʼe tonu ke faitohi te tagata taupau feʼaluʼaki ki te Sosiete Watch Tower ke fakahā age kia ia te ʼu meʼa ʼaē ʼe tonu ke ina fai. ʼI te ʼu faʼahi fuli, ko te falala kia Sehova pea mo te ʼofa ki te moʼoni, ʼe maʼuhiga age ia ʼi te meʼa ʼaē ʼe hā ki tuʼa peʼe ʼi te poto palalau. Neʼe mole haʼu ia Paulo ʼaki “he ʼu palalau fakaoloolo peʼe ko he ʼu palalau ʼaki te poto,” kae neʼe ina kamata tona minisitelio ʼi Kolonito “ ʼi te agavaivai pea mo te mataku pea mo tetetete lahi.” Ko te faʼahi ʼaia, neʼe fakatupu kovi koa ki tona minisitelio? Kailoa. Kae neʼe tokoni te faʼahi ʼaia ki te kau Kolonito ke nātou falala, “ ʼo mole [nātou falala] ki te poto fakatagata, kae ki te mālohi ʼo te ʼAtua.”​—1 Kolonito 2:​1-5.

Ko ʼIhi Kalitate Maʼuhiga

9. He koʼe ʼe tonu ke agalelei te kau tagata taupau feʼoloʼaki?

⁹ Ko te agalelei ʼe tokoni ki te kau tagata taupau feʼoloʼaki ke nātou maʼu he ʼu fua lelei. Neʼe uga e Petelo te kau Kilisitiano fuli ke nātou ‘femahinoʼaki,’ peʼe ke nātou “agalelei.” (1 Petelo 3:8, kiʼi nota ʼi te lalo pasina) ʼE manatu e te tagata taupau faka silikosikilipisio ʼe tonu ke ‘ina ʼiloʼi te hahaʼi fuli ʼo te kokelekasio pea mo tokaga lelei kia nātou.’ ʼAki te manatu ʼaia, neʼe tohi fēnei e Paulo: “Koutou fiafia mo te hahaʼi ʼaē ʼe fiafia; koutou fetāgihi mo te hahaʼi ʼaē ʼe fetāgihi.” (Loma 12:15) Ko te taʼi aga ʼaia ʼe ina uga te kau tagata taupau feʼoloʼaki ke nātou faiga mālohi ke nātou mahino ki te ʼu fihifihia pea mo te ʼu ʼaluʼaga ʼaē ʼe tau mo tonatou ʼu tēhina mo tuagaʼane ʼi te tui. ʼE feala ai ke nātou foaki he ʼu tokoni faka Tohi-Tapu ʼe fakatupu lotomālohi, pea ʼe feala ke fua lelei te ʼu tokoni ʼaia mo kapau ʼe nātou maʼuliʼi. Neʼe maʼu e te tagata taupau faka silikosikilipisio agalelei, te tohi mai te kokelekasio ʼe ōvi ki Turin, ʼi Italia, neʼe ʼui fēnei ai: “Kapau ʼe koutou loto ke tokagaʼi koutou, pea ʼe tonu ke koutou tokagaʼi te hahaʼi; kapau ʼe koutou loto ke nātou agalelei atu kia koutou, pea ʼe tonu ke koutou agalelei kia nātou; kapau ʼe koutou loto ke ʼofainaʼi koutou, pea ʼe tonu ke koutou ʼofa kia nātou; kapau ʼe koutou loto ke nātou tokoni atu, pea ʼe tonu ke koutou tokoni ki te hahaʼi. ʼE ko te faʼifaʼitaki ʼaia ʼaē neʼe ke tuku mai kia mātou!”

10. Koteā ʼaē neʼe ʼui e te kau tagata taupau faka silikosikilipisio pea mo faka tisitilike ʼo ʼuhiga mo te agavaivai, pea koteā te faʼifaʼitaki ʼaē neʼe tuku e Sesu ʼi te faʼahi ʼaia?

¹⁰ Ko te agavaivai pea mo te faigafua ʼo te fakaōvi kia nātou, ʼe tokoni anai ki te kau tagata taupau feʼoloʼaki ke nātou maʼu he ʼu fua lelei ʼi te meʼa ʼaē ʼe nātou fai. Neʼe fakatokagaʼi e te tagata taupau faka silikosikilipisio te faʼahi ʼaenī: “ ʼE maʼuhiga ʼaupito te maʼu ʼo te agavaivai.” Neʼe ina fakatokagaʼi fēnei te kau tagata taupau feʼoloʼaki foʼou: “ ʼAua naʼa koutou tuku ke fakaoloolo koutou e te ʼu tēhina ʼaē ʼe maʼu meʼa ʼuhi ko te meʼa ʼaē ʼe feala ke nātou fai maʼa koutou, pea ke ʼaua naʼa gata pe takotou ʼu fakakaumeʼa ki te ʼu hahaʼi ʼaia, kae ke koutou faiga tuʼumaʼu ke koutou aga fakatatau ki te ʼu tēhina mo tuagaʼane.” (2 Fakamatala 19:​6, 7) Pea ko he tagata taupau feʼaluʼaki ʼe agavaivai moʼoni, ʼe mole ina faka ʼuhiga fau anai tona ʼuhiga tagata fakafofoga ʼo te Sosiete. Neʼe ʼui lelei e te tagata taupau faka tisitilike: “Koutou agavaivai pea mo koutou fagono ki te ʼu tēhina ʼaki he lotolelei. Koutou faiga tuʼumaʼu ke faigafua te fakaōvi atu ʼo te ʼu tēhina mo tuagaʼane kia koutou.” ʼI tona ʼuhiga tagata lahi, neʼe feala ke mole fia nonofo te hahaʼi mo Sesu Kilisito, kae neʼe agavaivai pea neʼe faigafua te fakaōvi age kia te ia, māʼiape la mo te ʼu fānau neʼe nātou logo fīmālie ʼi tanatou nonofo mo ia. (Mateo 18:5; Maleko 10:​13-​16) ʼE loto e te kau tagata taupau feʼoloʼaki ke ʼaua naʼa tuʼania te fakaōvi age ʼaē kia nātou e te ʼu fānau, te ʼu tūpulaga, te hahaʼi matutuʼa, pea mo te hahaʼi fuli ʼo te kokelekasio.

11. ʼI te temi ʼaē ʼe ʼaoga ke fai ai, koteā te fua ʼo te faifakalelei?

¹¹ ʼE mahino ia, “ ʼe lahi te ʼu lakaga ʼe tou tūkia fuli ai,” pea ʼe feala pe ke hala te tagata taupau feʼaluʼaki. (Sake 3:2) Kapau ʼe nātou hala, pea ʼe nātou fai anai he faifakalelei fakamalotoloto, ke nātou tuku he faʼifaʼitaki ki te ʼu tagata ʼāfea ʼo ʼuhiga mo te agavaivai. ʼO mulimuli ki te meʼa ʼaē ʼe ʼui ia Tāʼaga Lea 22⁠:​4, “ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te faka kolōlia, pea mo te maʼuli.” Koia ʼe mole tonu koa la ki te kau kaugana fuli ʼa te ʼAtua ke nātou ‘haʼele mo tonatou ʼAtua ʼaki he agavaivai’? (Mikea 6:​8, tā ʼo te taʼu 1960) Neʼe fehuʼi age ki te tagata taupau faka silikosikilipisio pe koteā te tokoni ʼaē ka ina foaki anai ki he tagata taupau feʼaluʼaki foʼou, pea neʼe ina ʼui fēnei: “ ʼE tonu ke ke maʼu he fakaʼapaʼapa lahi pea mo he loto tokaga ki te ʼu tēhina fuli, pea mo ke faka ʼuhiga nātou ʼe nātou lelei age ia koe. ʼE lahi anai te ʼu meʼa ʼaē ka ke ako mo te ʼu tēhina. Ke ke agavaivai. ʼAua naʼa ke fetogi tou ʼuhiga. ʼAua naʼa ke fia māʼoluga.”​—Filipe 2:3.

12. He koʼe ʼe maʼuhiga ʼaupito te gāue mālohi ʼi te minisitelio faka Kilisitiano?

¹² Ko te gāue mālohi ʼi te minisitelio faka Kilisitiano ʼe ina faka maʼuhigaʼi te ʼu palalau ʼa te tagata taupau feʼaluʼaki. ʼE moʼoni, kapau ko ia pea mo tona ʼohoana ʼe nā tuku he faʼifaʼitaki lelei ʼo nā gāue mālohi ʼi te fai faka mafola, ʼe nā fakaloto mālohiʼi ai te kau tagata ʼāfea, mo tonatou ʼu ʼohoana, pea mo te toe ʼo te kokelekasio ke nātou gāue mālohi ʼi tonatou minisitelio. Neʼe uga fēnei e te tagata taupau faka silikosikilipisio: “Koutou gāue mālohi ʼi te selevisi.” Neʼe ina toe ʼui fēnei: “Neʼe ʼau fakatokagaʼi, ʼi te agamāhani, ka gāue mālohi he kokelekasio ʼi te minisitelio, pea ʼe tahitahiga te ʼu fihifihia ʼaē ʼe hoko kia nātou.” Neʼe ʼui fēnei e te tahi tagata taupau faka silikosikilipisio: “ ʼE ʼau ʼiloʼi papau, kapau ʼe gāue tahi te ʼu tagata ʼāfea mo te ʼu tēhina mo tuagaʼane ʼi te fai faka mafola, pea mo tokoni kia nātou ke nātou leleiʼia te minisitelio, ʼe iku anai te faʼahi ʼaia ki te tokalelei ʼo te ʼatamai pea mo te fiafia lahi ʼi te tauhi kia Sehova.” Ko te ʼapositolo ko Paulo, ‘neʼe lototoʼa ʼo ina fakahā te logo lelei ʼo te ʼAtua ki te kau Tesalonika, ʼi te ʼu faigataʼa lahi.’ ʼE mahino papau ia neʼe nātou leleiʼia tana ʼaʼahi pea mo tana fai faka mafola, pea neʼe nātou fakaʼamu ke nātou toe sisio kia ia!​—1 Tesalonika 2:​1, 2; 3:⁠6.

13. Koteā te meʼa ʼaē ʼe tokaga kiai te tagata taupau feʼaluʼaki ʼi te temi ʼaē ʼe fai faka mafola ai mo te kau Kilisitiano?

¹³ ʼI te temi ʼaē ʼe gāue ai mo te ʼu tēhina mo tuagaʼane ʼi te minisitelio, ʼe tokagaʼi e te tagata taupau feʼaluʼaki te ʼu meʼa ʼaē ʼe hoko kia nātou pea mo tonatou ʼu fealagia. Logope la te ʼaoga ʼo tana ʼu tokoni, kae ʼe ina ʼiloʼi ʼe feala ke matataku ʼihi ʼi tanatou fai faka mafola mo he tagata ʼāfea kua māhani lelei ʼi te faʼahi ʼaia. Koia, ʼi te tahi ʼu ʼaluʼaga, ʼe lagi lelei age he ʼu fakaloto mālohi ʼi he ʼu fai tokoni. Kapau ʼe kaugā ʼolo mo he kaugā fai faka mafola pe ko he ʼu pionie ʼo fai he ako Tohi-Tapu, ʼe lagi nātou leleiʼia age ke ina fai te ako. ʼE lagi nātou fai te faʼahi ʼaia ke feala ai hanatou hikihiki tanatou faʼahiga fai ʼo te ako.

14. He koʼe ʼe feala ke tou ʼui ko te kau tagata taupau feʼoloʼaki ʼaē ʼe gāue mālohi ʼi te fai faka mafola, ʼe nātou uga te ʼu tēhina mo tuagaʼane ke nātou fai feiā mo nātou?

¹⁴ Ko he ʼu tagata taupau feʼoloʼaki ʼe nātou gāue mālohi ʼi te fai faka mafola, ʼe nātou toe uga foki mo tonatou ʼu tēhina mo tuagaʼane ke nātou gāue mālohi. Ko te tagata taupau faka silikosikilipisio ʼi Ouganda neʼe haʼele ʼi te vao matuʼa lolotoga te hola katoa, ke feala hana fai fakatahi mo te tēhina te ako Tohi-Tapu neʼe mole tuputupu vave ʼi te faʼahi fakalaumālie. Lolotoga tanā haʼele, neʼe ʼua lahi, pea neʼe palapala fuli tonā ʼu mutuʼi meʼa. ʼI te ʼiloʼi ʼaē e te famili toko ono neʼe ko te tagata taupau feʼaluʼaki ʼaē neʼe haʼu ʼo ʼaʼahi ia nātou, neʼe nātou ōfo lahi. Neʼe nātou ʼiloʼi ʼe mole tokaga feiā tonatou ʼu takitaki lotu ki te faga ōvi. ʼI te ʼAhotapu ʼaē neʼe hoa kiai, neʼe nātou kau ki tanatou ʼuluaki fono pea neʼe nātou fakahā tanatou loto ʼaē ke nātou liliu ko he kau Fakamoʼoni ʼa Sehova.

15. Koteā te meʼa lelei ʼaē neʼe hoko ki te tagata taupau faka silikosikilipisio neʼe gāue mālohi ʼi te fai faka mafola ʼi Mekesike?

¹⁵ ʼI te fenua ʼo Oaxaca ʼi Mekesike, neʼe fai e te tagata taupau faka silikosikilipisio te meʼa neʼe mole ʼamanaki e he tahi ʼe ina fai anai. Neʼe ina fakatuʼutuʼu ke nofo ʼi te fale pilisoni ia po e fā, moʼo ʼaʼahi te toko 7 neʼe pilisoniʼi, ʼaē neʼe liliu ko te ʼu kaugā fai faka mafola ʼo te Puleʼaga. Lolotoga ni ʼu ʼaho, neʼe kaugā ʼalu mo nātou ʼaia neʼe pilisoni ʼi tanatou fai faka mafola ʼi te ʼu kogafale pilisoni pea mo fai te ʼu ako Tohi-Tapu. Ko ʼihi ʼu ako neʼe fai ʼo aʼu ki te pōʼuli, he neʼe lahi te ʼu meʼa ʼaē neʼe nātou fia ʼiloʼi. ʼE tohi fēnei e te tagata taupau feʼaluʼaki faiva ʼaia: “ ʼI te ʼosi ʼo te ʼaʼahi, ko ʼau pea mo te hahaʼi pilisoni ʼaia neʼe mātou fiafia ʼaupito ʼi tamatou fefakaloto mālohiʼaki.”

16. He koʼe ʼe ʼi ai hona ʼaoga lahi ke foaki e te kau tagata taupau feʼoloʼaki pea mo tonatou ʼohoana he ʼu fakaloto mālohi?

¹⁶ ʼE faiga e te ʼu tagata taupau feʼoloʼaki ke nātou fai he ʼu fakaloto mālohi. ʼI te ʼaʼahi ʼa Paulo ki te ʼu kokelekasio ʼaē ʼi Masetonia, neʼe ina ‘fakaloto mālohiʼi nātou ʼaki he ʼu tuʼuga palalau.’ (Gāue 20:​1, 2) Ko he ʼu palalau fakaloto mālohi ʼe feala ke ʼi ai hona ʼaoga lahi moʼo uga ʼo te kau tūpulaga pea mo te kau matutuʼa ke nātou fai he ʼu fakatuʼutuʼu fakalaumālie. ʼI te filiale lahi ʼo te Sosiete Watch Tower, neʼe fakahā e te sivi, ko te ʼu tagata taupau faka silikosikilipisio neʼe nātou fakaloto mālohiʼi te toko 20 ki te teau ʼi te kau hahaʼi ʼaē neʼe gāue ʼaki honatou lotolelei, ke nātou toʼo te selevisi katoa. ʼAki tana faʼifaʼitaki lelei ʼaē ko ia ko te kaugā fai faka mafola ʼo te Puleʼaga ʼi te temi katoa, ʼe toe liliu foki te ʼohoana ʼa te tagata taupau feʼaluʼaki ko he fakaloto mālohi.

17. Koteā te manatu ʼa te tagata taupau faka silikosikilipisio kua matuʼa, ʼo ʼuhiga mo tona pilivilesio ʼaē ʼe ko te tokoni ki te ʼu tēhina mo tuagaʼane?

¹⁷ ʼE ʼaoga tāfito he fakaloto mālohi ki te hahaʼi matutuʼa pea mo nātou ʼaē kua lotovaivai. ʼE tohi fēnei e te tagata taupau faka silikosikilipisio kua matuʼa: “Ko te koga ʼo taku gāue ʼaē ʼe tupu ai haku fiafia lahi, ʼe ko te pilivilesio ʼaē ke ʼau tokoni kia nātou ʼaē mole kei fai faka mafola pea mo nātou ʼaē kua gaʼegaʼe ʼi te faga ōvi ʼa te ʼAtua. Maʼa ʼaku, ko te ʼu palalau ʼaē ia Loma 1⁠:​11, 12 ʼe ʼi ai tonatou faka ʼuhiga makehe, heʼe ʼau maʼu ai he fakaloto mālohi pea mo he mālohi lahi ʼi taku ‘foaki he meʼa ʼofa fakalaumālie ki te hahaʼi ʼaia moʼo fakaloto mālohiʼi ʼo nātou.’ ”

Te ʼu Fakapale ʼo Tanatou Gāue Fiafia

18. Koteā te ʼu fakatuʼutuʼu faka Tohi-Tapu ʼa te kau tagata taupau feʼoloʼaki?

¹⁸ ʼE tokaga moʼoni te kau tagata taupau feʼoloʼaki ki tonatou ʼu tēhina mo tuagaʼane. ʼE nātou fia fakaloto mālohiʼi te ʼu kokelekasio, pea mo fakatuputupu nātou ʼi te faʼahi fakalaumālie. (Gāue 15:⁠41) ʼE gāue kinakina te tagata taupau feʼaluʼaki moʼo “fakaloto mālohiʼi, moʼo foaki he fakafimālie, pea mo fakatuputupu te holi ʼaē ke fakahoko te minisitelio pea mo hoko atu te maʼuliʼi ʼo te moʼoni.” (3 Soane 3) Ko te tahi tagata taupau feʼaluʼaki, ʼe ina faiga anai ke ina taupau maʼu tona ʼu tēhina mo tuagaʼane ʼi te tui. (Kolose 2:​6, 7) Koutou manatuʼi ko te tagata taupau feʼaluʼaki ʼe ko he “kaugā gāue moʼoni,” kae ʼe mole ko he tahi ʼe ina puleʼi te tui ʼa ʼihi. (Filipe 4:3; 2 Kolonito 1:​24) Ko tana ʼaʼahi ʼe ko he fealagia ʼaia ki he fakaloto mālohi, pea mo he gāue lahi, pea ʼe ko he fealagia ki te kolesi ʼo te kau tagata ʼāfea ke nātou toe vakaʼi te tuputupu ʼaē neʼe hoko pea mo vakavakaʼi te ʼu fakatuʼutuʼu ki te ka haʼu. ʼAki tana ʼu palalau pea mo tana faʼifaʼitaki, ʼe feala ke ʼamanaki e te kau kaugā fai faka mafola ʼo te kokelekasio, mo te kau pionie, mo te kau tagata faifekau faka minisitelio, pea mo te kau tagata ʼāfea ke fakaloto mālohiʼi pea mo uga nātou ki te gāue ki ʼamuli. (Vakaʼi ia 1 Tesalonika 5:​11.) Koia, tou lagolago fakamalotoloto ki te ʼu ʼaʼahi ʼa te tagata taupau feʼaluʼaki, pea mo tou fakaʼaoga katoa te gāue ʼaē ʼe fai e te tagata taupau faka tisitilike.

19, 20. Koteā te ʼu fakapale ʼaē ʼe maʼu e te kau tagata taupau feʼoloʼaki pea mo tonatou ʼu ʼohoana ʼi tanatou gāue agatonu?

¹⁹ ʼE lahi te ʼu fakapale ʼaē ʼe maʼu e te ʼu tagata taupau feʼoloʼaki pea mo tonatou ʼu ʼohoana ʼi tanatou gāue agatonu, pea ʼe feala ke nātou tui papau ko Sehova ʼe ina tapuakina anai nātou ki te ʼu gāue lelei ʼaē ʼe nātou fai. (Tāʼaga Lea 19:17; Efesi 6:8) Ko George pea mo Magdalena ʼe ko he taumatuʼa kua matutuʼa, pea neʼe nā gāue lolotoga ni ʼu taʼu ʼi te gāue ʼaē ko te ʼaʼahi ʼo te ʼu kokelekasio. ʼI te fakatahi ʼi Luxembourg, neʼe haʼu te fafine kia Magdalena, ko te fafine neʼe fai faka mafola ki ai kua hili taʼu e 20. Neʼe tupu te fia ʼiloʼi e te fafine Sutea ʼaia ia te moʼoni, ʼuhi ko te tohi faka Tohi-Tapu ʼaē neʼe tuku age e Magdalena, pea ʼaki te temi neʼe papitema. Neʼe haʼu te tuagaʼane kia George, neʼe ina manatuʼi tana fai faka mafola ʼi tona ʼapi kua hili kiai taʼu e 40. Ko ia pea mo tona ʼohoana, neʼe nā tali te moʼoni ʼuhi ko tana fakahā fakafiafia ia te logo lelei. ʼE mahino papau ia, neʼe fiafia ʼaupito ia George pea mo Magdalena.

²⁰ Neʼe fiafia ia Paulo ʼi tana sio ki te ʼu fua lelei ʼo tona minisitelio ʼi Efesi, pea neʼe lagi uga ai ia ia ke ina tohi te ʼu palalau ʼaē neʼe fai e Sesu: “ ʼE lahi age te manuʼia ʼo takita foaki, ʼi takita tali.” (Gāue 20:⁠35) Mai tona ʼaluʼaga ʼaē ko te gāue feʼaluʼaki ʼe tonu ke kita foaki tuʼumaʼu, koia ko nātou ʼaē ʼe nātou fai te gāue ʼaia ʼe nātou fiafia, tāfito mokā nātou ʼiloʼi te ʼu fua lelei ʼo tanatou gāue kinakina. Ko te tagata ʼāfea neʼe kua lotovaivai, neʼe faitohi fēnei ki te tagata taupau faka silikosikilipisio ʼaē neʼe ina tokoniʼi ia ia: “Neʼe lahi ʼaupito te ʼu tokoni ʼaē neʼe ke foaki mai ʼi te faʼahi fakalaumālie. . . . ʼE mole ke ʼiloʼi katoa anai te tokoni lahi ʼaē neʼe ke fai ki te Asafe ʼo totatou temi, ʼaē neʼe ‘teitei pe ke hēʼia tona vaʼe.’ ”​—Kolose 4:​11; Pesalemo 73:⁠2.

21. He koʼe ʼe feala ke tou ʼui ko te ʼu palalau ʼaē ʼe tuʼu ia 1 Kolonito 15:58 ʼe faka ʼuhiga ki te ʼu gāue ʼa te kau tagata taupau feʼoloʼaki?

²¹ Ko te tēhina kua matuʼa neʼe ʼi te gāue faka silikosikilipisio lolotoga ni ʼu taʼu, ʼe ina leleiʼia te fakamanatuʼi ʼo te vaega ʼo 1 Kolonito 15⁠:​58, ʼaē neʼe uga fēnei ai e Paulo: “Ke Koutou mālolohi, tuʼu tonu, ʼo fai ke lahi tuʼumaʼu takotou ʼu gāue ʼi te ʼAliki, ʼi takotou ʼiloʼi ʼaē ko takotou gāue ʼe mole vaʼiganoa ʼo ʼuhiga mo te ʼAliki.” ʼE mahino papau, ʼe lahi ʼaupito te ʼu gāue ʼaē ʼe fai e te ʼu tagata taupau feʼoloʼaki ʼi te gāue ʼa te ʼAliki. Pea ʼe tou loto fakafetaʼi ki tanatou gāue loto fiafia ʼi tonatou ʼuhiga tagata tauhi ʼapi ʼo te ʼofa makehe ʼa Sehova!

[Nota ʼi te lalo pasina]

ʼE Koutou Tali Feafeaʼi Anai?

◻ He koʼe ʼe feala ke ʼui ko te kau tagata taupau feʼoloʼaki ʼe ko he ʼu “tagata tauhi ʼapi lelei”?

◻ Koteā te ʼu faʼahi ʼaē ʼe feala ke tokoni ki te kau tagata taupau faka silikosikilipisio pea mo faka tisitilike, ke lelei age te fakahoko ʼo tanatou gāue?

◻ He koʼe ʼe maʼuhiga te agavaivai pea mo te gāue mālohi ʼi te minisitelio kia nātou ʼaē ʼe kau ʼi te gāue ʼaē ko te ʼaʼahi ʼo te kokelekasio?

◻ Koteā te ʼu fakatuʼutuʼu lelei ʼa te kau tagata taupau feʼoloʼaki?

[Paki ʼo te pasina 16]

ʼE faiga e te kau tagata taupau feʼoloʼaki ke nātou fakaloto mālohiʼi tonatou ʼu tēhina mo tuagaʼane ʼi te tui

[Paki ʼo te pasina 17]

ʼE feala ke maʼu he ʼu fua lelei e te kau tūpulaga pea mo nātou ʼaē kua matutuʼa, mo kapau ʼe nātou fakatahi mo te kau tagata taupau feʼoloʼaki pea mo tonatou ʼu ʼohoana

[Paki ʼo te pasina 18]

Ko te gāue mālohi ʼa te tagata taupau feʼaluʼaki ʼi te minisitelio, ʼe ina uga ai mo te kokelekasio ke ina fai feiā