Tou Fakatafito Te Tui Ki Te Tupuʼaga ʼo Te Malamanei
1 Tokolahi ʼe ʼi ai tanatou manatu ʼo ʼuhiga mo te tupuʼaga ʼo te maʼuli. Kae ko he meʼa fakaʼofaʼofa, heʼe tokolahi ʼe mole kei nātou tui ki te Tupuʼaga. Ko te tohi Mauli O Heegata ʼe ina fakatafito te moʼoni ʼo te ʼu akonaki ʼa te Tohi-Tapu. E feafeaʼi koa hatatou tokoni ki te hahaʼi fakamalotoloto ʼaē neʼe nātou fakahā tanatou fia logo? ʼAki te fai ʼo te ʼu ʼaʼahi. Mokā tou liliu ʼo ʼaʼahi te hahaʼi, ʼe lelei ke ʼi ai tuʼumaʼu hatatou manatu ke tou talanoa kiai, ke fakatafito anai kiai te tui kia Sehova totatou Tupuʼaga.
2 Kapau neʼe ina ʼui mai ʼe tui ia ki te Tohi-Tapu, ko te faʼahi ʼaia ʼe lelei moʼo kamata ʼaki ʼo takotou fai palalau:
◼ “Ko te vaega ʼo Isaia 45:18 ʼe ina fai he talanoa mālohi ʼo ʼuhiga mo te tupuʼaga ʼo te ʼatulaulau; ʼe ʼau fia ʼiloʼi takotou manatu ʼo ʼuhiga mo te faʼahi ʼaia. [Koutou lau pea koutou tuku ke fai mai hana tali.] ʼE fakahā e Sehova ko ia ko te Tupuʼaga ʼo te lagi pea mo te kele. Kae e feafeaʼi koa la ia ki te maʼuli ʼaē ʼi te kele? ʼE fakahā ia Isaia 42:5 ko Sehova ʼaē neʼe ina fakatupu te faʼahi ʼaia. [Koutou lau.] ʼE feala koa hakotou falala ki te Tohi-Tapu?” Koutou fakaʼaogaʼi te kapite 7 ʼo te tohi Mauli O Heegata, pea koutou fakahā te ʼu tupuʼaga lahi ʼaē ʼe ʼaoga ai ke tui kia Sehova ko te Tupuʼaga.
3 ʼE feala ke kamata takotou fai palalau ʼaki he manatu fēnei:
◼ “ ʼI taku ʼaʼahi talu mai, neʼe tā lagaʼi te fehuʼi ʼaē, Koteā koa te ʼapogipogi ʼo te tagata pea mo te kele? Koutou fakatokagaʼi peʼe feafeaʼi te tali ʼa te tohi ʼaē neʼe ʼau tuku atu ki te fehuʼi ʼaia.” Koutou fakahā age te ʼu pasina 156 ki te 158 ʼo te tohi Mauli O Heegata pea koutou fakaloto mālohiʼi ia ia ke ina lau te ʼu kupu tāfito. Kapau e lahi tana fia logo, ʼe feala ke koutou fehuʼi age: “ ʼI takotou manatu, koteā koa te ʼu fetogi fakaofoofo, ʼe hoko anai ʼi te kele?” Kapau ʼe feala, pea hoko atu takotou fai palalau ki te puani ʼaia peʼe hoki koutou toe liliu mai ʼo hoko atu takotou fai palalau ki niʼihi palakalafe ʼo te kapite pe ʼaia ʼo te tohi Mauli O Heegata.
4 Kapau ʼe hage ʼe fia logo ia ia ʼaē fai palalau mo koutou ki te lotu, ʼe feala hakotou fehuʼi age:
◼ “Neʼe koutou fakatokagaʼi koa ʼe tokolahi te hahaʼi ia ʼaho nei ʼe nātou tui ko te maʼuli ʼe haʼu mai he mālohi feiā pe? [Koutou tuku ke fai mai hana tali.] Ko te Tohi-Tapu ʼe mole ina tuku feiā pe tatou ke mole tou ʼiloʼi ia te Tupuʼaga moʼoni.” Koutou lau ia Fakahā 4:11. ʼI te ʼosi lau ʼo te vaega, e lagi ʼe ina fia fakahā mai pe koteā tana manatu. ʼE feala ke koutou fakatokagaʼi ia ia ki he puani makehe e tahi peʼe lua ʼi te kapite 1 ʼo te tohi Mauli O Heegata pea mo koutou fakahā age te fakatuʼutuʼu ʼa te Tupuʼaga ʼaē ko te fakaliliu ʼo te kele katoa ko he palatiso ʼo mulimuli ki te Puleʼaga ʼo Kilisito.
5 Ko he tahi faʼahiga kamata ʼo te ʼaʼahi ʼaki takotou ʼui age:
◼ “Ko te malamanei neʼe lahi tana mamahi ʼuhi ko te agakovi. Ko Sehova, ia te Tupuʼaga ʼo te kele, neʼe ina fakapapau ko te ʼu ʼaluʼaga ʼaia ʼe fakaʼosi anai. [Koutou fakahā age te pasina 161 pea koutou lau ia Fakahā 7:9, 16.] Ko nātou fuli ʼaē ʼe nātou ʼiloʼi ia ia ko tonatou Tupuʼaga pea ʼe nātou fia fai tona finegalo, ʼe feala ke nātou holi ki te ʼu tapuakina taulekaleka ʼaia.” Kapau ʼe faka fealagia te temi, ʼe feala ke hoko atu takotou fai palalau ʼaki ia Fakahā 21:3, 4 ʼi te pasina 162.
6 Ko te kau fai faka mafola ʼaē kua faiva ʼe nātou ʼiloʼi ʼe lelei te fai ʼo he polokalama ʼo fakatuʼutuʼu ai te temi ʼaē moʼo fai ʼo te ʼu ʼaʼahi. Koutou fai he ʼu fakatuʼutuʼu ʼo ʼuhiga mo te gāue ʼaia ke feala ai hatatou ʼaʼahi fakavilivili ia nātou ʼaē neʼe fia logo. Koutou fakasiosio pe ko te temi fea ʼaē ʼe lelei kia koutou pea mo te hahaʼi ʼaē ʼi te telituale. ʼAki takotou kau tuʼumaʼu ʼi te gāue ʼaenī, ʼe koutou maʼu anai te fiafia ʼi te gāue ʼaē ko te “fai ʼo he ʼu tisipulo.”—Mat. 28:19, 20.