Ke Tou Fakaʼaogaʼi Katoa Te Ako ʼo Te Minisitelio Faka Teokalatike
1 Ko te Ako ʼo Te Minisitelio Faka Teokalatike neʼe ko he meʼa gāue moʼo fakamāmāhani ʼo tatou ki te “fai akonaki” koia ʼe feala ke lelei ai tatatou fakahā ʼo te ʼu moʼoni ʼo te Tohi-Tapu ki niʼihi. (2 Tim. 4:2) ʼE tou maʼu te manatu maʼuhiga ʼi te ʼu talanoa faka Tohi-Tapu kehekehe ʼi te vāhaʼa fuli. E feafeaʼi hatatou tokaga ke tou maʼu katoa te fua lelei ʼo te akonaki maʼuhiga ʼaē ʼe haʼu mai te ako ʼaia?
2 Koutou tokaga fakalelei ki te ʼu ʼuluaki palalau ʼa te tagata taupau ki te gāue ʼo ʼuhiga mo he ʼu puani ʼaoga ʼe feala ke koutou akoʼi lolotoga te fono. Koutou fakakaukauʼi te ʼu fehuʼi ʼe feala ke ina lagaʼi pea e feafeaʼi takotou fakaʼaogaʼi te ʼu tali ʼi tokotou minisitelio.
3 Ko te akonaki ʼaē ʼe kamata ʼaki te fono gāue ʼe mole ko he fakamanatu pe ia ʼo he puani. ʼE ina fakahāhā te ʼaoga ʼo te puani ki te agaaga ʼo te maʼuli pea e feafeaʼi tona fua lelei kia koutou takitokotahi. Ko te teuteu fakatomuʼa ʼe tokoni anai kia koutou ke koutou tokagaʼi lelei te ʼu faʼahiga puani pea mo koutou kau ki te tali ki te fakamanatu ʼo te ʼu puani ʼaia.
4 Kapau ʼe tou lau tuʼumaʼu te ʼu vaega faka Tohi-Tapu ʼaē ʼe fakatuʼutuʼu ki te vāhaʼa fuli, pea ʼe loloto anai tatatou mahino ki te Folafola ʼa te ʼAtua. Ko te fai ʼo he ʼu kumi ʼe feala ke koutou maʼu ai he ʼu manatu foʼou pea mo he ʼu puani ʼe ʼaoga ke tuputupu ai takotou mālama ki te moʼoni. Ko te fakakaukauʼi ʼo te ʼu puani ʼo te Tohi-Tapu ʼe lahi ake ia ʼi te liuliuga pe ʼaē ʼo te fakamatala ʼo te Tohi-Tapu. ʼI te hili ʼo he fakamanatu fakanounou, ko ia ʼaē ʼe ina fai te akonaki ʼe ina fakahāhā anai te ʼu puani tāfito ʼo te koga ʼaē neʼe tuku ake ke ina fai pea mo fakahā peʼe feafeaʼi tonatou ʼalutahi mo totatou maʼuli pea mo tatatou tauhi. ʼE ʼaoga ke koutou tokaga peʼe feafeaʼi takotou ako fakalelei ke koutou maʼuliʼi te akonaki ʼo te Tohi-Tapu.—Pes. 119:105.
5 Kapau neʼe hinoʼi koutou ke koutou fai he akonaki, koutou toʼo he ʼu nota ʼo te puani ʼaē ka koutou gāueʼi. Koutou lau te ʼu manatu ʼaē ʼe tuʼu ʼi te tohi Manuel pour lʼEcole ʼaē ʼe talanoa ki te faʼahi ʼaē ʼe tonu ke koutou fai, pea ke koutou mulimuli kiai. ʼI takotou fili te ʼu manatu ʼaē ki takotou akonaki, koutou faigaʼi ke koutou fakahāhā fakalelei he ʼu puani ʼe ʼaoga anai ki te gāue faka mafola.—sg pp. 96 ki te 99.
6 Kapau ko koutou ko he tuagaʼane neʼe hinoʼi koutou ke koutou fai te Akonaki N. 3 peʼe N. 4, koutou fakaʼaogaʼi he ʼaluʼaga ʼe feala ke hoko moʼoni. Ko ia ʼaē ʼe fakalogo ʼe feala pe ke ina tali peʼe kailoa te meʼa ʼaē ʼe koutou talanoa kiai; koutou fakahā peʼe feafeaʼi takotou tokoni ki te hahaʼi takitokotahi ke nātou fakakaukauʼi te ʼu fakatuʼutuʼu faka Tohi-Tapu. (sg pp. 153 ki te 157) Ko te faʼahi ʼaia ʼe tokoni ai kia nātou ʼaē ʼi te fono ke nātou vakaʼi peʼe feafeaʼi te tali ki te ʼu fehuʼi ʼaē ʼe lagaʼi ʼi te fai faka mafola. Ke lelei takotou teuteu fakatomuʼa pea ke koutou fakatuʼutuʼu ke liuliuga fakatomuʼa takotou akonaki mo ia ʼaē ʼe hoa mo koutou. ʼE mole tonu anai ke liuliuga ʼi te temi pe ʼaē ʼe kamata ai te fono.
7 Ko nātou ʼaē ʼe fai tanatou ʼu akonaki ʼe fakaloto mālohiʼi nātou ke nātou heheka ʼi te ʼu hekaʼaga ʼaē ʼi muʼa ʼi te Fale ʼo te Puleʼaga. Ko te faʼahi ʼaia ʼe faka fealagia ai ki te tagata taupau ki te ako ke ina tuku ake he ʼu tokoni ʼe ʼaoga kia nātou. Ko tatou fuli ʼe feala hatatou maʼu he ʼu fua lelei mai te ʼu puani lelei, mo makehe ʼaē ʼe ina tuku mai ʼo fakatafito ki te tohi Manuel pour lʼEcole. E lagi ʼe mole ina muliʼi anai te fakaʼaluʼalu ʼo te puani ʼaē ʼe tuʼu ʼi te pepa Tokoni ʼe ʼAoga ki te Akonaki; ʼe ina fili anai he puani ʼe ʼaoga kia koutou ʼi te temi ʼaia ke feala ai hakotou tuputupu lelei.
8 Ko te ʼu tupuʼaga lelei ʼaia maʼa tatou ke tou teuteu ke tou kau ki te Ako ʼo te Minisitelio Faka Teokalatike ʼi te vāhaʼa fuli. Ko te akonaki ʼaē ʼe tou maʼu ʼe feala ke ina tokoniʼi tatou ke tou aga fakapotopoto pea ke tou faiva ʼi totatou minisitelio.—Taag. 1:5.