Te Ako ʼo Te Minisitelio Faka Teokalatike ʼo Te Taʼu 2004
1 ʼE akoʼi e Sehova te hahaʼi mai te ʼu potu fuape ke nātou fakahoko te gāue maʼuhiga ʼi te malamanei katoa. ʼE ina fakahoko te faʼahi ʼaia ʼaki te Ako ʼo Te Minisitelio Faka Teokalatike ʼaē ʼe fai ʼi te vāhaʼa fuli. ʼE lahi koa takotou kau ki te ako ʼaia, ʼo mulimuli ki takotou ʼu fealagia? ʼI Sanualio, ʼe fai anai he ʼu kiʼi fetogi moʼo tokoni ki te kau ako ke nātou maʼu te ʼu lelei fuli ʼo te ako ʼaia.
2 Te Fetofetogi ʼo Te ʼu Tēhina ʼAē ʼe Lagolago Ki Te Tagata Taupau ʼo Te Ako: Ko te ʼu tēhina ʼaē ʼe nātou fai te ʼu ʼuluaki akonaki pea mo te ʼu puani maʼuhiga ʼo te Tohi-Tapu, ʼe nātou loto fakafetaʼi ki te ʼu manatu ʼaē neʼe fakahā age e te tēhina ʼaē ʼe lagolago ki te tagata taupau ʼo te ako. ʼI te ʼu kokelekasio ʼaē ʼe lahi ai te kau tagata ʼāfea, ʼe feala ke fetofetogi ʼi te taʼu fuli te tēhina ʼaē ʼe lagolago ki te tagata taupau ʼo te ako. ʼAki te faʼahiga fai ʼaia, ʼe feala ai ke vaevae te gāue; kae tāfito, ko te kau tagata ʼāfea pea mo te kau faifekau faka minisitelio ʼe feala anai ke nātou fevaevaeʼaki tanatou ʼu fealagia ʼi te faiakonaki pea mo te takitaki ʼo te ako.
3 Te Fakatuʼutuʼu ʼo ʼUhiga Mo Te Fakamanatu: Kapau ʼe hoko te fakatahi faka silikosikilipisio ʼi te vāhaʼa ʼaē ʼe fai ai te fakamanatu, pea ʼe tonu ke fai te fakamanatu (pea mo te toe ʼo te polokalama ʼo te vāhaʼa) ʼi te vāhaʼa ki tuʼa atu ʼo te fakatahi, pea ko te polokalama ako ʼo te vāhaʼa ʼaia ʼe tonu ke fai ʼi te vāhaʼa ʼo te fakatahi faka silikosikilipisio. Kae ʼe mole ʼaoga anai ke fetogi te ʼu polokalama ako ʼo te ʼu vāhaʼa e lua mokā ʼe tō tahi te fakamanatu pea mo te ʼaʼahi ʼo te tagata taupau faka silikosikilipisio. Ko te katiko, mo te akonaki ʼo he kalitate ki te faiakonaki, pea mo te ʼu puani ʼaoga ʼo te Tohi-Tapu, ʼe tonu anai ke fai ʼo mulimuli ki te polokalama. Kae ko te ʼuluaki akonaki (ʼaē ʼe hoa ki te akonaki ʼo he kalitate ki te faiakonaki) ʼe tonu ke toʼo ʼi te vāhaʼa ʼaē ʼe hoa atu kiai. ʼI te hili ʼo te ʼu puani ʼaoga ʼo te Tohi-Tapu, pea ʼe fai anai te Fono Gāue ʼi te vaeluaʼi hola, ʼo vaevae ko akonaki e tolu e minuta 10 takitahi, peʼe ko akonaki e lua ʼe minuta 15 takitahi. (ʼE mole fai anai te ʼu tonu.) ʼE hoa anai ki te Fono Gāue te katiko pea mo he vaeluaʼi hola maʼa te tagata taupau faka silikosikilipisio. ʼI te Ako ʼo Te Minisitelio Faka Teokalatike ʼo te vāhaʼa ʼaē ka hoa kiai, ʼe fai anai te akonaki ki he kalitate ki te faiakonaki pea mo te ʼu puani ʼaoga ʼo te Tohi-Tapu ʼo mulimuli ki te polokalama, pea hoa kiai te fakamanatu.
4 Koutou fakaʼaogaʼi te ʼu faigamālie fuli ke koutou tuputupu ai ʼi te faʼahi fakalaumālie. ʼAki te ʼu akonaki ʼo te Ako ʼo Te Minisitelio Faka Teokalatike, ʼe koutou fakaloto mālohi ai takotou kokelekasio, mo koutou kau ki te fakahoko ʼo te ʼu lea faka polofeta ʼo te Tohi-Tapu, pea mo fakavikiviki kia Ia ʼaē neʼe ina foaki mai te logo taulekaleka ʼaē ʼe tonu ke tou tala.—Isa. 32:3, 4; Apk. 9:19.