Koutou Falala Kiā Sehova Pea Mo Koutou Lototoʼa

“Falala kiā Sehova, ke ke lototoʼa, pea ke mālohi tou loto. ʼIo, falala kiā Sehova.”​—Pesalemo 27:14.

1. He koʼe ʼe ʼaoga te falala, pea koteā te faka ʼuhiga ʼo te kupu ʼaia ʼi te Tohi-Tapu?

KO HE falala moʼoni ki he meʼa ʼe hage ko he mālama ʼe gigila. ʼE feala ai ke tou sio mamaʼo atu ʼi te ʼu faigataʼaʼia ʼaē ʼe tou tau mo ia ʼi te temi nei, pea mo sio ki te kā haʼu ʼaki he lototoʼa pea mo he fiafia. ʼE ko Sehova tokotahi pe ʼaē ʼe feala ke ina tuku mai he ʼu faʼahi ke tou falala moʼoni kiai, ʼaē ʼe tou maʼu ʼi tana Folafola. (2 Timoteo 3:16) ʼI tona fakahagatonu, ʼe tuʼa lahi te hā ʼo te kupu “falala” ʼi te Tohi-Tapu pea ʼe faka ʼuhiga ki te fakatalitali ki he meʼa ʼe lelei pea toe faka ʼuhiga ki te meʼa ʼaē ʼe tou fakatalitali kiai.a Ko te falala ʼaia ʼe maʼuhiga age ʼi he meʼa ʼe tou loto kiai, ʼaē ʼe lagi mole hona fakatafito peʼe lagi mole ʼiloʼi pe hoko anai.

2. Neʼe koteā te ʼaoga ʼo te falala ʼi te maʼuli ʼo Sesu?

² ʼI te temi ʼaē neʼe felāveʼi ai Sesu mo te ʼu fihifihia pea mo te ʼu faigataʼaʼia, neʼe sio mamaʼo atu ia pea neʼe falala kiā Sehova. “ ʼUhi ko te fiafia ʼaē neʼe fakapapau age kiā te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:2, MN ) ʼUhi ʼaē he neʼe tokaga tāfito Sesu ke faka lakatonuʼi te ʼuhiga pule ʼo Sehova ʼi te ʼatulaulau pea mo tāpuhā Tona huafa, neʼe mole talagataʼa ʼi he temi ki te ʼAtua, tatau aipe pe neʼe hoko ki ai he ʼu mamahi.

3. Koteā te ʼaoga ʼo te falala ʼi te maʼuli ʼa te kau kaugana ʼa te ʼAtua?

³ ʼE talanoa te Hau ko Tavite ki te pikipikiga ʼo te falala pea mo te lototoʼa, ʼi tana ʼui fēnei: “Falala kiā Sehova, ke ke lototoʼa, pea ke mālohi tou loto. ʼIo, falala kiā Sehova.” (Pesalemo 27:14) Kapau ʼe tou loto ke mālohi totatou loto, ʼe mole tonu ke tou lotolotolua ʼo ʼuhiga mo tatatou falala, kae ke tou manatuʼi tuʼumaʼu pea ke maʼuhiga kiā tātou. Kapau ʼe tou fai feiā, pea ʼe tou faʼifaʼitakiʼi anai ia Sesu, ʼo tou lototoʼa pea mo faʼafai ʼi tatatou kau ki te gāue ʼaē neʼe ina fakatotonu ke fai e tana kau tisipulo. (Mateo 24:14; 28:19, 20) Koia, ʼi te Tohi-Tapu ʼe tuʼu fakatahi te falala mo te tui pea mo te ʼofa, ko he kalitātē maʼuhiga pea mo tologa, ʼe lahi tona fakahā e te kau kaugana ʼa te ʼAtua ʼi tonatou maʼuli.—1 Kolonito 13:13.

ʼE Kotou “Mahu [Koa] ʼi Te Falala”?

4. Koteā ʼaē ʼe fakatalitali kiai te kau Kilisitiano fakanofo pea mo tonatou ʼu kaugā gāue ʼaē ko te “tahi ʼu ōvi”?

⁴ ʼE maʼu e te hahaʼi ʼa te ʼAtua he kā haʼu taulekaleka. Ko te kau Kilisitiano fakanofo ʼe natou fakatalitali ke natou kaugā gāue mo Kilisito ʼi selo, kae ko te “tahi ʼu ōvi” ʼe natou falala ʼe “faka ʼāteaina anai nātou mai te popūla ki te kovi pea ʼe natou maʼu anai te ʼāteaina faka kolōlia ʼo te fānau [fakakelekele] ʼa te ʼAtua.” (Soane 10:16, MN; Loma 8:19-21, MN; Filipe 3:20) Ko “te ʼāteaina faka kolōlia” ʼaia ʼe kau ai te faka ʼāteaina mai te agahala pea mo tona ʼu fua kovi. Koia, ko Sehova—ʼaē ʼe ina foaki “te faiofa taulekaleka fuape mo meaofa lelei fuape”—ʼe Ina foaki pe anai te meʼa ʼofa ʼaē ʼe lelei ʼaupito kiā nātou ʼaē ʼe agatonu age ki ai.—Sakopo 1:17; Isaia 25:8.

5. ʼE tou liliu feafeaʼi ʼo “mahu ʼi te falala”?

⁵ ʼE maʼuhiga feafeaʼi te falala faka Kilisitiano ʼi totatou maʼuli? ʼE tou lau fēnei iā Loma 15:13 (MN ): “ ʼOfa pe ke haga te ʼAtua ʼaē ʼe ina foaki te falala, ʼo fakafonu koutou ʼaki te fiafia kātoa pea mo te tokalelei kātoa, ʼuhi ko takotou tui, ke kotou mahu ʼi te falala ʼaki ia te mālohi ʼo te laumālie māʼoniʼoni.” Ei, ʼe mole hage te falala ko he ʼuloʼi afi ʼo he foʼi sela ʼi te fakapōʼuli, kae ʼe hage ia ko te mālama gigila ʼo te laʼā ʼi te uhu, ʼo fonu ai te maʼuli ʼo he tahi ʼi te tokalelei, mo te fiafia, mo maʼu hana fakatuʼutuʼu ʼi tona maʼuli, pea mo lototoʼa. Kotou tokagaʼi ʼe tou “mahu ʼi te falala” mokā tou tui ki te Folafola ʼa te ʼAtua pea mo tou maʼu tona laumālie māʼoniʼoni. ʼE ʼui fēnei iā Loma 15:4 (MN ): “Ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tātou, koteʼuhi ke tou maʼu te falala ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.” Koia kotou fai te ʼu fehuʼi ʼaenī: ‘ ʼE au taupau koa ke mālohi taku falala ʼo au ako fakalelei te Tohi-Tapu, ʼo au lau ʼi te ʼaho fuli pe? ʼE au kole tuʼumaʼu koa te laumālie ʼo te ʼAtua?’—Luka 11:13.

6. Ke mālohi tatatou tui, koteā ʼaē ʼe tonu ke tou tōkakaga kiai?

⁶ Ko Sesu, totatou Faʼifaʼitaki, neʼe mālohi ʼaki te Folafola ʼa te ʼAtua. Kapau ʼe tou tokagaʼi fakalelei ia ia, pea ʼe mole tou ‘fiu pea mo lotovaivai ʼi totatou ʼu nefesi.’ (Hepeleo 12:3) ʼE mahino papau ia, kapau ʼe mole kei mālohi te falala ʼaē neʼe foaki mai e te ʼAtua ʼi totatou ʼatamai pea mo totatou loto peʼe kapau ʼe tou tōkakaga tātou ki he tahi ʼu faʼahi—te ʼu koloā peʼe ko he ʼu fakatuʼutuʼu ʼi te mālama—mole tuai, pea feala ke tou vaivavai ʼi te faʼahi fakalaumālie, pea ki muli age mole kei tou mālohi pea mo lototoʼa moʼo mulimuli ki te ʼu pelesepeto ʼo ʼuhiga mo te aga ʼaē ʼe tonu ke fai. Kapau ʼe hoko atu, pea feala pe ke “malemo ai [tatatou] tui.” (1 Timoteo 1:19) ʼI te tahi age faʼahi, ko te falala moʼoni ʼe faka mālohiʼi ai tatatou tui.

Te Falala—ʼE Maʼuhiga Ki Te Tui

7. ʼE maʼuhiga feafeaʼi te falala ki te tui?

⁷ ʼE ʼui ʼi te Tohi-Tapu: “Ko te tui ʼe ko he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logope lā ʼe mole tou sisio kiai.” (Hepeleo 11:1, MN ) Koia, ko te falala ʼe ko he faʼahi ʼe mole tonu ke meʼa noaʼi, kae ʼe ko he koga maʼuhiga ʼo te tui. Tou vakaʼi ia Apalahamo. ʼI te sio fakatagata, ko ia pea mo tona ʼohoana, ia Sala, neʼe kua nā fakalaka ʼi te taʼu ʼaē ʼe feala ai ke nā maʼu fānau, ʼi te temi ʼaē neʼe fakapapau e Sehova honā hōloga. (Senesi 17:15-17) Neʼe tali feafeaʼi e Apalahamo? “Logolā neʼe fakalaka ia ʼi te falala, kae neʼe tui he neʼe falala pe ia, ʼe liliu anai ko te tamai ʼo te ʼu puleʼaga tokolahi.” (Loma 4:18, MN ) Ei, ʼaki te falala ʼaē neʼe foaki e te ʼAtua kiā Apalahamo, neʼe maʼu ai e tana tui he fakatafito mālohi ʼe ʼi ai anai hona hōloga. Pea ʼaki tana tui neʼe lahi age pea mo mālohi age tana falala. Koia, neʼe maʼu ai e Apalahamo pea mo Sala te lototoʼa ʼaē ke nā mavae ʼi tonā ʼapi pea mo tonā famili, pea mo nā māʼuʼuli ʼi te ʼu falelā ʼi he fenua matāpule!

8. Kapau ʼe tou kātaki agatonu pea ʼe mālohi feafeaʼi ai tatatou falala?

⁸ Neʼe mālohi te falala ʼa Apalahamo he neʼe fakalogo kātoa kiā Sehova, logolā neʼe ʼi ai te ʼu temi neʼe faigataʼa hana fakalogo. (Senesi 22:2, 12) ʼO toe feiā pe, ʼaki tatatou fakalogo pea mo faʼa kātaki ʼi te selevisi ʼo Sehova, ʼe feala ai hatatou falala ki tatatou fakapale. Neʼe tohi e Paulo ʼe iku “te faʼa kātaki ki te ʼuhiga tagata kua tali,” pea ki muli age ʼe ina maʼu te falala, “pea ko te falala ʼe mole ina fakaloto mamahi.” (Loma 5:4, 5, MN ) Koia neʼe toe tohi fēnei ai e Paulo: “Kae e matou fakaʼamuʼage ke feia tatou fakatatau mo te loto hoha e koutou tahi fakaha, o uhiga mo te taofi o te katoa o te falala o kaku ki te gataʼaga.” (Hepeleo 6:11) Ko te maʼu ʼo he manatu lelei feiā, ʼuhi ko tatatou felogoi lelei mo Sehova, ʼe tokoni mai ke tou lototoʼa mokā hoko he ʼu faigataʼaʼia, pea ke tou fiafia.

“Fiafia ʼi Te Falala”

9. Koteā ʼaē ʼe feala ke tou fai tuʼumaʼu ke feala ai hatatou “fiafia ʼi te falala”?

⁹ Ko tatatou falala ʼaē ʼe foaki mai e te ʼAtua ʼe māʼoluga age ia ʼi te ʼu meʼa ʼaē ʼe feala ke foaki mai e te malamanei. ʼE ʼui fēnei iā Pesalemo 37:34: “Falala kiā Sehova pea taupau tona ala, pea ʼe ina hikihiki anai koe ke ke maʼu te kele. Kā toʼo kehe anai te hahaʼi agakovi, ʼe ke sio anai kiai.” Ei, ʼe lahi te ʼu tupuʼaga ke tou “fiafia ʼi te falala.” (Loma 12:12, MN ) Kae ke tou lava fai ia te faʼahi ʼaia, ʼe tonu ke tou manatuʼi tuʼumaʼu pe tatatou falala. ʼE kotou tau fakakaukauʼi koa ki te falala ʼaē ʼe foaki atu e te ʼAtua? ʼE kotou sisio koa ʼe kotou maʼuli ʼi te palatiso, ʼo kotou fiafia heʼe kotou haohaoa, ʼe mole kei kotou tuʼania, ʼe kotou fakatahi mo he ʼu hahaʼi ʼe ʼoʼofa kiā koutou, pea mo kotou fai he gāue ʼe kotou fiafia moʼoni ai? ʼE kotou metitāsioʼi koa te ʼu pāki ʼo te Palatiso ʼaē ʼe tā ʼi tatatou ʼu tohi? Ko te fakakaukau tuʼumaʼu feiā ʼe feala ke fakatatau ki te holoholoʼi ʼo he matapā fakamālama ke sio lelei ai he tahi ki te taulekaleka ʼo tuʼa. Kapau ʼe mole tou holoholoʼi te matapā fakamālama, pea ʼe liliu anai ʼo ʼuli pea ʼe mole kei tou sio lelei anai ki te meʼa matalelei ʼaē ʼi tuʼa. ʼE feala anai ke tou tokaga ki he tahi ʼu meʼa. ʼOfa pe ke mole hoko he meʼa feiā!

10. He koʼe ko tatatou fakaʼamu ʼaē ke tou maʼu te fakapale ʼe ko te fakahā ʼaia ʼe tou felogoi lelei mo Sehova?

¹⁰ ʼE mahino ia, ko te tupuʼaga tāfito ʼo tatatou tauhi kiā Sehova ʼe ko totatou ʼofa kiā te ia. (Maleko 12:30) Kae ʼe tonu ke tou fakaʼamu ke tou maʼu te fakapale. ʼI tona fakahagatonu, ʼe ʼamanaki Sehova ke tou fai te faʼahi ʼaia! ʼE ʼui fēnei iā Hepeleo 11:6: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli pea e ina fakapale natou e natou kumi iaʼia.” He koʼe ʼe loto e Sehova ke tou tui ʼe Ina Fakapale anai tātou? Heʼe kapau ʼe tou tui kiai, pea ʼe tou fakahā ai ʼe tou ʼiloʼi lelei tatatou Tamai ʼaē ʼe ʼi selō. ʼE loto fia foaki pea ʼe ʼofa ki tana fānau. ʼE mahino ia ʼe tou lotomamahi anai pea mo lotovaivai mo kapau neʼe mole tou maʼu he “kā haʼu pea mo he falala.”—Selemia 29:11.

11. Ko te ʼu fakapapau ʼa te ʼAtua ʼaē neʼe falala kiai Moisese neʼe tokoni feafeaʼi kiā ia ke ina fai he ʼu tonu ʼe poto?

¹¹ Ko te faʼifaʼitaki fakaofoofo ʼo he tahi neʼe maʼuhiga kiā ia te falala ʼaē neʼe foaki age e te ʼAtua, neʼe ko Moisese. ʼUhi he neʼe ko “te foha ʼo te ʼofafine ʼo Falaone,” ko Moisese neʼe ko he tahi neʼe pule ki te hahaʼi, mo maʼu tuʼulaga pea mo maʼu koloā ʼi Esipito. ʼE holi anai koa te ʼu meʼa ʼaia peʼe tauhi anai koa kiā Sehova? ʼAki he lototoʼa, neʼe filifili e Moisese ke tauhi kiā Sehova. Koteā tona tupuʼaga? He “neʼe ina tuku fakamamaʼu ʼona mata ki te totogi ʼo te fakapale.” (Hepeleo 11:24-26, MN ) Ei, neʼe mole meʼa noaʼi e Moisese te ʼu fakapapau ʼa te ʼAtua ʼaē neʼe falala kiai.

12. He koʼe ko te falala ʼa he Kilisitiano ʼe fakatatau ki he puloga?

¹² Neʼe fakatatau e Paulo te falala ki he puloga. Ko totatou puloga fakatātā ʼaia ʼe ina puipui totatou ʼatamai, ke feala ai hatatou fai he ʼu tonu poto, mo fakamuʼamuʼa te ʼu meʼa ʼaē ʼe maʼuhiga, pea mo taupau tatatou agatonu. (1 Tesalonika 5:8) ʼE kotou ʼai tuʼumaʼu koa tokotou puloga fakatātā? Kapau ʼe kotou fai feiā, pea ohage ko Moisese pea mo Paulo, ʼe kotou taupau ai takotou falala, ʼo mole kotou falala “ki he u koloa fakalakilua, kae ki te Atua ae e ina fakakoloa mai tatou, aki te meafuape, tou fakafiafia ai.” ʼE moʼoni, ʼe tonu ke kotou lototoʼa moʼo fakafisi ki te ʼu manatu ʼa te hahaʼi tokolahi, pea mo kotou līaki te kumi ʼo te ʼu meʼa maʼa koutou, kae ʼe lahi anai te fakapale ʼo takotou ʼu faiga! ʼI tona ʼuhiga moʼoni, he koʼe ʼe kotou tali anai he meʼa ʼe mole maʼuhiga age ia ʼi “te mauli mooni,” ʼaē kā maʼu e nātou ʼaē ʼe falala pea mo ʼoʼofa kiā Sehova?—1 Timoteo 6:17, 19.

“ ʼE Mole Au Tuku Anai Koe”

13. Koteā ʼaē ʼe fakapapau e Sehova ki tana kau kaugana agatonu?

¹³ Ko te hahaʼi ʼaē ʼe natou falala ki te tuʼu ʼaenī, ʼe lagi natou fakakaukau ki te ʼu meʼa kā hoko kiā nātou, ʼi te ʼāʼāsili anai ʼo “te ʼu nunuʼa ʼo te tuʼania” ʼi te mālamanei. (Mateo 24:8, MN ) Kae ko nātou ʼaē ʼe falala kiā Sehova ʼe mole natou tuʼania. ʼE natou haga “nofo fīmālie anai pea mo maʼuli tokalelei, ʼo mole [natou] tuʼania he malaʼia.” (Tāʼaga Lea 1:33) ʼUhi ʼaē he mole natou falala ki te tuʼu ʼaenī, ʼe natou mulimuli fakafiafia ki te tokoni ʼaenī ʼa Paulo: “Ke pulihi ʼi tokotou faʼahiga maʼuli ia te manako ʼaē ki te paʼaga, kotou fakafeʼauga pe ki te meʼa ʼaē ʼe maʼu, he neʼe ina ʼui fēnei: ‘Kailoa ʼe mole au tuku anai koe, kailoa ʼe mole au līaki anai koe!’ ”—Hepeleo 13:5, MN.

14. He koʼe ʼe mole ʼaoga ke tuʼania fau te kau Kilisitiano ʼo ʼuhiga mo te ʼu meʼa ʼaē ʼe ʼaoga kiā nātou ʼi te faʼahi fakasino?

¹⁴ ʼE fakahā lelei ʼi te vaega ʼaia ʼe tokaga anai ia Sehova kiā tātou. Neʼe toe fakapapau e Sesu te tokaga ʼofa ʼa te ʼAtua kiā tātou, ʼi tana ʼui fēnei: “Koutou fua kumi te Puleaga o Selo mo tana susitisia pea e foaki atu anai kia koutou ia meafuape alâ [te ʼu meʼa ʼaē ʼe ʼaoga ki te maʼuli]. Koia, aua tautou hoha o uhiga mo apogipogi, he hoha anai te apogipogi kia te ia totonu; e feauga’pe te aho takitahi mo ona kinakina.” (Mateo 6:33, 34) ʼE ʼiloʼi e Sehova ʼe ko he meʼa faigataʼa hatatou faʼafai maʼa tona Puleʼaga pea mo tou toe fakahoko foki totatou maʼua ʼaē ko te maʼu ʼo te ʼu meʼa ʼaē ʼe ʼaoga ʼi te faʼahi fakasino. Koia, tou falala kātoa ʼe feala kiā Sehova ke ina foaki mai te ʼu meʼa ʼaē ʼe ʼaoga kiā tātou pea ʼe loto moʼoni kiai.—Mateo 6:25-32; 11:28-30.

15. ʼE lava taupau feafeaʼi e te kau Kilisitiano ia he ‘mata ʼe lelei’?

¹⁵ ʼE tou fakahā ʼe tou falala kiā Sehova mokā tou taupau he ‘mata ʼe lelei.’ (Mateo 6:22, 23) Ko he tahi ʼe ina maʼu he mata ʼe lelei, ʼe ko he tahi ʼe ina maʼu he loto ʼe moʼoni pea mo maʼa, pea ʼe mole mānumānu pea mo manatu pe kiā ia totonu. Ko he tahi ʼe ina maʼu he mata ʼe lelei, ʼe mole faka ʼuhiga leva ke maʼuli masiva peʼe mole ina fakahoko fakalelei tona ʼu maʼua faka Kilisitiano. Kae ko tona faka ʼuhiga ʼaē ke tou “fakapotopoto” ʼo tou fakamuʼamuʼa te tauhi kiā Sehova.—2 Timoteo 1:7, MN.

16. He koʼe ʼe tonu ke tou tui pea mo lototoʼa, ke tou taupau ai he mata ʼe lelei?

¹⁶ ʼE tonu ke tou maʼu te tui pea mo te lototoʼa ke tou taupau he mata ʼe lelei. Ohage la, kapau ʼe loto e tokotou patolo ke kotou gāue tuʼumaʼu ʼi te ʼu hola ʼaē kua kotou fakatuʼutuʼu ki te ʼu fono, ʼe kotou lototoʼa anai koa ʼo fakamuʼamuʼa te ʼu meʼa fakalaumālie? Kapau ʼe lotolotolua he tahi ki te fakahoko e Sehova Tana fakapapau ke tokaga ki Tana ʼu kaugana, pea ʼe feala pe ke haga Satana ʼo fakamālohi te ʼu fakaneke pea feala anai kiā ia ʼaia ke ina tuku tana kau ki te ʼu fono. Ei, kapau ʼe mole tou tui, pea ʼe feala ai kiā Satana ke ina puleʼi tātou, ko ia ʼaē ka ina fakatuʼutuʼu te ʼu meʼa ʼaē ʼe tonu ke tou fakamuʼamuʼa, kae mole ko Sehova. ʼI meʼa fakaʼofaʼofa leva mo kapau ʼe hoko he meʼa feiā!—2 Kolonito 13:5.

“Falala Kiā Sehova”

17. ʼE tapuakina feafeaʼi ʼi te temi nei ia nātou ʼaē ʼe falala kiā Sehova?

¹⁷ ʼE fakahā liuliuga ʼi te Tohi-Tapu ko nātou ʼaē ʼe falala pea mo tui kiā Sehova ʼe mole fua kovi kiā nātou. (Tāʼaga Lea 3:5, 6; Selemia 17:7) ʼE moʼoni ʼi ʼihi temi ʼe tonu ke natou fakafeʼauga pe mo te ʼu koloā fakasino ʼaē kua natou maʼu, kae kiā nātou ʼe ko he sākilifisio veliveli ʼaia mokā fakatatau ki te ʼu tapuakina ʼaē kā natou maʼu. ʼE natou fakahā ai ʼe natou “falala kiā Sehova” pea mo ina foaki anai ki tana kau agatonu te ʼu meʼa faitotonu fuli ʼaē ʼe natou loto kiai. (Pesalemo 37:4, 34) Koia, ʼe natou fiafia moʼoni ʼi te temi nei. “Ko te fakatalitali ʼa te kau faitotonu ʼe ko he meʼa fakafiafia, kae ko te ʼamanaki ʼa te kau agakovi ʼe puli anai ia.”—Tāʼaga Lea 10:28.

18, 19. (a) Koteā te fakapapau ʼaē ʼe foaki mai e Sehova kiā tātou? (b) ʼE tou lava taupau feafeaʼi ia Sehova ʼi totatou “toʼomataʼu”?

¹⁸ Ka haʼele he kiʼi toe ʼo puke te nima ʼo tana tamai, ʼe mole mataku ia. ʼE toe moʼoni te faʼahi ʼaia ʼo ʼuhiga mo tātou, ʼi tatatou haʼele mo tatatou Tamai ʼaē ʼe ʼi selo. Neʼe ʼui fēnei e Sehova ki Iselaele: “ ʼAua naʼa ke mataku, heʼe au nofo mo koe. . . . ʼE au tokoni anai kiā te koe. . . . Heʼe ko au, ia Sehova tou ʼAtua, ʼe au puke tou nima mataʼu, ia Ia ʼaē ʼe ina ʼui atu, ‘ ʼAua naʼa ke mataku. ʼE au tokoni atu anai.’ ”—Isaia 41:10, 13.

¹⁹ Ko he pāki matalelei te ʼui ʼaē, ko Sehova ʼe ina puke tokita nima! Neʼe tohi fēnei e Tavite: “Kua au tuku tuʼumaʼu pe ia Sehova ʼi ʼoku muʼa. ʼE mole au tūkia anai, heʼe nofo ʼi toku toʼomataʼu.” (Pesalemo 16:8) ʼE tou lava taupau feafeaʼi ia Sehova ʼi totatou “toʼomataʼu”? ʼE feala anai mo kapau ʼe tou fai ia faʼahi e lua. ʼUluaki, ʼe tonu ke tou tuku tana Folafola ke ina takitaki tātou ʼi te ʼu faʼahi fuli ʼo totatou maʼuli; pea lua, ʼe tonu ke tou sio tuʼumaʼu ki te fakapale faka kolōlia ʼaē ʼe tuku mai e Sehova ʼi ʼotatou muʼa. Neʼe hiva fēnei e te tagata fai pesalemo ko Asafe: “ ʼE au nofo tuʼumaʼu mo koe, neʼe ke puke toku nima mataʼu. ʼE ke taki anai au ʼaki tau tokoni, ʼosi ʼaia pea ʼe ke taki anai au ki te kolōlia.” (Pesalemo 73:23, 24) ʼAki te ʼu palalau fakaloto fīmālie ʼaia, ʼe feala ke tou falala ai ki te kā haʼu.

“Kua Ōvi Mai Tokotou Fakahāo”

20, 21. E feafeaʼi te kā haʼu ʼo nātou ʼaē ʼe falala kiā Sehova?

²⁰ ʼI te fakalaka ʼo te temi, ʼe ʼāsili maʼuhiga ai ke nofo Sehova ʼi totatou toʼomataʼu. Kua vave hoko mai te mamahi lahi ki te mālama ʼa Satana neʼe mole heʼeki hoko he meʼa feiā ʼi muʼa atu, pea ʼe kamata anai ʼaki te fakaʼauha ʼo te ʼu lotu hala. (Mateo 24:21) ʼE mātataku anai te hahaʼi fuli ʼaē ʼe heʼe tui. Kae, ʼi te temi maveuveu ʼaia, ʼe fiafia anai te kau kaugana lototoʼa ʼa Sehova ʼi tanatou falala! Neʼe ʼui fēnei e Sesu: “Kā kamata hoko mai anai te ʼu meʼa ʼaia, ke kotou tutuʼu tonu ake pea mo lagaʼi ake tokotou ʼulu, heʼe kua ōvi mai tokotou fakahāo.”—Luka 21:28, MN.

²¹ Koia, tou fiafia ʼi te tuku mai e te ʼAtua he falala pea ʼaua naʼa kākāʼi tātou peʼe fakahalaʼi tātou e te ʼu fakafiafia kākā ʼa Satana. Pea tou faiga mālohi ke tou maʼu te tui, mo te ʼofa, pea mo te manavasiʼi ki te ʼAtua. Kapau ʼe tou fai feiā, pea ʼe tou maʼu anai te lototoʼa ke tou fakalogo kiā Sehova ʼi te ʼu ʼaluʼaga fuli pe pea mo fakafeagai ki te Tevolo. (Sakopo 4:7, 8) Ei, “kotou lototoʼa, pea ke mālohi tokotou loto, ia koutou fuli ʼaē ʼe fakatalitali kiā Sehova.”—Pesalemo 31:24.

[Kiʼi nota]

ʼE Feala Koa Hakotou Tali?

• Neʼe tokoni feafeaʼi te falala ʼa Sesu ke ina maʼu te lototoʼa?

• ʼE pipiki feafeaʼi te tui pea mo te falala?

• ʼE lava feafeaʼi ki te falala pea mo te tui ke maʼu ai e he Kilisitiano te lototoʼa moʼo fakamuʼamuʼa te ʼu meʼa ʼaē ʼe maʼuhiga ʼi tona maʼuli?

• He koʼe ko nātou ʼaē ʼe “falala kiā Sehova” ʼe feala ke natou falala ki te kā haʼu?

[Paki ʼo te pasina 28]

Peʼe kotou tūpulaga peʼe kua kotou mātutuʼa, kae ʼe kotou fakakaukau koa ʼe kotou maʼuli ʼi te palatiso?