Te Faifakamafola ʼAki Te Laupapa
1. Kotea te fakalotomalohi ʼe fai ki te ʼu kokelekasio ʼae ʼe maʼu ai he ʼu koga meʼa ʼe kaugā malie ai te hahaʼi ʼae ʼe fakalaka lalo ai?
1 ʼE fakalotomalohiʼi ia te ʼu kokelekasio ʼae ʼe maʼu ai he ʼu koga meʼa ʼe kaugā malie ai te hahaʼi ʼae ʼe fakalaka lalo, ke natou fakaʼaogaʼi ia te ʼu laupapa ʼi te faifakamafola faigamalie. Kapau ʼe kotou fakaʼaogaʼi he laupapa pea ʼe tonu ke ʼi ai he tahi ʼe tuʼu peʼe heka ovi ki te laupapa. Koia ʼe toe feala foki ke nonofo ovi he foʼi toko lua ʼi te laupapa. ʼE tonu ke faiga ia natou ʼae ʼe tutuʼu ovi ki te laupapa ke natou agalelei, mo aga fakakaumeʼa pea mo tali kaiga lelei. Kapau ʼe haʼu he tahi ki te laupapa pea ʼe feala ki he tahi ia naua ke ina kamata ia te faipalalau. ʼE feala tana ui fenei: “Neʼe kua ke feʼekeʼaki koa pe kotea ʼae ʼe ui mai ʼi te Tohi-Tapu ʼo ʼuhiga mo te faʼahi ʼaeni?” ʼE feala ki he tahi age tehina peʼe ko he ʼu tehina ʼe toko lua ke nā leʼoleʼo ia te laupapa lolotoga te temi ʼae ʼe fai ai te faipalalau.
2. Fakamatala he aluʼaga ʼe fakaha ai te maʼuhiga ʼo te faifakamafola ʼaki te laupapa.
2 Ko te faʼahiga fai ʼaia, neʼe iku lelei ai ki he ʼu ako Fakatohi-tapu. Ko he finemui kei ako, neʼe ina fai he ʼu fekumi ʼo ʼuhiga mo te kau Fakamoʼoni ʼa Sehova kaʼe neʼe mole feala ke ina maʼu he Fale Fono. ʼI te vahaʼa ʼe hoa mai ki ai, neʼe sio ki he laupapa ʼi te univelesite. Neʼe kamata ai tana ako Tohi-Tapu pea ʼi te temi nei kua papitema. Pea ʼe lagolago ki te faʼahiga fai ʼaia ʼo te faifakamafola ʼaki te laupapa.
3. Kotea ia te manatu ʼa ʼihi ʼo ʼuhiga mo te faifakamafola ʼaki te laupapa?
3 Neʼe ui fenei e he tuagaʼane neʼe fiafia ʼi tana faifakamafola ʼaki te laupapa: “Neʼe tutuʼu ʼihi ʼi te laupapa ʼo toʼo te ʼu nusipepa fakamuli. Ko ʼihi neʼe mole heʼeki natou faipalalau mo te kau Fakamoʼoni ʼa Sehova. Neʼe au tokagaʼi kapau ʼe fai te faʼahiga fai ʼaia ʼaki te laupapa, ʼe feala ke malave ki te hahaʼi.” Neʼe toe tokagaʼi fenei e te tahi tuagaʼane: “ʼE ko he faʼahiga faifakamafola ʼe fua lelei koteʼuhi ʼe ʼomai te hahaʼi kia koutou. Logo la ʼe mole natou fia fai ki ai kaʼe ʼe natou fia iloʼi meʼa fuli.”
4. He koʼe ʼe lelei ke tou fakatuʼu maʼu ia te laupapa ʼi te koga meʼa mo te ʼu ʼaho ʼo te vahaʼa ʼae kua fakatuʼutuʼu ki ai?
4 ʼE lelei ke tou fakatuʼu maʼu ia te laupapa ʼi te koga meʼa pea mo te ʼu ʼaho ʼo te vahaʼa ʼae kua fakatuʼutuʼu ki ai. ʼI tatatou fai ia te faʼahi ʼaia, ʼe liliu anai ko he agamahani ia te sisio ʼa te hahaʼi ki te laupapa. Pea ʼe natou fiafia anai ʼi te fakaovi atu ʼo fai he fehuʼi peʼe toʼo hanatou tohi. ʼE fai koa ʼe takotou kokelekasio he fakatuʼutuʼu ʼo ʼuhiga mo te faifakamafola ʼaki te laupapa? Kapau koia, ʼe lagi feala takotou lagolago ki te “fagonogono te puleaga o te Atua” ʼaki he lotofiafia pea ʼe fua lelei anai.—Luka 9:60.