Tokoniʼi Te ʼu Fānau Ke Nātou Tauhi Kia Sehova Mo Tonatou Loto
1 Neʼe ʼui e Salomone ko te “ ʼu foha ko te tofiʼa ʼa Sehova”. (Pes. 127:3-5.) ʼE moʼoni, ko nātou ko he tofiʼa maʼuhiga ia. Ko te maʼua ʼo te ʼu mātuʼa ia muʼa ʼo te ʼAtua ko te akoʼi, mo teuteuʼi pea mo fakatotonuʼi ʼo tanatou ʼu fānau. Ko te tahi meʼa ʼe tonu ke nātou fai, ke nātou teuteuʼi tanatou fānau ʼi te minisitelio, mo fakaloto mālohiʼi nātou ke nātou palalau mo tonatou loto kia Sehova pea mo te Puleʼaga. — Ef. 6:4.
2 ʼE kamata koa te ako ʼaia ʼi te taʼu fia? Ko te tali ʼa te Tohi-Tapu ʼe mālama lelei: ʼo kamata mai tona kei meamea (2 Tim. 3:14, 15). Kapau ʼe kamata tanatou ako ʼi tonatou kei meamea, ʼe lahi ʼaupito ai te ʼu fealagia ki te ʼu fānau tanatou tauaka mālohi ʼi te moʼoni pea mo nātou faigaʼi te minisitelio ko tonatou vokasio. Ko te ako talu mai te kei meamea ʼe ko he tahi ʼaia taupau ʼo nātou mai te ʼu faʼahiga manatu pea mo te ʼu aga ʼa te mālama.
3 ʼI muʼa ʼo te hoko mai ʼo te taʼu ʼaē ʼe ʼolo ai ʼo ako, tokolahi te ʼu tamaliki ʼe nātou fakahā tanatou fealagia ʼo nātou ako he ʼu meʼa faigataʼa. Tou fakaʼaoga te fahaʼi ʼaia ke nātou maʼu he ʼu kalitate ke leleiʼia nātou e Sehova (w 88 1/8 p. 15; w 89 1/12 p. 31). Tokolahi te ʼu fānau neʼe tuputupu talu mai tonatou kei meamea ʼo aʼu ki tanatou liliu ko te kau faka mafola mole heʼeki papitema. Ko ʼihi ʼu fānau ʼe nātou foaki tonatou maʼuli kia Sehova pea nātou papitema ka kei nātou tūpulaga. ʼE feala ai ke nātou pionie vaeluaʼi temi pea mo pionie katoa ʼi muʼa ʼo te ʼosi ʼo tanatou ako. Moʼo aʼu ki te ʼu fakatuʼutuʼu ʼaia, ʼe tonu ke akoʼi nātou ke nātou fai palalau mo te hahaʼi ki he ʼu manatu faka tohi-tapu kehekehe.
4 Ko te ʼu hahaʼi kua matutuʼa ʼe nātou tau ʼi te temi nei mo te agatuʼu pea mo te mole fakaʼapaʼapa ʼa te kau tūpulaga ʼe lagi ʼe mole nātou fia palalau anai mo he tūpulaga fai faka mafola ʼe haʼu ʼo ta tonatou matapā. Koteā te meʼa ʼe feala ke palalau ia ki ai moʼo lagaʼi ʼo te faigataʼa ʼaia pea mo taupau ʼo te fia logo ʼo ia ʼaē neʼe ina avahi mai te matapā? Ko he tūpulaga fai faka mafola neʼe māhani tana ʼui age te meʼa ʼaenī ohage la: “Mālo, ko toku higoa ko ... ʼE ʼau ʼaʼahi toku ʼu vāhaʼa fale ʼi te ʼaho nei koteʼuhi ʼe tokolahi ʼe nātou tuʼania te temi ka haʼu. Ia koutou ʼaē kua matumatuʼa, ʼe lahi age takotou māhani ki te maʼuli ia te ʼau. Kae koʼeni he vaega faka tohi-tapu ʼe fakaloto mālohi kia tatou fuli.” ʼI te ʼosi lau ʼo Fakahā 21:3, 4, ʼe feala tana ʼaumai te fai palalau ki te kiʼi pepa lotu ʼaē Une vie paisible dans un monde nouveau.
5 Koʼeni he tahi faʼifaʼitaki: “Mālo, ko toku higoa ko ... ʼE ʼau ʼaʼahi vave pe te ʼu hahaʼi ʼo te kolo koteʼuhi ʼe ʼau ʼiloʼi ʼe tokolahi ia nātou ʼaē kua matumatuʼa ʼe nātou tuʼaniaʼia te ʼu agaaga ʼaē ʼe hage ʼe fai e te kau tūpulaga ʼi te temi nei. ʼI ʼihi temi ʼe mole aga fakaʼapaʼapa te kau tūpulaga, peʼe nātou fakafeagai. Kae ʼe ʼau fia lau atu he vaega faka tohi-tapu ʼe hā mai ai ʼe hoko mai anai he ʼaho ʼe akoʼi ai e te hahaʼi fuli te maʼuli fakatahi ʼi te tokalelei.” ʼOsi ʼaia koutou lau ia Pesalemo 37:11 pea koutou fakamahino tona ʼuhiga. Ka logo anai he ʼu hahaʼi kua matumatuʼa ki he kau tūpulaga ʼe palalau fakamalotoloto feiā, ʼe mole fai he mahalohalo ia ʼe tokolahi anai ia nātou ʼaia ʼe puna’maʼuli.
6 Ko te kau faka mafola tūpulaga ʼe lauʼi afe ʼe hoholo atu pe tanatou kau lelei ki te gāue fai faka mafola pea mo fai ʼo he ʼu tisipulo. ʼE tonu ke fakamālo fakafiafia kia nātou. Ko te kau tūpulaga ʼaē neʼe akoʼi talu mai tonatou kei meamea e te ʼu mātuʼa ʼe aga faka lotu ʼe nātou faiga fakavilivili anai mokā ʼe tou fakaloto mālohiʼi nātou ke nātou kau katoa ki te ʼu faʼahi kehekehe ʼo te minisitelio.
7 Koia, tou tokoniʼi te kau tūpulaga fai faka mafola ʼi totatou kokelekasio ke nātou maʼu te fealagia ʼaē ʼo tauhi kia Sehova mo tonatou mālohi katoa, ʼonatou fakavikiviki kia te ia mo tonatou loto. — Tnk. 12:1.