Ke Lelei Age Tatatou Minisitelio: Tou Fagonogono Faigamalie

He Ko ʼe ʼe Maʼuhiga? ʼE tahitahiga tatatou maʼu ia te hahaʼi ki ʼonatou ʼapi moka tou faifakamafola. Kaʼe ʼe feala pe ke tou faipalalau mo natou moka tou atalitali ki te ka, peʼe moka tou olo ki te toketa, peʼe moka tou olo ki te fale koloa, peʼe ʼi te fale gaue, peʼe ʼi te fale ako ʼi te temi manava, peʼe ʼi he tahi age aluʼaga. ʼE ko te finegalo ʼo Sehova ke natou logo ki te logo lelei ʼo te Puleʼaga. (1 Tim. 2:3, 4) ʼE tonu ke tou kamata he faipalalau ke tupu ai hatatou faifakamafola kia natou.

Te ʼu Meʼa ʼAe ʼe Tonu Ke Ke Fai:

Filifili ia ia ʼae ka ke faipalalau mo ia. ʼE ke tokagaʼi koa ʼe agalelei pea mo fia faipalalau ia ia ʼae ʼe ke fia faifakamafola ki ai? ʼE feala koa ke ke palalau faʼifaʼitaliha? Ko ʼihi kau faifakamafola, ʼe natou sisio muʼa ki he tahi pea natou malimali ki ai. Pea kapau ʼe malimali age he tahi, pea ʼe natou kamata te faipalalau.
Fai fakanounou hau kole fakalogologo mo kapau ʼe ke mataku ʼi te palalau.—Nee. 2:4; Gaue 4:29.
Kamata ʼaki he ʼu kiʼi palalau nounou, ohage la ko he fakamalo. Neʼe mole kamata palalau ia Sesu ki te Puleʼaga ʼi tana faipalalau mo te fafine Samalia. (Soa. 4:7) ʼE feala ke ke kamata ʼaki he fakavikiviki: “ʼE nonofo lelei ʼau tamaliki!” Pe ʼe ke kamata ʼaki he fehuʼi: “Neʼe ke sioʼi la te tala logo ʼanapo?”
ʼI takolua lolotoga faipalalau, faigaʼi ke ke palalau ki te logo lelei, ʼo ke ʼaveʼave mamalie te logo. Faiga ke hoholo lelei te faipalalau ohage pe ko hau faipalalau mo he tahi ʼe kolua feiloʼiʼaki. ʼE lagi feala ke ke talanoa ki he manatu ʼe ina leleiʼia ʼo tupu ai hana fai he fehuʼi. Ohage la, kapau ʼe ke palalau ʼo ʼuhiga mo te famili, ʼe feala ke ke ui fenei: “Neʼe au maʼu he ʼu tokoni ʼe ʼaoga ʼo ʼuhiga mo te akoʼi ʼo te fanau.” Pea kapau ʼe ke palalau ʼo ʼuhiga mo he ʼu alatike foʼou, ʼe feala ke ke ui fenei: “Heʼeki faʼa fualoa, neʼe au lau te ʼu logo lelei ʼo ʼuhiga mo he fetogi.” Kapau ʼe ʼosi te faipalalau kaʼe heʼeki ke talanoa ki te logo lelei, ʼaua naʼa ke lotovaivai.
Feʼaveʼaki tuʼumaʼu he ʼu kiʼi pepa lotu peʼe ko he tahi age ʼu meʼa gaue ʼe ke lava foaki ki he tahi ʼe fia logo.

ʼAhiʼahi Fai Te Faʼahi ʼAeni LolotogaTe Mahina:

• ʼI te vahaʼa fuli, faigaʼi ke ke kamata he faipalalau ke tupu ai hau lava fagonogono faigamalie.