Tou Faka Mafola Te Logo Lelei ʼi Te Potu Fuli Pe

¹ Ko te ʼu ʼuluaki Kilisitiano neʼe nātou faka mafola te logo lelei ʼi te potu fuli pe. Neʼe nātou gāue mālohi lolotoga taʼu e 30 ʼi te kua ʼosi fakatuʼuake ʼo Sesu Kilisito, koia neʼe feala ai ke ʼui ko te logo ʼo te Puleʼaga kua “faka mafola ʼi te ʼu meʼa katoa ʼaē neʼe fakatupu ʼi te lalo lagi.”​—Kol. 1:⁠23.

² Ko te kau kaugana faiva ʼa Sehova ia ʼaho nei ʼe nātou toe fai aipe te fakatuʼutuʼu ʼaia​—ko tona faka ʼuhiga ʼe nātou fakaaʼu te logo lelei ʼo te Puleʼaga ki te hahaʼi fuli. Koteā te meʼa ʼaē ʼe lava tokoni kia tatou ke tou fakahoko te fakatuʼutuʼu ʼaia? Kua tokolahi ʼaupito te hahaʼi ʼaē ʼe gāue ʼi te ʼaho katoa, pea ʼe tahitahiga tatatou maʼu atu ia nātou ki tonatou ʼapi. ʼI te temi ʼaē ʼe mole nātou gāue ai, e lagi nātou folau, mo faifakatau, peʼe nātou maʼumaʼua ʼi te ʼu meʼa ʼaē ʼe nātou loto kiai. ʼE aʼu feafeaʼi te logo ʼo te Puleʼaga ki te hahaʼi ʼaē ʼe nātou kumi te moʼoni?​—Mat. 10:⁠11.

³ Ko ʼihi ʼe nātou logo ki te moʼoni ʼi te koga meʼa ʼaē ʼe nātou gāue ai. ʼO feiā pe mo te ʼu kolo liliki ʼaē ʼe ʼi ai te ʼu fale koloā, pea mo lahi ai te feʼaluʼaki ai ʼa te hahaʼi. ʼI te ʼu kolo lalahi, ko te hahaʼi gāue ʼaē ʼe nonofo ʼi te ʼu kolo gāue, peʼe ko te ʼu falefata lalahi, pea mo nātou ʼaē ʼe nonofo ʼi te ʼu falefata ʼaē ʼe mole faigafua hakita hū kiai​—ko tanatou hoki logo ʼaē ki te logo lelei. ʼI te ʼu fakaʼosi vāhaʼa, ko ʼihi neʼe faka mafola kia nātou te logo lelei ʼi te ʼu koga meʼa ʼaē neʼe nātou ʼolo ʼo mālōlō ai, ʼi te ʼu tauʼaga motokā peʼe ʼi te ʼu fale koloā.

⁴ ʼE lahi ʼaupito te ʼu kaugā fai faka mafola ʼe nātou faiga mālohi ke nātou fagonogono ʼi te ʼu faʼahi ʼaē ʼe feʼoloʼaki ai te hahaʼi, ʼi te ʼu koga meʼa ʼaē ʼe feala ai takita maʼu ai te hahaʼi. ʼI te kamata, neʼe mole māhani te ʼu kaugā fai faka mafola ki te faʼahiga fai ʼaia, he neʼe nātou māhani pe nātou ki te fai faka mafola ʼi te ʼu ʼapi. Kae kua feafeaʼi ʼi te temi nei?

⁵ “Kua ʼau lotomālohi ʼi toku minisitelio!” ko te ʼui ʼaia ʼa te tēhina māhani ʼi te fai faka mafola. Neʼe toe ʼui e te tahi tēhina: “ ʼE ko he tokoni ʼaia kia ʼau ke ʼau haga sio ki muʼa.” ʼE ʼui fēnei e te pionie kua fualoa tana kau ʼi te selevisi: “Ko te faʼahi ʼaia kua ina fakamālohiʼi toku ʼatamai, toku sino, pea mo ina fakamālohiʼi ʼau ʼi te faʼahi fakalaumālie, . . . pea ʼe kei ʼau haga haʼele aipe ki muʼa.” ʼE fakatokagaʼi e te kaugā fai faka mafola ʼi te temi nei, kua feala tana palalau ki te tokolahi ʼo te hahaʼi ʼaē neʼe mole heʼeki palalau mo te kau Fakamoʼoni ʼa Sehova ki muʼa atu. Ko te kau tūpulaga ʼe nātou kau fakafiafia mo nātou ki te gāue ʼaia. ʼE ʼui fēnei e te tūpulaga: “ ʼE ʼau fiafia heʼe tonu ke ʼau palalau mo te hahaʼi tokolahi.” ʼE ʼui e te tahi tūpulaga: “Kua lahi age te ʼu tohi ʼaē ʼe ʼau tuku ki te hahaʼi!” Ko te gāue ʼaenī ʼe fai ʼi te ʼu telituale ʼaē ʼe fai tuʼumaʼu.

⁶ Ko Te ʼu Tagata Taupau Feʼaluʼaki ʼe Nātou Takitaki Te Gāue: ʼI tana ʼiloʼi ʼaē ko “te ʼaluʼaga ʼo te malamanei ʼe lolotoga fetogi nei,” koia neʼe fakatuʼutuʼu ai e te Sosiete ke fetogi e te ʼu tagata taupau feʼaluʼaki tanatou polokalama fai faka mafola ʼo te vāhaʼa, ke feala te fagono ʼa te tokolahi ʼo te hahaʼi ki te logo lelei. (1 Ko. 7:​31) Lolotoga he ʼu taʼu, neʼe fakatuʼutuʼu e te ʼu tagata taupau faka silikosikilipisio ke nātou fai faka mafola ʼi te uhu, pea ke nātou fai te ʼu ʼaʼahi pea mo te ʼu ako Tohi-Tapu ʼi te hili hoʼatā. ʼI te tahi ʼu fenua, ʼe kei lagi ʼaoga te faʼahiga fai ʼaia. Ko ʼihi fenua, e lagi ʼi ai he ʼu ʼaho ʼe mole lahi te fai faka mafola ʼi te ʼu ʼapi ʼi te uhu. Kapau koia ʼaia, pea ʼe lagi fakatuʼutuʼu anai e te tagata taupau feʼaluʼaki ke fai te fai faka mafola ʼi te ʼu fale koloā, peʼe ʼi te ʼu ala. Peʼe feala ke ina fakatuʼutuʼu ke ʼolo he kiʼi kūtuga ʼo fai faka mafola ʼi te ʼu pilō, ʼi te ʼu fale koloā, ʼi te ʼu tauʼaga motokā, pea mo te tahi ʼu potu ʼaē ʼe lahi te feʼoloʼaki ai ʼa te hahaʼi. Kapau ʼe fakaʼaogaʼi lelei e te ʼu kaugā fai faka mafola te ʼu temi ʼaē ʼe nātou fai faka mafola ai, ʼe mahino ia ʼe lahi anai te hahaʼi ʼaē ka nātou maʼu.

⁷ ʼE fakahā e te ʼu tānaki ko te fetogi ʼaia neʼe tali lelei e te ʼu tagata taupau pea mo te ʼu kaugā fai faka mafola. ʼE lahi te ʼu kolesi ʼo te ʼu tagata ʼāfea neʼe nātou fakaafe te tagata taupau faka silikosikilipisio ke tokoni ki te ʼu kaugā fai faka mafola ʼo ʼuhiga mo te ʼu koga kehekehe ʼo te fai faka mafola ʼo tonatou telituale. Neʼe ʼaoga ki te ʼu kaugā fai faka mafola ʼaia ke nātou gāue tahi mo te tagata taupau ʼi he koga ʼo te ʼu gāue ʼaia. Pea ko te ʼu kaugā fai faka mafola ʼaia kua feala hanatou akoʼi niʼihi. (2 Tim. 2:⁠2) Koia ʼi te temi nei kua lahi te hahaʼi ʼaē kua aʼu kiai te logo lelei.

⁸ ʼE mahino ia, ʼe mole tonu ke koutou talitali ke ʼaʼahi koutou e te tagata taupau faka silikosikilipisio ke koutou fai ai te ʼu koga ʼaia ʼo te fai faka mafola. Koʼeni te ʼu manatu kehekehe ʼe ʼaoga anai ki tokotou telituale:

⁹ Ko Te Fagonogono ʼi Te ʼu Ala: ʼI ʼihi temi e lagi tou ʼui peʼe ‘ ʼifea koa te hahaʼi,’ mokā tou fai faka mafola ʼi te uhu kae mole tou maʼu atu nātou ki tonatou ʼapi. Neʼe lagi kua nātou ʼolo ʼo fai he fekau pe kua nātou ʼolo ʼo faifakatau. Kua koutou ʼahiʼahi koa te fai faka mafola kia nātou ʼi te ala? Ka lelei tona fai, pea ko te faʼahiga fai ʼaia ʼo te minisitelio ʼe feala ke fua lelei ʼaupito. ʼE feala ke koutou fakaōvi ki te hahaʼi pea mo koutou kamata palalau lelei age kia nātou. ʼE mole fakamaʼua mai ke tou fagonogono ki te hahaʼi fuli ʼaē ʼe feʼoloʼaki. Koutou palalau ki te ʼu hahaʼi ʼaē ʼe mole fakavilivili, ohage la ko nātou ʼaē ʼe tutuʼu ʼi muʼa ʼo te ʼu fale koloā, ʼo sioʼi te ʼu meʼa ʼaē ʼi loto, ki te hahaʼi ʼaē ʼe talitali ʼi tanatou ʼu motokā, peʼe ko te hahaʼi ʼaē ʼe talitali ki te kā. ʼI te kamata, ʼe feala ke koutou fakaʼalofa age pea koutou talitali ke fai atu hana tali. Kapau ʼe fia palalau, pea koutou fehuʼi age ki ai pe koteā tana manatu ʼo ʼuhiga mo he puani ʼe koutou manatu ʼe ina leleiʼia anai.

¹⁰ Ko te tagata taupau feʼaluʼaki neʼe ina fakaafe te toko ono kaugā fai faka mafola ke nātou fai faka mafola mo ia pea mo tona ʼohoana ʼi te ala. Neʼe koteā tona ʼu fua? ʼE ina fakamatala fēnei: “Neʼe lelei ʼaupito te pogipogi uhu ʼaia ʼaē neʼe mātou fai faka mafola ai! Neʼe mole mātou tau mo te faigataʼaʼia ʼaē ko te mole maʼu ʼo te hahaʼi ʼi tonatou ʼu ʼapi. Neʼe mātou tufa te ʼu nusipepa e 80 pea neʼe lahi mo te ʼu kiʼi pepa lotu ʼaē neʼe mātou tufa. Neʼe lahi te ʼu fai palalau fakaloto mālohi ʼaē neʼe mātou fai mo te hahaʼi. Ko te kaugā fai faka mafola, ko tana hoki kau ʼaia ʼi te fagonogono ʼi te ala, neʼe ina ʼui fēnei: ‘Kua fualoa taku kua ʼi te moʼoni, pea ʼi te temi nei kua ʼau ʼiloʼi te lelei ʼo te faʼahiga fai faka mafola ʼaia!’ ʼI te fakaʼosi ʼo te vāhaʼa, neʼe kua ʼosi fuli te ʼu nusipepa ʼo te kokelekasio.”

¹¹ ʼI tana gāue ʼi te tahi kokelekasio, neʼe ʼui age ki te tagata taupau ʼaia, ʼi te tahi uhu māfoatā neʼe tokolahi te ʼu kaugā fai faka mafola neʼe nātou kau ki te fagonogono ʼi te ala, kae neʼe mole faʼa haʼele lelei tanatou fai ʼaia. Neʼe palalau te tuagaʼane mo te toko lua pe ʼi te uhu ʼaia, he neʼe fakavilivili te hahaʼi fuli ʼaē neʼe fetaulaki mo ia ʼo nātou ʼolo ki tanatou gāue. Neʼe ʼui age e te tagata taupau ke nātou toe liliu fuli ki te ala ʼaia, pea ke ʼaua naʼa nātou uhuuhu kiai. Neʼe nātou fai te faʼahi ʼaia, pea neʼe nātou nonofo ai ʼo aʼu ki te fetapā. Ko te tuagaʼane ʼaē neʼe palalau pe mo te toko lua ʼi tana ʼuluaki fai, neʼe lelei age leva tana fai ʼaia ʼi tana toe liliu ki te ala ʼaia. Neʼe ina tufa te ʼu nusipepa e 31 pea mo te ʼu kaupepa e 15, neʼe fai palalau mo te toko 7, ʼo nātou foaki age tonatou ʼu tuʼasila, pea neʼe kamata ai tana ʼu ako Tohi-Tapu e lua! Neʼe toe fua lelei mo te fai fagonogono ʼo nātou ʼaē neʼe fagonogono tahi mo ia.

¹² Ka koutou maʼu he tahi ʼe fia logo ki te logo lelei, koutou faigaʼi ke koutou ʼiloʼi tona higoa, mo tona tuʼasila, pea mo tona numelo telefoni. ʼE mole tonu anai ke koutou fehuʼi atu aipe te ʼu meʼa ʼaia, kae ʼe feala ke koutou ʼui age: “Neʼe ʼau leleiʼia tata fai palalau ʼaenī. ʼE feala koa ke tā hoko atu ʼi he tahi ʼaho?” Peʼe koutou fehuʼi age: “ ʼE feala koa haku ʼalu atu ke tā fai palalau ʼi tou ʼapi?” Tokolahi ia nātou ʼaē ʼe fai age kiai te ʼu taʼi palalau ʼaia, ʼe nātou tali ke toe ʼaʼahi nātou. Ke tou tokakaga ke lahi hatatou ʼu pepa fakaafe ke tou fakaʼaogaʼi moʼo fakaafe ʼo nātou ʼaē ʼe fia ʼōmai ki tatatou ʼu fono.

¹³ Kapau ʼe koutou palalau mo he tahi ʼe ina fia ako te Tohi-Tapu, kae ʼe nofo ʼi he telituale ʼo he tahi kokelekasio, ʼe tonu ke koutou fakahā te faʼahi ʼaia, ke feala ai hona ʼaʼahi e te ʼu tēhina ʼo te kokelekasio ʼaia. ʼE lelei anai koa te fai fagonogono ʼi te ala moʼo faka mafola ʼo te logo lelei ʼi tokotou telituale? Kapau koia ʼaia, koutou toe vakaʼi te alatike “Ke Tou Maʼu Te Hahaʼi ʼAē ʼe Fia Logo ʼAki Tatatou Fagonogono Fakapotopoto ʼi Te Ala” ʼi Te Minisitelio ʼo Te Puleʼaga ʼo Sūlio 1994. ʼOsi ʼaia pea koutou fakatuʼutuʼu ke koutou fai te fagonogono faigamālie ʼi he temi faigamālie ke feala ai hakotou palalau mo he tokolahi.

¹⁴ Ko Te Fagonogono ʼi Te ʼu Kā: ʼI te tahi pogipogi uhu, neʼe fakatuʼutuʼu ai e te ʼu pionie ke nātou fagonogono ki te hahaʼi ʼaē neʼe talitali ki te kā ʼo ōvi ki te faleako. Logope la neʼe lelei tanatou ʼu fai palalau, neʼe ʼi ai leva te kiʼi fihifihia. ʼI te temi ʼaē neʼe kua haʼele lelei ai te fai palalau, neʼe tau mai te kā, ʼo ina tuʼusi ai te fai palalau. Kae neʼe maʼu te puleʼaki e te kau pionie, he neʼe nātou kake ki te kā, ʼo nātou hoko atu tanatou fai fagonogono ki te hahaʼi ʼaē neʼe ʼi te kā, kae neʼe nātou lolotoga fakalaka ʼi te kolo. ʼI te aʼu ʼa te kā ki te koga meʼa ʼaē neʼe tonu ke ʼalu kiai, neʼe toe liliu mai te kau pionie ʼi te kā ʼo hoko atu pe tanatou fai fagonogono ʼi te kā. ʼI te ʼosi ʼo tanatou feʼoloʼaki ʼi te kā, neʼe nātou fakatahitahi te ʼu fua lelei ʼo tanatou gāue: Neʼe nātou tufa te ʼu nusipepa e 200 tupu, pea neʼe nātou kamata te ʼu ako Tohi-Tapu e 6. Ko ʼihi hahaʼi neʼe nātou foaki tonatou ʼu tuʼasila pea mo tanatou ʼu numelo telefoni ke feala honatou ʼaʼahi ʼi tonatou ʼapi. ʼI te vāhaʼa ki muli mai, neʼe toe liliu te kau pionie ki te tauʼaga kā pea neʼe nātou toe fai te faʼahiga fai faka mafola ʼaia. Neʼe nātou tufa te ʼu nusipepa e 164 pea neʼe nātou kamata te tahi ʼu ako Tohi-Tapu. ʼI te tahi koga meʼa, neʼe tuʼu ai te kā pea neʼe haʼu te tahi ʼo heka ʼi te hekaʼaga ʼaē neʼe kei ava​—ia tafa ʼo te pionie. Neʼe haga ia ki te tēhina pea neʼe mali­mali ʼo ina ʼui age ki ai: “ ʼE ʼau ʼiloʼi, neʼe ke haʼu mo haku Tule Leʼo.”

¹⁵ Tokolahi te ʼu kaugā fai faka mafola ʼe lelei tanatou ʼu fai fagonogono mokā nātou ʼolo ʼi te ʼu kā, ʼi te saliote afi, peʼe ʼi te vakalele. ʼE lava feafeaʼi koa hakotou kamata he fai palalau mo he tahi ʼe heheka tahi mo koutou? Ko te kaugā fai faka mafola e taʼu 12 neʼe ina kamata lau te Réveillez-vous! ʼi te kā, ʼaki tana ʼamanaki ke tupu ai hana fai palalau mo te kiʼi taʼahine ʼaē ʼe heka ʼi ʼona tafa. Neʼe hoko te faʼahi ʼaia. Neʼe fehuʼi age e te kiʼi taʼahine pe koteā ʼaē ʼe ina lau, pea neʼe tali age e te kiʼi tama ʼe ina lau te puleʼaki ʼaē moʼo fakatokatoka ʼo te ʼu fihifihia ʼe tau mo te kau tūpulaga. Neʼe ina toe ʼui age neʼe lahi te ʼu fua lelei neʼe ina maʼu ʼi tana lau te alatike ʼaia, pea ʼe toe feala ke tokoni kia ia. Neʼe ina tali fakafiafia te ʼu nusipepa. Neʼe hoko atu tana fai palalau mo te ʼu tūpulaga e toko lua, neʼe nā kole age hanā ʼu nusipepa. ʼI tana fakatokagaʼi te meʼa ʼaia, ko te tagata ʼaē ʼe ina taki te kā neʼe ina fakatuʼu te kā ʼi te kauala, pea ina fehuʼi age pe koʼe ʼe lahi ʼaupito te fia lau ki te ʼu nusipepa ʼaia. ʼI tana mahino ki te faʼahi ʼaia, neʼe ina tali mo ia te ʼu nusipepa. ʼE mahino ia, neʼe mole hoko anai te faʼahi ʼaia mo kanapaula neʼe mole lahi te ʼu nusipepa ʼaē neʼe ʼave e te tūpulaga, ke feala ai hana tufa kia nātou fuli ʼaē neʼe nātou fia lau!

¹⁶ Te Fagonogono ʼi Te ʼu Lotoʼā Pea Mo Te ʼu Tauʼaga Motokā: Ko te fagonogono ʼi te ʼu lotoʼā pea mo te ʼu tauʼaga motokā ʼe ko he faʼahiga fai ʼaia ʼe lelei ke kita maʼu ai te hahaʼi. Neʼe koutou ʼahiʼahi koa te fagonogono ʼi te ʼu tauʼaga motokā ʼo te ʼu fale koloā? Koutou fakaʼaogaʼi tuʼumaʼu he kiʼi temi moʼo vakavakaʼi ʼo te hahaʼi ʼaē ʼi ʼokotou tafaʼaki. Koutou kumi he tahi ʼe mole fakavilivili peʼe ko he tahi ʼe talitali ʼi te motokā, pea koutou kamata he fai palalau fakakaumeʼa. Kapau ʼe hoko atu te fai palalau, pea koutou fakahā te logo ʼo te Puleʼaga. Koutou faiga ke koutou fai faka mafola tokotahi kia ia ʼaē ʼe koutou maʼu ʼi te tauʼaga motokā, kae ke ʼaua naʼa fakamamaʼo te kaugā fai faka mafola ʼaē. Ke ʼaua naʼa lahi fau takotou kato pea ke ʼaua naʼa koutou ʼai he meʼa ʼe tupu ai anai he tokagaʼi ʼo koutou e te hahaʼi. Koutou tokakaga naʼa tokagaʼi faʼu koutou. E lagi lelei age ke faka mafola ʼi he kiʼi temi nounou ʼi he tauʼaga motokā, pea ke koutou hiki ki he tahi tauʼaga motokā. Kapau ʼe mole fia palalau he tahi mo koutou, pea koutou hoko atu takotou gāue ki he tahi kehe. ʼI tana fai te faʼahi ʼaia, neʼe tufa ai e te tēhina te ʼu nusipepa e 90 ʼi te māhina e tahi ʼi tana fai fagonogono ʼi te ʼu tauʼaga motokā.

¹⁷ Ko ʼihi hahaʼi ʼe nātou ʼolo ki he lotoʼā ʼo mālōlō ai; ko ʼihi ʼe nātou ʼolo ʼo gaoʼi ai peʼe nātou ʼolo ʼo mālōlō ai mo tanatou ʼu tamaliki. ʼE mole tou fia gaohaʼa anai kia nātou, kae ʼe tou kumi anai he ʼu faigamālie moʼo fai fagonogono. Ko te tēhina neʼe ina kamata te fai palalau mo te tagata ʼe ina fakamaʼa te lotoʼā, pea neʼe ina fakatokagaʼi ʼe tuʼania ʼo ʼuhiga mo te toloke pea mo te ka haʼu ʼo tana ʼu tamaliki. Neʼe kamata ai he ako Tohi-Tapu pea neʼe fia tuʼumaʼu ʼi te lotoʼā.

¹⁸ Te Fagonogono Faigamālie ʼi Te ʼu Koga Meʼa ʼAē ʼe Tuʼu Ai Te ʼu Fale Koloā: Logope la ʼe mole feala tuʼumaʼu te fai faka mafola ʼi te ʼu koga meʼa ʼaē ʼe tuʼu ai te ʼu fale koloā, ko ʼihi kau fai faka mafola ʼe nātou kumi he ʼu faigamālie moʼo fai ʼo te fagonogono faigamālie. ʼE nātou heheka ʼi te hekaʼaga, pea nātou kamata palalau mo te hahaʼi ʼaē ʼe heheka ai. Kapau ʼe fia fai palalau he tahi, pea ʼe nātou foaki ki ai he kiʼi pepa lotu peʼe ko he nusipepa, ʼo nātou tokaga naʼa tokagaʼi e te hahaʼi, pea ʼe nātou fai he ʼu fakatuʼutuʼu ke nātou toe liliu ʼo ʼaʼahi ia nātou. ʼI tanatou ʼosi fagonogono ʼi he tahi ʼu fale koloā, pea nātou hiki ki he tahi age ʼo nātou kamata palalau mo he tahi kehe. ʼE mahino ia, ʼe mole tonu ke nātou fai he meʼa ke tokagaʼi nātou e te hahaʼi lolotoga tanatou fai fagonogono faigamālie ʼi te faʼahi ʼaia.

¹⁹ Ka koutou fakaʼalofa ki he tahi, koutou kamata te fai palalau ʼaki he ʼu palalau fakakaumeʼa. Kapau ʼe ina tali lelei, pea koutou fai age he fehuʼi, pea koutou tokaga fakalelei ki te meʼa ʼaē ʼe ina fakahā atu. Koutou fakahā age ʼe koutou fakaʼapaʼapa ki tana manatu. Kapau ʼe feala, pea koutou ʼio ki te meʼa ʼaē ʼe ina ʼui atu.

²⁰ Ko te tuagaʼane neʼe ina fai te palalau fakaloto fiafia mo te finematuʼa, ʼo ina fakatokagaʼi kia ia te kua totogi kovi ʼo te maʼuli. Neʼe ʼio te fafine ki te manatu ʼaia, pea neʼe hoko ai mo te fai palalau. Neʼe fakahā age e te fafine tona higoa pea mo tona tuʼasila, pea neʼe fai ai te ʼaʼahi kia ia ʼi te vāhaʼa pe ʼaia.

²¹ Ko Te Fagonogono ʼi Te ʼu Fale Koloā: Ko ʼihi kokelekasio ʼe nātou maʼu te ʼu telituale ʼaē ʼe tuʼu ai te ʼu pilō pea mo te ʼu fale koloā. Ko te tēhina ʼaē ʼe tokaga ki te ʼu telituale, ʼe feala ke ina teuteuʼi fakalelei he ʼu kate ʼo te ʼu telituale ʼaia. Kapau ko te ʼu kate ʼo te telituale ʼaē ʼe nonofo ai te hahaʼi, ʼe pipiki tahi mo te telituale ʼaia, pea ʼe tonu ke tohi fakalelei, ʼe mole tonu ke gāueʼi te ʼu fale koloā ohage ko he koga ʼo te telituale. ʼI te tahi ʼu telituale, ko te ʼu koga meʼa ʼaē ʼe tuʼu ai te ʼu koloā pea mo te ʼu pilō, ʼe feala ke fai fakatahi mo te ʼu nofoʼaga ʼaē ʼe maʼu ai. ʼE feala ke fakaafe e te ʼu tagata ʼāfea he ʼu kaugā fai faka mafola faiva ke nātou gāue tuʼumaʼu ʼi te ʼu telituale ʼaē ʼe tuʼu ai te ʼu pilō pea mo te ʼu fale koloā.

²² Kapau ʼe fakaafe koutou ke koutou kau ki te gāue ʼaia kae neʼe mole heʼeki koutou kau kiai ʼi muʼa atu, ke feala hakotou ‘lotomālohi’ ʼe lagi lelei anai ke koutou ʼuluaki fai te ʼu koloā veliveli; pea, kapau leva kua koutou lotomālohi, pea koutou fai te ʼu koloā lalahi. (1 Tes. 2:⁠2) Mokā koutou fai faka mafola ʼi te ʼu fale koloā, pea ʼe tonu ke koutou teuteu lelei ohage ko hakotou ʼolo ki he fono ʼi te Fale ʼo te Puleʼaga. Kapau ʼe feala, pea koutou hū ki te koloā mo kapau ʼe mole ʼi ai he kau faifakatau. Koutou ʼui age ʼe koutou fia palalau mo te tagata ʼaē ʼoʼona te koloā peʼe ko ia ʼaē ʼe tokaga ki te koloā. Koutou malimali pea mo lotomāfana, pea tahi ʼaē meʼa, ke koutou palalau fakanounou. ʼE mole ʼaoga ke kita faifakalelei age. ʼE lahi te kau gāue kua nātou māhani ki te faʼahi ʼaia pea ʼe mole nātou punamaʼuli mokā tou ʼolo age ʼo palalau kia nātou.

²³ ʼI takotou ʼosi fakamālo kia ia ʼaē ʼi te fale koloā, ʼe feala ke koutou ʼui fēnei: ʼE lahi ʼaupito te maʼumaʼua ʼo te hahaʼi gāue, ʼo tahitahiga ai tamatou maʼu nātou ʼi tonatou ʼu ʼapi, koia ʼe mātou ʼaʼahi ai koutou ki takotou gāue ke mātou tuku atu te alatike fakaloto mālohi ʼaenī ke koutou lau.” Pea fai he fakamatala e tahi peʼe lua ʼo ʼuhiga mo te ʼu nusipepa ʼaia.

²⁴ Peʼe koutou fai te faʼahiga palalau ʼaenī kia ia ʼaē ʼoʼona te fale koloā: “Neʼe mātou fakatokagaʼi ko te hahaʼi gāue ʼe nātou faiga ke nātou ʼiloʼi lelei te ʼu meʼa ʼaē ʼe hoko. Ko te alatike fakamuli ʼo Te Tule Leʼo (peʼe ko te Réveillez-vous!) ʼe ina fakahā ai te alatike ʼe ʼaoga kia tatou takitokotahi.” Fakamahino age ki ai pe koteā te ʼu alatike ʼaia, pea koutou fakaʼosi te fai palalau ʼo koutou ʼui fēnei: “ ʼE mātou ʼiloʼi papau ʼe koutou leleiʼia anai te lau ʼo te alatike ʼaia.”

²⁵ kapau ʼe ʼi ai he kau gāue, pea kapau ko he meʼa ʼe feala ke koutou fai, koutou ʼui age fēnei: “ ʼE koutou lotolelei koa ke ʼau fakahā te ʼu alatike ʼaenī ki tau kau gāue?” Kapau ʼe ina fakagafua atu, pea koutou manatuʼi neʼe koutou fakapapau ʼe mole koutou fualoa anai, pea ʼe fakaʼamu e te tagata ʼaē ʼoʼona te fale koloā ke koutou fai te faʼahi ʼaia. Kapau ʼe fia fai palalau ia ia ʼaē ʼe gāue, pea ʼe lelei anai ke koutou fakatuʼutuʼu mo ia ke koutou ʼaʼahi ia ia ki tona ʼapi.

²⁶ Mole heʼeki faʼa fualoa, ʼi te kiʼi kolo veliveli, neʼe faka mafola te ʼu kaugā fai faka mafola mo te tagata taupau faka silikosikilipisio ʼi te ʼu koloā. ʼI te kamata, neʼe matataku te ʼu kaugā fai faka mafola, koteʼuhi neʼe mole heʼeki nātou fai te faʼahiga fai faka mafola ʼaia; kae mole tuai, pea neʼe nātou fiafia pea mo nātou leleiʼia te faʼahi ʼaia. Mole heʼeki hola katoa tanatou fai, kae kua nātou palalau mo te toko 37 hahaʼi pea neʼe nātou tufa te ʼu nusipepa e 24 pea mo te ʼu kaupepa e 4. Neʼe fakatokagaʼi e te tēhina ʼi te aga māhani ʼi he māhina katoa, ʼe mole feala ke nātou felāveʼi mo he kaugamālie feiā ʼi tanatou fai faka mafola ʼi te ʼu ʼapi, ohage ko tanatou fai faka mafola ʼi te ʼu fale koloā ʼi te kiʼi temi nounou ʼaia.

²⁷ Tou Fakatupu He ʼu Faigamālie Ke Feala Ai Hatatou Fai Faka Mafola: Neʼe mole gata pe te fai faka mafola ʼa Sesu ki tana feʼaluʼaki ʼi te ʼu ʼapi. Neʼe ina faka mafola te logo lelei ʼi te ʼu lakaga fuli. (Mat. 9:9; Luka 19:​1-​10; Soane 4:​6-​15) Koutou fakatokagaʼi peʼe fakatupu feafeaʼi e ʼihi kaugā fai faka mafola te ʼu faigamālie moʼo fai faka mafola.

²⁸ Ko ʼihi ʼe nātou fai fagonogono ki te ʼu mātuʼa ʼaē ʼe talitali ki tanatou tamaliki ʼi te hūʼaga ʼo te faleako. Mai tona ʼaluʼaga ʼaē ʼe ʼōmai te ʼu mātuʼa ia minuta e 20 ʼi muʼa ʼo te ʼosi ʼo te ako, ʼe maʼu he temi moʼo fakatupu he fai palalau mo nātou ʼo ʼuhiga mo he manatu faka Tohi-Tapu.

²⁹ E tokolahi te kau pionie ʼe nātou ʼiloʼi te maʼua ʼaē ke nātou palalau mo te hahaʼi ʼaē ʼe fia logo tāfito ki he manatu ʼe tuʼu ʼi tatatou ʼu nusipepa. Ohage la, ko te tuagaʼane neʼe ina maʼu he ʼu fua lelei ʼi te ʼu faleako e 6 ʼi te telituale ʼo tona kokelekasio, ʼi tana fakahā te alatike “L’école en crise,” ʼi te Réveillez-vous! ʼo te ʼaho 22 ʼo Tesepeli 1995. Neʼe ina ʼaʼahi foki mo te ʼu pilō faka puleʼaga ʼaē ʼe tokoni ki te ʼu famili, ʼo fakahā kia nātou te ʼu nusipepa ʼo ʼuhiga mo te maʼuli faka famili pea mo te fakaʼalikiʼi ʼo te tamaliki, pea neʼe nātou tali ke toe liliu age mo te ʼu nusipepa foʼou ʼaē ʼe toe talanoa pe ki te ʼu manatu ʼaia. Neʼe ina tuku te Réveillez-vous! ʼo te ʼaho 8 ʼo Malesio 1996 ki te pilō ʼaē ʼe tokaga ki te hahaʼi ʼaē ʼe mole hanatou gāue, pea neʼe nātou ʼui ʼe ko he alatike “ ʼe mole hona fakatatau.”

³⁰ ʼE ʼui e te tagata taupau faka tisitilike, ko ia mo tona ʼohoana, ʼe nā fai fagonogono lolotoga tanā faifakatau ʼi te fale koloā. ʼE nā faifakatau ʼi te temi ʼaē ʼe mole hahaʼi ai te fale koloā, pea ʼi te temi ʼaē ʼe feʼoloʼaki ai te hahaʼi ʼo fai tanatou ʼu fakatau. ʼE lahi ʼaupito tanā ʼu fai palalau mo te hahaʼi.

³¹ Tokolahi te ʼu kaugā fai faka mafola ʼe nātou fakamatala te ʼu fua lelei ʼaē ʼe nātou maʼu ʼi tanatou fagonogono ki te hahaʼi ʼi te ʼu fale fai fō. ʼE mole gata pe tanatou gāue ki te tuku ʼo te ʼu nusipepa ki te fale ʼaia mokā ʼe mole ʼi ai he tahi, kae ʼe nātou fakatuʼutuʼu ke nātou fakahā te logo lelei ki te hahaʼi. Koia ʼe nātou faiga ke nātou palalau fakahagatonu ki te hahaʼi ʼaē ʼe ʼōmai ki te ʼu fale ʼaia.

³² ʼI te tahi ʼu fenua, ʼe ʼi ai te ʼu kaugā fai faka mafola ʼe fakagafua ke nātou fagonogono ʼi te ʼu malaʼe vakalele. ʼI ʼihi temi, ʼe nātou fagonogono ki te kau folau ʼaē ʼe nonofo ʼi te ʼu fenua ʼaē ʼe tokosiʼi ai te kau Fakamoʼoni ʼa Sehova. Kapau ʼe fia logo he tahi ki te logo lelei, pea ʼe nātou foaki he kiʼi pepa lotu peʼe ko te ʼu nusipepa.

³³ Kapau ʼi te telituale ʼo te kokelekasio, ʼe ʼi ai he ʼu falefata ʼe mole gafua hatatou hū feiā kiai, pea ʼe feala ke tou faka mafola ki te tagata leʼo, peʼe ki te ʼu pule ʼo te fale ʼaia. Ko te faʼahi ʼaia ʼe toe fakaʼaogaʼi ʼi te ʼu ʼapi ʼaē ʼe mole gafua hakita hū feiā kiai. Ko te tagata taupau faka silikosikilipisio pea mo te ʼu kaugā fai faka mafola, neʼe nātou fai te faʼahiga fai faka mafola ʼaia ʼi te ʼu falefata e 7. ʼI te ʼu fale ʼaia, neʼe nātou ʼui age ki te tagata pule, logope la ʼe mole tali ke nātou palalau mo te hahaʼi ʼaē ʼe nonofo ʼi te ʼu kogafale ohage ko tanatou fai māhani, kae neʼe nātou fakahā age ʼe nātou fia tuku age kia nātou te ʼu nusipepa foʼou. Ko te ʼu tagata pule ʼo te ʼu fale ʼaia e 7, neʼe nātou tali fakafiafia te ʼu nusipepa pea neʼe nātou kole age he tahi ʼu nusipepa! Ko nātou ʼaē ʼe nonofo ʼi te ʼu fale­fata ʼaia neʼe fakahā kia nātou te logo lelei ʼi te telefoni.

³⁴ Koutou Faiga Mālohi ʼo Fai Faka Mafola ʼi Te Potu Fuli Pe: Ko te maʼuliʼi ʼo tatatou foaki ʼo totatou maʼuli ki te ʼAtua, ʼe pipiki kiai te maʼuhiga ʼo totatou maʼua ʼaē ko te faka mafola ʼo te logo ʼo te Puleʼaga. Ke feala hatatou palalau ki te hahaʼi, ʼi te temi ʼaē ʼe nātou faigamālie ai, ʼe tonu ke tou tuku keheʼi te ʼu meʼa ʼaē ʼe tou loto tāfito kiai, ke “feala ai ʼi te ʼu ʼaluʼaga kehekehe ke tou hāofaki niʼihi.” Ko te kau kaugana fuli ʼa Sehova ʼe nātou fia ʼui fēnei, ohage ko te ʼui ʼa te ʼapositolo ko Paulo: “Heʼe ʼau fai ia meʼa fuli ʼuhi ko te logo lelei, ke feala haku kau kiai mo ʼihi.”​—1 Ko. 9:​22, 23.

³⁵ Neʼe tohi fēnei e Paulo ki muli age: “ ʼE ʼau faka kolōliaʼi anai ia ʼau ʼuhi ko toku ʼu vaivaiʼaga, ke puipui ʼau e te mālohi ʼa Kilisito ohage ko he fale fehikitaki. . . . Heʼe ʼi te temi ʼaē ʼe ʼau vaivai ai, ko te temi ʼaia ʼaē ʼe ʼau mālohi ai.” (2 Ko. 12:​9, 10) Ko tona faka ʼuhiga, ʼe mole he tahi ia tatou ʼe feala ke ina fakahoko te gāue ʼaia ʼaki tona mālohi totonu. ʼE tonu ke tou kole kia Sehova ke ina foaki mai tona laumālie maʼoniʼoni. Kapau ʼe tou kole ki te ʼAtua ke ina foaki mai tona mālohi, pea ʼe tou falala ʼe ina tali anai tatatou ʼu kole. Pea ko totatou ʼofa ki te hahaʼi ʼe ina uga anai tatou ke tou kumi te ʼu temi faigamālie moʼo faka mafola te logo lelei ki te hahaʼi, tatau aipe pe ko te potu fea ʼaē ʼe nātou nonofo ai. Lolotoga te vāhaʼa ka haʼu, he koʼe ʼe mole tou ʼahiʼahi te ʼu manatu ʼaē ʼe tuʼu ʼi te pepa ʼaenī?