Tou Fakahā Te Logo Lelei ʼo Tou ʼAmanaki ʼe Fua Lelei Anai
1 Ko tatou fuli ʼe tou loto ke tou fiafia ʼi te ʼu meʼa ʼaē ʼe tou fai, pea ʼe tou fia sio ki te ikuʼaga ʼo te ʼu meʼa ʼaia, tāfito ʼi te gāue ʼaē ko te fai ʼo ni ʼu tisipulo. Koteā koa ʼaē ʼe ina fakatupu ai tatatou fiafia? ʼE kamata ʼaki tatatou taupau maʼu ʼo he manatu ʼe lelei, mokā tou maʼumaʼua ʼi te gāue ʼaē ʼe ʼaoga ke fai moʼo tokoni ki te hahaʼi. (Taag. 11:25) Ko tatatou faʼahiga fakahā ʼo te logo lelei, ʼe tonu ke hā ai ʼe tou tui moʼoni ki te ʼu meʼa ʼaē ʼe tou talanoa kiai. Kapau ko ʼatatou ʼu palalau ʼe haʼu mai totatou loto, pea ʼe hā anai tatatou fakamalotoloto pea mo tatatou tui papau. (Luka 6:45) Ka tou teuteuʼi tatatou ʼu palalau ʼo fai liuliuga, pea ʼe mole tou matataku anai ʼi te palalau ki te hahaʼi ʼi te telituale. Ko te faʼahi ʼaia ʼe maʼuhiga tāfito anai lolotoga te māhina ʼo Sepetepeli, mokā tou tufa anai te tohi Te tagata ʼaē ʼe lahi tokotahi ʼo te ʼu temi fuli. ʼE koutou fakatokagaʼi anai te ʼaoga ʼo te ʼu palalau ʼaē ʼe hoa mai, moʼo fakahā ʼo te logo lelei ʼaki he manatu ʼe lelei.
2 Mokā koutou tufa te tohi ʼo “Te tagata ʼaē ʼe lahi tokotahi,” ʼe feala ke koutou fai te ʼu palalau ʼaenī ʼi takotou ʼuluaki fai palalau:
◼ “Ko te tokolahi ʼe tui kia Sesu. Kae, ʼuhi ko te lahi ʼaupito ʼo te ʼu meʼa kovi ʼaē ʼe hoko ʼi te malamanei, ʼe ʼui e ʼihi peʼe ʼi ai he ʼuhiga ʼo te ʼu meʼa ʼaia. Koteā tau manatu ʼo ʼuhiga mo te faʼahi ʼaia?” Tuku ke fai atu hana tali. Koutou lau ia Luka 4:42-43 pea koutou palalau fakanounou ki te tupuʼaga ʼo te haʼu ʼa Sesu ki te kele. ʼOsi ʼaia pea koutou fuli ki te kapite 24 ʼo te tohi Te tagata ʼaē ʼe lahi tokotahi, pea koutou lau te palakalafe 1 ki te 2 ʼo te pasina 2, ʼo koutou fakahā age ko te ʼu fihifihia ʼo te tagata ʼe hoki fakatokatoka anai pe e te Puleʼaga ʼo te ʼAtua. Koutou tuku ki ai te tohi ko tona totogi fakaʼofa ko te 400.
3 Mokā koutou liliu ʼo ʼaʼahi ia nātou ʼaē neʼe palalau mo koutou ʼo ʼuhiga mo te tokaga ʼa Sesu kia tatou, ʼe feala ke koutou ʼui age fēnei:
◼ “ ʼI tātā ʼuluaki felogoi, neʼe tā palalau ki te meʼa neʼe ʼui e Sesu, ʼaē ko te Puleʼaga ʼo te ʼAtua ka ina fakatokatoka anai ʼotatou ʼu fihifihia. Koteā tau manatu ʼo ʼuhiga mo te meʼa ʼaē ka ina fai ʼi te fakaʼosi, moʼo faka ʼāteaina ʼo nātou ʼaē ʼe lahi tonatou ʼu mamahi?” Tuku ke fai atu hana tali. Koutou fuli age ki te kapite 133, pea koutou toe vakaʼi te ʼu fakamatala ʼi te palakalafe nima. Koutou fuli age ki te paki ʼo te pasina ʼaē ʼe hoa mai kiai, pea koutou fakamahino age te meʼa ʼaē ka hoko mokā fai anai te finegalo ʼo te ʼAtua ʼi te kele ohage ko selo. Koutou fakaʼaogaʼi te paki ʼaia ʼo te tohi ʼo Te tagata ʼaē ʼe lahi tokotahi, moʼo faka maʼuhigaʼi te ʼu ʼaluʼaga lelei ʼaē neʼe fakapapau mai e te ʼAtua. Koutou fakahā age ki ai ʼe feala ke fai hana ako Tohi-Tapu. Kapau ʼe ina tali, pea koutou kamata te ako ʼaki te tohi Te ʼAtamai Mālama.
4 ʼE feala ke koutou fai te ʼu palalau ʼaenī mokā koutou tufa te tohi ʼo “Te tagata ʼaē ʼe lahi tokotahi”:
◼ “ ʼI taku palalau mo te hahaʼi ʼo te kolo, neʼe ʼau fakatokagaʼi ko te tokolahi ʼe nātou fakaʼamu ki te fīmālie pea mo te tokalelei ʼi te malamanei. ʼI tau manatu, he koʼe ʼe mole feala ke fakahoko e te tagata te ʼu meʼa ʼaia? [Tuku ke fai atu hana tali.] Ko ʼihi kau takitaki politike ʼe lagi nātou fakamalotoloto pea mo nātou fai he ʼu meʼa ʼe lelei, kae fakatokagaʼi mai muʼa te meʼa ʼaē ʼe ʼui mai e te Tohi-Tapu.” Lau ia Pesalemo 146:3, 4; pea koutou fehuʼi age: “ ʼE ʼi ai koa he tahi ʼe feala ke ina foaki te ʼu meʼa ʼaē ʼe ʼaoga ki te tagata?” Lau te vaega 5 mo te 6. Koutou ʼui age ko Sesu ʼe ko te hau mālohi ʼaē neʼe fili e te ʼAtua ke ina ʼaumai te tokalelei pea mo te fīmālie. Koutou fakahā age te paki ʼo te hisitolia 53 ʼo te tohi ʼo Te tagata ʼaē ʼe lahi tokotahi, pea koutou fakatokagaʼi age kia ia te ʼu fua lelei ʼaē ʼe tou maʼu ʼi te pule ʼa Kilisito. Koutou fakahā age te totogi fakaʼofa ʼo te tohi pea koutou tuku age ki ai.
5 Kapau neʼe koutou ʼuluaki fai palalau ki te ʼuhiga pule ʼa te ʼAtua, pea ʼe feala ke koutou ʼui age te manatu ʼaenī ʼi takotou ʼaʼahi:
◼ “ ʼI taku haʼu talu mai ai, neʼe tā palalau ki te mole feala ʼaē ki te tagata ke ina foaki mai te tokalelei moʼoni ki te kele. ʼE lagi ʼe ke manatuʼi neʼe tā vakaʼi te manatu ʼa te Tohi-Tapu ʼo ʼuhiga mo te mole feala ʼaē ki te tagata ke ina fakahoko te faʼahi ʼaia. [Toe lau ia Pesalemo 146:3.] Neʼe ke fakatokagaʼi koa pe koʼe ʼe tokoniʼi tatou e te ʼAtua ke ʼaua naʼa tuku tatatou falala ki te tagata? [Tuku ke fai atu hana tali.] Lagi ʼe ke loto tahi anai mo te manatu ʼaē ko te ʼamanaki ʼo ʼuhiga mo he puleʼaki tologa, ʼe foaki mai anai pe ia e te ʼAtua pea mo Sesu Kilisito. ʼE tou falala ki te faʼahi ʼaia ʼuhi ko te manatu ʼaē ʼe tou maʼu ia Fakahā 11:15. [Lau.] Kapau ʼe tou fia liliu ko he ʼu hahaʼi fakalogo ʼo te Puleʼaga ʼo Kilisito, koteā te meʼa ʼaē ʼe tonu ke tou fai?” Koutou fuli age te hisitolia 84 ʼo te tohi Te tagata ʼaē ʼe lahi tokotahi, pea koutou lau te palakalafe 2 ʼo te lua pasina, ʼo koutou faka maʼuhigaʼi ia Luka 14:31-32 pea mo te paki. Koutou fakahā age peʼe feafeaʼi te maʼu e te lauʼi miliona hahaʼi te tokalelei mo te ʼAtua pea mo Kilisito, ʼaki te fai ʼo he ako Tohi-Tapu. Kapau ʼe ina fakagafua atu, koutou fakahā ki ai te tohi Te ʼAtamai Mālama pea koutou kamata te ako.
6 Peʼe feala ke koutou fakaʼaogaʼi te manatu fakanounou ʼaenī moʼo fakahā ʼo te tohi “Te tagata ʼaē ʼe lahi tokotahi”:
◼ “Mokā talanoa niʼihi kia Sesu Kilisito, e lahi te hahaʼi ʼe nātou manatu ko ia ʼe ko he kiʼi tamasiʼi peʼe ko he tagata ʼe ʼamanaki mate. Ko tanatou manatu kia Sesu ʼe gata pe ʼi tana tupu pea mo tona mate. ʼI te agamāhani, ko te ʼu meʼa taulekaleka ʼaē neʼe palalau kiai pea mo ina fai, ʼe mole nātou tokagaʼi. Ko te ʼu meʼa ʼaē neʼe ina fakahoko ʼe malave ki te ʼu hahaʼi fuli ʼe maʼuʼuli ʼi te kele ʼaenī. Koia la ʼaē, ʼe maʼuhiga ai ke tou ako te ʼu meʼa taulekaleka ʼaē neʼe ina fai maʼa tatou.” Lau ia Soane 17:3. Koutou fuli age te ʼuluaki pasina ʼi te kamataʼaga ʼo te tohi Te tagata ʼaē ʼe lahi tokotahi, pea koutou lau ia te palakalafe fā. Koutou tuku age te tohi pea koutou fakamahino age peʼe feafeaʼi tona fakaʼaogaʼi ʼi te ako takitokotahi.
7 Mokā koutou ʼaʼahi he tahi neʼe koutou tuku ki ai te tohi ʼo “Te tagata ʼaē ʼe lahi tokotahi,” ʼe feala ke koutou ʼui fēnei:
◼ “ ʼI taku haʼu talu mai ai, neʼe tā palalau ki te maʼuhiga ʼo te ʼiloʼi ʼo Sesu. ʼE ʼui fēnei e Soane 17:3 ko te faka ʼuhiga ʼo te ʼiloʼi ʼo Sesu ʼe ko te ‘maʼuli heʼegata.’ ʼE lava feafeaʼi hatatou fai te faʼahi ʼaia?” Tuku ke fai atu hana tali. ʼE feala ke hoko atu takotou fai palalau ʼo koutou fakamahino age tatatou fakatuʼutuʼu ʼaē ʼo ʼuhiga mo te ako Tohi-Tapu, pea e feafeaʼi te fai ʼo te ako ʼaia ʼaki te tohi Te ʼAtamai Mālama.
8 ʼI totatou ʼuhiga “kaugā gāue ʼa te ʼAtua,” ʼe lahi te ʼu tupuʼaga ʼe feala ai ke tou ʼamanaki ai ʼe fua lelei anai tatatou fakahā te logo lelei. (1 Ko. 3:9) Kapau ʼe tou taupau maʼu te manatu ʼaia, pea ʼe lahi anai te ʼu tapuakina ʼe foaki mai e Sehova.