Koutou Palalau ʼAki He Lotomālohi
1 Lolotoga te ʼu taʼu ʼaenī, ko te kau fai faka mafola ʼo ʼihi ʼu fenua, neʼe nātou ʼui kua faigataʼa ʼaupito te fai palalau mo te hahaʼi ʼi tonatou ʼu ʼapi. ʼE ʼui e te tokolahi, ʼi tonatou ʼu telituale ʼe fakalaka ʼi te 50 ki te teau ia te hahaʼi ʼaē ʼe mole maʼu atu kio nātou mokā nātou ʼolo ʼo faka mafola ʼi te ʼu ʼapi. Koia ʼuhi ko te faʼahi ʼaia, ʼe mole he fua ʼo te temi ʼaē ʼe tuku ki te potu ʼaia.
2 ʼI te ʼu taʼu ki muʼa atu, neʼe kaugamālie te hahaʼi ʼaē neʼe maʼu atu kio nātou ʼi te ʼAhotapu, he neʼe ʼui ʼi te agamāhani ʼe ko te ʼaho mālōlō. Kae kua fetogi te ʼu agamāhani. Ia ʼaho nei ʼe ko he agamāhani te gāue ʼa te hahaʼi, te tokaga ki te ʼu meʼa ʼaē ʼe ʼaoga ki tonatou famili ohage la ko te faifakatau, peʼe ko te temi fakafiafia, pea ko te tupuʼaga la ʼaia ʼo te mole maʼu atu ʼo nātou ki tonatou ʼu ʼapi. Koia la ʼaē, ʼo feiā aipe mo te ʼu ʼAhotapu, kua tahitahiga tatatou felāveʼi mo te hahaʼi kio nātou.
3 Ka pupuli te hahaʼi ʼi tonatou ʼu ʼapi, ko tona faka ʼuhiga kua nātou ʼolo nātou ki te tahi potu. Kapau ko tatatou fakatuʼutuʼu ʼe ko te palalau ki te hahaʼi, he koʼe ʼe mole tou palalau mo nātou ʼaē ʼe fetaulaki mo tatou—ʼi te ala, ʼi te ʼu fale fakatauʼaga meʼa, peʼe ʼi te fale gāue. Neʼe ko he agamāhani ʼa Paulo tana fakaōvi kia “nātou ʼaē neʼe fakafetaulaki ʼi te lapalasi fakatauʼaga meʼa,” ʼo fai fagonogono kia nātou. (Gāue 17:17) Neʼe ko he faʼahiga fai fagonogono neʼe maʼu ai he ʼu fua lelei, pea ʼe toe feiā pe ʼi te temi nei.
4 Ka tou ʼolo ʼi te ʼu ʼapi, ʼe tou sio ki te hahaʼi ʼe nātou haʼele ʼi te ala peʼe nātou talitali ki he tahi. Ka lāulelei te ʼaho, ʼe nātou heheka ʼi he ʼōloto peʼe nātou gaohi tanatou motokā peʼe nātou fufulu. Ko he malimali pea mo he fakaʼalofa fakafiafia, ʼe feala ke tokoni kia tatou ke tou kamata ai he fai palalau. Kapau ʼe nātou nonofo ōvi, ʼe feala ke tou ʼui age neʼe tou ʼolo kio nātou ka neʼe mole ʼi ai he tahi pea ʼi te temi nei ʼe tou fiafia ʼi te fai palalau mo nātou. Ko te tokolahi neʼe hoko kia nātou te ʼu meʼa fakafiafia, he neʼe nātou lotomālohi ʼo palalau.
5 Te ʼu Fua ʼo Te Lotomālohi: Neʼe fakamatala e te tēhina ʼe palalau kia nātou ʼaē ʼe tutuʼu, ʼaē ʼe talitali ki he kā, ʼaē ʼe haʼeʼele, peʼe heheka ʼi tanatou ʼu motokā. ʼAki he malimali pea mo he leʼo mālū, ʼe palalau ia kia nātou ohage ko he vāhaʼa fale agalelei ʼe haʼu pe ʼo ʼaʼahi ia nātou. ʼI tana fai feiā neʼe mole gata pe ʼi tana tuku te ʼu tuʼuga tohi kae neʼe ina toe kamata pe foki mo te ʼu tuʼuga ako faka Tohi-Tapu.
6 Ko te tahi tēhina mo tona ʼohoana neʼe nā fai faka mafola ʼi te ʼu ʼapi ʼo nā fetaulaki mo te fafine neʼe haʼele ʼo taki tana kato ʼe fonu ai tana meʼa kai. Neʼe nā kamata te fai palalau, ʼo nā fakavikivikiʼi te fafine ʼi tana tokaga lelei ki te ʼu meʼa ʼaē ʼe ʼaoga ki tona famili. Pea nā fehuʼi age: “Kae ko ai ʼaē ʼe feala ke ina foaki mai te ʼu meʼa ʼaē ʼe ʼaoga ki te malamanei?” ʼO tupu ai te fia logo ʼa te fafine. ʼI te hili ʼo te fai palalau fakanounou ʼaia, neʼe fakaafe ia nāua e te fafine ki tona ʼapi, ʼo kamata ai te ako Tohi-Tapu.
7 Koia ka tou ʼolo anai ʼo fai fagonogono ʼi te ʼu ʼapi, pe ko te ʼAhotapu peʼe ko he tahi ʼaho ʼo te vāhaʼa, pea mole tou maʼu atu te hahaʼi kio nātou, he koʼe ʼe mole tou lotomālohi ʼo palalau ki te hahaʼi ʼaē ʼe fetaulaki mo tatou—ʼi te ala peʼe ʼi he tahi age pe koga meʼa? (1 Tes. 2:2) ʼE fua lelei anai totatou minisitelio, pea ʼe tou maʼu anai he fiafia lahi ʼi tatatou selevisi.