ʼE Feafeaʼi Hatatou Fakaʼaogaʼi Ia Te Laupapa ʼi Te Faifakamafola?

ʼE fua lelei ia te fakaʼaogaʼi ʼo te laupapa ʼi tatatou faifakamafola, moʼo taki mai ia te hahaʼi ʼae ʼe fia logo ki te moʼoni. (Soa. 6:44) Koia, neʼe fakalotomalohiʼi ia te kau tagata ʼafeā ke natou fakatuʼutuʼu ia he faifakamafola ʼi te telituale ʼo te kokelekasio ʼae ʼe hahaʼi ai natou ʼe fakalaka lalo. ʼE feala tatatou feʼaveʼaki ia te laupapa, koia ʼae ʼi te agamahani ʼe mole ʼaoga ai ke tou kole ke fakagafua mai e te puleʼaga ia te faʼahiga faifakamafola ʼaia. Ko ai koa ʼae ʼe feala ke ina fakaʼaogaʼi ia te laupapa? Ko te kau faifakamafola ʼae ʼe natou agafakapotopoto, mo fakaʼapaʼapa tanatou faʼahiga teuteu pea mo tanatou faʼahiga palalau, pea mo faiva ʼi te faipalalau mo te hahaʼi. Tou vakaʼi ia te ʼu meʼa ʼae tonu ke fai pea mo ʼae ʼe mole tonu ke fai e te kau faifakamafola. Pea ʼe tokoni anai ia te faʼahi ʼaia kia natou ke natou maʼu ai he ʼu fua lelei.

Te ʼu Meʼa ʼAe ʼe Tonu Ke Fai:

Kotou agafakakaumeʼa, mo tali leleiʼi pea mo tokoni ki te hahaʼi. Ko ʼihi kau faifakamafola, ʼe natou mata malimali pea mo natou fakamalō ki te hahaʼi. Kapau ʼe fakalaka he tahi kaʼe ʼe ina sioʼi ia te laupapa, ʼe feala hakotou ui age “ʼE feala pe hau filifili hau tohi mo kapau ʼe ke loto ki ai.”
Ke mole kotou mamaʼo peʼe ovi fau mai te laupapa. ʼI ʼihi koga meʼa, ʼe fua lelei ki te kau faifakamafola ia tanatou mole faʼa nonofo mamaʼo ʼi te laupapa. Kaʼe ki te manatu ʼa ʼihi, ʼe lagi mole fia tuʼu anai te hahaʼi ʼaki te faʼahiga fai ʼaia, koia ʼae ʼe natou nofo mamaʼo ai, ʼo kaku ki te tuʼu ʼa he tahi ʼi te laupapa. Pea moka fakaovi mai he tahi ki te laupapa, kotou faiga ke kotou faipalalau mo ia, ʼo lagi kotou fehuʼi age, “Neʼe kua kotou fai koa ia te fehuʼi ʼaia?”
Kotou fakaʼaogaʼi tuʼumaʼu ia te Tohi-Tapu moka ʼe feala.
Kotou fakamahino ki he tahi pe ʼe ina toʼo ʼatatou tohi, ohage ko te tohi Te Ako Mai Te Tohi-Tapu, pe ʼe feafeaʼi te fai ʼo he ako Tohi-Tapu. Kotou fakaha age ia te kiʼi ʼata viteo He Ko ʼe ʼe Lelei Ke Ke Ako Te Tohi-Tapu? ʼaki takotou fakaʼaogaʼi ia te ʼu kiʼi masini foʼou.
Mo kapau ko he faʼahi ʼe feala, kotou kole kia natou ʼae ʼe neʼe fia logo tonatou tuʼasila, mo tonatou higoa, mo tonatou numelo telefoni, pea mo tonatou tuʼasila ʼi te Neti. Pea kapau ko he tahi ʼe mole nofo ʼi tokotou telituale, kotou tohi te kiʼi pepa Veuillez suivre l’intérêt (S-43), pea kotou foimo fakatoʼo ki te sikalaipe.

Te ʼu Meʼa ʼAe ʼe Mole Tonu Ke Fai:

ʼAua naʼa kotou agamalohi, mo fakakinauʼi te hahaʼi, pea mo kotou tutuʼu ovi ki te laupapa ohage he tagata leʼo.
ʼAua naʼa kotou manatu, ko te faʼahiga faifakamafola ʼaia, ʼe ko te tufa pe ʼo te ʼu nusipepa. Koteʼuhi moka tou faifakamafola, ʼe tou fakatuʼutuʼu ke tou kamata hatatou ako Tohi-Tapu, koia ʼae ʼe tonu ai ke tou faiga ke tou faipalalau mo te hahaʼi.
ʼAua naʼa kotou tutuʼu ʼi muʼa ʼo te laupapa ke mole sisio ki ai te hahaʼi, pea ʼaua takotou tokakaga pe ʼo faipalalau mo tokotou kaugā gaue. Kapau ʼe tonu ke kotou fakaʼaogaʼi ia takotou telefoni toʼotoʼo, pea ʼe lelei age ke kotou fakamamaʼo mai te laupapa.
ʼAua naʼa kotou kau ki ni fihi mo te hahaʼi ʼae ʼe fakafeagai. Kapau ko he tahi ʼe fakafeagai ʼe liliu ʼo agamalohi, pea ʼe lagi ʼaoga ke kotou mavae ki he tahi koga meʼa.