Kua Ōvi Mai Te ʼĀteaina Faka Kolōlia Maʼa Te ʼu Fānau ʼa Te ʼAtua

“Ko te ʼu meʼa ʼaē neʼe fakatupu neʼe tuku ke nātou fakalogo ki te vaʼiga . . . ʼuhi ko te ʼamanaki ʼaē ko te ʼu meʼa ʼaē neʼe fakatupu ʼe toe faka ʼāteaina anai nātou mai te popūla ki te maumau pea ʼe nātou maʼu anai te ʼāteaina faka kolōlia ʼo te fānau ʼa te ʼAtua.”​—Loma 8:​20, 21.

1. Neʼe fakatātā feafeaʼi te sakilifisio ʼa Sesu ʼi te ʼAho ʼo te ʼu Faifakalelei?

NEʼE foaki e Sehova tona ʼAlo ʼulu tokotahi, ko he sakilifisio faitotogi moʼo faka fealagia ki te ʼu hahaʼi e toko 144 000 ke nātou ʼolo ʼo maʼuʼuli ʼi selo, pea ke maʼuli ʼo heʼegata te tahi ʼu hahaʼi ʼi te kele. (1 Soane 2:​1, 2) Ohage ko te meʼa ʼaē neʼe tou vakaʼi ʼi te ʼuluaki alatike, ko te sakilifisio ʼa Sesu maʼa te kau Kilisitiano ʼaē neʼe fakanofo ʼaki te laumālie, neʼe ʼi ai tona fakatātā ʼi te ʼAho ʼo te ʼu Faifakalelei, ʼi te temi ʼaē neʼe sakilifisioʼi ai e te pelepitelo lahi ʼo Iselaele te vitulo, ko he mōlaga ki tana ʼu agahala, mo tona loto fale, pea mo te telepi ʼo Levi. ʼI te ʼaho pe ʼaia, neʼe toe sakilifisioʼi ai foki mo te tao, ko he mōlaga maʼa te hahaʼi Iselaelite fuli, ohage ko te sakilifisio ʼa Kilisito ʼaē ka ʼaoga anai ki te malamanei katoa. Tahi ʼaē meʼa, ko te tao ʼaē neʼe tuku ke ʼalu ki te toafa, neʼe ina ʼave mo ia ʼi hona ʼaluʼaga fakatātā, te ʼu agahala ʼaē neʼe fai e te hahaʼi lolotoga te taʼu katoa.a​—Levitike 16:​7-​15, 20-​22, 26.

2, 3. Koteā te faka ʼuhiga ʼo te ʼu palalau ʼaē neʼe fai e Paulo ia Loma 8:​20, 21?

² ʼI tana ʼosi talanoa ki te ʼamanaki ʼa te hahaʼi ʼaē ka liliu anai ko he ʼu “foha ʼo te ʼAtua” ʼi selo, neʼe ʼui fēnei e te ʼapositolo ko Paulo: “Ko te atali ʼaki he lotohoha ʼa te ʼu meʼa ʼaē neʼe fakatupu ʼe nātou talitali ki te fakahā ʼo te ʼu foha ʼo te ʼAtua. Heʼe ko te ʼu meʼa ʼaē neʼe fakatupu neʼe tuku ke nātou fakalogo ki te vaʼiga, ʼo mole nātou fai ʼaki honatou lotolelei, kae ʼuhi ko ia ʼaē neʼe ina fakamaʼua ke fakalogo kiai, ʼuhi ko te ʼamanaki ʼaē ko te ʼu meʼa ʼaē neʼe fakatupu ʼe toe faka ʼāteaina anai nātou mai te popūla ki te maumau pea ʼe nātou maʼu anai te ʼāteaina faka kolōlia ʼo te fānau ʼa te ʼAtua.” (Loma 8:​14, 17, 19-​21) Koteā te faka ʼuhiga ʼo te ʼu palalau ʼaia?

³ ʼI te temi ʼaē neʼe fakatupu ai tatatou kui ko Atama ko he tagata haohaoa, neʼe ko he ‘foha [peʼe ko he fānau] ʼa te ʼAtua.’ (Luka 3:​38) ʼUhi ko tana agahala, neʼe tupu ai tana “popūla ki te maumau,” pea neʼe ina foaki te agaaga ʼaia ki te malamanei. (Loma 5:​12) Neʼe tuku e te ʼAtua ke tupu te tagata pea ke tau mo te “vaʼiga,” ʼuhi ko te agahala ʼaē neʼe ina maʼu mai ia Atama, kae neʼe ina foaki he ʼamanaki ʼaki te “hāko,” ia Sesu Kilisito. (Senesi 3:​15; 22:18; Kalate 3:​16) ʼE talanoa ia Fakahā 21:​1-4 ki te temi ʼaē ka ‘puli ai anai te mate, mo te putu, mo te kekē, pea mo te mamahi.’ Mai tona ʼuhiga ʼaē ko te fakapapau ʼaia ʼe fai ki te “malamanei,” koia ʼe ina fakamoʼoni mai ai kia tatou ko te sosiete fakatagata foʼou ʼaē ka maʼuli anai ʼi te kele ʼi te takitaki ʼo te Puleʼaga ʼo te ʼAtua, ʼe fakaliliu anai tonatou sino pea mo tonatou ʼatamai ke haohaoa, pea ke nātou maʼu te maʼuli heʼegata ʼi tonatou ʼuhiga “fānau ʼa te ʼAtua.” ʼI te lolotoga ʼAfio ʼa Kilisito ia Taʼu e Afe, “ ʼe faka ʼāteaina anai [te hahaʼi fakalogo] mai te popūla ki te maumau.” ʼI tanatou ʼosi fakahā tanatou agatonu kia Sehova ʼi te ʼahiʼahi fakaʼosi, ʼe faka ʼāteaina anai nātou ʼo talu ai mai te agahala pea mo te mate. (Fakahā 20:​7-​10) ʼI te temi ʼaia, ko nātou ʼaē ka nonofo ʼi te kele ʼe nātou “maʼu anai te ʼāteaina faka kolōlia ʼo te fānau ʼa te ʼAtua.”

ʼE Nātou ʼUi “Haʼu!”

4. Koteā te faka ʼuhiga ʼo te ʼui ʼaē ke tou “toʼo noa te vai ʼo te maʼuli”?

⁴ ʼI ʼamanaki taulekaleka leva ʼaē ʼe maʼu e te malamanei! Koia ʼe mole tou punamaʼuli ai ki te gāue fakamalotoloto ʼa te kau Kilisitiano fakanofo ʼaē ʼe kei maʼuʼuli ʼi te kele, ʼo takitaki te faka mafola ʼo te ʼamanaki ʼaia ki te hahaʼi! Mai tona ʼuhiga ʼaē ʼe nātou kau anai ki te “fafine ʼohoana” ʼo te Akeno ʼaē kua faka kolōliaʼi, ia Sesu Kilisito, koia ʼe kau te toe ʼo te kau fakanofo ʼi te fakahoko ʼo te lea faka polofeta ʼaenī: “Ko te laumālie pea mo te fafine ʼohoana ʼe nā haga ʼui: ‘Haʼu!’ Pea ko ʼaē ʼe logo kiai ke ina ʼui: ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai, ke ina toʼo noa te vai ʼo te maʼuli.” (Fakahā 21:​2, 9; 22:​1, 2, 17) Kailoa, ʼe mole gata pe ki te kau fakanofo e toko 144 000, te maʼu ʼo te ʼu fua lelei ʼo te sakilifisio faitotogi ʼa Sesu. ʼE haga gāue te laumālie ʼo te ʼAtua ʼaki te toe ʼo te kau fakanofo ʼaē ʼe kau ki te kalasi ʼo te fafine ʼohoana, ʼo nātou ʼui fēnei “Haʼu.” ʼE fakaafe ia nātou fuli ʼaē ʼe nātou loto ki te faitotonu ke nātou ʼui “Haʼu,” ʼo nātou maʼu ai te ʼu fua lelei fuli ʼo te ʼu fakatuʼutuʼu ʼaē ʼe fai e Sehova ki tonatou hāofaki.

5. Ko ai ia nātou ʼaē ʼe fiafia ai te kau Fakamoʼoni ʼa Sehova ke nātou fakatahitahi mo nātou?

⁵ ʼE tui te kau Fakamoʼoni ʼa Sehova ki te ʼu fakatuʼutuʼu ʼaē ʼe fai e te ʼAtua ke nātou maʼu te maʼuli ʼaki ia Sesu Kilisito. (Gāue 4:​12) ʼE nātou fiafia ʼi tanatou fakatahi mo he ʼu hahaʼi fakamalotoloto ʼe nātou fia ʼiloʼi te ʼu fakatuʼutuʼu ʼa te ʼAtua pea mo fai tona finegalo. ʼE ava tonatou ʼu Fale ʼo te Puleʼaga kia nātou fuli ʼaē ʼe nātou fia ‘ ʼōmai pea mo toʼo noa te vai ʼo te maʼuli’ ʼi te “temi fakaʼosi” ʼaenī.​—Taniela 12:4.

Neʼe Hoko Te ʼu Fetogi ʼAki Te Temi

6. Neʼe fakaʼaogaʼi feafeaʼi e te ʼAtua tona laumālie ki tana hahaʼi kaugana ʼi te ʼu temi kehekehe ʼo te hisitolia?

⁶ Ko te ʼAtua, ʼe ʼi ai tona temi kua fakakatofa ke ina fakahoko ai tana ʼu fakatuʼutuʼu, pea ʼe malave te faʼahi ʼaia ki tana ʼu felogoi mo te tagata. (Tagata Tānaki 3:1; Gāue 1:7) Logope la neʼe hifo ifo te laumālie ʼa te ʼAtua ki tana kau kaugana ʼi muʼa ʼo te temi faka Kilisitiano, kae neʼe mole fakanofo nātou ko tona ʼu foha fakalaumālie. Kae ʼo kamata mai ia Sesu, neʼe kua hoko mai te temi ʼaē neʼe fakatuʼutuʼu ai e Sehova ke ina fakaʼaogaʼi tona laumālie maʼoniʼoni moʼo fakanofo he ʼu tagata pea mo he ʼu fafine ke nātou ʼolo ʼo maʼuʼuli ʼi selo. Kae e feafeaʼi ia ʼaho nei? Ko te laumālie ʼaia ʼe fakaʼaogaʼi ki te “tahi ʼu ōvi” ʼa Sesu, kae ʼe mole ina fakatupu ʼi tonatou loto he ʼamanaki pea mo he holi ki te maʼuli ʼaē ʼe ʼi selo. (Soane 10:16) ʼAki te ʼamanaki ʼaē ʼe foaki e te ʼAtua ke nātou maʼuʼuli ʼo heʼegata ʼi te palatiso ʼi te kele, ʼe nātou lagolago fakafiafia ki te toe ʼo te kau fakanofo ʼo nātou fai faka mafola ʼi te mālama ’ aenī, ʼaē ka ʼamanaki fetogi anai ʼaki te mālama foʼou pea mo faitotonu ʼa te ʼAtua.​—2 Petelo 3:​5-​13.

7. Koteā te taʼukai ʼaē neʼe kau kiai te kau Ako ʼo te Tohi-Tapu, kae koteā te meʼa ʼaē neʼe nātou ʼiloʼi ʼo ʼuhiga mo te palatiso?

⁷ Neʼe kamata ‘fakaaʼu e te ʼAtua te ʼu foha tokolahi ki te kolōlia’ ʼi tana folahi te laumālie maʼoniʼoni ʼi te Penikosite ʼo te taʼu 33 ʼo totatou temi, pea ʼe hā mai, neʼe ina fakakatofa he temi moʼo fakakatoa ai te “Iselaele ʼa te ʼAtua,” ʼaē ʼe faʼufaʼu e te toko 144 000. (Hepeleo 2:​10; Kalate 6:​16; Fakahā 7:​1-8) ʼO kamata mai te taʼu 1879, neʼe tautau talanoa te nusipepa ʼaenī ki te gāue ʼo te taʼukai ʼaē ʼe kau kiai te kau Kilisitiano fakanofo. Kae neʼe toe ʼiloʼi foki e te kau Ako ʼo te Tohi-Tapu (ʼaē ʼe fakahigoaʼi ia ʼaho nei ko te kau Fakamoʼoni ʼa Sehova), ʼe talanoa te Tohi-Tapu ki te ʼamanaki ʼaē ko te maʼuli heʼegata ʼi he palatiso ʼi te kele. Ohage la, neʼe ʼui fēnei e Te Tule Leʼo Fakapilitānia ʼo Sūlio 1883: “ ʼI te ʼosi fakatuʼu e Sesu tona puleʼaga, pea mo maumauʼi te agakovi, pea mo te tahi ʼu meʼa kovi, pea ʼe liliu leva anai te kele ʼaenī ko he palatiso, . . . pea ko nātou fuli ʼaē ʼe nonofo ʼi tonatou falemaka ʼe nātou hū anai ki te palatiso ʼaia. Pea ʼi tanatou liliu ʼaē ko he ʼu hahaʼi ʼe fakalogo ki tana ʼu lao, ʼe feala anai ke nātou maʼuʼuli ai ʼo heʼegata.” ʼAki te temi, neʼe fakasiʼisiʼi te tānaki ʼo te kau fakanofo, pea neʼe fakahū māmālie ki te kautahi ʼa Sehova, he ʼu hahaʼi neʼe mole nātou ʼamanaki ki te maʼuli ʼi selo. ʼI te lolotoga ʼo te ʼu taʼu ʼaia, neʼe foaki e te ʼAtua he fakasiosio poto lahi ki tana kau kaugana fakanofo, te kau Kilisitiano ʼaē neʼe toe tutupu.​—Taniela 12:3; Filipe 2:​15; Fakahā 14:15, 16.

8. ʼI te kamata ʼo te ʼu taʼu 1930, neʼe fakahaʼuhaʼu feafeaʼi te mahino ki te ʼamanaki ʼaē ki te maʼuli ʼi te kele?

⁸ Tāfito ʼo kamata mai te taʼu 1931, ko nātou ʼaē neʼe ʼamanaki ki te maʼuli ʼi te kele neʼe nātou fakatahi mo te kokelekasio faka Kilisitiano. ʼI te taʼu ʼaia, neʼe fakamālamaʼi e Sehova te toe ʼo te kau Kilisitiano fakanofo ke nātou mahino ai, ko te koga tohi ʼo Esekiele kapite 9 ʼe faka ʼuhiga ki te kalasi ʼaia ʼaē ka maʼuʼuli anai ʼi te kele, pea ʼe fakaʼiloga nātou ke nātou hāo pea mo hū ki te mālama foʼou ʼa te ʼAtua. Neʼe fakamahino ai ʼi te taʼu 1932, ko te ʼu hahaʼi ʼaia ʼo te temi ʼaenī ʼaē ʼe nātou hage ko he ʼu ōvi, neʼe fakatātā nātou e Sonatape (peʼe ko Seonatape), te kaugā fagona ʼo Sehu. (2 Hau 10:15-​17) ʼI te taʼu 1934, neʼe fakamahino lelei ai e te kau Fakamoʼoni ʼa Sehova, ʼe tonu ki te kau “Sonatape” ke nātou “foaki” tonatou maʼuli kia Sehova. ʼI te taʼu 1935, neʼe ʼiloʼi ai, ko te “toe hahaʼi tokolahi” ʼe ko te tahi ʼu ōvi ʼaē ʼe nātou ʼamanaki ke nātou maʼuʼuli ʼi te kele​—kae neʼe ʼui ʼi muʼa atu ʼe ko he lua kalasi fakalaumālie ʼe liliu anai ko he ʼu “kaugā gāue” ʼo te ʼohoana ʼo Kilisito ʼi selo. (Fakahā 7:​4-​15; 21:​2, 9; Pesalemo 45:14, 15) Pea tāfito talu mai te taʼu 1935, neʼe takitaki e te kau Kilisitiano fakanofo te kumi ʼo te hahaʼi faitotonu ʼaē ʼe nātou holi ke nātou maʼuʼuli ʼo heʼegata ʼi te palatiso ʼi te kele.

9. ʼI te hili ʼo te taʼu 1935, he koʼe neʼe fakagata e ʼihi Kilisitiano tanatou kai ki te pane pea mo ʼinu ki te vino ʼi te Taumafa ʼo te ʼAliki?

⁹ ʼI te hili ʼo te taʼu 1935, ko ʼihi Kilisitiano ʼaē neʼe nātou kai te pane pea mo ʼinu te vino ʼi te Taumafa ʼo te ʼAliki, neʼe nātou tuku tanatou fai te faʼahi ʼaia. Koteā tona tupuʼaga? He neʼe mahino kia nātou, neʼe nātou ʼamanaki ki te maʼuli ʼi te kele, ka mole ko te maʼuli ʼaē ʼi selo. Neʼe ʼui fēnei e te tahi fafine neʼe papitema ʼi te taʼu 1930: “Logope la neʼe ʼui [ko takita kai te pane pea mo ʼinu te vino] neʼe ko te meʼa ʼaē neʼe tonu ke kita fai, pea tāfito ki te kau minisi faiva ʼaē neʼe fai faka mafola temi katoa, kae neʼe mole he temi neʼe ʼau tui papau ai, ʼe ʼau kau anai ʼi te maʼuli ʼaē ʼi selo. Koia, ʼi te taʼu 1935, neʼe fakamahino lelei ai kia mātou, ʼe lolotoga tānaki te hahaʼi tokolahi ʼe nātou ʼamanaki ki te maʼuli ʼi te kele. Tokolahi ia mātou neʼe mātou fiafia ʼi tamatou ʼiloʼi ʼaē, neʼe mātou kau ʼi te toe hahaʼi tokolahi, pea neʼe mātou fakagata ai tamatou toʼo te pane pea mo te vino.” Neʼe hoko te ʼu fetogi māʼiape la ʼi te ʼu tohi faka Kilisitiano ʼa te sosiete. ʼI te ʼu taʼu ki muʼa atu, neʼe fai tāfito te ʼu tohi maʼa te kau tisipulo ʼa Sesu ʼaē neʼe fakanofo ʼaki te laumālie, kae ʼo kamata mai te taʼu 1935, neʼe foaki e Te Tule Leʼo pea mo te tahi ʼu tohi ʼa te ‘tagata kaugana agatonu’ he meʼa kai fakalaumālie neʼe ʼaoga ki te kau Kilisitiano fakanofo pea mo tonatou ʼu kaugā gāue ʼaē ʼe nātou ʼamanaki ki te maʼuli ʼi te kele.​—Mateo 24:45-​47.

10. ʼE feala ke fetogi feafeaʼi he Kilisitiano fakanofo heʼe agatonu?

¹⁰ E feafeaʼi mo kapau ʼe liliu he Kilisitiano fakanofo ʼo heʼe agatonu? ʼE fetogi anai koa ia ia e he tahi kehe? Neʼe fakamoʼoni ia Paulo ki te faʼahi ʼaia ʼi tana talanoa ʼaē ki te fuʼu oliveto fakatātā. (Loma 11:11-​32) Kapau ʼe tonu ke fetogi he Kilisitiano fakanofo, pea ʼe hā mai ʼe fai anai e te ʼAtua te pāui ki selo ki he tahi neʼe ʼiloa tana tui ʼi tana gāue lolotoga ni ʼu taʼu ʼi te tauhi taputapu ʼaē kia Sehova.​—Vakaʼi ia Luka 22:28, 29; 1 Petelo 1:​6, 7.

Ko He ʼu Tupuʼaga Ke Tou Loto Fakafetaʼi Ai

11. Tatau aipe peʼe koteā tatatou ʼamanaki, koteā te meʼa ʼaē ʼe fakapapau mai ia Sake 1:​17 kia tatou?

¹¹ Tatau aipe pe kofea te potu ʼaē ʼe tou tauhi agatonu ai kia Sehova, kae ʼe ina foaki mai anai te meʼa ʼaē ʼe ʼaoga kia tatou pea mo fakafimālie te ʼu meʼa ʼaē ʼe totonu ʼaē ʼe tou holi kiai. (Pesalemo 145:16; Luka 1:​67-​74) Tatau aipe peʼe tou ʼamanaki moʼoni ki te maʼuli ʼaē ʼe ʼi selo peʼe tou ʼamanaki ki te maʼuli ʼaē ʼi te kele, kae ʼe lahi te ʼu tupuʼaga ʼaē ʼe feala ai tatatou loto fakafetaʼi ki te ʼAtua. ʼE ina fai tuʼumaʼu pe te meʼa ʼaē ʼe fua lelei kia nātou ʼaē ʼe nātou ʼoʼofa kia te ia. Neʼe ʼui e te tisipulo ko Sake, “ko te meʼa ʼofa lelei fuli pea mo te mōlaga haohaoa fuli ʼe haʼu ia mai ʼoluga, heʼe hifo mai te Tāmai ʼo te ʼu mālama ʼaē ʼe ʼi selo,” ia Sehova ʼAtua. (Sake 1:​17) Tou vakaʼi pe koteā te ʼu meʼa ʼofa pea mo te ʼu tapuakina ʼaia.

12. He koʼe ʼe feala hatatou ʼui, neʼe foaki e Sehova ki tana ʼu kaugana agatonu takitokotahi he ʼamanaki taulekaleka?

¹² Neʼe foaki e Sehova ki tana ʼu kaugana agatonu takitokotahi he ʼamanaki taulekaleka. Neʼe ina pāuiʼi ʼihi ki te maʼuli ʼi selo. Ko te kau fakamoʼoni ʼaē neʼe maʼuʼuli ʼi muʼa ʼo te temi faka Kilisitiano, neʼe foaki age e Sehova kia nātou te ʼamanaki taulekaleka ʼaē ko te fakatuʼuake ki te maʼuli ʼo heʼegata ʼi te kele. Ohage la, neʼe tui ia Apalahamo ki te fakatuʼuake, pea neʼe talitali ki “te kolo ʼaē ʼe ʼi ai tona ʼu fakatafito moʼoni”​—te Puleʼaga ʼo selo ʼaē ka ina takitaki anai te kele, ʼi te temi ʼaē ka fakatuʼuake ai anai. (Hepeleo 11:10, 17-​19) ʼI te temi fakaʼosi ʼaenī, ʼe toe foaki e te ʼAtua ki te lauʼi miliona hahaʼi te ʼamanaki ʼaē ke nātou maʼuʼuli ʼo heʼegata ʼi te palatiso ʼi te kele. (Luka 23:43; Soane 17:3) ʼE mahino ia, ʼe tonu ke loto fakafetaʼi ʼaupito ia nātou fuli ʼaē neʼe foaki age kia nātou e Sehova ia te ʼamanaki taulekaleka ʼaia.

13. Neʼe fakaʼaogaʼi feafeaʼi e te ʼAtua tona laumālie maʼoniʼoni ki tana hahaʼi?

¹³ ʼE foaki e Sehova ki tana hahaʼi te meʼa ʼofa ʼaē ko tona laumālie maʼoniʼoni. Ko te kau Kilisitiano ʼaē ʼe nātou maʼu te ʼamanaki ki te maʼuli ʼi selo, ʼe fakanofo nātou ʼaki te laumālie maʼoniʼoni. (1 Soane 2:​20; 5:​1-4, 18) Kae ko te kau kaugana ʼa te ʼAtua ʼaē ʼe nātou ʼamanaki ke nātou maʼuʼuli ʼi te kele, ʼe nātou toe maʼu foki mo nātou te tokoni pea mo te takitaki ʼo te laumālie maʼoniʼoni. Neʼe kau ia Moisese ki te kau kaugana ʼaia, pea neʼe ina maʼu mo ia te laumālie ʼa Sehova, ʼo toe feiā pe mo te ʼu tagata e toko 70 ʼaē neʼe fakanofo ke nātou tokoni kia ia. (Faka au 11:24, 25) ʼAki te takitaki ʼo te laumālie maʼoniʼoni, neʼe gāue faiva ia Pesalele ki te laga ʼo te tapenakulo ʼo Iselaele. (Ekesote 31:​1-​11) Neʼe hifo ifo te laumālie ʼo te ʼAtua kia Seteone, mo Sefeteo, mo Samisoni, mo Tavite, mo Elia, mo Eliseo, pea mo ʼihi atu. Logope la ʼe mole fakaaʼu anai te hahaʼi ʼaia ʼo te ʼu temi ʼāfea ki te kolōlia ʼi selo, kae neʼe takitaki nātou e te laumālie pea mo tokoni kia nātou, ohage pe ko te tahi ʼu ōvi ʼa Sesu ia ʼaho nei. Koia, kapau ʼe kita maʼu te laumālie maʼoniʼoni, ʼe mole faka ʼuhiga leva, ʼe pāuiʼi kita ki te maʼuli ʼaē ʼi selo. Kae ʼe takitaki tatou e te laumālie ʼo Sehova, ʼo tokoni mai kia tatou ke tou faka mafola pea mo fakahoko te tahi ʼu gāue ʼaē ʼe fakamaʼua mai e te ʼAtua kia tatou, pea ʼe ina foaki mai he mālohi ʼe lahi age ia ʼi totatou mālohi māhani, pea mo ina fakatupu ia tatou te fua ʼo te laumālie ʼaē ko te ʼofa, mo te fiafia, mo te tokalelei, mo te kātaki fualoa, mo te finegaloʼofa, mo te agalelei, mo te tui, mo te agamālū, pea mo te loto lolomi. (Soane 16:13; Gāue 1:8; 2 Kolonito 4:​7-​10; Kalate 5:​22, 23) ʼE mole tonu koa la ke tou loto fakafetaʼi ki te meʼa ʼofa ʼaia ʼaē ʼe foaki mai e te ʼAtua kia tatou?

14. Koteā te ʼaoga ʼo te ʼatamai mālama kia tatou pea mo te poto ʼaē ʼe foaki mai e te ʼAtua?

¹⁴ ʼE tonu ke tou loto fakafetaʼi ʼuhi ko te ʼatamai mālama pea mo te poto ʼaē ʼe foaki mai e te ʼAtua, tatau aipe peʼe tou ʼamanaki ke tou maʼuʼuli ʼi selo peʼe ʼi te kele. Ko te ʼatamai mālama totonu ʼo ʼuhiga mo Sehova, ʼe tokoni kia tatou ke tou “ ʼiloʼi te ʼu meʼa ʼaē ʼe maʼuhiga tāfito” pea mo tou “haʼele ʼi he ʼaluʼaga ʼe tau mo feʼauga mo Sehova, ke [tou] lelei ʼaupito kia te ia.” (Filipe 1:​9-​11; Kolose 1:​9, 10) Ko te poto fakaʼatua ʼe ko he puipui pea mo he takitaki ʼi tokita maʼuli. (Tāʼaga Lea 4:​5-7; Tagata Tānaki 7:​12) Ko te ʼatamai mālama moʼoni pea mo te poto, ʼe fakatafito ki te Folafola ʼa te ʼAtua, pea ko te toe ʼo te kau fakanofo ʼe nātou tokagaʼi tāfito te ʼu meʼa ʼaē ʼe ʼui ai ʼo ʼuhiga mo tanatou ʼamanaki ʼaē ki te maʼuli ʼi selo. Kae ko tokita ʼofa ki te Folafola ʼa te ʼAtua pea mo takita mahino lelei kiai, ʼe mole ko he ʼu fakamoʼoni ʼaia mai te ʼAtua ʼe pāuiʼi kita ki te maʼuli ʼi selo. Ko te ʼu tagata ohage ko Moisese pea mo Taniela, neʼe nā tohi māʼiape la mo ʼihi koga ʼo te Tohi-Tapu, kae ʼe fakatuʼuake anai nāua ki te maʼuli ʼi te kele. Tatau aipe peʼe tou ʼamanaki ki te maʼuli ʼi selo peʼe ʼi te kele, kae ʼe tou maʼu fuli te meʼa kai fakalaumālie mai te “tagata kaugana agatonu mo poto” ʼaē neʼe fakanofo e Sehova. (Mateo 24:45-​47) ʼE tou loto fakafetaʼi ʼaupito ki te ʼatamai mālama ʼaē ʼe tou maʼu ʼaki te fakatuʼutuʼu ʼaia!

15. Koteā te meʼa ʼofa tāfito ʼaē neʼe fai e te ʼAtua, pea ʼe koutou faka ʼuhigaʼi feafeaʼi te meʼa ʼaia?

¹⁵ Ko te meʼa ʼofa ʼaē ʼe lahi tokotahi mai te ʼAtua, ʼe ko te fakatuʼutuʼu agaʼofa ʼo te sakilifisio faitotogi ʼa Sesu, ʼaē ʼe ʼaoga kia tatou tatau aipe peʼe tou ʼamanaki ki te maʼuli ʼi selo peʼe ʼi te kele. Neʼe ʼofa lahi te ʼAtua ki te malamanei, pea “neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” (Soane 3:​16) Tahi ʼaē meʼa, ko te ʼofa ʼo Sesu neʼe ina uga ia ia ke “ina foaki tona nefesi ko he totogi moʼo fetogi ʼaki ʼo te tokolahi.” (Mateo 20:28) Ohage ko tona fakamahino mai e te ʼapositolo ko Soane, ko Sesu Kilisito ʼe “ko te sakilifisio faifakalelei ʼo ʼuhiga mo ʼatatou ʼu agahala [te ʼu agahala ʼa te kau fakanofo], pea ʼe mole gata pe ki tatatou ʼu agahala, kae ʼo toe kau ai foki mo te ʼu agahala ʼo te malamanei katoa.” (1 Soane 2:​1, 2) Koia, ʼe tonu ke tou loto fakafetaʼi fuli ki te fakatuʼutuʼu agaʼofa ʼaia ʼaē neʼe fai moʼo hāofaki ʼo tatou pea ke tou maʼuʼuli ai ʼo heʼegata.b

ʼE Koutou ʼOlo Anai Koa Kiai?

16. Koteā te meʼa maʼuhiga ʼaē ka tou fakamanatu anai ʼi te ʼosi tō ʼo te laʼā ʼi te ʼaho 11 ʼo ʼApelili 1998, pea ko ai ia nātou ʼaē ʼe tonu ke kau kiai?

¹⁶ Ko totatou loto fakafetaʼi ki te totogi ʼaē neʼe fai e te ʼAtua ʼaki tona ʼAlo, ʼe tonu ke ina uga tatou ke tou ʼolo ki te ʼu Fale ʼo te Puleʼaga peʼe ko te tahi ʼu koga meʼa ʼaē ka fakatahi ai anai te kau Fakamoʼoni ʼa Sehova ʼi te ʼosi tō ʼo te laʼā ʼi te ʼaho 11 ʼo ʼApelili 1998, ke nātou fai ai te fakamanatu ʼo te mate ʼo Kilisito. ʼI te temi ʼaē neʼe ina fakatuʼutuʼu ai te fakamanatu ʼaia mo tana kau ʼapositolo agatonu ʼi te po fakaʼosi ʼo tona maʼuli ʼi te kele, neʼe ʼui fēnei e Sesu: “Koutou haga fai te meʼa ʼaenī moʼo fakamanatu kia te ʼau.” (Luka 22:19, 20; Mateo 26:26-​30) Ko te toe ʼo te kau fakanofo ʼe nātou kai anai te pane ʼaē ʼe mole hona meʼa fakatupu, ʼaē ʼe ina fakatātā te sino haohaoa ʼo Sesu, pea mo nātou ʼinu anai te vino, ʼaē ʼe ina fakatātā tona taʼataʼa ʼaē neʼe ina liligi ʼi tona sakilifisio. ʼE gata pe ki te kau Kilisitiano ʼaē neʼe fakanofo ʼaki te laumālie te fealagia ʼaē ke nātou fai te faʼahi ʼaia, koteʼuhi ʼe nātou kau ʼi te fuakava foʼou pea mo te fuakava ki te Puleʼaga, pea ʼe nātou maʼu te fakamoʼoni ʼo te laumālie maʼoniʼoni ʼa te ʼAtua, ko tanatou ʼamanaki ʼe ko he ʼamanaki ki te maʼuli ʼi selo. Ko te tahi ʼu lauʼi miliona hahaʼi ʼe nātou kau anai ki te fono ʼaia, ʼo nātou mamata ʼaki he fakaʼapaʼapa ki te ʼu meʼa ʼaē ka hoko, koteʼuhi ʼe nātou loto fakafetaʼi ki te ʼofa ʼa te ʼAtua pea mo Kilisito ʼi tanā fakatuʼutuʼu te sakilifisio ʼo Sesu ke feala ai kia tatou ke tou maʼu te maʼuli heʼegata.​—Loma 6:​23.

17. Koteā te meʼa ʼaē ʼe tonu ke tou manatuʼi ʼo ʼuhiga mo te fakanofo ʼo he tahi ʼaki te laumālie?

¹⁷ Ko takita tui ʼāfea, peʼe ko tokita lotomamahi ʼuhi ko te mate ʼo he tahi neʼe kita ʼofa mamahi ai, peʼe ko te ʼu fihifihia ʼaē ʼe tupu ʼuhi ko tokita maʼuli ʼi te mālama ʼaenī, peʼe ko takita logoʼi ʼaē neʼe foaki mai e Sehova kia kita he tapuakina makehe, ʼe lagi uga ai anai kita ke kita manatu hala, ʼe pāuiʼi kita ki te maʼuli ʼaē ʼe ʼi selo. Kae ʼe tonu ke tou manatuʼi fuli, ʼe mole fakatotonu mai e te Tohi-Tapu ke tou kai te pane peʼe ke tou ʼinu te vino ʼi te ʼAho Fakamanatu moʼo fakahā ʼaki ai ʼe tou loto fakafetaʼi ki te sakilifisio faitotogi ʼo Kilisito. Tahi ʼaē meʼa, ko te fakanofo ʼo he tahi ʼaki te laumālie, “ ʼe mole fakalogo ia kia ia ʼaē ʼe fakaʼamu peʼe kia ia ʼaē ʼe lele, kae [ʼe fakalogo ia] ki te ʼAtua,” ia Ia ʼaē neʼe ina fakanofo ia Sesu ko tona Foha fakalaumālie, pea mo ina fakaaʼu te tahi ʼu foha e toko 144 000 ki te kolōlia.​—Loma 9:​16; Isaia 64:8.

18. Koteā te ʼu tapuakina ʼaē kua vave maʼu e nātou ʼaē ʼe nātou tauhi kia Sehova ia ʼaho nei?

¹⁸ Ko te maʼuli heʼegata ʼi te palatiso ʼi te kele ʼe ko te ʼamanaki ʼaia ʼaē ʼe foaki e te ʼAtua ki te tokolahi ʼo te hahaʼi ʼaē ʼe nātou tauhi kia te ia ʼi te ʼu ʼaho fakamuli ʼaenī. (2 Timoteo 3:​1-5) Mole tuai, pea ʼe nātou maʼuli fiafia anai ʼi te palatiso ʼaia. ʼE fakatuʼutuʼu anai e te ʼu pilinise te ʼu meʼa ʼo te kele ʼo mulimuli ki te takitaki ʼo te Puleʼaga ʼaē ʼe ʼi selo. (Pesalemo 45:16) ʼE tokalelei anai te kele, heʼe maʼuliʼi anai e te hahaʼi te ʼu lao ʼa te ʼAtua pea mo nātou ako anai te tahi ʼu meʼa ʼo ʼuhiga mo te ʼu ala ʼa Sehova. (Isaia 9:​6, 7; Fakahā 20:12) ʼE lahi anai te ʼu gāue ʼaē ka fai moʼo laga ni ʼu fale pea mo fakaliliu te kele ke matalelei. (Isaia 65:17-​25) Tahi ʼaē meʼa, koutou fakakaukauʼi age muʼa te ʼu fakatahi faka famili fakafiafia ʼaē ka hoko mokā fakatuʼuake anai te kau mate! (Soane 5:​28, 29) ʼI te ʼosi ʼo te ʼahiʼahi fakaʼosi, pea ʼe pulihi katoa anai te agakovi. (Fakahā 20:​7-​10) ʼO kamata mai te temi ʼaia ʼo talu ai, ʼe fonu anai te kele ko te hahaʼi haohaoa ʼaē ka ‘faka ʼāteaina anai mai te popūla ki te maumau, pea mo nātou maʼu anai te ʼāteaina faka kolōlia ʼo te ʼu fānau ʼa te ʼAtua.’

[Nota ʼi te lalo pasina]

ʼE Feafeaʼi Anai Takotou Tali?

◻ Koteā te faka ʼuhiga ʼo te ʼui ʼaē ke kita “toʼo noa te vai ʼo te maʼuli?”

◻ Tatau aipe peʼe tou ʼamanaki ke tou maʼuʼuli ʼi selo peʼe ʼi te kele, kae koteā te ʼu tupuʼaga ʼaē ke tou loto fakafetaʼi ai ki te ʼAtua?

◻ Koteā te fakamanatu ʼaē ʼe fai ʼi te taʼu fuli, pea ʼe tonu ke tou kau kiai?

◻ Koteā te meʼa ʼaē ka hoko anai ʼi te ka haʼu ki te tokolahi ʼo te hahaʼi ʼa Sehova?

[Paki ʼo te pasina 18]

Ko te toko lauʼi miliona hahaʼi ʼe nātou ‘toʼo noa te vai ʼo te maʼuli.’ ʼE koutou kau koa kia nātou ʼaia?