Ke Tou Maʼu Te Hahaʼi ʼAē ʼe Fia Logo ʼAki Tatatou Fagonogono Fakapotopoto ʼi Te Ala
1 Neʼe akoʼi e Sesu tana kau tisipulo ke nātou kumi ia nātou ʼaē ʼe fia fagono ki te logo ʼo te Puleʼaga. (Mat. 10:11) Kae, ʼe lahi te ʼu kolo ia ʼaho nei, ʼe faigataʼa ʼaupito te maʼu ʼo te hahaʼi ʼi tonatou ʼu ʼapi. Kae, koteā koa te meʼa ʼe feala ke fai moʼo maʼu ʼo te hahaʼi ʼaē e lagi ʼe mole maʼu ʼi tonatou ʼu ʼapi?
2 Ko te fagonogono ʼi te ala ʼe feala ko he faʼahi e lelei moʼo maʼu ʼo te hahaʼi ʼaē neʼe mole maʼu atu ki tonatou ʼu ʼapi ʼi te fai faka mafola. ʼE feala ke tou fagonogono ʼi te ʼu koga meʼa talitali kā, ʼo ōvi ki he ʼu fale ʼe tapuʼi tatatou hū kiai, ʼi te ʼu malaʼe ʼaē ʼe feʼoloʼaki ai te hahaʼi, pea mo ʼihi age faʼahi ʼe haʼele ai te hahaʼi ʼi te ʼaho fuli.
3 ʼI te talanoa ʼaē ki te fagonogono ʼi te ala, neʼe tuʼaniaʼi e ʼihi. E lagi ʼe nātou lotolotolua ʼi te kau ki te gāue ʼaia koteʼuhi ʼe nātou umiuminoa peʼe nātou ʼui fakatomuʼa ʼe fakafisi age te hahaʼi ʼaē ʼe mole nātou leleiʼia te logo ʼo te Puleʼaga. Ko te ʼu tuʼania ʼaia ʼi te agamāhani ʼe mole hona fakatafitoʼaga. Ko nātou ʼaē kua faiva ʼi te gāue ʼaia ʼe ʼui maʼa nātou ʼe mole faigataʼa age ia ʼi te fai faka mafola ʼaē ʼi te ʼu ʼapi. Koia, neʼe nātou fakatokagaʼi ʼe tokolahi te hahaʼi kua māhani kia nātou te faka felogoi ʼi te ala ʼo ʼuhiga mo he ʼu tupuʼaga kehekehe, pea ko ʼihi e lagi lahi age tanatou fia palalau pea mo fakalogo ʼi hatatou ʼolo ʼo fisifisi ʼonatou matapā. Koia kapau ʼe tou ‘lotomālohi,’ e lagi tou punamaʼuli ʼi te fua lelei ʼo tatatou gāue.—1 Tes. 2:2.
4 E feafeaʼi koa te faiva ʼaupito ʼi te fagonogono ʼi te ala? ʼE maʼuhiga takotou teuteu fakalelei. Ke koutou lau fakatomuʼa te ʼu nusipepa pea ke koutou fakatokagaʼi he puani e tahi peʼe lua ʼe koutou fakasiosio ʼe fia logo kiai te hahaʼi ʼaē ʼe felāveʼi mo koutou. Ko te fakahā ʼo te logo ʼi te ʼu sekonita e 30 ʼe lelei. ʼUhi ko te fakatuʼutuʼu ko te fai palalau mo niʼihi, koutou fili he faʼahi ʼe lahi te hahaʼi ʼe feʼoloʼaki ʼi ai. Logope la ʼaē ko he meʼa lelei takita fagonogono mo he tahi kaugā faka mafola, ʼe lelei age takita gāue kehekehe. Ko te kau fai faka mafola ʼaē ʼe gāue tahi ʼe feala pe ke lahi te temi ʼe nātou fai palalau ai kae mole nātou tokakaga ki te hahaʼi ʼaē e lagi ʼe fia fakalogo ki te logo ʼo te Puleʼaga.
5 Ko te tutuʼu ʼi he faʼahi ʼo fakahā pe te ʼu nusipepa ʼe mole lelei age ia ʼi te fakatuʼutuʼu ʼaē ke kita faka felāveʼi ki te hahaʼi. Koutou faiga ke koutou sisio ki te hahaʼi. Ke koutou fiafia, mo aga faka kaumeʼa, pea ke koutou faiga ke kamata hakotou fai palalau. ʼI ʼihi faʼahi, ʼe feala ke koutou haʼele siʼisiʼi pe mo ia ʼaē ʼe koutou palalau ki ai. Kapau ʼe lotolelei ia kiai, koutou fakahā ake te ʼu nusipepa. Kapau ʼe mole ina tali te ʼu nusipepa, e lagi koutou fia tuku ake he kiʼi pepa lotu.
6 ʼI te agamāhani ʼe lelei te teuteuʼi ʼo he fakahā fakanounou ʼo te moʼoni, ʼo lagaʼi ai he fehuʼi peʼe ko he talanoa ʼe uga anai te fia logo. Kapau ʼe ina tali lelei, koutou faiga ke koutou ʼiloʼi tona higoa, tona tuʼasila, pea lagi mo tona numelo telefoni ke feala ai hakotou tokoni ki ai. ʼE feala ke koutou ʼui age: “Kapau ʼe lahi te meʼa ʼe koutou fia ʼiloʼi, ʼe ʼau fiafia ʼi te ʼaʼahi ʼo koutou ki tokotou ʼapi peʼe fai he fakatuʼutuʼu mo he tahi kau Fakamoʼoni ke ina ʼaʼahi koutou.”
7 Ko he tagata ʼāfea neʼe fai faka mafola ki he fafine ʼohoana pea neʼe ʼui age e te fafine neʼe mole heʼeki palalau ia mo he kau Fakamoʼoni ʼi tona ʼapi. Neʼe ina tali he tohi pea mo lotolelei ke ʼalu age he tuagaʼane ki tona ʼapi ʼi te temi ʼaē ʼe fealagia ai. ʼE lahi ʼaupito ia nātou ʼaē ʼe ʼaoga ke tou maʼu pea ke tou tokoni kia nātou mo kapau ʼe tou faiva ʼi te fagonogono ʼi te ala.—Gāue 17:17.