Ko He Ako ʼe Ina Foaki Mai Te ʼu Faʼahi ʼAē ʼe Maʼuhiga Tāfito

¹ ʼE ʼolo te hahaʼi ki te ako ke akoʼi nātou ke feala hanatou fakahoko tanatou ʼu fakatuʼutuʼu ʼi tonatou maʼuli. Kae ʼe mole he tahi fakatuʼutuʼu ʼe maʼuhiga age ʼi te fakatuʼutuʼu ʼaē ke tou fakavikiviki ki te Tupuʼaga ʼo te maʼuli, pea mo tou tokoni ki te hahaʼi ke nātou ako tana ʼu fakatuʼutuʼu pea mo tana ʼu manatu. Ko te fakatuʼutuʼu ʼa te Ako ʼo Te Minisitelio Faka Teokalatike, ko te teuteuʼi ʼo tatou ke tou akoʼi tatatou tui ki te hahaʼi. Koia, ka tou kau ki te ako ʼaia ʼi te vāhaʼa fuli, pea ʼe tou maʼu ai te ʼu faiva ʼe tokoni mai ki tatatou ʼu gāue ʼaē ʼe maʼuhiga tāfito ʼi totatou maʼuli.

² Neʼe tufa atu te “Polokalama ʼo Te Ako ʼo Te Minisitelio Faka Teokalatike Ki Te Taʼu 2003” ʼi Te Minisitelio ʼo Te Puleʼaga ʼo te māhina ʼaenī kua ʼosi. ʼI te polokalama ʼaia ʼe tuʼu ai te ʼu faʼahiga fakaʼaluʼalu ʼo te ako. ʼE lagi lelei hakotou ʼai takotou polokalama ʼaia ki takotou tohi Tirez profit de l’École du ministère théocratique, ʼaē ʼe tonu ke koutou ʼaumai ʼi te vāhaʼa fuli ki te Ako ʼo Te Minisitelio Faka Teokalatike. Tou vakaʼi age muʼa he ʼu agaaga ʼo te Ako ʼo Te Minisitelio Faka Teokalatike ki te taʼu 2003.

³ He Kalitate Ki Te Faiakonaki: ʼO kamata ʼi Sanualio, ʼe kamata anai te Ako Faka Teokalatike, ʼaki he akonaki e minuta nima, ʼo ʼuhiga mo he kalitate ki te faiakonaki, peʼe ko he agaaga ʼo te lautohi, ʼo te ako, peʼe ko te faiako. ʼE fai anai te ʼuluaki akonaki ʼaia e te tagata taupau ʼo te ako, peʼe ina hinoʼi he tahi tagata ʼāfea faiva ke ina fai te akonaki ʼaia. ʼE lava talanoa te tēhina ki te faka ʼuhiga ʼo te kalitate ʼaia, pea mo te maʼuhiga ʼo te kalitate ʼaia ʼi te faiakonaki. ʼE feala hana hilifaki kiai he ʼu faʼifaʼitaki faka Tohi-Tapu, pea mo ina fakahā te ʼaluʼaga ʼaē ʼe lava fakaʼaogaʼi ai te kalitate ʼaia, pea mo faka maʼuhigaʼi ko te fai ʼo te faʼahi ʼaia ʼe ina lava hikihiki tatatou fai faka mafola ke toe lelei age.

⁴ Akonaki N° 1: Ko te ʼu tēhina ʼaē ʼe hinoʼi ki te ʼuluaki akonaki, ʼe toe fakamanatuʼi age ke nātou “fakahā te ʼaoga ʼo te akonaki ʼaia.” Ko tona faka ʼuhiga, ke nātou fakahā ki te kokelekasio peʼe tonu ke nātou fakaʼaogaʼi feafeaʼi te ʼu puani ʼo te akonaki. Kapau ʼe tuku atu kia koutou te akonaki ʼaia, koutou vakaʼi ia te pasina 48 mo te 49 ʼo te tohi École du ministère, heʼe tuʼu ai te ʼu tokoni ki tona faʼahiga teuteuʼi, pea mo koutou lau te ʼu tokoni ʼaē ʼe fakahā ʼi te kupu tāfito “Application pratique” ʼi te Index ʼo te fakaʼosi ʼo te tohi.

⁵ Polokalama Lau ʼo Te Tohi-Tapu: Kapau ʼi te ʼu taʼu ki muʼa atu neʼe mole feala hakotou mulimuli ki te polokalama lau ʼo te Tohi-Tapu ʼo te vāhaʼa fuli, he koʼe ʼe mole koutou fakatuʼutuʼu ke koutou mulimuli ki te polokalama ʼo te taʼu ʼaenī? Ko nātou ʼaē ʼe nātou fai te faʼahi ʼaia, ʼe hoko mai anai te fakaʼosi ʼo te taʼu, pea nātou fakaʼosi te lau katoa ʼo te Tauhi Foʼou. ʼI te pasina 10, palakalafe 5 ʼo te tohi École du ministère, ʼe talanoa ai ki te ʼu lelei ʼaē ʼe tou maʼu mo kapau ʼe tou kamata he polokalama lau ʼo te Tohi-Tapu ʼaki te Tauhi Foʼou.

⁶ Te ʼu Puani Maʼuhiga ʼo Te Tohi-Tapu: Neʼe fakaloaloaga te akonaki ʼaia ke minuta hogofulu, ke feala ki te kokelekasio ke nātou fai he ʼu tali ʼo ʼuhiga mo te ʼu kapite ʼo te Tohi-Tapu ʼaē neʼe tonu ke lau ʼi te vāhaʼa. Ko nātou ʼaē ʼe hinoʼi ki te akonaki ʼaia ʼe tonu ke nātou mulimuli lelei ki te temi ʼaē kua tuku age. ʼE fai anai ʼi te vāhaʼa fuli, ʼo feiā mo te vāhaʼa ʼaē ka fai ai te fakamanatu ʼo te ako. Ka koutou lau anai te ʼu kapite, koutou vakaʼi te ʼu puani ʼaē ka ʼaoga anai kia koutou ʼi takotou ako faka famili, ʼi takotou minisitelio, pea ʼi tokotou maʼuli. Neʼe koteā te ʼu kalitate ʼaē neʼe maʼu e Sehova ʼi tana ʼu felogoi mo te hahaʼi pea mo te ʼu puleʼaga? Koteā te ʼu meʼa neʼe koutou ako, neʼe fakaloto mālohiʼi ai takotou tui pea mo takotou fakafetaʼi kia Sehova? Koutou fai hakotou ʼu tali ki te ʼu puani kehekehe ʼo te ʼu kapite ʼaē neʼe tuku atu ke koutou lau, ʼo feiā mo te ʼu vaega ʼo ʼuhiga mo te lautohi ʼaē ka fai lolotoga te akonaki N° 2, koteʼuhi ko te tēhina ʼaē ka ina fai te lautohi ʼaia, ʼe mole ina fai anai he fakamatala ʼo ʼuhiga mo te ʼu vaega ʼaia.

⁷ Akonaki N° 2: ʼI te vāhaʼa fuli, ko te tēhina ʼaē ka ina fai te lautohi, ʼe ko he akoako anai ki te lautohi ʼi muʼa ʼo te kaugamālie. Ko te lautohi ʼaia ʼe fakatafito anai ki te ʼu kapite faka Tohi-Tapu ʼo te vāhaʼa. Gata pe ki te vāhaʼa fakaʼosi ʼo te māhina, heʼe fakatafito anai te lautohi ʼaia ki he Tule Leʼo. Ko ia ʼaē ka ina fai te lautohi ʼaia, ʼe mole ina fai anai he ʼu ʼuluaki palalau pea mo he ʼu palalau fakaʼosi. ʼI te faʼahiga fai ʼaia, ʼe feala anai kia ia ke tokaga tāfito ke lautohi fakalelei.—1 Tim. 4:13.

⁸ Akonaki N° 3 Pea Mo Te N° 4: Ko ʼihi ʼi te ʼu akonaki ʼaia ʼe toʼo tāfito mai te tohi Tokoni Ki Te ʼu Fai Palalau pea mo te tohi Fai Palalau Faka Tohi-Tapu; ko ʼihi ʼe foaki pe he kupu tāfito. Ko nātou ʼaē ka nātou fai te ʼu akonaki ʼaia, ʼe feala anai ke nātou hikihiki tanatou ʼu fai palalau, ʼo fai he ʼu kumi ʼi te ʼu tohi faka Kilisitiano. ʼE lagi faka faigafua anai ki te ʼu tuagaʼane ke nātou faka ʼalutahi te ʼu meʼa ʼaē ka nātou palalau kiai, ke ʼaoga ki te ʼu tuagaʼane ʼaē ʼe hoa mo nātou.

⁹ Te ʼu ʼAluʼaga ʼo Te Fai Palalau: Ohage ko tona fakahā ʼi te pasina 45 ʼo te tohi École du ministère, ʼe lava tuku atu e te tagata taupau ʼo te ako te faʼahiga ʼaluʼaga ʼo te fai palalau. Kapau ʼe mole ina tuku atu, pea ʼe feala ki te ʼu tuagaʼane ke nātou toʼo he ʼaluʼaga ʼi te lisi ʼaē ʼe tuʼu ʼi te pasina 82. Kapau ko he tuagaʼane ʼe ina fai he fai palalau ʼi te ʼu māhina e lua fuli, pea ʼe feala anai lolotoga taʼu e nima, ke ina fetofetogi tona ʼu ʼaluʼaga ʼo mulimuli ki te ʼu ʼaluʼaga e 30 ʼaē ʼe tuʼu ʼi te tohi. Ko te ʼu tuagaʼane ʼaē ʼe nātou filifili te No. 30, te kupu tāfito “He tahi ʼaluʼaga ʼo te fai palalau ʼe hoko ʼi tokotou telituale,” ʼe tonu ke nātou tohi te ʼaluʼaga ʼaia ʼi te kiʼi pepa (S-89) ʼaē ʼe ʼavage, ʼo tohi ʼi lalo peʼe ʼi te tuʼa pepa. Ko te tagata taupau ʼo te ako, ʼe ina tohi anai ʼi te pasina 82 ʼo te tohi ʼa te tuagaʼane, te ʼaho ʼaē neʼe fai ai te fai palalau ia tafa ʼo te ʼaluʼaga ʼaē neʼe ina fakaʼaogaʼi. ʼE feala hana toe fai feiā ʼi te temi ʼaē ʼe ina tohi ai te kiʼi pepa fai tokoni ʼa te tuagaʼane.

¹⁰ Te Pepa ʼo Te ʼu Tokoni: Ko te pepa ʼo te ʼu tokoni ʼe tuʼu ʼi takotou tohi, ʼi te pasina 79 ki te 81. Koia ʼe tonu anai ke koutou ʼaumai takotou tohi ki te tagata taupau ʼo te ako, ʼi te hili ʼo te ʼu akonaki fuli ʼaē ka koutou fai. ʼE tonu anai ki te tagata taupau ke ina taupau he pepa ʼe ina tohi ai te ʼu puani ʼaē ʼe gāueʼi e te kau ako.

¹¹ He Fai Palalau Moʼo Fakamanatu: Ko te fakamanatu ʼo te Ako ʼo Te Minisitelio Faka Teokalatike, ʼe mole tohi anai te ʼu tali ki he moʼi pepa. ʼE fai tuʼa tahi anai ʼi te ʼu māhina lua fuli, pea ʼe fai anai lolotoga minuta e 30. Ko te ʼu fehuʼi ʼaē ka vakaʼi lolotoga te fakamanatu, ʼe hoko atu pe anai tona tufa tahi atu mo Te Minisitelio ʼo Te Puleʼaga. Kapau ʼe tō tahi te vāhaʼa ʼo te fakamanatu mo te vāhaʼa ʼo te fakatahi faka tisitilike peʼe ko te ʼaʼahi ʼa te tagata taupau faka tisitilike, pea ʼe tonu anai ki te ʼu akonaki ʼaē ʼe tonu ke fai ʼi te vāhaʼa ka hoko mai, ke fai ʼi he vāhaʼa ki muʼa atu, pea ke toe fakatuʼutuʼu te fakamanatu ki te vāhaʼa ka hoa mai.

¹² Te Tahi ʼu Kalasi Ako: ʼI te ʼu kokelekasio ʼaē ʼe fakalaka ai te kau ako ʼi te toko 50, ʼe lava fakatuʼutuʼu e te kau tagata ʼāfea he tahi ʼu kalasi ako. “ ʼE feala ke fakaʼaogaʼi te fakatuʼutuʼu ʼaia maʼa te ʼu akonaki ʼa te kau ako fuli, peʼe fai pe ki te ʼu akonaki 3 mo te 4.” (École du ministère, pasina 285) Ko te tokoni ʼaia ʼe fai moʼo faka faigafua ki te ʼu kokelekasio ʼaē ʼe lahi ai te ʼu tuagaʼane, kae tokosiʼi te ʼu tēhina moʼo fai te lautohi. ʼE tonu ki te kau tagata ʼāfea ke nātou filifili he ʼu tēhina faiva moʼo takitaki te ʼu ako ʼaia.

¹³ Te Tēhina Lagolago Moʼo Fai Tokoni: Ohage ko tona tuʼu ʼi te polokalama Ako ʼo Te Minisitelio Faka Teokalatike, ʼe tonu anai ki te kau tagata ʼāfea ke nātou hinoʼi he tahi tēhina fai tokoni, moʼo tokoniʼi ʼāteaina te kau tagata ʼāfea pea mo te kau tagata faifekau faka minisitelio mokā nātou fai tanatou ʼu puani maʼuhiga ʼo te Tohi-Tapu pea mokā nātou fai te ʼu ʼuluaki akonaki. Ko te tēhina ʼaē ka hinoʼi ki te faʼahi ʼaia, ʼe tonu anai ko he tēhina kua māhani ʼi te ako, ko he tēhina ʼe fakaʼapaʼapaʼi anai tana ʼu tokoni e te tahi ʼu tagata ʼāfea. ʼE tonu ki tana ʼu tokoni ke ʼi ai hona ʼu fua lelei, ke poto ʼi te fakavikiviki kia ia ʼaē neʼe lelei tana faiakonaki, pea mo ina akoʼi he faʼahiga fai ʼo te ʼu akonaki, pea mo fakahinohino age ki te ʼu tēhina he puani e tahi peʼe lua moʼo hikihiki tanatou faʼahiga faiakonaki. ʼE mole ʼaoga anai ke ina fai he ʼu tokoni ʼi te ʼu akonaki fuli ʼaē ʼe fai e he tēhina ʼe faiakonaki putuputu. Kae ko te tēhina fai tokoni ʼaia, ʼe tonu ke fakasiosio poto pea ke mahino kia ia māʼia mo te ʼu tēhina ʼaē ʼe nātou fai he ʼu akonaki ki te kaugamālie, ʼe feala ke tokoniʼi nātou ke nātou toe tuputupu.—1 Tim. 4:15.

¹⁴ Koteā ʼAē ʼe Tonu Ke Tokagaʼi e Te Tagata Taupau ʼo Te Ako: Koteā ʼaē ʼe lava tokoni ki he tēhina fai tokoni mokā ina sivisivi he faiakonaki? ʼI te ʼu kapite e 53 ʼo te tohi, ʼe teitei maʼu ai ʼi te kiʼi tolu talanoa ʼo te tohi École du ministère te fakamatala nounou ʼo te ʼu faʼahi ʼaē ʼe tonu ke kita tokagaʼi. ʼE toe tonu foki ki te tagata taupau ʼo te ako ke ina tokagaʼi te tahi ʼu fakamanatu peʼe ko te tahi ʼu tokoni ʼo te tohi, heʼe tokoni anai kia ia ke mahino vave ki te fakaʼaluʼalu lelei ʼo te akonaki, pea mo tona ʼaoga. Ohage la, ʼe lelei ke koutou tokagaʼi te ʼu fehuʼi ʼaē ʼe tuʼu ʼi ʼaluga ʼo te pasina 55, pea mo te ʼu manatu ʼaē ʼe tuʼu ʼi te palakalafe fakaʼosi ʼo te pasina 163.

¹⁵ Koutou Tohi ʼi Te ʼu Kogaʼi Pasina ʼAē ʼe Mole Tohi Ai He Meʼa: ʼO hilifaki ki te ʼu faʼahi ʼaē ʼe lau ʼātea ʼo te ʼu pasina ʼo takotou tohi, ʼe tuʼu ʼi te tohi École du ministère te ʼu kogaʼi pasina neʼe fakatuʼutuʼu ke koutou tohi ai te ʼu faʼahi ʼaē neʼe koutou tokagaʼi ʼi takotou ako takitokotahi, pea ʼi te fono ʼo te Ako ʼo Te Minisitelio Faka Teokalatike. (Vakaʼi te ʼu pasina 77, 92, 165, 243, 246, pea mo te 250.) Koutou tokaga ʼo ʼaumai takotou tohi ʼi te vāhaʼa fuli. Koutou avahi moʼo mulimuli ʼaki te ʼuluaki akonaki, pea mo te tahi ʼu akonaki ʼo te ako. Koutou tohi te ʼu tokoni ʼaē ʼe fai e te tagata taupau ʼo te ako. Koutou tokagaʼi lelei te ʼu faʼahiga faiakonaki ʼa te ʼu tēhina, ohage ko te ʼu fehuʼi, te ʼu faʼifaʼitaki, te ʼu lea fakatātā, te ʼu paki, pea mo te fakakehekeheʼi ʼa he ʼu faʼahi peʼe ko he ʼu ʼaluʼaga. Kapau ʼe koutou tohi he ʼu puani ʼe ʼaoga kia koutou, pea ʼe feala anai hakotou toe manatuʼi, pea mo fakaʼaogaʼi te ʼu puani lelei ʼaupito ʼaē neʼe koutou logo kiai ʼi te ako.

¹⁶ Neʼe ʼiloʼi e Sesu Kilisito ko te faka mafola ʼo te logo lelei ʼo te Puleʼaga ʼo te ʼAtua, neʼe ko he toe pilivilesio makehe. Neʼe ko te gāue tāfito ʼaē neʼe tonu ke ina fai. (Mko. 1:38) Neʼe ina ʼui fēnei: “ ʼE tonu ke ʼau toe faka mafola te logo lelei ʼo te puleʼaga ʼo te ʼAtua ki ʼihi kolo, heʼe ko te tupuʼaga la ʼaia ʼo toku fekauʼi mai.” (Luka 4:43, MN ) Ohage ko nātou ʼaē kua nātou tali te fakaafe ke nātou muli ia te ia, ʼo feiā mo tatou ʼe tou maʼumaʼua tāfito ʼo faka mafola te logo lelei, pea ʼe tou faigaʼi tuʼumaʼu ke tou hikihiki tatatou “sakilifisio fakavikiviki” ke toe lelei age. (Hep. 13:15, MN ) Moʼo fakahoko te fakatuʼutuʼu ʼaia, tou faigaʼi mālohi ke tou kau tuʼumaʼu ki te Ako ʼo Te Minisitelio Faka Teokalatike, te ako ʼaia ka tokoni anai moʼo teuteuʼi ʼo tatou ki te ʼu faʼahi ʼaē ʼe maʼuhiga tāfito ʼi te maʼuli.