Te ʼu Tonu

◼ Te ʼu tohi ʼaē ʼe tufa ʼi Sanualio: Ko te kaupepa Te Kau Fakamoʼoni ʼa Sehova​—⁠Logo Tahi Moʼo Fai ʼo Te Finegalo ʼo Te ʼAtua ʼi Te Malamanei peʼe ko he tahi age nusipepa e pasina 32 ʼi te lea fakaʼuvea ki te falā 50. Fepualio: Te tohi Te Tagata ʼAē ʼe Lahi Tokotahi ʼi Te ʼu Temi Fuli ki te falā 400. Malesio: Te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼApelili: Apone ki Te Tule Leʼo peʼe ko te Réveillez-vous! peʼe ko te ʼu nusipepa lualua. Ki te ʼu telituale ʼaē ʼe fai tuʼumaʼu, ʼe toe feala pe foki ke fakaʼaogaʼi he kaupepa (gata pe ki te kaupepa Lʼinstruction peʼe ko te nusipepa L’école). FAKATOKAGA: Ko te ʼu kokelekasio ʼaē ʼe mole heʼeki nātou maʼu te ʼu tohi ʼaē ʼe tuʼu ʼi ʼoluga, ʼaē ka tou tufa ʼi te fai faka mafola, ʼe tonu ke nātou kole ʼi tanatou Pepa Fakaʼui Tohi (S-14) ʼo te māhina ka hoa mai.

◼ ʼE tonu ke fai e te ʼu kokelekasio he ʼu fakatuʼutuʼu ʼaoga ʼo ʼuhiga mo te ʼAho Fakamanatu ʼaē ka fai ʼi te taʼu ʼaenī ʼi te Feliatolu, ʼaho 2 ʼo ʼApelili ʼi te ʼosi tō ʼo te laʼā. Logope la ʼe ko he meʼa lelei ke tahi teuteuʼi e te ʼu kokelekasio tonatou ʼAho Fakamanatu, kae ko te faʼahi ʼaia ʼe mole feala tuʼumaʼu. ʼI te ʼu koga meʼa ʼaē ʼe lahi ai te ʼu kokelekasio ʼe nātou fevaevaeʼaki te fakaʼaogaʼi ʼo te Fale ʼo te Puleʼaga, lagi ko he kokelekasio e tahi peʼe laka age ʼe feala ke nātou fakaʼaogaʼi he tahi age fale ki te afiafi ʼaia. Ko te ʼAho Fakamanatu ʼe mole tonu ke kamata tuai fau naʼa mole leleiʼia leva ia ʼe nātou ʼaē ʼe foʼofoʼou mai. Pea tahi ʼaē, ʼe mole tonu ke nounou fau te temi ia muʼa pea mo te ʼosi ʼo te toʼotoʼoga, ʼo mole feala ai he fakamālo kia nātou ʼaē neʼe hoki ʼōmai, mo foaki ʼo he tokoni fakalaumālie ki niʼihi, peʼe ko he fefakaloto mālohiʼaki. ʼI te ʼosi ʼo te fakatokagaʼi fakalelei ʼo te ʼu meʼa fuli ʼaia, ʼe tonu anai ke vakaʼi e te ʼu tagata ʼāfea pe koteā te ʼu fakatuʼutuʼu ʼaē ka tokoni lelei anai kia nātou ʼaē ʼe kau ki te ʼAho Fakamanatu, ke ʼaoga katoa kia nātou te lakaga ʼaia.

◼ Ko te akonaki makehe ki te hahaʼi ʼe fai anai ʼi te temi ʼo te ʼAho Fakamanatu ʼi te ʼAhotapu, ʼaho 21 ʼo ʼApelili. Koʼeni te kupu tāfito ʼo te akonaki ʼaia “Tou Nonofo Maʼa ʼi Te Lotolotoiga ʼo He Taʼiake ʼe Fakapikopiko.” ʼE foaki anai te plan ʼo te akonaki ʼaia. Ko te ʼu kokelekasio ʼaē ʼe ʼaʼahi nātou e te taupau faka silikosikilipisio, peʼe kau ki te fakatahi faka silikosikilipisio, peʼe ko he fakatahi makehe, ʼe nātou fakalogo anai ki te akonaki ʼaia ʼi te vāhaʼa ʼaē ki muli mai. ʼE mole feala anai ke fai fakatomuʼa e he kokelekasio te akonaki makehe ʼaia ia muʼa ʼo te ʼaho 21 ʼo ʼApelili.

◼ ʼO kamata ʼi Fepualio, ʼo aʼu ki te ʼaho 3 ʼo Malesio, ko te taupau faka silikosikilipisio ʼe ina fai anai te akonaki foʼou ki te hahaʼi, ʼaē ko tona kupu tāfito ʼaenī “Ko He Kokelekasio ʼe Nofo Agatonu ʼi Te Takitaki ʼa Kilisito.”