ʼE Fua Lelei Ia Te Fagonogono ʼi Te Ala
1. Ko te ʼaluʼaga fea ʼaē ʼe feala ke tou faʼifaʼitakiʼi ai ia Sesu?
1 Lolotoga tana minisitelio ʼaē ʼi te kele, neʼe mole tuʼania ia Sesu ʼi te palalau ki te hahaʼi ʼaē neʼe felāveʼi mo ia ʼi te ala, pea mo te tahi ʼu koga meʼa ʼaē ʼe ʼi ai he kaugamālie. (Luka 9:57-61; Soa. 4:7) Neʼe ina fia fakahā te logo maʼuhiga ki te hahaʼi ʼaē ʼe felāveʼi mo ia. Iā ʼaho nei, ko te fagonogono ʼi te ala, ʼe ko he puleʼaki lelei ʼaia, moʼo tokoni ki te hahaʼi ke natou maʼu ia te poto fakaʼatua. (Taag. 1:20) ʼE fua lelei anai tatatou fagonogono ʼi te ala, mo kapau ʼe tou ʼolo ʼo fai palalau mo te hahaʼi pea mo kapau ʼe tou fakaʼaogaʼi te fakasiosio tonu.
2. ʼI tatatou fagonogono ʼi te ala, ʼe feafeaʼi hatatou ʼolo ʼo fai palalau mo te hahaʼi?
2 Tou ʼOlo ʼo Fai Palalau Mo Te Hahaʼi: ʼI te agamāhani ʼe lelei age hatatou fakaovi ki te hahaʼi ʼi hatatou tutuʼu peʼe tou fakatalitali ke ovi mai he tahi. Tou malimali, mo tou sio ki te hahaʼi, ʼo tou aga fakakaumeʼa. Kapau ʼe tou gāue mo he tahi ʼu kaugā fagona, ʼi te agamāhani ʼe lelei age hatatou fakaovi takitokotahi ki te hahaʼi. ʼE tonu ke tou ʼolo ke tou toe felāveʼi mo te hahaʼi ʼaē neʼe fia logo. Kapau ʼe fealagia, ʼi te ʼosi ʼo tatatou fai palalau, tou kole age peʼe mole feala lā ke tou toe felāveʼi. Ko ʼihi kaugā fagona ʼe natou gāue tuʼumaʼu ʼi te koga meʼa pē e tahi, ke feala hanatou toe felāveʼi mo te ʼu hahaʼi neʼe kua natou fai palalau, ke toe hoko atu tanatou fia logo ki te moʼoni.
3. ʼE feafeaʼi koa hatatou fakaʼaogaʼi te fakasiosio tonu mokā tou fagonogono ʼi te ala?
3 Tou Fakaʼaogaʼi Te Fakasiosio Tonu: Tou maʼu he fakasiosio lelei ʼi te kumi ʼo he koga meʼa ʼo te ala ʼaē ʼe feala ke tou tutuʼu ai pea mo vakaʼi he tahi ʼe tou fakaovi ki ai. ʼE mole ʼaoga anai ke tou fagonogono ki te hahaʼi fuli. Tou fakasiosio lelei ki te meʼa ʼaē ʼe fai e te hahaʼi. Kapau anai ʼe tou sio ki he tahi ʼe fakavilivili faʼu, ʼe lelei age pē tona tuku ke fakalaka. Kā tou fagonogono ʼi muʼa ʼo he ʼu matani gāue, ke tou fakaʼeteʼete naʼa tou fakalelu ki te pule ʼo te matani gāue. ʼI te agamāhani, ʼe lelei age te fagonogono ki te hahaʼi ʼi tanatou ʼosi gāue, ʼi hatatou faiga ke tou fagonogono age ʼi tanatou ʼulu gāue. Ke ʼaua naʼa tou fakaʼoho te hahaʼi mokā tou fakaovi kiā nātou. Tou toe maʼu foki te fakasiosio tonu mokā tou foaki age he ʼu tohi. Kapau ʼe mole faʼa leleiʼia e te hahaʼi ia te logo lelei, ʼe feala ke tou tuku age he kiʼi pepa lotu, kae mole tou fakatoʼo leva age he ʼu nusipepa.
4. He koʼē ko te fagonogono ʼi te ala ʼe ko he faʼahiga fai fakamafola ʼe fua lelei pea mo fakafiafia?
4 Ko te fagonogono ʼi te ala ʼe ina fakafealagia mai kiā tātou ke tou tō lahi te pulapula ʼo te moʼoni ʼi he kiʼi temi siʼisiʼi. (Tnk. 11:6) Ko ʼihi hahaʼi ʼaē ʼe feala ke tou felāveʼi mo nātou ʼi te ala, ʼe mole feala ke tou maʼu iō nātou ʼi te temi ʼaē ʼe tou fai fakamafola ʼi te ʼu ʼapi. Koia ʼe lelei ke tou foimo fai ia te fagonogono ʼi te ala, ʼaē ʼe ko he faʼahiga fai fakamafola fakafiafia mo fua lelei.