Tou Tokoni Kia Nātou ʼe Nātou “Tali Lelei”
1. Ia ʼaho nei, ko ai ʼaē ʼe faka maʼopoʼopo mai e Sehova kia te ia?
1 ʼI te loto ʼa te hahaʼi takitokotahi, ʼe ʼi ai te ʼu meʼa ʼe nātou fia fai kiai. (Mat. 12:35) ʼE talanoa te Tohi-Tapu ʼo ʼuhiga mo he tahi ʼe “fia fai ki te tau.” (Pes. 55:21) Ko ʼihi ʼe nātou “fia fai ki te ʼita.” (Taag. 29:22) Kae ʼe toe ʼi ai mo nātou ʼaē ʼe nātou “tali lelei te maʼuli heʼegata.” (Gaue 13:48, MN ) ʼI totatou temi, ʼe lolotoga faka maʼopoʼopo mai e Sehova kia te ia te ʼu hahaʼi ʼaia ʼaē ʼe nātou tali lelei. (Asea 2:7) ʼE tou lava tokoni feafeaʼi kia nātou ke nātou liliu ko he kau atolasio ʼa Sehova?
2. Koteā ʼaē ʼe tonu ke tou fai ʼi tatatou fakahoko tatatou gāue ʼaē ko te fai ʼo he ʼu tisipulo?
2 Tou Fai Fakalelei Tatatou ʼu ʼAʼahi: ʼE maʼuhiga ke tou maʼu he manatu ʼe lelei mokā tou fai tatatou ʼu ʼaʼahi, ke feala ai hatatou fakahoko tatatou gāue ʼaē ko te fai ʼo he ʼu tisipulo. (Mat. 28:19, 20) ʼE tou tokaga koa ʼo ʼaʼahi te hahaʼi ʼaē neʼe tou maʼu pea neʼe fia logo? ʼE tou toe ʼaʼahi koa ia nātou fuli ʼaē neʼe nātou tali hanatou tohi, peʼe neʼe nātou fia logo ki te logo lelei? ʼE tou faiga koa ke tou tokoni kia nātou ke nātou tuputupu ʼi te faʼahi fakalaumālie? ʼE fakalogo kiai tonatou maʼuli, koia ʼe tonu ai ke tou faiga ke tou haga taupau te fia logo ʼa te hahaʼi ʼaē neʼe tou maʼu.
3. Koteā ʼaē ʼe tonu ke tou fai ʼi tatatou ʼosi fai palalau mo he tahi ʼi te minisitelio?
3 ʼI te temi ʼaē ʼe kei tou manatuʼi lelei ai tatatou fai palalau mo he tahi, tou toʼo he kiʼi temi ke tou tohi ai tona higoa pea mo tona tuʼasila. Tou tohi te ʼu manatu ʼaē neʼe tou palalau kiai, te ʼu vaega ʼaē neʼe tou lau, pea mo te tohi ʼaē neʼe tou tuku. Hili ʼaia, tou fai he fakatuʼutuʼu ke tou foimo fai te ʼaʼahi.
4. Koteā ʼaē ʼe tou lava fai ke lelei tatatou ʼu ʼaʼahi?
4 Te Faʼahiga Fai ʼo He ʼAʼahi: Ka koutou fai he ʼaʼahi, ʼe lelei ke koutou agalelei pea mo aga fakakaumeʼa pea mo koutou tokaga moʼoni kia ia ʼaē ʼe koutou ʼaʼahi. ʼAua naʼa koutou palalau ki he ʼu manatu faigataʼa kae ke koutou palalau ki he manatu faka Tohi-Tapu. Koutou teuteuʼi he manatu faka Tohi-Tapu ʼe fia palalau anai kiai, pea ʼi te fakaʼosi ʼo te ʼaʼahi, koutou lagaʼi he fehuʼi ʼe koutou tali anai kiai mokā koutou toe liliu age. Ka palalau tatatou ʼaʼahi ki he manatu ʼe fakafeagai ki te Tohi-Tapu, pea ʼe lagi lelei ke mole koutou fihi ki te faʼahi ʼaia. Koutou faiga ke koutou fai palalau ʼo ʼuhiga mo he ʼu manatu ʼe koutou logo tahi kiai.—Kol. 4:6.
5. Koteā te ʼu faiga ʼaē neʼe fai e te pionie, pea neʼe koteā tona ʼu fua?
5 ʼE ʼaoga he ʼu faiga lahi moʼo fai te ʼu ʼaʼahi, kae ʼe tou fiafia ʼi te ʼu fakapale ʼaē ʼe tou maʼu. Neʼe fakatuʼutuʼu e te pionie ʼi Saponia ke lahi te ʼu ʼaʼahi ʼaē ʼe ina fai ʼi te ʼu māhina fuli. Neʼe ina kamata tohi te ʼu higoa ʼo nātou fuli ʼaē neʼe ina maʼu ʼi te fai faka mafola ʼi te ʼu ʼapi, pea lolotoga te vāhaʼa katoa neʼe ina ʼaʼahi ia nātou. Neʼe ina teuteuʼi lelei tana ʼu palalau pea mo ina fakahoko tana minisitelio ʼo falala katoa ki te logo ʼaē neʼe ina tala. ʼI tana tahi ʼaʼahi, neʼe ina kamata ai te ako Tohi-Tapu mo he tahi neʼe ina ʼui fēnei age: “Neʼe ʼau kapu tuʼumaʼu takotou hahaʼi. Ko taku hoki fakalogo ʼaē kia koutou.” ʼAki te faʼa kātaki ʼofa ʼa te pionie ʼaia, neʼe ina maʼu ai te ʼu fua lelei. ʼI te fakaʼosi ʼo te ʼuluaki māhina, neʼe ko tana ʼu ako Tohi-Tapu e hogofulu.
6. He koʼe ʼe tonu ke tou fai tuʼa lahi tatatou ʼu ʼaʼahi?
6 ʼE fetogi tuʼumaʼu te maʼuli ʼo te hahaʼi. (1 Ko. 7:31) ʼE lagi tonu ke tou ʼaʼahi tuʼa lahi ke tou toe maʼu ai he tahi ʼe fia logo. Kapau ʼe tou fai fakalelei te ʼu ʼaʼahi, pea ʼe feala anai ke tou tokoni kia nātou ʼaē ʼe nātou tali lelei ke nātou haʼele ʼi te ala ki te maʼuli heʼegata.—Mat. 7:13, 14.