ʼU Mātuʼa—Koutou Akoʼi Takotou ʼu Tamaliki Ke Nātou Fai Faka Mafola
1 ʼE tapuakina tatatou ʼu kokelekasio heʼe ʼi ai te ʼu tamaliki ʼe holi fakamalotoloto ke nātou tauhi ki te ʼAtua. (Tnk. 12:1) ʼE nātou kau ia nātou ʼaē ʼe fakaafe e Sehova ke nātou fakavikiviki kia te ia. (Pes. 148:12-14) Koia, ko te ako ʼaē ʼe foaki e te ʼu mātuʼa ʼi te ʼaho fuli ki tanatou ʼu tamaliki, ʼe tonu ke kau kiai te akoʼi kia nātou peʼe feafeaʼi tanatou fakahā tanatou tui ki te hahaʼi ʼi te gāue fai faka mafola.—Teu. 6:6, 7.
2 Tou Akoʼi Te ʼu Tamaliki Ke Nātou Tuputupu: ʼE ʼaoga ke akoʼi te ʼu tamaliki ʼi tonatou kei liliki ke nātou kaugā fagona mo tanatou ʼu mātuʼa ʼi te minisitelio. ʼI muʼa ʼo takotou fai te gāue ʼaia, koutou teuteuʼi takotou ʼu tamaliki ke nātou ʼiloʼi te ʼu meʼa ʼaē ka nātou fakahā. Koutou fakatuʼutuʼu fakatomuʼa te ʼu meʼa ʼaē ʼe koutou fakaʼamu ke nātou fai mokā nātou fisifisi te ʼu matapā. Ko nātou ʼaē kei liliki ʼe feala ke nātou foaki ki te hahaʼi te ʼu kiʼi pepa lotu pea mo te ʼu pepa fakaafe, pea mo fakaafe te hahaʼi ki te Fale ʼo te Puleʼaga. Ko te ʼu tūpulaga ʼaē kua popoto ʼi te lautohi, ʼe feala ke nātou lau te ʼu vaega faka Tohi-Tapu ki te hahaʼi. ʼE feala ke nātou fakahā te ʼu nusipepa, ʼo nātou fakaʼaogaʼi he faʼifaʼitaki fakanounou. Kapau kua nātou māhani ʼi te faʼahi ʼaia, pea koutou akoʼi nātou ke nātou fakaʼaogaʼi te Tohi-Tapu ʼi tanatou fai faka mafola. ʼE lahi te ʼu kaugā fai faka mafola tūpulaga kua nātou kamata tuku te ʼu nusipepa ki te hahaʼi pea mo nātou fai tuʼumaʼu tanatou ʼu ʼaʼahi. ʼE lelei age ki he tamasiʼi ke gāue ʼi te fai faka mafola mo he tahi kua lahi, ka mole gāue mo he tahi tūpulaga. Ko ia ʼaē kua lahi ʼe feala ke ina fakamahino age kia ia ʼaē ʼe nā fai palalau ko te tūpulaga ʼe akoako ke poto ʼi te minisitelio.
3 Ko te kiʼi finemui neʼe ina fehuʼi ki te ʼu tagata ʼāfea ke tokoni age ki ai, ke feala hana liliu ko he kaugā fai faka mafola ʼo te Puleʼaga. Logope la ko he kiʼi finemui neʼe kei taʼu nima pea ʼe mole poto ʼi te lautohi, kae neʼe ina fakahā fakalelei te logo ʼo te Puleʼaga ʼi te fai faka mafola ki te hahaʼi. Neʼe ina maʼu loto te ʼu vaega, pea neʼe ina fuli age ke lau ʼe ia ʼaē neʼe fai faka mafola ki ai, pea neʼe ina fakamahino age ki ai.
4 Tahi ʼaē meʼa, ʼe tonu ke akoʼi te ʼu tamaliki ʼaki te faʼifaʼitaki ʼa te ʼu mātuʼa, te maʼuhiga ʼo te fai ʼo he polokalama ʼe lelei ke nātou kau tuʼumaʼu ki te minisitelio. ʼE tonu ke fakatuʼutuʼu e te ʼu mātuʼa he polokalama ke nātou fai faka mafola ʼi te vāhaʼa fuli pea ke nātou mulimuli kiai, ke feala ai te ʼiloʼi e te ʼu tamaliki te ʼu ʼaho ʼaē kua fakatuʼutuʼu ai ki te gāue fai faka mafola.
5 Kapau ʼe akoʼi te ʼu tamaliki ʼi tonatou kei liliki ke nātou manako pea mo nātou leleiʼia te minisitelio, ʼe uga ai anai nātou ke nātou faiga ki he ʼu pilivilesio ʼe lahi age ʼi te temi ka haʼu, ʼo lagi kau kiai te gāue pionie. (1 Ko. 15:58) Ko tatou fuli ʼe tonu ke tou fakaloto mālohiʼi tatatou ʼu fānau ke nātou tuputupu ʼi tonatou ʼuhiga kau fakavikiviki kia Sehova.