“ ʼE Tupu Te Tui Mai Te Meʼa ʼAē Neʼe Kita Logo Kiai”
1 Ka tou maʼu he tahi ʼe ina “tali lelei te maʼuli heʼegata,” ʼe tonu ke tou fakamālohiʼi tana tui ʼo ʼuhiga mo te meʼa ʼaē neʼe logo kiai. (Gāue 13:48; Loma 10:17) Moʼo fai ʼo te faʼahi ʼaia, ʼe tonu ke tou ʼaʼahi ia nātou ʼaē ʼe apone pea mo nātou ʼaē ʼe nātou toʼo tuʼumaʼu te ʼu nusipepa, ʼo ʼave kia nātou te ʼu nusipepa foʼou pea mo fai palalau mo nātou. Kae, ʼe tonu ke tou manatuʼi, ʼe tou fakatuʼutuʼu ke tou kamata he ako ʼaki te tohi Te ʼAtamai Mālama ʼAē ʼe Ina Taki Ki Te maʼuli Heʼegata. Koʼeni he ʼu faʼahiga palalau ʼe feala ke tokoni kia koutou:
2 Mokā koutou fai he ʼaʼahi ʼo koutou palalau ki te alatike ʼaē “Koutou Fakavikiviki Ki Te Hau ʼo Te Heʼegata!,” ʼe feala ke kamata fēnei takotou palalau:
◼ “ ʼI tatā palalau talu mai ai, neʼe tā fakamanatu te ʼu meʼa ʼaē ʼe nātou fakamoʼoni ai ʼe ʼi ai te ʼAtua māfimāfi. Kae, ʼe mole tonu ke gata ʼaki pe tatatou ʼui ʼaē ʼe maʼuli moʼoni te ʼAtua. ʼE tonu ke tou ʼiloʼi tona huafa. ʼE ko te higoa fea ʼaē ʼe koutou fakaʼaogaʼi ʼo ʼuhiga mo te ʼAtua? [Tuku ke fai mai hana tali.] Ko te ʼu lauʼi miliona hahaʼi ʼe nātou fakahigoaʼi ia ia ‘ ʼAliki’ peʼe ‘ ʼAtua,’ kae ko te ʼu kupu ʼaia ʼe mole nā fakahā lelei pe ko ai ia ia. Pea tahi ʼaē meʼa, ʼe loto ia ke tou ʼiloʼi tona huafa. [Lau ia Pesalemo 83:18.] ʼE fakahā mai e te Tohi-Tapu kia tatou te ʼu meʼa ʼe lahi ʼaupito ʼo ʼuhiga mo Sehova ʼAtua, ohage ko tona fakamahino ʼi te tohi ʼaenī.” Koutou fakahā age te paki ʼaē ʼi te pasina 29 ʼo te tohi Te ʼAtamai Mālama, pea koutou lau te meʼa ʼaē ʼe tuʼu ʼi ai. ʼI takotou ʼosi palalau ki te ʼu ʼuluaki palakalafe e tolu ʼo te kapite 3, ʼe feala anai hakotou kamata he ako Tohi-Tapu!
3 Kia nātou ʼaē neʼe koutou fakatokagaʼi ki te alatike “He Koʼe ʼe Pulihi Anai Te ʼu Lotu ʼo Te Malamanei?” ʼe feala ke koutou hoko atu tanatou fia logo ʼaki te palalau ʼaenī:
◼ “ ʼI tau ʼosi lau te alatike, e lagi neʼe ke ōfo ʼi te ʼui ʼaē ʼe mole feala ke lau ʼe tatau te ʼu lotu fuli. ʼE ʼi ai te lotu moʼoni pea mo te ʼu lotu hala. Ko te faʼahi ʼaia ʼe lagaʼi ai te fehuʼi maʼuhiga, Ko te tauhi fea koa ʼaē ʼe tali e te ʼAtua? Neʼe fai e Sesu te tali ki te fehuʼi ʼaia, pea ʼe fakahā lelei ʼi te tohi ʼaenī.” Koutou fuli age te kapite 5 ʼo te tohi Te ʼAtamai Mālama, pea koutou lau te palakalafe 4, pea mo Soane 4:23, 24. Pea koutou fehuʼi age, “ ʼE ke lotolelei koa ke fai hau ako Tohi-Tapu ʼe mole totogi?” Kapau ʼe ina tali, koutou fuli ki te kapite 1 pea koutou kamata he ako.
4 Kapau neʼe ina leleiʼia te “Réveillez-vous!” ʼo te ʼaho 22 ʼo ʼApelili, ʼi te lea Fakafalani, mokā koutou toe ʼaʼahi ia ia, ʼe feala ke koutou faigaʼi ke kamata he ako Tohi-Tapu ʼaki te tohi “Te ʼAtamai Mālama”:
◼ “ ʼE lagi kei ke manatuʼi neʼe tā palalau ʼo ʼuhiga mo tatā ʼamanaki ʼaē ke tā sio ki he mālama ʼe mole toe ʼi ai anai te tau. ʼE faigataʼa tatatou fakakaukauʼi peʼe feafeaʼi moʼoni anai te faʼahi ʼaia. ʼI henī ʼe tuʼu ai te paki ʼo te mālama ʼaia. [Fakahā age te paki ʼi te ʼu pasina 188 ki te 189 ʼi te tohi Te ʼAtamai Mālama.] ʼE mole ko he meʼa fakafiafia koa la hatatou maʼu te ʼu meʼa ʼaia? [Koutou fuli age ki te pasina 4 ki te 5, ʼo koutou fakahā age te paki, pea koutou lau te talanoa ʼe tuʼu ʼi ai.] Ko te kupu ʼo te tohi ʼaenī ʼe tatau mo te ʼu palalau ʼa Sesu ʼaē ʼe tou maʼu ia Soane 17:3. [Koutou lau.] Kapau ʼe feala, ʼe ʼau fia fakahā atu peʼe feafeaʼi te fakaʼaogaʼi ʼo te tohi ʼaenī mo takotou Tohi-Tapu ke koutou maʼu ai te ʼatamai mālama ʼaia ʼaē ʼe ina foaki mai te maʼuli.” Kapau ʼe lotolelei kiai ia ia ʼaē ʼe palalau mo koutou, koutou kamata he ako ʼi te ʼuluaki kapite.
5 Kapau neʼe koutou palalau mo he tahi ʼe maʼumaʼua ʼi takotou ʼuluaki fai palalau, ʼe feala ke koutou talanoa ki te manatu ʼaenī mokā koutou toe liliu ʼo ʼaʼahi ia ia:
◼ “Neʼe mole heʼeki faʼa fualoa, neʼe ʼau ʼaʼahi mai koe pea neʼe ʼau tuku atu te ʼu nusipepa ko Te Tule Leʼo pea mo te Réveillez-vous! Ko te ʼu nusipepa ʼaia ʼe nā fakatupu ia tatou te fakaʼapaʼapa ʼaē ki te Tohi-Tapu pea mo tana ʼu tokoni ʼo ʼuhiga mo te aga ʼaē ʼe tonu ke fai. ʼI taku ʼiloʼi ʼaē ʼe ʼaoga ke mahino te hahaʼi fuli ki te Folafola ʼa te ʼAtua, neʼe ʼau toe liliu mai ʼo fakahā atu he manatu ʼe tokoni anai kia koe ke ke fai te faʼahi ʼaia.” Koutou fakahā te tohi Te ʼAtamai Mālama, pea koutou fakamahino age te ʼu kapite ʼo te pasina 3. Koutou fehuʼi age ki ai pe ko te kapite fea ʼaē ʼe ina fia ʼiloʼi tāfito, ʼosi ʼaia pea koutou fakahā age te kapite, pea koutou kamata he ako Tohi-Tapu.
6 Ko tatatou fiafia ʼe lahi anai mo kapau ʼe feala hatatou ‘avahi ki niʼihi te matapā ʼo te tui’ ʼaē ʼe ina taki ki te maʼuli heʼegata.—Gāue 14:27; Soane 17:3.