Te Ako ʼo Te Minisitelio Faka Teokalatike Ki Te Taʼu 2001
1 ʼE lahi ʼaupito te ʼu tupuʼaga faka Tohi-Tapu ke tou faiga fuli ai ke tou kau ki te Ako ʼo Te Minisitelio Faka Teokalatike.—Taag. 15:23; Mat. 28:19, 20; Gaue 15:32; 1 Tim. 4:12, 13; 2 Tim. 2:2; 1 Pet. 3:15.
2 Kua fualoa te fakatuʼutuʼu ʼi te ako ia te polokalama lau ʼo te Tohi-Tapu ʼi te vāhaʼa fuli. Ko te pasina e tahi ʼo te Tohi-Tapu ʼe tonu ke lau ʼi te ʼaho fuli. ʼI te kamata ʼo te taʼu ʼaenī, ʼe toe fakatuʼutuʼu ke fai ʼi te ʼu vāhaʼa fakamanatu fuli he polokalama lau ʼo te Tohi-Tapu. Kua katoa te tahi polokalama lau ʼo te Tohi-Tapu, ʼaē neʼe fakatuʼutuʼu ki te ʼu taʼu fakamuli e tolu. Kae kapau ʼe mole koutou feʼaugaʼia te fakatuʼutuʼu ʼaia ki te lau ʼo te Tohi-Tapu, pea ʼe feala pe ke koutou fakatuʼutuʼu hakotou polokalama.
3 ʼI te akonaki 2, ʼe akoʼi ai ki te ʼu tēhina te “lautohi [ʼo te Folafola ʼa te ʼAtua] ʼi muʼa ʼo te hahaʼi.” (1 Tim. 4:13, MN ) Kapau ʼe ʼi ai hakotou kiʼi fai akonaki, pea koutou lau liuliuga pea mo leʼolahi. ʼE feala ke koutou fakaʼaogaʼi te ʼu foʼi fime puke leʼo ʼo te Sosiete ʼaē ʼe lau ai te Tohi-Tapu, ke hikihiki ai takotou faʼahiga puʼaki ʼo te ʼu kupu, mo te fakaʼaluʼalu ʼo takotou lautohi pea mo te tahi ʼu faʼahi.
4 Ko te akonaki 3 pea mo te 4 ʼe fakatafito ki te kiʼi kaupepa “Te ʼu Fai Palalau Faka Tohi-Tapu.” Kapau ʼe mole feʼauga te temi ki te ʼu meʼa ʼaē ʼe tonu ke koutou palalau kiai, pea koutou filifili pe te ʼu manatu ʼaē ʼe ʼaoga ki te telituale ʼo takotou kokelekasio. ʼE feala ke koutou fai takotou fai palalau ʼo mulimuli ki te ʼu agaaga ʼaē ʼe hoko ʼi takotou telituale.
5 Koutou faiga fakapotopoto moʼo fai takotou ʼu fai akonaki ʼi te ako. Koutou toʼo he temi moʼo teuteuʼi lelei, pea koutou fai ʼaki tokotou loto katoa. ʼE koutou fakaloto mālohi anai te kokelekasio, pea ʼe fua lelei anai kia koutou mo kapau ʼe koutou kau ʼaki tokotou loto katoa ki te Ako ʼo te Minisitelio Faka Teokalatike ʼi te taʼu 2001.