Tou Fiafia ʼi Tatatou ʼAmanaki

“[ʼE tou maʼu] te falala, pee ko te amanaki, ki te mauli heegata, ae nee fakapapau i mua o te u sekulo fuli e te Atua ae e mole loi.”—TITO 1:2.

MOʼO FAKAMANATU

․․․․․

He koʼē ʼe tou ʼiloʼi ʼe fiafia selō mokā taupau e te kau Kilisitiano fakanofo tanatou agatonu ʼo kaku ki te mate?

․․․․․

Koteā pikipikiga ʼo te fakahoko ʼo te ʼamanaki ʼo te tahi ʼu ovi pea mo ʼaē ʼa te kau Kilisitiano fakanofo?

․․․․․

Ko te ʼu ‘aga māʼoniʼoni’ fea pea mo ‘te ʼu gāue fea ʼaē ʼe fakaʼiloga ʼaki ai tatatou pipiki ki te ʼAtua’ ʼaē ʼe tonu ke tou fakahā?

1. ʼE lava tokoni feafeaʼi mai te ʼamanaki ʼaē ʼe foaki e Sehova ke tou kātakiʼi te ʼu ʼaluʼaga ʼaē ʼe feala ke hoko?

KO SEHOVA ʼe ko “te Atua o te amanaki.” Neʼe fai e te ʼapositolo ko Paulo te ʼu palalau ʼaia mo ʼui ko Sehova ʼe ina lava ‘fakafonu tātou ʼaki te fiafia mo te tokalelei ʼi te tui, ʼo tupu ke lahi ʼosi iā tātou te ʼamanaki lelei pea mo te mālohi ʼo te laumālie māʼoniʼoni.’ (Loma 15:13) Kapau ʼe tou fonu ʼi te ʼamanaki, ʼe feala ke tou kātakiʼi he ʼaluʼaga pē ʼe feala ke hoko, pea ʼe tou maʼu he fiafia lahi pea mo he tokalelei ʼi totatou loto. Ohagē ko te kau Kilisitiano fakanofo, ko tanatou ʼamanaki ʼe liliu anai ko “he taula o te laumalie, ae e malohi mo pipiki mau” ki ʼihi kau Kilisitiano. (Hep. 6:18, 19) ʼE feala ke tou pipiki maʼu ki tatatou ʼamanaki ʼi te ʼu temi faigataʼa ʼo totatou maʼuli, pea ʼe lava tokoni mai anai ke ʼaua naʼa tou lotolotolua peʼe puli tatatou tui.—Lau ia Hepeleo 2:1; 6:11.

2. Ko te kau Kilisitiano ʼe natou tahi maʼu tana ʼamanaki, koteā te ʼu ʼamanaki kehekehe ʼaia? He koʼē ʼe fia ʼiloʼi e “ihi ovi” ia te ʼamanaki ʼa te kau fakanofo?

² Ko te kau Kilisitiano ʼe natou tahi maʼu tana ʼamanaki. Ko te kau Kilisitiano fakanofo ʼo te “kii fagaovi” ʼaē kei māʼuʼuli ʼi te kele, ʼe natou ʼamanaki ki te maʼuli tuputupua ʼi selō, ko ni hau pea mo pelepitelō mo Kilisito ʼi tona Puleʼaga. (Luka 12:32; Apk. 5:9, 10) Ko “ihi ovi,” ʼaē ʼe natou kaugamālie ʼosi, ʼe natou maʼu te ʼamanaki ki te maʼuli heʼegata ʼi te palatiso ʼi te kele, ʼo natou fakalogo ki te Puleʼaga Fakamēsia. (Apk. 7:9, 10; Soa. 10:16) ʼE mole galo ki te tahi ʼu ovi ʼe fakalogo tonatou haofaki ki te ʼu gāue ʼaē ʼe natou fai moʼo lagolago ki te ʼu “tehina” fakanofo ʼo Kilisito ʼaē ʼe kei māʼuʼuli ʼi te kele. (Mat. 25:34-40) Kā maʼu anai e te kau fakanofo tonatou fakapale pea ko te ʼamanaki ʼo te tahi ʼu ovi ʼe hoko moʼoni anai. (Lau ia Hepeleo 11:39, 40.) Tou vakaʼi muʼa te ʼamanaki ʼaē ʼe faiga kiai te kau fakanofo.

TE “AMANAKI MAULI” ʼA TE KAU KILISITIANO FAKANOFO

3, 4. ʼE maʼu feafeaʼi e te kau Kilisitiano fakanofo “he mauli foou . . . ki he amanaki mauli,” pea koteā te ʼamanaki ʼaia?

³ Neʼe tohi e te ʼapositolo ko Petelo te ʼu tohi e lua ki te kau Kilisitiano fakanofo, pea neʼe ina ʼui “kua filifili” nātou. (1 Pet. 1:1, 2) Neʼe ina fakahā te tahi ʼu manatu ʼo ʼuhiga mo te ʼamanaki fakatalakitupua ʼaē ʼe foaki ki te kiʼi fagaovi. ʼI tana ʼuluaki tohi, neʼe tohi fēnei e Petelo: “Ke fakafetai ki te Atua, te Tamai o totatou Aliki ko Sesu-Kilisito, ae kua ina tuku kia tatou he mauli foou, o mulimuli ki tona manavaofa lahi, ki he amanaki mauli, i te toe tuuake a Sesu-Kilisito mai te kau mate, ki he tofiga ae e mole feala ke popo, pee uli, pee fefe, pea kua taofi atu kia koutou i te atu lagi, kia koutou ae kua taupau i te malohi o te Atua aki te tui ki te fakamauli ae kua teuteu ke fakaha i te u temi fakamuli! Pea e kotou fiafia lahi i te mea aena.”—1 Pet. 1:3-6.

⁴ ʼE foaki e Sehova “he mauli foou” ki he kiʼi kūtuga neʼe ina filifili ʼi te kau Kilisitiano ke natou fakatahi mo Kilisito ʼi te Puleʼaga ʼi selō, ʼo natou liliu ko he ʼu foha fakalaumālie ʼo te ʼAtua. Neʼe fakanofo nātou ʼaki te laumālie māʼoniʼoni ke natou hau pea mo pelepitelō mo Kilisito. (Apk. 20:6) ʼE ʼui e Petelo ko te “mauli foou” ʼaia ʼe ina fakafealagia “he amanaki mauli,” ʼaē ko “he tofiga . . . e mole feala ke popo, pee uli, pee fefe” neʼe tāʼofi maʼa nātou “i te atu lagi.” ʼE mole tou punamaʼuli ai ki te “fiafia lahi” ʼa te kau fakanofo ʼi tanatou maʼu te ʼamanaki maʼuli ʼaia. Kae ke natou maʼu te ʼamanaki ʼaia ʼe tonu ke natou nonofo agatonu.

5, 6. He koʼē e tonu ke faiga lahi te kau Kilisitiano fakanofo ke natou maʼu tonatou pāui ʼaē ki selō?

⁵ ʼI tana lua tohi, neʼe tokoniʼi e Petelo te kau Kilisitiano fakanofo ke ‘ ʼāsilisili fakamālotoloto mo fakamālohiʼi tonatou pāui pea mo tanatou filifili.’ (2 Pet. 1:10) ʼE tonu ke natou faiga lahi ke tuputupu iā nātou te ʼu kalitātē Fakakilisitiano ohagē ko te tui, te pipiki ki te ʼAtua, te feʼofaniʼaki fakatautēhina, pea mo te ʼofa. Neʼe ʼui fēnei e Petelo: “Kapau e kotou mau te u mea aena o lahi ia koutou, e mole natou tuku anai koutou ke nonofo noa mo hala fua.”—Lau ia 2 Petelo 1:5-8.

⁶ ʼI tona ʼuhiga kolōlia, neʼe ʼui fēnei e Kilisito ki te ʼu tagata ʼāfea fakanofo ʼo te ʼuluaki kōkelekāsio ʼo Filatelefia, ʼi Asia Veliveli: “Koteuhi nee ke tauhi te folafola o te kataki fualoa ia au, e au tauhi anai ia koe i te hola o te ahiahi ae ka hau ki te malamanei katoa, ke ahiahii ai te hahai o te kele. E au hau vave. Taofi te mea ae e ke mau, o tupu ke aua naa too tou pale e he tahi.” (Apk. 3:10, 11) Neʼe fakapapau ʼe foaki anai te “kolona o te mauli” ki he Kilisitiano fakanofo neʼe agatonu ʼo kaku ki te mate. Kae kapau ko he tahi neʼe fakanofo ʼaki te laumalie ʼe mole nofo agatonu pea ʼe mole ina maʼu ia te kolona ʼaia.—1 Pet. 5:4; Apk. 2:10.

TE ULUʼAGA KI TE PULEʼAGA

7. Koteā te ʼamanaki fakatalakitupua ʼaē neʼe talanoa kiai ia Suta ʼi tana tohi?

⁷ ʼI te lagi taʼu 65 ʼo totatou temi, neʼe fai e Suta te tehina ʼo Sesu tana tohi kiā “natou ae kua paui,” ko ʼana tehina neʼe fakanofo ke maʼuli ʼi selō. (Suta 1; vakaʼi ia Hepeleo 3:1) Neʼe fia talanoa ʼi tana tohi ʼaia ki te ʼamanaki fakakolōlia ʼo te haofaki, ʼaē ʼe maʼu “fakatahi” e te kau Kilisitiano ʼaē ʼe pāui ki te Puleʼaga ʼo te ʼAtua ʼi selō. (Suta 3) Logolā neʼe ʼi ai te tahi ʼu faʼahi maʼuhiga ke talanoa kiai, kae ʼi te fakaʼosi ʼo tana tohi ʼaia, neʼe talanoa ki te ʼamanaki fakatalakitupua ʼaē ʼe maʼu e te kau Kilisitiano fakanofo, ʼo ina tohi fēnei: “Ki ae e feala ke ina taupau koutou mai te u higaaga fuli pea mo ina fakaha koutou, ia mua o tona kololia heemele mo fonu i te fiafia, ki te Atua e tahi, ko totatou Fakamauli, ia Sesu-Kilisito ko totatou Aliki, ke tuku kia ia te kololia, mo te pule, mo te malohi, pea mo te mafimafi, maia mua o te temi fuli, mo te temi nei, pea mo te u sekulo fuli!”—Suta 24, 25.

8. Ohagē ko tona tuʼu iā Suta 24, koteā ʼaē ʼe fakahā mai ʼe fiafia selō mokā nofo agatonu ki te mate he Kilisitiano fakanofo?

⁸ ʼE mahino ia, ʼe mole loto e te kau Kilisitiano fakanofo agatonu ke fakaʼauha nātou. ʼO fakatafito ki te Tohi-Tapu, ʼe natou ʼamanaki ʼe fakatuʼuake nātou mai te mate e Sesu Kilisito ki he maʼuli fakalaumālie haohaoa, ke feala ai hanatou hā iā muʼa ʼo te ʼAtua ʼaki he fiafia lahi. Kā mate agatonu he Kilisitiano fakanofo, ʼe mahino papau “e toe tuuake anai ia e fakalaumalie, e hee pala, . . . e fakakololia.” (1 Ko. 15:42-44) Kapau ʼe maʼu te “fiafia lahi . . . i te lagi ki he tagata agahala e tahi e fakahemala,” kotou fakakaukauʼi age muʼa ia te fiafia ʼi selō mokā mate agatonu he tehina fakanofo ʼa Kilisito. (Luka 15:7) ʼE fiafia fakatahi anai Sehova mo tana kau ʼāselo agatonu pea mo te tehina fakanofo ʼaia ʼi tana maʼu tana fakapale.—Lau ia 1 Soane 3:2.

9. Koteā te fakaʼuhiga ʼo te “avahi fakalaulahi” ʼo te uluʼaga ʼo te Puleʼaga ki te kau fakanofo agatonu, pea ʼe malave feafeaʼi te ʼamanaki ʼaia ki te kau fakanofo ʼaē ʼe kei māʼuʼuli ʼi te kele?

⁹ ʼO toe fēia, neʼe faitohi Petelo ki te kau Kilisitiano fakanofo, kapau ʼe natou taupau maʼu tanatou pāui ʼo natou nonofo agatonu ki te mate, pea “e avahi fakalaulahi . . . anai kia [nātou] te uluaga ki te puleaga heegata o totatou Aliki mo Fakamauli ko Sesu-Kilisito.” (2 Pet. 1:10, 11) Ko te uluʼaga ki te Puleʼaga ʼi selō ʼe “avahi fakalaulahi” anai maʼa nātou, ko tona fakaʼuhiga ʼe natou hū anai ki selō ʼi he kolōlia lahi. ʼE feala ke toe fakaʼuhiga ki te lahi ʼo te ʼu tapuakina kā natou maʼu anai ʼi selō. ʼE feala ke natou manatuʼi ʼaki he loto fiafia pea mo he loto fakafetaʼi ia tonatou maʼuli agatonu. ʼE mahino ia ko te ʼamanaki ʼaia ʼe ina foaki ki te kau Kilisitiano fakanofo ʼaē ʼe kei māʼuʼuli ʼi te kele te mālohi ʼaē ke natou ‘fakagaūgaūe tanatou fakakaukau ʼo ʼuhiga mo te gāue.’—1 Pet. 1:13.

TE “AMANAKI” ʼO TE TAHI ʼU OVI

10, 11. (a) Koteā te ʼamanaki ʼaē ʼe foaki ki te tahi ʼu ovi? (b) Koteā te pikipikiga ʼo Kilisito mo te fakahā ʼo “te u foha o te Atua” pea mo te fakahoko ʼo te ʼamanaki ʼo te maʼuli ʼi te kele?

¹⁰ Neʼe tohi e Paulo ʼo ʼuhiga mo te ʼamanaki fakakolōlia ʼo “te u foha o te Atua” ʼaē neʼe fakanofo ʼaki te laumālie, ʼo ina ʼui ʼe natou “mau tofiga fakatahi” mo Kilisito. Pea neʼe talanoa leva ki te ʼamanaki taulekaleka ʼaē ʼe foaki e Sehova ki te tahi ʼu ovi ʼaē ʼe mole feala hona malau, ʼo ina ʼui fēnei: “E talitali ai te malamanei katoa mo he holi mamahi ki te lakaga e fakaha anai e te Atua tana u foha [te kau fakanofo]. He nee tuku age te malamanei ki te vaiga, nee mole loto ia ki ai, kae ko te Atua ae nee ina tuku ia ki ai, mo he amanaki lelei e fakaateainai anai ia mai te popula o te pala, ke kau foki mo ia ki te ateaina o te u foha a te Atua i te kololia.”—Loma 8:14-21.

¹¹ Neʼe foaki e Sehova te “amanaki” ki te mālamanei ʼi tana fai te fakapapau ʼo ʼuhiga mo te fakaʼāteaina mai “te gata afea,” ia Satana te Tēvolo, ʼaki te “hakoga” ʼaē neʼe fakapapau. (Apk. 12:9; Sen. 3:15) Ko te ʼuluaki koga ʼo te “hakoga” ʼaia neʼe fakaʼuhiga kiā Sesu Kilisito. (Kal. 3:16) Neʼe foaki e Sesu ʼaki tana mate pea mo tona fakatuʼuake ia he tafitoʼaga ʼo te fakaʼāteaina ʼo te mālamanei mai te agahala pea mo te mate. Ko te fakahoko ʼo te ʼamanaki ʼaia ʼe ʼi ai tona pikipikiga mo te “fakaha . . . e te Atua tana u foha.” ʼE ‘fakahā’ anai te kau fakanofo ʼaē kua fakakolōlia, te lua koga ʼaia ʼo te “hakoga,” ʼi te temi ʼaē kā natou fakatahi mo Kilisito moʼo fakaʼauha te tuʼu ʼo te ʼu faʼahiga meʼa agakovi ʼa Satana. (Apk. 2:26, 27) ʼE foaki e te faʼahi ʼaia te fakaʼāteaina ki te tahi ʼu ovi ʼaē ʼe ʼomai mai te mamahi lahi.—Apk. 7:9, 10, 14.

12. Mokā fakahā anai te kau fakanofo koteā te ʼu lelei fakakolōlia kā maʼu anai e te mālamanei?

¹² ʼE ko he toe fakafīmālie lahi kā maʼu anai e te “malamanei” lolotoga Te ʼAfio ʼa Kilisito Iā Taʼu e Afe! ʼI te temi ʼaia, ʼe toe ‘fakahā’ anai te ʼu “foha o te Atua” ʼaē kua fakakolōlia mokā natou gāue anai ohagē ko he kau pelepitelō mo Kilisito, ʼo natou fakahoko te ʼu lelei ʼo te sākilifisio faitotogi ʼa Sesu ki te mālamanei. ʼI tanatou fakalogo ki te Puleʼaga ʼaē ʼi selō, ʼe kamata ʼiloʼi anai e te “malamanei” te fakaʼāteaina mai te ʼu fua kovi ʼo te agahala pea mo te mate. Ko te hahaʼi fakalogo ʼe “fakaateainai [mamalie anai] mai te popula o te pala.” Kapau ʼe natou nonofo agatonu kiā Sehova ʼi te ʼu Taʼu e Afe pea mo te ʼahiʼahi fakamuli ʼaē kā hoko ʼi te fakaʼosi ʼo te ʼu taʼu ʼaia, pea ʼe tohi anai tonatou higoa ʼo talu ai ʼi “te tohi o te mauli.” ʼE natou maʼu anai “te ateaina o te u foha a te Atua i te kololia.” (Apk. 20:7, 8, 11, 12) ʼE ko he toe kolōlia lahi ia!

TOU TAUPAU LELEI TATATOU ʼAMANAKI

13. ʼE fakalogo kiteā tatatou ʼamanaki, pea ko ʼāfea ʼaē kā hā ai Kilisito?

¹³ ʼI te ʼu tohi e lua ʼaē neʼe tohi e Petelo ʼaki te takitaki ʼo te ʼAtua, ʼe tou maʼu ai te ʼu tokoni ki te kau fakanofo pea mo te tahi ʼu ovi ke natou taupau lelei te ʼamanaki ʼaē ʼe natou tahi maʼu. Neʼe ina fakahā lelei ʼe mole fakalogo tanatou ʼamanaki ki ʼanatou gāue, kae ki te ʼofa makehe ʼa Sehova. Neʼe ina tohi fēnei: “Koutou fakapotopoto, koutou mau he amanaki lelei katoa ki te kalasia ae e tuku atu anai kia koutou i te aho ae e ha ai anai ia Sesu-Kilisito.” (1 Pet. 1:13) ʼE hā anai Kilisito ʼi te temi ʼaē kā haʼu ai ʼo fakapale tana ʼu tisipulo agatonu pea mo fakahoko te ʼu fakamāu ʼa Sehova ki te hahaʼi agakovi.—Lau ia 2 Tesalonika 1:6-10.

14, 15. (a) Moʼo taupau lelei tatatou ʼamanaki, koteā ʼaē ʼe tonu ke tou tōkakaga tāfito kiai? (b) Koteā te tokoni ʼaē neʼe fai e Petelo?

¹⁴ Moʼo taupau lelei tatatou ʼamanaki, ʼe tonu ke tou tōkakaga tāfito ki “te ʼaho ʼo Sehova” ʼaē kua vave hoko mai. ʼE fakaʼauha ai anai “te ʼu lagi” ʼo te temi nei, peʼe ko te ʼu puleʼaga fakatagata, pea mo “te kele” ʼaē ʼe ko te hahaʼi agakovi pea mo “te ʼu meʼa” ʼaē ʼe kau ai. Neʼe tohi fēnei ia Paulo: “Ko te ʼu faʼahiga tagata feafeaʼi anai ia koutou . . . ʼo talitali pea mo kotou taupau lelei ʼi tokotou ʼatamai te hoko mai ʼo te ʼaho ʼo Sehova, ʼaia ʼe tupu ai anai te mavetevete ʼo te ʼu lagi ʼaē kua ulo pea mo te huhuʼa ʼo te ʼu meʼa ʼaē kua vela ʼaupitō!”—2 Pet. 3:10-12, MN.

¹⁵ Ko “te lagi” mo “te kele” ʼo te temi nei ʼe fetogi anai ʼaki te “lagi foou [te Puleʼaga ʼa Kilisito] mo he kele foou [he sōsiete foʼou ʼi te kele].” (2 Pet. 3:13) Neʼe foaki leva e Petelo he ʼu tokoni, ʼo ʼuhiga mo tatatou “talitali” peʼe ko tatatou taupau lelei tatatou ʼamanaki ʼo ʼuhiga mo te fakapapau ʼo te maʼuli foʼou, ʼo ina ʼui fēnei: “Koia leva, nai ofaaga, i takotou talitali ki te u mea aia, kotou faiga ke mau atu kotou e kotou maa mo hee mele i te tokalelei.”—2 Pet. 3:14.

TOU HAʼELE ʼO MULIMULI KI TATATOU ʼAMANAKI

16, 17. (a) Ko te ʼu ‘aga māʼoniʼoni’ fea pea mo ‘te ʼu gāue fea ʼaē ʼe fakaʼiloga ʼaki ai tatatou pipiki ki te ʼAtua’ ʼaē ʼe tonu ke tou fakahā? (b) ʼE hoko feafeaʼi anai tatatou ʼamanaki?

¹⁶ ʼE mole tonu pē ke tou taupau lelei tatatou ʼamanaki, kae ʼe toe maʼua foki ke tou maʼuli ʼo mulimuli ki tatatou ʼamanaki. ʼE lelei ke tou tōkakaga ki totatou ʼuhiga tagata peʼe fafine ʼi te faʼahi fakalaumālie. ʼI te ʼu ‘aga māʼoniʼoni’ ʼaē ʼe tonu ke tou maʼu, ʼe kau kiai tatatou ‘taupau he aga ʼe lelei ʼi te lotolotoiga ʼo te ʼu puleʼaga,’ ʼaki tatatou agatonu. (2 Pet. 3:11; 1 Pet. 2:12) ʼE tonu ke tou maʼu te ‘feʼofaʼaki iā tātou.’ ʼE kau kiai tatatou faiga lahi ke tou taupau te logotahi fakatautēhina ʼi te mālamanei māʼia ʼi tatatou kōkelekāsio. (Soa. 13:35) Ko ‘te ʼu gāue ʼaē ʼe fakaʼiloga ʼaki tatatou pipiki ki te ʼAtua’ ʼe ko te ʼu gāue ʼaē ʼe fakamoʼoni ai tatatou felōgoi lelei mo Sehova. ʼE kau kiai tatatou faikole fakamālotoloto, ʼo fēia mo te lau ʼo te Tohi-Tapu ʼi te ʼaho fuli, te ako takitokotahi pea mo metitāsio, te tauhi fakafāmili, pea mo te kau tuʼumaʼu ki te fakamafola ʼo “te logo lelei . . . o te puleaga.”—Mat. 24:14.

¹⁷ ʼE tou loto fuli ke tou liliu ko ni hahaʼi ʼe leleiʼia e Sehova pea ke haofaki tātou ʼi te temi ʼaē kā “mavetevete” ai te tuʼu agakovi ʼaenī. ʼE tou sisio anai ki te fakahoko ʼo tatatou ʼamanaki, “te falala ki te mauli heegata, ae nee fakapapau i mua o te u sekulo fuli e te Atua ae e mole loi.”—Tito 1:2.

[Paki ʼo te pāsina 22]

ʼE maʼu e te kau Kilisitiano fakanofo “he mauli foou, . . . ki he amanaki mauli”

[Paki ʼo te pāsina 24]

Kotou taupau lelei takotou ʼamanaki ʼi tokotou fāmili