Tou Tokoni Ki Niʼihi Ke Nātou Faka Maʼuhigaʼi Totatou Tupuʼaga
1 ʼE tou hage koa ko te tagata fai pesalemo ʼi tana ʼui ʼaē: “Ê Sehova, . . . ko koe ia te matapuna ʼo te maʼuli”? (Pes. 36:5, 9) E feafeaʼi koa hatatou tokoni ki niʼihi ke nātou ʼiloʼi ia Sehova totatou Tupuʼaga pea mo nātou faka maʼuhigaʼi ia ia? ʼAki tatatou tufa ia te tohi E Feala Keke Mauli O Heegata Ite Palatiso Ite Kele lolotoga te māhina ʼo Sūnio. Ko te tohi ʼaenī ʼe lelei ʼaupito koteʼuhi ʼe ina fakahā mai ʼe ʼi ai te ʼAtua moʼoni. ʼE ina fakamoʼoni ko te Tohi-Tapu ko te Folafola ʼa te ʼAtua. ʼE tou loto ke ʼiloʼi e te hahaʼi fuli peʼe feafeaʼi te faka maʼuhigaʼi ʼo Sehova ʼAtua e te meʼa ʼaē neʼe ina fakatupu pea mo te Tohi-Tapu.
2 Koʼeni te faʼifaʼitaki ʼe faigafua, mo fakahagatonu.
ʼI te ʼosi fakamālo, koutou fakahā age te paki ʼi te pasina 69, pea koutou fehuʼi age:
◼ “Neʼe feafeaʼi koa te kamata ʼo te maʼuli ʼi te kele? ʼE ʼui e ʼihi neʼe tupu fakafokifā. ʼE ʼui mai e te Tohi-Tapu ko te ʼAtua ʼaē neʼe ina fakatupu ia te kele. Koteā koa la takotou manatu? [Koutou tuku ke fai mai hana tali.] Ko te kapite ʼaenī ʼe ina fakahā mai te ʼu tali ʼe ʼalutahi katoa mo te Tohi-Tapu pea mo te ʼu manatu ʼa te ʼu tagata popoto. Koia ko te tohi ʼaenī ʼe ina foaki mai te ʼamanaki ki he ʼapogipogi ʼe lelei age; pea ʼe ʼau loto ke koutou maʼu te tohi ʼaenī ko tona totogi fakaʼofa ko te fāgeau, ke feala ai foki hakotou toe vakaʼi te ʼu fakamoʼoni fuli pea ʼe feala ai leva ke koutou fai hakotou fakatuʼutuʼu.”
3 ʼI te ʼosi ʼo takotou fakahā ake tokotou higoa, ʼe feala ke koutou ʼui age:
◼ “ ʼI te mālama ʼaenī, ʼe ʼaoga koa la te faka tui ki te ʼu meʼa ʼaē neʼe fakatupu, peʼe ʼi takotou manatu neʼe tou tutupu faka fuanoa mai pe? [Koutou tuku ke fai mai hana tali.] Koutou fakatokagaʼi muʼa te manatu ʼa te Tohi-Tapu ʼo ʼuhiga mo te faʼahi ʼaia. [Koutou lau ia Hepeleo 3:4.] ʼI takotou manatu ʼe mole ʼaoga koa la ia te ʼu laga fale fuli ke ʼi ai he tagata ke ina faʼu? Koia, ko te ʼatulaulau neʼe feala koa la tana haʼu faka fuanoa pe?” Koutou fakahā ake te paki ʼi te ʼu pasina 34 pea mo te 35 ʼo te tohi Mauli O Heegata, pea koutou fakatokagaʼi ia ia ki te manatu ʼe tuʼu ʼi te palakalafe 4 ʼo te pasina 35. Koutou fakahā fakafiafia age ia te tohi ʼo koutou fakahā mo tona totogi fakaʼofa, ʼo koutou ʼui age ʼe koutou toe liliu mai pea ʼe koutou fai palalau anai ki te fehuʼi ʼaē, Koteā koa te ʼapogipogi ʼo te tagata pea mo te kele?
4 ʼI te hili ʼo takotou fakamālo, ʼe feala ke koutou ʼui age:
◼ “ ʼI takotou manatu, ʼe haʼu moʼoni koa te Tohi-Tapu mai te ʼAtua? [Koutou tuku ke fai mai hana tali.] Neʼe feafeaʼi koa te tohi ʼo te Tohi-Tapu? [Koutou avahi te tohi Mauli O Heegata ʼi te pasina 47.] Koutou fakatokagaʼi te meʼa ʼe tuʼu ʼi te Tohi-Tapu ia 2 Timoteo 3:16. [Koutou lau.] Koia, e feafeaʼi koa la te haʼu ʼo te Tohi-Tapu mai te ʼAtua mokā neʼe tohi ia e te ʼu tagata?” Koutou fakatokagaʼi ia te talanoa ʼe tuʼu ʼi te paki ʼo te pasina 49. Koutou ʼui age kiai ʼe feala ke ina maʼu he fua lelei ʼaki tana lau ia te tohi pea ʼe ina maʼu ai te tali ki te fehuʼi ʼaia.
5 Ko he tahi faʼahi moʼo fai ʼo te felogoi, ko te fakahā ʼo te takafi ʼo te tohi Mauli O Heegata pea mo koutou ʼui age:
◼ “ ʼI te ʼaho ʼaenī ʼe mātou fai te fehuʼi ʼaenī ki ʼomātou vāhaʼa fale, ʼE feala koa hatatou maʼuli ʼo heʼegata ʼi te Palatiso ʼi te kele? Koteā la takotou manatu? [Koutou Tuku ke fai mai hana tali.] Logope la te ʼiloʼi e te ʼu tagata popoto lalahi ʼe fakafoʼou te ʼu eveeve ʼo te sino, ʼe tou ʼiloʼi ʼe tou mamate fuli. Koutou fakatokagaʼi muʼa te manatu ʼe ʼui mai ʼi te tohi ʼaenī ʼo ʼuhiga mo te faʼahi ʼaia. [Koutou fakamahino age te ʼu puani ʼo te palakalafe 4 ʼo te pasina 7.] ʼE tonu ke tou fakasiosio takitokotahi ʼaki te meʼa ʼaia peʼe ʼi ai he ʼamanaki lelei maʼa te tagata ki te temi ka haʼu.” ʼOsi ʼaia pea koutou fakahā ake te tohi ʼo fakahā tona totogi fakaʼofa, pea koutou lagaʼi he fehuʼi ʼe feala ke koutou tali kiai ʼi takotou ʼaʼahi ka hoa mai.
6 ʼE koutou holi koa ke koutou tokoni ki niʼihi ke nātou ʼiloʼi te ʼu moʼoni taulekaleka ʼo ʼuhiga mo totatou Tupuʼaga pea mo tona finegalo ʼaē ki te malamanei? Ko te tohi Mauli O Heegata ʼe feala ke tokoni kia koutou, ke koutou fai te faʼahi ʼaia. Ko te tohi ʼaia ʼe ina faka maʼuhigaʼi totatou Tupuʼaga Lahi, te Tuʼi ʼAliki ko Sehova, ʼo ina fakavikiviki tana ʼu gāue pea mo fakahā tona fakatuʼutuʼu taulekaleka ʼaē ko te tāpuhā ʼo tona huafa pea mo tapuakina te malamanei ʼaki te Puleʼaga ʼo Kilisito.