Tou Kau Ki Te Ako ʼo Te Minisitelio Faka Teokalatike
1 Ko te Ako ʼo Te Minisitelio Faka Teokalatike ʼe ko he fakatuʼutuʼu moʼo akoʼi ʼo te toko lauʼi miliona kau Fakamoʼoni ʼa Sehova, ʼi tonatou ʼuhiga kau minisi ʼo te logo lelei. Tokolahi ia tatou ʼe tou manatuʼi tatatou tuʼania ʼi tatatou ʼuluaki kau ki te ako ʼaia, pea ʼi te temi nei ʼe tou loto fakafetaʼi ʼuhi ko te ʼaoga ʼo te ako ʼaia ki totatou tuputupu ʼi te faʼahi fakalaumālie, ʼi totatou ʼuhiga kau faiako ʼo te Folafola ʼa te ʼAtua. (Vakaʼi ia Gāue 4:13.) ʼE koutou kau koa ki te ako taulekaleka ʼaia?
2 Ko ai koa ʼaē ʼe feala ke kau ki te ako ʼaia? ʼI te pasina 73 ʼo te tohi Organisés pour bien remplir notre ministère ʼe ina tali fēnei: “Ko nātou fuli ʼaē ʼe kau tuʼumaʼu ki te ʼu fono ʼo te kokelekasio, ʼe feala ke nātou kau ki te ako ʼaia, ʼo feiā ki te hahaʼi ʼe foʼofoʼou mai, kae ke ʼaua naʼa nātou fai he aga ʼe fakafeagai ki te ʼu pelesepeto ʼo te Tohi-Tapu.” ʼE mātou fakaafe ia nātou fuli ʼaē ʼe fia kau kiai—tagata, fafine, pea mo te ʼu tamaliki—ke nātou ʼolo ki te tagata taupau ki te ako, pea ke nātou kole ke nātou kau kiai.
3 Ko Te Polokalama ʼo Te Ako Ki Te Taʼu 1997: Ko te polokalama ʼo te Ako ʼo Te Minisitelio Faka Teokalatike ki te taʼu 1997, ʼe lahi ai te ʼu akonaki faka Tohi-Tapu, pea mo te ʼu akonaki ʼo ʼuhiga mo te ʼu tagata pea mo te ʼu fafine ʼo te Tohi-Tapu, ʼo kau kiai mo te hisitolia ʼo te kautahi. ʼO hilifaki ki te fakatuputupu ʼo tatatou poto palalau pea mo tatatou poto faiakonaki, ʼe lahi te ʼu koloā fakalaumālie ʼaē ʼe tou maʼu ʼi te ʼu vāhaʼa fuli ʼi te polokalama ʼaia. (Taag. 9:9) Kapau ʼe tou teuteu ki te ako, ʼaē ʼe kau ai te lau ʼo te Tohi-Tapu ʼi te vāhaʼa fuli, pea mo tou kau tuʼumaʼu ki te ʼu fono, ʼe feala ke tou maʼu ʼi te polokalama ʼaia he ʼu tapuakina lahi ʼi te faʼahi fakalaumālie.
4 ʼI te agamāhani ko te Akonaki N° 2, ʼe lau ai te ʼu vaega ʼo te Tohi-Tapu. Ko ia ʼaē ʼe ina teuteuʼi te akonaki ʼaia, ʼe tonu ke ina vakavakaʼi lelei te ʼu minuta ʼaē ʼe ina lau ai te koga tohi, pea mo ina vakavakaʼi peʼe ina lava fakaʼaogaʼi feafeaʼi te ʼu minuta e nima, moʼo fai ʼaki tana ʼuluaki palalau pea mo tana ʼu palalau fakaʼosi. Ko te faʼahi ʼaia ʼe ina faka fealagia anai kia ia ʼaē ʼe ako ke ina fakaʼaogaʼi katoa tona temi pea mo ina fakatuputupu tana poto lautohi pea mo tana poto ʼi te faiakonaki ʼo mulimuli ki te ʼu meʼa ʼaē ʼe ʼaoga kia nātou ʼaē ʼe kau ki te fono.—1 Tim. 4:13.
5 Ko te fagonogono faigamālie ʼe toe kau ki te fakatuʼutuʼu ʼo te Akonaki N° 3, ʼaē ʼe fakatafito ki te tohi Te ʼAtamai Mālama. Koia, ʼe feala ke fili e he tuagaʼane ke ina fai he ʼaʼahi, pe ko he ako Tohi-Tapu, peʼe ko he fagonogono faigamālie moʼo fakatuʼutuʼu kiai tanā fai palalau. ʼE mahino papau ia, ko te meʼa ʼaē ʼe maʼuhiga tāfito ʼe ko te lelei ʼo te fai palalau, kae mole ko te ʼaluʼaga ʼaē ʼe fai ai te fai palalau.
6 Ko te Akonaki N° 4 ʼe tonu ke lelei ʼaupito pea mo ʼaoga. ʼI te vāhaʼa fuli, ʼe vakaʼi anai te faʼifaʼitaki ʼo he tagata pe ko he fafine ʼe talanoa kiai te Tohi-Tapu. Koutou vakaʼi fakalelei te ʼu puani ʼaē ʼe tuʼu ʼi te pepa ʼe ʼalutahi mo Te Minisitelio ʼo Te Puleʼaga ʼo ʼuhiga mo te tagata ʼaia pe ko te fafine ʼaia ʼo te Tohi-Tapu. Koutou fai te akonaki ʼo mulimuli ki te kupu tāfito, pea koutou fakaʼaogaʼi te ʼu vaega tāfito ʼo Tohi-Tapu, ʼaē ka tokoni anai kia nātou ʼaē ʼo te fono, ke nātou tokagaʼi ia ia ʼaē ʼe talanoa kiai te Tohi-Tapu pea mo tana aga, te ʼu meʼa ʼaē neʼe ina fai, pea mo te ʼu meʼa ʼaē neʼe holi kiai, te ʼu meʼa ʼaē ʼe lelei ke tou faʼifaʼitaki kiai pea mo te ʼu meʼa ʼaē ʼe tonu ke tou līaki. Ko te vaega ʼaē ʼe mole pipiki ki te tagata ʼaia pe ko te fafine ʼaia ʼaē ʼe talanoa kiai te Tohi-Tapu, ʼe lagi feala ke fakaʼaogaʼi mo kapau ʼe nātou faka maʼuhigaʼi te manatu ʼa Sehova ki te ʼu meʼa ʼaē ʼe lelei, pe ko te ʼu meʼa ʼaē ʼe kovi, pea mo vakaʼi peʼe ʼalutahi mo te kupu tāfito ʼo te akonaki.
7 Kapau ʼe koutou maʼu te pilivilesio ʼaē ko te fai ʼo te ʼuluaki akonaki, peʼe ko te ʼu puani maʼuhiga, peʼe ko te lau ʼo te ʼu vaega ʼo te Tohi-Tapu, ʼe feala ke koutou fakahā takotou loto fakafetaʼi ki te Ako ʼo Te Minisitelio Faka Teokalatike, ʼo koutou teuteuʼi lelei pea mo koutou fai liuliuga takotou akonaki, ʼo koutou fakahā takotou tui papau ki te ʼu meʼa ʼaē ʼe koutou palalau kiai, pea mo koutou fai ʼaki he loto fiafia, ʼo mole koutou fakalaka ʼi te temi ʼaē neʼe tuku atu, ʼo koutou fakalogo pea mo fakaʼaogaʼi te ʼu tokoni ʼa te tagata taupau ki te ako, pea mo koutou faiga tuʼumaʼu ke koutou fai fakalelei takotou akonaki. Koia ko takotou kau ki te ako ʼe liliu anai ko he tapuakina kia koutou, pea mo nātou fuli ʼaē ʼe kau ki te fono.