Tou Faka Mafola Te Puleʼaga
1 Ia Hepeleo 10:23, ʼe fakaloto mālohiʼi tatou ke tou “taupau maʼu te fakahā ia muʼa ʼo te kaugamālie tatatou ʼamanaki.” Pea ko tatatou ʼamanaki ʼe fakatafito ki te Puleʼaga ʼo te ʼAtua. Neʼe fakatotonu tāfito e Sesu, ko te logo lelei ʼo te Puleʼaga ʼe tonu ke faka mafola ki te ʼu puleʼaga fuli. (Maleko 13:10) ʼE tonu ke tou manatuʼi tuʼumaʼu te faʼahi ʼaia mokā tou fai totatou minisitelio.
2 Ka tou palalau mo te hahaʼi, ʼe tou faiga ke tou kamata tatatou fai palalau ki te meʼa ʼaē ʼe nātou fia logo kiai, peʼe ko te ʼu meʼa ʼaē ʼe nātou tuʼaniaʼi. ʼI te agamāhani ʼe tou talanoa ki te ʼu meʼa ʼaē kua nātou sio kiai, ohage la ko te fai fakapō ʼe hoko ʼi te ʼu fenua, te ʼu fihifihia ʼaē ʼe tau mo te kau tūpulaga, te ʼu tuʼania ʼo ʼuhiga mo te meʼa ʼaē ʼe ʼaoga ki te maʼuli, peʼe ko te ʼu lakilisi ʼo te malamanei. ʼUhi ko te tokaga tāfito ʼa te hahaʼi ki te ʼu “tuʼania ʼo te maʼuli,” ka tou fakahā age ʼe tou mahino ki te ʼu meʼa ʼaē ʼe nātou tuʼaniaʼi, pea ʼe nātou tautau fakahā mai anai te ʼu meʼa ʼaē ʼe nātou manatu kiai. (Luka 21:34) Ko te faʼahi ʼaia ʼe faka fealagia anai kia tatou ke tou fakahā tatatou ʼamanaki.
3 Kae, kapau ʼe mole tou tokakaga, pea ʼe feala ke tou palalau ki he ʼu meʼa ʼe mole fakaloto mālohi, ʼo mole tou fakahoko ai te fakatuʼutuʼu tāfito ʼo tatatou ʼaʼahi—ʼaē ko te faka mafola ʼo te logo ʼo te Puleʼaga. Logope la ʼe tou talanoa ki te ʼu fihifihia ʼaē ʼe tupu ai te faigataʼaʼia ʼo te maʼuli, ko tatatou fakatuʼutuʼu ʼe ko te fakatokagaʼi ʼo te hahaʼi ki te Puleʼaga, ʼaē ka ina fakatokatoka anai te ʼu fihifihia ʼo te malamanei ʼo talu ai. ʼE tou maʼu te ʼamanaki taulekaleka ʼe tonu ke fagono kiai te hahaʼi. Koia tatau aipe pe neʼe tou ʼuluaki palalau ki te ʼu agaaga ʼo te “ ʼu temi maʼuhiga ʼaupito mo faigataʼa” ʼaenī, kae ʼe mole tonu ke tuai tatatou fakahā age ia te faʼahi tāfito ʼaē ʼe tou fia palalau kiai, ia te “logo lelei heʼegata.” Kapau ʼe tou fai feiā, pea ʼe mahino papau ia ʼe tou fakahoko katoa anai totatou minisitelio.—2 Tim. 3:1; 4:5; Fkhā. 14:6.