Ke ʼAoga Kia Koutou Te Polokalama ʼo Te Ako ʼo Te Minisitelio Faka Teokalatike Ki Te Taʼu 1999
1 Ko Sesu neʼe ko te Faiakonaki Lahi. Ko te hahaʼi neʼe “nātou ōfo . . . ʼi tana taʼi faʼahiga faiakonaki.” (Maleko 1:22) Logope la ʼe mole he tahi ia tatou ʼe feala ke palalau pea mo faiakonaki ohage ko Sesu, kae ʼe tou faiga anai ke tou faʼifaʼitaki kia te ia. (Gāue 4:13) Koia, kapau ʼe tou kau ki te Polokalama Ako ʼo Te Minisitelio Faka Teokalatike, pea ʼe tokoni mai anai te ako ʼaia ke tou hikihiki tatatou poto palalau pea mo tatatou faiakonaki.
2 ʼI te taʼu 1999, ʼe fakatafito anai te Akonaki N° 1 ki te tohi Les Témoins de Jéhovah : Prédicateurs du Royaume de Dieu pea mo te ʼu alatike ʼo Te Tule Leʼo pea mo te Réveillez-vous! ʼo te taʼu 1997. ʼE tuputupu anai tatatou mahino ki te ʼu meʼa fakalaumālie, mo kapau ʼe tou lau fakatomuʼa te ʼu alatike ʼaia pea mo tou fakalogo kiai ʼi te polokalama ʼo te ako faka teokalatike. Ko nātou ʼaē neʼe hinoʼi age ke nātou fai te akonaki ʼaia ʼe tonu ke nātou fakahā mai peʼe tou lava fakaʼaogaʼi feafeaʼi te ʼu puani ʼaia, ʼo ina fai ke tupu ʼaki ai hatatou fia logo pea mo fai ke maʼuli te akonaki ʼaia. ʼE fakatafito anai te Akonaki N° 3 pea mo te N° 4 ki te ʼu tohi Bonheur familial peʼe ko te Auxiliaire pour une meilleure intelligence de la Bible. Ko te tēhina taupau ʼo te ako ʼe tonu ke ina vakavakaʼi fakalelei te ʼu manatu ʼi muʼa ʼo tana hinoʼi he tahi ke ina fai te akonaki ʼaia. Ko nātou fuli ʼaē ʼe tonu ke nātou fai hanatou akonaki ki te tohi Bonheur familial, ʼe tonu ke nātou tuku he faʼifaʼitaki lelei ʼi tonatou maʼuli faka famili.
3 Koutou Maʼuliʼi Te ʼu Tokoni, Pea Koutou Teuteuʼi Fakalelei: Ko tatou fuli ʼe feala ke tou tuputupu ʼi te poto palalau pea mo te faiakonaki. (1 Tim. 4:13) Koia, ʼe tonu ke tou kumi tokoni pea ke ʼaua naʼa tou manatu ʼe mole ʼaoga kia tatou. (Taag. 12:15; 19:20) Ko te fakahāhā lelei ʼo te moʼoni ʼi te ʼu fono pea mo te fai faka mafola, ʼe mole tonu ke gata ʼaki pe he fakamatala ʼo he ʼu meʼa peʼe ko te lau ʼo he ʼu vaega. Kae ʼe tonu ke tou fai ke malave ki te loto ʼo te hahaʼi pea mo uga ai te hahaʼi ʼaē ʼe fagono mai kia tatou ke nātou mulimuli ki te ʼu tokoni ʼaia. ʼE feala ke tou fai te faʼahi ʼaia mo kapau ʼe tou palalau fakamalotoloto ki te moʼoni. (Vakaʼi ia Gāue 2:37.) Ko te tokoni ʼaē ʼe foaki mai ʼi te ako ʼe tokoni anai kia tatou ke tou fai te faʼahi ʼaia.
4 ʼI te temi pe ʼaē ʼe foaki atu ai hakotou kiʼi fai palalau, ʼe lelei ke koutou fakakaukauʼi te ʼu kalitate ʼaē ʼe tonu ke koutou gāueʼi, ʼaē ʼe fakamahino ʼi te tohi Manuel pour l’École. Koutou vakaʼi te meʼa ʼaē ʼe tonu ke koutou fai ke koutou maʼuliʼi te ʼu tokoni ʼaē neʼe fai atu kia koutou ʼi takotou tahi kiʼi fai palalau. Koutou metitasio ki te kupu tāfito, te ʼaluʼaga ʼaē ka koutou fakaʼaogaʼi ki te fai palalau, pea mo vakaʼi peʼe feafeaʼi anai te maʼuliʼi ʼo te ʼu vaega ʼo takotou akonaki. Koutou metitasio ki te faʼahiga fakaʼaogaʼi lelei ʼo te ʼu manatu ʼaia ke feala hana akoʼi te hahaʼi pea mo nātou.—1 Tim. 4:15, 16.
5 Kapau ʼe koutou tuʼania takotou kau ki te ako, pea koutou faikole ʼo ʼuhiga mo te faʼahi ʼaia pea koutou kole tokoni ki te tagata taupau ʼo te ako. ʼE fua lelei anai kia tatou fuli te fakaʼaogaʼi lelei ʼo te polokalama ʼo te Ako ʼo te Minisitelio Faka Teokalatike 1999.