Tou Tokaga ʼo Fai He ʼu ʼAʼahi
1 “Lolotoga te ʼu taʼu ʼaenī e lua kua hili, neʼe ʼau lau tuʼa fā [te tohi Création], ʼo mole gata pe la taku puna’maʼuli ʼi te loloto ʼo te ʼu kumi pea mo te gāue fakapotopoto ʼaē neʼe fai mo ʼona teuteuʼi. Ke hoholo atu takotou ta te tohi ʼaia. ʼE tonu ke maʼu e te hahaʼi fuli te tohi ʼaia; ʼe fakagata ai leva te ʼu fekinauʼaki pea mo te ʼu manatu hāla ʼo ʼuhiga mo totatou haʼuʼaga, ʼo feiā pe foki ki te hahaʼi ʼaē ʼe mole tui.” Neʼe fēnei te palalau ʼa te tagata avocat, ʼe feala ke tou lau ʼi te pasina 32 ʼo te Koutou ʼaʼala! ʼo te ʼaho 22 ʼo ʼapelili 1992.
2 Ko he palalau feiā ʼo ʼuhiga mo te tohi Création ʼe mole ina uga koa tatou ke tou faigaʼi ia meʼa fuli ʼo tufa te tohi ʼaia ki he tokolahi ʼe fia logo mai? Kae ʼe tonu foki ke tou tokaga ʼo fai he ʼu ʼaʼahi moʼo uga ʼo te fia logo ki te tohi ʼaia mole hona fakatatau.
3 Tokosiʼi ia tatou neʼe loloto tatatou ako te ʼu fakatuʼutuʼu fuli ʼaē neʼe faʼu e te kau evolisio. Kae, ʼe mole maʼuhiga he fai ʼo he ʼu kumi feiā moʼo faigaʼi ʼo te hahaʼi ʼaē ʼe tui ki te moʼoni ko te fakatuʼutuʼu ʼo te evolisio ko te tahi pe ʼaia meʼa neʼe fai e Satana moʼo fakameleʼi ʼo te Tupuʼaga ʼo te malamanei katoa, ia Sehova ʼAtua. ʼAua naʼa tou fakameʼameʼa ʼo toe liliu ʼo ʼaʼahi te ʼu hahaʼi ʼaki tatatou tuʼania ʼaē ʼe mole feala anai hatatou tali ki ni ʼu fehuʼi makehe ʼe feala anai ke nātou fai mai. Ko te tohi Création ʼe ina foaki mai te ʼu fakamoʼoni lahi ʼo ʼuhiga mo te ʼu fehuʼi takitahi ʼaia.
4 Pea, ko te ʼu kapite 16 ki te 20 ʼe lahi ai te ʼu manatu ʼo ʼuhiga mo te ʼu akonaki loloto ʼa te Tohi-Tapu ʼo ʼuhiga mo te haʼuʼaga ʼo te tagata, te ʼu fakatuʼutuʼu ʼa te ʼAtua ʼo ʼuhiga mo te kele pea mo te malamanei, ʼo feiā foki mo he ʼu fili ʼe tau mo te hahaʼi ʼi te temi nei. ʼE lahi te ʼu meʼa maʼuhiga ke tou palalau ki ai lolotoga te ʼu ʼaʼahi.
5 Kapau ʼe koutou tuʼania te toe liliu mai ʼo ʼaʼahi ni hahaʼi neʼe koutou tuku kia nātou he tohi, he koʼe ʼe mole koutou ʼomai mo he tahi ʼi te kau faka mafola ʼe faiva age ia peʼe ina ʼiloʼi lelei te ʼu fakatuʼutuʼu ʼa te kau evolisio? ʼE feala ko he tēhina pe ko he tuagaʼane kei ako neʼe ina akoʼi te fahaʼi ʼaia ʼi te fale ako pea ʼe ina ʼiloʼi lelei te ʼu fakatuʼutuʼu ʼo te temi nei. Peʼe, feala ko he tahi ʼi tokotou kokelekasio neʼe tui ki te evolisio ʼi muʼa ʼo tana ʼiloʼi te moʼoni faka tohi-tapu, pea ʼi te temi nei ʼe feala tana faiva ʼo tokoniʼi koutou ke koutou fakatotonuʼi te ʼu akonaki hāla ʼo te evolisio.
6 Lolotoga he ʼaʼahi, ʼaua naʼa koutou tuʼania ʼo fakatokagaʼi age te kapite 19 ʼo te tohi Création pea mo fai te palalau ki te ʼamanaki ʼaē ʼe fakahā mai e te Tohi-Tapu. Ko te kapite ʼaia ʼe ina fakahā te ʼu puani lahi ʼe feala ke fakahā moʼo uga ʼo te hahaʼi ke nātou fia logo ki te ʼu fakapapau ʼo te Tohi-Tapu. ʼE feala ke koutou fakaʼaogaʼi te ʼu manatu ʼi te kupu ʼaē “La transformation de la terre” (Ko te fakaliliu ʼo te kele), pasina 236, pea mo te ʼu manatu ʼaenī e lua “La fin de la misère” (Te fakaʼosi ʼo te masiva) pea “Il n’y aura plus ni maladie ni mort” (ʼE mole toe ʼi ai anai he mahaki mo he mate), ʼi te ʼu pasina 238 pea mo 239.
7 Ko te tohi lelei ʼaia neʼe ina tokoniʼi te hahaʼi tokolahi ke nātou maʼu te ala ʼo te maʼuli. ʼE lagi feala anai hatatou toe tokoniʼi niʼihi hahaʼi ʼo uga nātou ke nātou lau pea mo vakaʼi te meʼa ʼaē ʼe fakahā mai e te tohi Création ʼo ʼuhiga mo te maʼuli ʼi te kele pea mo tona kamataʼaga.