Te Ako ʼo Te Minisitelio Faka Teokalatike ʼo Te Taʼu 1998

Ko te akoʼi ʼo he tahi ko tona faka ʼuhiga ʼe “akoʼi peʼe akoako ki he faʼahiga ʼatamai mālama peʼe ke poto.” ʼAki te Ako ʼo Te Minisitelio Faka Teokalatike, ʼe akoʼi tuʼumaʼu tatou ʼo ʼuhiga mo te ʼatamai mālama ʼo te ʼAtua. Koia, ko tatatou kau ki te ako ʼaia ʼe toe feala ai foki ke tou fakatuputupu tatatou poto ʼi te faʼahiga fai palalau pea mo te faʼahiga faiako. ʼE foaki mai anai e te polokalama ako ʼo te taʼu 1998 te ʼu faigamālie ke toe lahi age tatatou tuputupu ʼi te faʼahi fakalaumālie.

ʼI takotou vakavakaʼi te polokalama ako ʼo te taʼu ka haʼu, ʼe koutou fakatokagaʼi anai, ʼi ʼihi temi, ʼe fakatafito te Akonaki N°3 ki he tagata pe ko he fafine ʼo te Tohi-Tapu ʼe maʼu ʼi te tohi Auxiliaire. Tahi ʼaē meʼa, neʼe hilifaki kiai te tohi Te Manuʼia Faka Famili ki te polokalama ʼo te taʼu 1998, pea ʼe talanoa anai kiai te akonaki N°3 pea mo te N°4. Kapau ʼe fakatafito te akonaki N°4 ki te tohi Te Manuʼia Faka Famili, pea ʼe tonu anai ke fai te akonaki ʼaia e he tēhina ohage ko he akonaki ki te kokelekasio. Pea ʼe toe fakamanatuʼi atu, ʼe mole tonu anai ke fakalaka te ʼu akonaki ʼi te ʼu minuta ʼaē kua tuku age.

Ko He Fakatuʼutuʼu Foʼou: Ke fua lelei kia tatou takitokotahi, “Ko Te Tahi Polokalama Ki Te Lau ʼo Te Tohi-Tapu,” ʼe tohi fakatahi mo te numelo ʼo te katiko ki te ʼu vāhaʼa fuli. Logope la ʼe mole fakatafito kiai he koga ʼo te polokalama ʼo te ako ʼi te vāhaʼa, kae koutou fakatuʼutuʼu ke koutou mulimuli kiai. ʼE faka fealagia e te faʼahi ʼaia ke koutou māhani ki te lau ʼo te Tohi-Tapu ʼi te ʼaho fuli, mo kapau ʼe mole heʼeki koutou fai.

Kapau ʼe koutou fia ʼiloʼi he tahi ʼu meʼa ʼo ʼuhiga mo te ʼu fai palalau, mo te ʼu tokoni, pea mo te ʼu fakamanatu, koutou lau fakalelei te ʼu fakatotonu ʼaē ʼe tou maʼu ʼi te “Polokalama ʼo Te Ako ʼo Te Minisitelio Faka Teokalatike Ki Te Taʼu 1998,” pea mo te pasina 3 ʼo Te Minisitelio ʼo Te Puleʼaga ʼo ʼOketopeli 1996.

Kapau ʼe mole heʼeki koutou tohi tokotou higoa ki te Ako ʼo Te Minisitelio Faka Teokalatike, pea ʼe mātou fakaafe atu koutou ke koutou fai te faʼahi ʼaia ʼi te temi nei. ʼE hoko atu pe te gāue maʼuhiga ʼo te ako ʼaia, ʼo ina akoako te ʼu kaugana agavaivai ʼa Sehova ʼaē ʼe pipiki kia te ia, ke nātou liliu ko he ʼu minisi ʼe popoto lelei.​—1 Tim. 4:​13-​16.