Te ʼu Lelei ʼo Te Ako ʼo Te Minisitelio Faka Teokalatike
1 ʼE maʼu e te hahaʼi ʼa Sehova te pilivilesio makehe ʼaē ke akoʼi nātou ʼi te ako faka teokalatike. (Isa. 54:13; Soa. 6:45) Kae ʼe tonu foki ke tou faiga mālohi mo kapau ʼe tou fia maʼu te ʼu lelei ʼo te ako ʼaia. ʼE koutou mahino koa ko te Ako ʼo te Minisitelio Faka Teokalatike ʼe fua lelei anai ki tokotou maʼuli fakalaumālie?
2 Neʼe Nātou Sio Ki Tona ʼu Fua Lelei: Tokolahi te ʼu taupau ako neʼe nātou tokagaʼi, ko te ako ʼaē ʼe fai ʼo ʼuhiga mo te ʼu kalitātē ki te faiakonaki, neʼe ina hikihiki ia te gāue fai faka mafola. Tahi ʼaē meʼa, neʼe tokagaʼi e te tahi taupau ako, ko te fakatuʼutuʼu ʼaē ke fai he ʼu tali e te nofoʼaki ʼi te akonaki ʼaē ʼo ʼuhiga mo te ʼu puani maʼuhiga ʼo te Tohi-Tapu, kua feala ai ki te tokolahi ke nātou mulimuli ki te polokalama lau ʼo te Tohi-Tapu. ʼO ʼuhiga mo te Akonaki No. 2, tokolahi te ʼu tēhina neʼe nātou fakafetaʼi ki te ʼu fua lelei ʼaē neʼe nātou maʼu ʼi tanatou tōkakaga tāfito ʼo teuteuʼi te koga tohi ʼaē ʼe tonu ke nātou lau, kae mole nātou teuteuʼi he ʼu ʼuluaki palalau pea mo he ʼu palalau fakaʼosi. Ko nātou ʼaē ʼe nātou fai te akonaki ʼaia, ʼe nātou tōkakaga tāfito ʼi te temi leva ʼaenī ke nātou hikihiki tanatou lautohi.—1 Tim. 4:13.
3 ʼE Fua Lelei Ki Te Nofoʼaki Kātoa: ʼE ko he meʼa fakafiafia mokā tou tali ʼi te ʼu fono. (Taag. 15:23) ʼI tatatou maʼu fakatomuʼa te ʼu fehuʼi ki te fakamanatu, ʼe ko he fealagia ʼaia kiā tatou ke tou teuteu pea mo fai he ʼu tali ʼi te fakamanatu. Tahi ʼaē meʼa, neʼe kamata tā ʼi Te Tule Leʼo ʼo te ʼaho 1 ʼo Sānualio 2004, te ʼu manatu ʼaoga ʼo ʼuhiga mo te ʼu kapite faka Tohi-Tapu ʼo te lautohi ʼo te vāhaʼa, ʼi te Ako ʼo Te Minisitelio Faka Teokalatike. Ko te ʼu alatike ʼaia neʼe tokoni ai ki te tokolahi ke nātou fai he ʼu tali fakaloto mālohi ʼi te akonaki ʼo ʼuhiga mo te ʼu puani maʼuhiga ʼo te Tohi-Tapu.
4 Ko nātou fuli ʼaē ʼe kau ki te ako, ʼe nātou maʼu te pilivilesio ʼaē ko te teuteuʼi pea mo te fai ʼo he ʼu akonaki. ʼE feala ke fua lelei kiā tatou fuli te ʼu manatu fakaloto mālohi ʼaē ʼe fai mai muʼa e te taupau ako. Pea ʼi te ʼosi fono, ko te taupau ako ʼe ina fai ʼāteaina he ʼu tokoni lelei ki te kau ako takitokotahi. ʼE toe ʼaoga foki kiā tatou ia te ʼu gāue ʼaē ʼe kole mai ke tou fai ʼi te fakaʼosi ʼo te ʼu kapite fuli ʼo te tohi Tirez profit de l’École du ministère théocratique, ʼaē ʼe talanoa ai ʼo ʼuhiga mo he kalitātē ki te faiakonaki.
5 Ko te ʼu manatu ʼaoga ʼo te Tohi-Tapu ʼaē ʼe koutou logo kiai ʼi te ako pea ʼi te hili ʼo te ako, koutou tohi ʼi takotou tohi École du ministère. Koutou metitāsio ki te ʼu meʼa ʼaē neʼe koutou ako, pea mo vakaʼi peʼe tokoni feafeaʼi atu ia te ako fakaʼatua ʼaia ke koutou tuputupu ʼi te faʼahi fakalaumālie.