Akoʼi Ki Takotou Fānau Ke Natou Fakavikiviki Kiā Sehova
1. ʼE lava fakavikiviki feafeaʼi e te tamaliki liliki ia Sehova?
1 Iā Pesalemo 148:12, 13, ʼe ina fakaloto mālohiʼi ai ia te tamaliki tagata pea mo fafine ke natou “fakavikiviki ki te huafa ʼo Sehova.” ʼE tou maʼu ʼi te Tohi-Tapu ia te ʼu tuʼuga faʼifaʼitaki ʼa te tamaliki liliki neʼe natou fai ia te faʼahi ʼaia. Ohagē lā, “neʼe tauhi ia Samuele kiā Sehova, neʼe ko he tamasiʼi ia.” (1 Sam. 2:18) Neʼe ko “te kiʼi taʼahine veliveli” ʼaē neʼe ina ʼui ki te ʼohoana ʼo Naamane ʼe feala ki te polofetā ʼa Sehova ʼi Iselaele ke ina faitoʼo ia te kilia ʼo Naamane. (2 Hau 5:1-3) ʼI te temi ʼaē neʼe hū ai ia Sesu ki te fale lotu pea mo ina fai ia te ʼu tuʼuga gāue fakaofoofo, neʼe ko te “tamaliki tagata” ʼaē neʼe natou kalaga fēnei: “Haofaki, ʼe matou kole atu, te ʼAlo ʼo Tavite!” (Mat. 21:15) ʼE lava akoʼi feafeaʼi e te ʼu mātuʼa ki tanatou fānau ke natou fakavikiviki kiā Sehova?
2. He koʼē ʼe maʼuhiga ke tuku e te ʼu mātuʼa ia he faʼifaʼitaki lelei ki tanatou fānau?
2 ʼAki Te Faʼifaʼitaki: ʼI muʼa ʼo te akoʼi ʼo te moʼoni ki te loto ʼo tanatou fānau, neʼe tonu ki te ʼu mātuʼa Iselaele ke natou akoʼi muʼa kiā nātou totonu ia te ʼofa ʼaē kiā Sehova pea mo taupau ʼi ʼonatou loto tana ʼu fakatotonu. (Teu. 6:5-9) Kapau ʼe kotou vikiʼi ia te minisitelio pea mo kotou lagolago kiai ʼi te vāhaʼa fuli, ʼe sio anai takotou fānau ko te minisitelio ʼe ko he meʼa maʼuhiga pea mo fakafiafia.
3. Neʼe fua lelei feafeaʼi ki te tuagaʼane ia te faʼifaʼitaki ʼo tana ʼu mātuʼa?
3 ʼE manatuʼi fēnei e te tuagaʼane: “ ʼI taku lahilahi ake, neʼe ko te agamāhani ʼo toku fāmili ʼi te vāhaʼa fuli ko te kau ki te minisitelio. Neʼe au sio ki te fiafia moʼoni ʼo taku ʼu mātuʼa ʼi te fai faka mafola. Neʼe au lahilahi ake ʼo sio ki te minisitelio ko he meʼa ʼe lelei ʼaupitō.” Ko te tuagaʼane ʼaia, ʼi tona taʼu fitu neʼe liliu ai ko he kaugā fagona pea kua taʼu 33 nei tana kau ki te selevisi temi kātoa.
4. ʼE feafeaʼi ia te akoʼi māmālie ʼo te fānau?
4 ʼAki Te Ako ʼe Foaki Māmālie: Kotou ʼolo mo takotou fānau mokā kotou fai faka mafola. Lagi ʼe feala hanatou fisifisi ʼi te ʼu matapā, peʼe natou foaki he kiʼi pepa lotu, peʼe natou lau he vaega faka Tohi-Tapu. ʼE natou fiafia ai anai pea mo tokoni kiā nātou ke natou sisio ki te ʼu fealagia ʼaē ʼe natou maʼu moʼo kau ki te faka mafola ʼo te logo ʼo ʼuhiga mo te Puleʼaga. ʼI tanatou lahilahi ake, pea ʼe toe lahi ake anai mo tanatou kau ʼaē ki te minisitelio. Koia, kotou tokoni kiā nātou ke natou tuputupu māmālie pea mo foaki age he ʼu manatu ʼo ʼuhiga mo he ʼu manatu fakalaumālie ke natou fakahoko.
5. Koteā ʼaē ʼe ʼaoga ki he tamasiʼi ke liliu ai ko he kaugā fagona?
5 Kotou fakahā ki te kau tagata ʼāfea mokā kua kotou fakatokagaʼi kua lava liliu ʼo kaugā fagona ia takotou fānau pea mo kapau kua natou fia kau ki te gāue ʼaia. ʼE natou mahino lelei anai ʼi tanatou liliu ʼo kaugā fagona ki tonatou maʼua takitokotahi ke natou fakavikiviki kiā Sehova. Kotou manatuʼi ʼe mole fakamaʼua ki he fānau ohagē ko he tahi kua papitema ke mahino lahi ki he ʼu akonaki faka lotu ʼi muʼa ʼo hana fai faka mafola. Kua mahino koa takotou fānau ki te ʼu akonaki tāfito ʼo te Tohi-Tapu? ʼE ina fakaʼaogaʼi koa ʼi tona maʼuli ia te ʼu lēkula faka Tohi-Tapu ʼo ʼuhiga mo te ʼu aga ʼaē ʼe tonu ke fai? ʼE fia kau koa ki te minisitelio pea mo ina loto ke ʼiloʼi ia ia ko he Fakamoʼoni ʼa Sehova? Kapau koia, ʼe feala ki te kau tagata ʼāfea ke natou fakafuafua peʼe kua tuha mo ia ke liliu ko he kaugā fagona.—Vakaʼi te tohi Organisés pour faire la volonté de Jéhovah, p. 79 ki te 82.
6. He koʼē ʼe tāu mo te ʼu mātuʼa ke natou akoʼi ia tanatou fānau?
6 ʼE ko he toe gāue ki te ʼu mātuʼa ia te akoʼi ki te loto ʼo tanatou fānau ke natou fakavikiviki kiā Sehova. Kae ko he toe fiafia ʼe maʼu e te ʼu mātuʼa ʼi hanatou sisio ki tanatou fānau ʼe tuputupu ʼi te faʼahi fakalaumālie. Ko te faʼahi ʼaē ʼe maʼuhiga tāfito, ʼe fiafia ia Sehova mokā palalau ia te fānau ʼo ʼuhiga mo tana ʼu gāue taulekaleka.