ʼE Akoʼi Tātou e Sehova Ki Te Gāue ʼAia
1. ʼI te foaki e Sehova he gāue ki te hahaʼi, koteā ʼaē ʼe ina toe foaki kiā nātou?
1 Kā foaki e Sehova he gāue ki te hahaʼi, ʼe ina toe foaki foki mo he tokoni ke natou fakahoko fakalelei te gāue ʼaia. Ohagē lā, ʼi te temi ʼaē neʼe ʼui age e Sehova kiā Noe ke ina faʼu te ʼaleka, ko he faʼahi neʼe heʼeki fai e Noe ʼi muʼa atu, neʼe Ina toe ʼui age foki peʼe feafeaʼi tona faʼu. (Sen. 6:14-16) ʼI te temi ʼaē neʼe hinoʼi ai ia Moisese, te tauhi ovi agavaivai ke palalau ki te ʼu tagata ʼāfea ʼo Iselaele pea mo Falaone, neʼe fakalotomālohiʼi fēnei ia ia e Sehova: “Ko au ʼe au nofo anai mo tou gutu pea ʼe au akoʼi atu anai te palalau ʼaē ʼe tonu anai ke ke fai.” (Eke. 4:12) ʼO ʼuhiga leva mo tatatou fakahoko ia te gāue fai fakamafola ʼo te logo lelei, neʼe foaki mai e Sehova kiā tātou ia te ʼu fakatotonu ʼo ʼuhiga mo te gāue ʼaia. ʼE ina akoʼi tātou ki te gāue ʼaia ʼaki te Ako Fakateokalatike pea mo te Fono Gāue. ʼE feafeaʼi hatatou maʼu he fua lelei ʼi te ako ʼaia?
2. Koteā te ʼu fua lelei ʼe feala ke tou maʼu ʼi te Ako Fakateokalatike?
2 Te Ako Fakateokalatike: ʼI muʼa ʼo te fono, kotou lau pea mo teuteuʼi te ʼu akonaki peʼe ko te ʼu tohi ʼaē kā vakaʼi. Ko te meʼa kā hoko, ʼi takotou sio peʼe feafeaʼi te fakaʼaogaʼi ʼo te ʼu puani ʼi tanatou ʼu fai palalau, ʼe kotou fakatuputupu anai takotou mahino ʼo ʼuhiga mo te fai akonaki. (Taag. 27:17) Kotou ʼaumai takotou tohi École du ministère ki te fono pea kotou fakaʼaogaʼi te tohi ʼaia ohagē ko he tohi moʼo akoako. ʼI te mulimuli ʼa te taupau ʼo te ako ki te tohi ʼaia ʼi te ʼosi ʼo te ʼu fai palalau, kotou fakaʼiloga ia te ʼu puani tāfito ʼe ʼaoga kiā koutou, pea mo fakaʼaogaʼi te ʼu faʼahi ʼaē ʼe lauʼātea ʼo te ʼu pāsina ke kotou tohi ai ni ʼu nota. ʼI takotou kau ki te ako ʼaia ʼe kotou maʼu ai te ʼu fua lelei. ʼE kotou kau koa ʼi te ako ʼaia? Kā foaki atu hakotou akonaki, kotou teuteuʼi lelei pea mo kotou mulimuli ki te tokoni ʼaē ʼe fai atu kiā koutou. Kotou fakaʼaogaʼi ʼi te minisitelio ia te ʼu puani ʼaē neʼe kotou ako.
3. Koteā ʼaē ʼe tokoni mai anai ke fua lelei ia te Fono Gāue kiā tātou?
3 Te Fono Gāue: ʼE tou manatuʼi lelei anai te ʼu tokoni ʼaē neʼe fai lolotoga te fono ʼaia ʼi tatatou lau fakatomuʼa mo teuteuʼi te ʼu akonaki peʼe ko te ʼu tohi ʼaē kā vakaʼi pea mo teuteuʼi ni ʼu tali. Kapau ʼe tou fakanounou totatou ʼu tali, ʼe feala anai ki ʼihi ke natou fai hanatou tali.
Kotou sioʼi fakalelei ki te ʼu faʼifaʼitaki, pea mo fakaʼaogaʼi ia te ʼu tokoni ʼaē ʼe feala ai ke fua lelei ki takotou minisitelio. Kotou taupau lelei te ʼu ʼalatike ʼo Te Minisitelio ʼo Te Puleʼaga ʼaē kā ʼaoga ki te fai fakamafola.
4. He koʼē ʼe tonu ke tou fakaʼaogaʼi lelei ia te ako fakateokalatike?
4 Ohagē ko te ʼu gāue ʼaē neʼe foaki kiā Noe pea mo Moisese, ko tatatou gāue fai fakamafola ʼo te logo lelei ʼi te kele kātoa ʼe faigataʼa. (Mat. 24:14) ʼE feala ke lava lelei mo kapau ʼe tou falala kiā Sehova, ia totatou Faiako Lahi, pea mo fakaʼaogaʼi lelei ia te ako ʼaē ʼe ina foaki mai.—Isa. 30:20.