Tou Tala Ki Te Hahaʼi Te ʼAmanaki ʼo Te Puleʼaga
1 ʼI te ʼu ʼaho faigataʼa ʼaenī, tokolahi ʼi te mālamanei ʼe mole hanatou ʼamanaki. (Efe. 2:12) Ko ʼihi ʼe mole natou aga fakapotopoto, heʼe natou falala ki te ʼu koloa, ki te ʼu pule takitaki, ki te poto fakatagata, pea mo te tahi atu ʼu faʼahi. Kae ʼe tou fiafia lahi tātou, heʼe tou maʼu ia te ʼamanaki moʼoni ki te kā haʼu, ko he ʼamanaki ʼe hagē ko “he foʼi tau ki te maʼuli, ʼe moʼoni ia pea ʼe tukupau ia”!—Hep. 6:19.
2 ʼO mulimuli ki te takitaki ʼo te Puleʼaga ʼo te ʼAtua, ʼe liliu anai ia te kele ko he palatiso. ʼE toe fakatuʼuake anai tatatou ʼu mate ʼaē ʼe tou ʼoʼofa mamahi ai. (Gāue 24:15) ʼE pulihi anai ia te maʼuli masiva, te heʼe faitotonu, te matuʼatuʼa, pea mo te mate. (Pes. 9:18; Mat. 12:20, 21; Fakh. 21:3, 4) ʼE kau ia te ʼu fakapapau ʼaia ki te ʼu fakapapau ʼa Sehova ʼaē kā ʼamanaki hoko. Ko te faʼahi fea ʼaē ʼe kotou fakaʼamuʼamu kiai ʼi takotou ʼamanaki?
3 Tou Tala Ia Te Logo Lelei: ʼE mole tonu ke tou taupau pē maʼa tātou ia te ʼamanaki ʼaia ʼo te Puleʼaga. Ko tatatou ʼofa ʼaē ki te ʼAtua pea mo tatatou tatau, ʼe ina uga tātou ke tou faʼifaʼitakiʼi ia Sesu ʼo “fakahā te logo lelei ki te kau māsisiva, . . . [mo] faka mafola te ʼāteaina kiā nātou ʼe pōpula pea ki te kau kivi ke natou toe sisio, pea mo fakaliliu ʼi te ʼosi ʼo tanatou faka ʼāteaina, ia nātou ʼaē ʼe taʼomia.” (Luka 4:18) Neʼe tala e te ʼapositolo ko Paulo ia te logo lelei ʼi te ʼu fakatauʼaga meʼa kai pea ʼi te potu fuli pē ʼaē neʼe ina maʼu ai te hahaʼi. Neʼe maʼumaʼua ʼaupitō ʼi te minisitelio. (Gāue 18:5) ʼO faʼifaʼitaki ki tana faʼafai ʼi te minisitelio, ʼe mole vaivai anai tatatou ʼamanaki faka Kilisitiano ʼi “te ʼu hoha ʼo te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloa.”—Mko. 4:19.
4 Kā tou felāveʼi mo ni ʼu hahaʼi ʼe mole fia logo, peʼe natou meʼa noaʼi ia te logo ʼo te Puleʼaga, peʼe fakafeagai mai kiā tātou, ʼe mole vaivai ai tatatou ʼamanaki ʼo ʼuhiga mo te Puleʼaga. ʼE tou “tāpiki maʼu ki te tala ʼo tatatou ʼamanaki ʼi te kaugamālie, ʼo mole tou lotovaivai.” (Hep. 10:23) ʼE mole tou “ufiufi ʼo ʼuhiga mo te logo lelei.” (Loma 1:16) Ko tatatou tui papau pea mo tatatou faʼa kātaki ʼe lagi ina uga anai ʼihi ʼaki te temi ke natou fakalogo.
5 Logolā ʼe lelei ke tou fakahā age ki te hahaʼi ia te fakaʼāʼāsili kovi ʼo te ʼu ʼaluʼaga ʼo te mālamanei ʼaē neʼe fakakikite ʼi te ʼu lea faka polofetā ʼa te Tohi-Tapu, kae ʼe mole tou faka mafola he logo ʼo te malaʼia. ʼE tou fakahā tāfito ʼi tatatou minisitelio ia te ʼamanaki ʼo te Puleʼaga—te logo lelei ʼo te Puleʼaga ʼo te ʼAtua. ʼOfa pē ke tou faka mafola ia te logo lelei ʼaia ʼaki he loto falala pea mo he loto faʼafai, “ke feala [hatatou] tui papau ki te ʼamanaki ʼo aʼu ki te fakaʼosi.”—Hep. 6:11.