Ke Hoko Atu Tatatou Palalau Ki Te Moʼoni
1 Neʼe ʼui fēnei e te kau ʼapositolo: “ ʼE mole feala ke tuku tamatou palalau ki te ʼu meʼa ʼaē neʼe mātou sio kiai pea mo fagono kiai.” (Gāue 4:20) Ia ʼaho nei ʼe tonu foki ke hoko atu tatatou palalau ki te moʼoni. Logope la ko te tufa ʼo Te Tule Leʼo pea mo te Réveillez-vous! ʼe ko he puleʼaki lelei ke tou maʼu ai te hahaʼi ʼaē ʼe fia logo, kae ʼe tonu ke tou liliu ʼo ʼaʼahi ia nātou mo kapau ʼe tou loto ke nātou ʼiloʼi he tahi age ʼu meʼa ʼo ʼuhiga mo te moʼoni.
2 Ka koutou ʼaʼahi he tahi neʼe ina toʼo te “Réveillez-vous!” ʼi te lea Fakafalani ko tona kupu tāfito ʼaenī “Quand les guerres auront disparu,” ʼe feala ke koutou kamata he ako Tohi-Tapu ʼo koutou fakaʼaogaʼi te fehuʼi ʼaenī:
◼ “ ʼI taku haʼu talu mai ai, neʼe tā palalau ʼo ʼuhiga mo te ʼu tau ʼa te ʼu puleʼaga pea mo te kau ʼa te lotu ki te ʼu tau ʼaia. ʼE ke ʼiloʼi koa la ko te ʼu faʼahiga meʼa ʼaia ʼaē ʼe hoko, ʼe hā lelei ai ʼe tou maʼuli ʼi te temi ʼaē ʼe fakahigoaʼi e te Tohi-Tapu ko te ʼu ʼaho fakamuli? [Fakahā te tohi Te ʼAtamai Mālama. Tou lau te ʼuluaki palakalafe ʼo te kapite 11, pea tou faka maʼuhigaʼi te talanoa ʼo te pasina 102.] Ko te tohi ʼaenī ʼe ina fakamahino te puani ʼaē neʼe tā talanoa kiai, pea mo te tahi ʼu kapite e 18 ʼaē ʼe tuʼu ʼi te tānakiʼaga ʼo te ʼu kupu ʼo te tohi ʼaenī. [Fakahā te pasina 3.] Kapau ʼe feala, ʼe ʼau fia fakahā atu peʼe tokoni feafeaʼi te tohi ʼaenī kia koe ke feala ai hau mahino ki te ʼu manatu maʼuhiga ʼaia ʼaē ʼe haʼu mai te Tohi-Tapu.” Kapau ʼe feala, tou kamata he ako Tohi-Tapu ʼi te pasina 6.
3 Kapau neʼe koutou fakapapau ki he tahi ʼe koutou toe ʼaʼahi anai ia ia pea mo koutou fakamahino age peʼe lava feafeaʼi hakotou maʼu he maʼuli fīmālie ʼi te temi nei, ʼe feala ke koutou ʼui fēnei age:
◼ “ ʼI tata ʼuluaki felogoi, neʼe ʼau fakahā atu te vaega ʼo te Tohi-Tapu ʼe fakahā ai pe koʼe ʼe feala ke tou falala ki te ka haʼu ʼa te tagata. ʼI te ʼaho nei ʼe ʼau fia fakahā atu te meʼa ʼe ina fakahā ai te meʼa ʼaē ʼe feala ke ina foaki mai kia tatou he loto fīmālie ʼi te temi nei.” Lau ia Pesalemo 4:8. Koutou fuli te tohi Te ʼAtamai Mālama ʼi te pasina 168 pea mo koutou lau te palakalafe 19. ʼOsi ʼaia pea koutou fehuʼi age: “ ʼE ke fia fai koa hau ako Tohi-Tapu ʼe fakahā lelei ai peʼe lava feafeaʼi hau maʼu te faʼahiga fīmālie ʼaia ʼi tou maʼuli?” Kapau ʼe lotolelei kiai, koutou fuli ki te kapite 1.
4 Kapau neʼe koutou ʼuluaki palalau ki te fakaʼapaʼapa ʼaē ʼe tonu ke fai ki te ʼu puleʼaga, ʼi takotou toe liliu mai ʼe feala ke koutou ʼahiʼahi te faʼahiga palalau ʼaenī:
◼ “ ʼE lagi kei ke manatuʼi neʼe tā palalau ʼo ʼuhiga mo te meʼa ʼaē neʼe ʼui e Sesu ia Mateo 22:21, ʼaē ʼe tonu ke fakalogo te kau Kilisitiano ki te ʼAtua pea mo te puleʼaga. ʼE mole faigataʼa koa la ʼi ʼihi temi te fakafiafia ʼo nāua ʼaia? ʼI tau manatu ko te pule fea koa ʼaē ʼe tonu ke tou fakalogo tāfito kiai ohage ko te pule māʼoluga?” Tuku ke fai mai hana tali. Pea koutou fuli age te tohi Te ʼAtamai Mālama ʼi te kapite 14, ʼo te pasina 130, pea koutou lau te palakalafe 3. Koutou fakahā age te maʼuhiga ʼo te ako tuʼumaʼu ʼo te Tohi-Tapu. Fakahā age ki ai he ako Tohi-Tapu ʼi te tohi Te ʼAtamai Mālama.
5 ʼE feala ke koutou fakahā fakahagatonu age te ako Tohi-Tapu ʼi takotou fai te ʼaʼahi, ʼo koutou ʼui age fēnei:
◼ “ ʼE mātou tufa ʼamatou ʼu nusipepa ʼi te malamanei katoa moʼo fakahā ki te hahaʼi ʼi te potu fuli te meʼa ʼaē ʼe akoʼi mai e te Tohi-Tapu. Kapau ʼe leleiʼia e te hahaʼi te meʼa ʼaē ʼe nātou lau, ʼe mātou fakahā age kia nātou ʼe feala ke fai hanatou ako Tohi-Tapu. [Fakaʼaogaʼi te talanoa ʼaē ‘ ʼE Koutou Loto Katoa Koa Ki He ʼAʼahi?’ ʼi te tuʼaʼi pasina ʼo Te Tule Leʼo.] ʼE mātou fakaʼaogaʼi te tohi ʼaenī, Te ʼAtamai Mālama ʼAē ʼe Ina Taki Ki Te Maʼuli Heʼegata, ohage ko he takitaki. ʼE ʼau fia fakahā fakanounou atu peʼe feafeaʼi te fai ʼo te ako Tohi-Tapu.”
6 Kapau ʼe hoko atu tatatou palalau ki te moʼoni, ʼe mahino papau ia ʼe ʼi ai anai ʼihi hahaʼi ʼe nātou fakalogo pea mo nātou tali lelei.—Maleko 4:20.