Te ʼu Tagata Taupau ʼe Ko He ʼu Faʼifaʼitaki—Te Tagata Taupau ʼo Te Ako ʼo Te Minisitelio Faka Teokalatike
1 Ko te tagata taupau ʼo Te Ako ʼo Te Minisitelio Faka Teokalatike ʼe ko he tagata ʼāfea fakapotopoto ʼe gāue kinakina ʼi te faiakonaki, pea ʼe tāu mo ia ke tou fakaʼapaʼapa pea mo lagolago ki ai. (1 Tim. 5:17) Koteā koa tona maʼua?
2 ʼE tokaga ki te tānakiʼaga tohi ʼo te Ako ʼo Te Minisitelio Faka Teokalatike ʼaē ʼe ʼi te fale fono. ʼE ina fakaloto mālohiʼi ia nātou fuli ʼaē ʼe tuputupu ʼi te faʼahi fakalaumālie ke nātou kau ʼi te ako ʼaia. ʼE ina vakaʼi peʼe fai he polokalama moʼo tufa te ʼu kiʼi pepa fai palalau ia vāhaʼa e tolu ʼi muʼa ʼo te fono ʼaē ka fai ai. ʼE tonu ke ina ʼiloʼi lelei te kokelekasio, ʼo ina manatuʼi te kau ako fuli pea mo tanatou ʼu fealagia. Logope la ʼe feala ke tokoni age ki ai he tahi age tēhina moʼo teuteuʼi tana polokalama, kae ko te vaevae ʼo te ʼu fai palalau ʼe tonu ke takitaki e te tēhina ʼaē ʼe taupau ki te ako.
3 Ke feala hana takitaki lelei te ako, ʼe tonu ke teuteuʼi lelei e te tagata taupau te ʼu fai palalau ʼo te ʼu vāhaʼa fuli, ʼo ina vakavakaʼi lelei te ʼu tohi ʼaē ʼe fakatafito kiai. Ko te faʼahi ʼaia ʼe tokoni anai kia ia ke ina fakaloto mālohiʼi te kau ako ke nātou leleiʼia te polokalama ako, pea ke ina ʼiloʼi pe neʼe fakaʼaogaʼi fakalelei te ʼu tohi ʼaē neʼe hinoʼi ki te ʼu fai palalau, pea ke ina faka maʼuhigaʼi te ʼu puani ʼaē ka maʼu anai ʼi te fakamanatu.
4 ʼI te ʼosi fai ʼo te ʼu fai palalau fuli ʼa te kau ako, ʼe fakamālo anai te tagata taupau kia ia ʼaē neʼe ina fai, ʼo ina fakamahino age pe koʼe neʼe lelei tana gāueʼi he puani, peʼe ina fakamahino age pe koʼe ʼe tonu ke ina toe gāueʼi. Ka ʼaoga he tokoni ki he tahi moʼo teuteuʼi tana ʼu fai palalau, pea ʼe fakatuʼutuʼu anai e te tagata taupau totonu, peʼe ina hinoʼi anai he tahi ke tokoni kia ia.
5 Ke fua lelei kia tatou te gāue kinakina ʼo te tagata taupau ʼo Te Ako ʼo Te Minisitelio Faka Teokalatike pea mo te ʼu tēhina ʼaē ʼe gāue fakatahi mo ia, ʼe tonu ke tou kau tuʼumaʼu ki te ako. ʼE tonu foki ke tou fai te ʼu fai palalau fuli ʼaē ʼe hinoʼi mai ke tou fai, pea mo mulimuli ki te ʼu tokoni ʼaē ʼe fai mai ʼo feiā mo te ʼu tokoni ʼaē ʼe fai ki ʼihi ʼi te ako. Kapau ʼe tou fai te faʼahi ʼaia, pea ʼe fakahaʼuhaʼu anai ʼo lelei tatatou fakahā te logo lelei ʼo te Puleʼaga ʼi muʼa ʼo te hahaʼi pea ʼi te ʼu ʼapi.—Gāue 20:20; 1 Tim. 4:13, 15.