Te Tali Ki ʼAkotou ʼu Fehuʼi

◼ Koteā ʼaē ʼe tonu ke tou manatuʼi ʼo ʼuhiga mo te lau ʼo te ʼu palakalafe ʼi te ʼu fono?

ʼE lahi te temi ʼaē ʼe fakaʼaogaʼi ki te lau ʼo te ʼu palakalafe ʼi te Ako ʼo Te Tule Leʼo pea mo te Ako Tohi ʼo te Kokelekasio. Ko tona faka ʼuhiga, ko te tēhina ʼaē neʼe hinoʼi ke lautohi, ʼe maʼuhiga te faʼahi ʼaē ʼe ina fai, heʼe ina akoʼi te hahaʼi. ʼE tonu ke ina lau ke feala ai ‘te mahino’ ʼo te ʼu puani ʼo te ako kia nātou ʼaē ʼe fakalogo, pea mo uga ai nātou ke nātou maʼuliʼi te ʼu meʼa ʼaia. (Neh. 8:⁠8) Koia, ʼe tonu ai ke teuteu lelei te tēhina ʼaē ka lautohi. (1 Tim. 4:​13; vakaʼi te ako 6 ʼo te tohi Manuel pour l’école.) Koʼeni te ʼu puani maʼuhiga ki te lautohi ʼaē ʼe fai ia muʼa ʼo te kaugamālie.

Koutou Faka Maʼuhigaʼi Te ʼu Kupu ʼAē ʼe Tonu Ke Faka Maʼuhigaʼi: Koutou vakaʼi fakatomuʼa pe ko te ʼu kupu fea pea mo te ʼu kupuʼi palalau fea ʼaē ʼe tonu ke faka maʼuhigaʼi ke feala ai he mahino lelei ʼa te hahaʼi.

Koutou Puʼaki Fakalelei Te ʼu Kupu: ʼE maʼuhiga ke puʼaki fakalelei pea mo lau ke mātala te ʼu kupu ʼaē ʼe tuʼu ʼi te alatike, ke feala ai he mahino kiai te hahaʼi. Koutou vakaʼi ʼi te tikisionalio te ʼu kupu ʼaē ʼe mole koutou mahino kiai, peʼe ko te ʼu kupu ʼaē ʼe tahitahiga tona fakaʼaogaʼi peʼe koutou fakalogo ia te ʼu foʼi fime ʼa te Sosiete.

Koutou Palalau Leʼolahi Pea Mo Fakafiafia: Ko te palalau leʼolahi pea mo fakafiafia, ʼe fakatupu ai te fia logo, pea ʼe ina uga ia ia ʼaē ʼe fakalogo ke mulimuli ki te ʼu meʼa ʼaē ʼe logo kiai.

Koutou Lotomāfana Pea Mo Koutou Palalau Fakakāiga: ʼE faigafua anai takita lautohi mo kapau ʼe mole kita mataku. Kapau ko ia ʼaē ʼe lautohi ʼe ina teuteuʼi lelei, ʼe mole mataku anai ia, pea ʼe liliu anai tana lautohi ko he meʼa ʼe logo lelei, ka mole tou fiu ʼi tona fakalogo.​—Ha. 2:⁠2.

Ka Koutou Lautohi, ʼAua Naʼa Koutou Hilifaki He Tahi ʼu Kupu Ki Te ʼu Kupu ʼAē Kua Tā: Ko te ʼu kiʼi nota ʼaē ʼe tuʼu ʼi te lalo pasina ʼo feiā aipe mo te ʼu talanoa ʼaē ʼe tuʼu ʼi loto ʼo te ʼu parenthèses peʼe ko te ʼu crochets, ʼe lau leʼolahi ʼi te agamāhani mo kapau ʼe nātou fakamahino lelei ai te alatike. ʼE gata pe ki te ʼu meʼa ʼaē ʼe tuʼu ʼi te ʼu parenthèses moʼo hinoʼi ʼo te ʼu vaega, ʼe mole lau anai. ʼE tonu ke lau te kiʼi nota ʼaē ʼe tuʼu ʼi te lalo pasina mo kapau ʼe talanoa kiai te palakalafe, ʼo tou ʼui fēnei: “ ʼE ʼui fēnei e te kiʼi nota ʼi te lalo pasina . . .” ʼI te ʼosi lau ʼo te faʼahi ʼaia, pea ʼe feala ke hoko atu te lau ʼo te palakalafe.

Ka lelei te lautohi ia muʼa ʼo te kaugamālie, pea ʼe liliu ko he koga maʼuhiga moʼo ‘akoʼi ʼo te hahaʼi ke nātou mulimuli ki te ʼu meʼa fuli ʼaē neʼe fakatotonu mai’ e totatou Tagata Faiako Lahi.​—Mat. 28:⁠20.