Tou Fakaʼaoga Fakaleleiʼi Te ʼu Nusipepa
1 Koutou tutuʼu ʼi muʼa ʼo he fale tuku sulunale: ko te lahi pea mo te ʼu faʼahiga nusipepa ʼe maʼu ai ʼe fakaofoofo, ʼo kamata mai te ʼu tohi ʼe ʼaoga ki te ʼu toe liliki ʼo aʼu ki te ʼu tohi ʼo ʼuhiga mo te ʼu kumi neʼe fai e te tagata. ʼE mole feala anai te lau ʼo te ʼu tohi fuli ʼaia. Ko ʼihi ʼe ʼi ai te ʼu meʼa ʼe ʼaoga, kae ʼe lahi te ʼu tohi ʼe mole faʼa maʼuhiga. ʼE lahi te ʼu tohi ʼe mole lelei pea ʼe tonu ke tuku kehe.
2 ʼE kehekehe ʼaupito ia mo Te Tule Leʼo pea mo te Koutou ʼaʼala! Ko te tupuʼaga ʼo te ta ʼo te ʼu nusipepa ʼaia, ʼe ko te kumi pea mo te kalagaʼi ʼo te moʼoni ke feala ai kia nātou fuli ʼaē ʼe nātou fakahā tanatou fia fai ki te ʼofa ʼo te ʼAtua ke nātou maʼu te fakamaʼuli.
3 Ko te nusipepa Koutou ʼaʼala! ʼe feala tana faiga fakapotopoto ke lave ʼi te ʼu hahaʼi kehekehe, ʼuhi heʼe mafola ʼaupito pea mo tona ʼu alatike kehekehe. Ohage ko tona fakamahino ʼi te pasina 4 ʼo te nusipepa ʼaia, ʼe “fakatuʼutuʼu ki te hahaʼi takitokotahi ʼo te famili”. Ko te ʼu manatu ʼo te ʼu alatike ʼe palalau ai ki te ʼu faʼahiga meʼa kehekehe: ki te ʼu hahaʼi, te lotu, te poto ʼo te tagata, mo ʼihi atu meʼa. Ko te Koutou ʼaʼala! ʼe palalau ki te ʼu meʼa loloto pea ʼe ina fakahā te ʼaluʼaga moʼoni ʼo te ʼu logo ʼo te temi nei. Kae tāfito, ʼe ina “foaki mai te ʼu ʼuhiga tāfito ke tui ai ko te Tupuʼaga ʼe ina fakahoko anai tana ʼu fakapapau ʼaki tana fakatuʼu (...) he tuʼu foʼou ʼe tuʼu ai anai te tokalelei pea mo te fīmālie moʼoni”.
4 Ko te numelo ʼo te ʼaho 8 ʼo ʼoketopeli ko tona kupu ʼe tuʼu ʼi tona takafi “ ʼE feala takotou tauʼi te ʼu manatu ʼe mole totonu”. Tokolahi te hahaʼi ʼe haʼele kovi tonatou maʼuli ʼuhi ko te ʼu manatu ʼaia! Ka ʼe tou fakahā anai te nusipepa ʼaia, ʼe lagi ʼe tou faigaʼi anai ke lave ia nātou ʼaē ʼe palalau mo tatou ʼo tou palalau ki tana ʼu tokoni fakatupu fīmālie, ʼe toʼo mai te Tohi-Tapu. ʼO ʼuhiga mo te numelo ʼo te ʼaho 22 ʼo ʼoketopeli, ʼe feala ke fakalogo lelei mai he tahi mokā ʼe tou fakahāhā te ʼu manatu fakatupu fīmālie ʼe tuʼu ʼi te ʼu alatike ʼaē ko tona kupu “Ko he mālama foʼou ʼe ina foaki anai ki te hahaʼi fuli te ʼu meʼa ʼe ʼaoga kia nātou”.
5 Ko Te Tule Leʼo kua ʼiloa ʼi te malamanei katoa ohage ko he meʼa fakahāhā ʼo te logo lelei ʼo ʼuhiga mo te Puleʼaga ʼo te ʼAtua pea mo te ʼu tapuakina faka palatiso ʼe ina foaki mai anai. Ko te numelo ʼo te ʼaho 1 ʼo ʼoketopeli ʼe tali anai ki te fehuʼi ʼaē “ ʼE ʼaoga moʼoni koa he mesia ki te tagata?” Ko he faka fealagia ʼaia kia tatou ke tou palalau ai ki tatatou ʼamanaki ʼaē ki te Puleʼaga. ʼAki te kupu ʼaē “Te meʼa faigataʼa ʼe tau mo te maʼuli faka famili ia ʼaho nei”, ʼo te numelo ʼo te ʼaho 15 ʼo ʼoketopeli ʼe ina fakaloto malōhiʼi anai tatou ke kamata hatatou ʼu fai palalau mo he ʼu hahaʼi ʼe ʼi ai hanatou famili pea ʼe nātou holi ke fakamaʼamaʼa ʼanatou kavega ʼo ʼuhiga mo te maʼuli.
6 ʼE tou loto anai ʼo ʼuhiga mo te ʼu hahaʼi ʼaē ʼe loto fakamalotoloto ki te moʼoni ke nātou maʼu tuʼumaʼu te ʼu nusipepa maʼuhiga ʼaia. Ka ʼe tou palalau anai ki te ʼu tapuakina lahi ʼe tou maʼu mai ʼi te ʼu nusipepa ʼaia, tou faigaʼi ʼo uga te hahaʼi ke nātou lau tatatou ʼu nusipepa. ʼAua naʼa tou lotolotolua ʼo fakahā te apone pea mo te ʼu tapuakina ʼo he meʼa kai fakalaumālie maʼa ʼo tuʼumaʼu.
7 ʼE feala tatatou fakahā tatatou ʼu nusipepa ki te hahaʼi fuli, heʼe tou ʼiloʼi papau tonatou maʼuhiga. ʼE ʼi ai tatatou meʼa lelei; ʼe ko he aga faka kilisitiano tona vaevae. — Taag. 3:27; Hep. 13:16.