Ko Te Tule Leʼo Pea Mo Te Réveillez-vous! — Ko Te ʼu Nusipepa ʼe Feʼauga Lelei Ki Te Moʼoni

“Neʼe ke totogi ʼau, Ê Sehova, ʼAtua ʼo te moʼoni.”—Pesalemo 31:5.

1, 2. (a) Koteā te meʼa neʼe malave ki te tuagaʼane ʼi tana lau ʼaē ʼo Te Tule Leʼo? (b) Koteā te ʼu fehuʼi ʼe malaga ʼo ʼuhiga mo ʼatatou ʼu nusipepa?

NEʼE tohi e te tuagaʼane Kilisitiano fēnei, “Mālo siʼi ʼofa ʼo ʼuhiga mo te ʼu palalau taulekaleka ʼaē ʼi te alatike ʼo Te Tule Leʼo ‘ ʼE Feala Ke Koutou Maʼu He Fakafimālie ʼi Te ʼu Temi Faigataʼa.’a Neʼe lahi te ʼu manatu neʼe koutou talanoa kiai neʼe tautonu mo te ʼu meʼa ʼaē neʼe hoko kia te ʼau; neʼe hage pe ia neʼe tohi kia ʼau te alatike. ʼI taku ʼuluaki lau te nusipepa, neʼe hali toku ʼu loʼimata. ʼE ko he meʼa lelei foki hakita ʼiloʼi ʼe ʼi ai he tahi ʼe ina ʼiloʼi te meʼa ʼaē ʼi tokita loto! ʼE ʼau fakamālo lahi ʼi taku kau ki te kau Fakamoʼoni ʼa Sehova. Kofea he tahi age faʼahi ʼe feala ke tou maʼu ai te ʼu fakapapau ʼo te maʼuli heʼegata ʼi te Palatiso ʼo he temi ka haʼu kua ōvi mai pea mo te temi ʼaenī, ʼe fakafimālie ki ʼo totatou ʼu nefesi! Mālo. Tuʼa miliona mālo.”

² ʼE mole heʼeki hoko koa he ʼaluʼaga feiā kia koutou? Neʼe mole heʼeki ʼi ai koa he talanoa ʼi Te Tule Leʼo peʼe ko te nusipepa Réveillez-vous! neʼe hage ia neʼe tohi pe maʼa koutou? Koteā te ʼui ki te malave ʼaē ʼo ʼatatou ʼu nusipepa ki te loto ʼo te hahaʼi? Koteā he tokoni ʼe feala ke tou fai ke nātou maʼu ai te maʼuli ʼaē ʼe talanoa kiai te ʼu nusipepa ʼaia?—1 Timoteo 4:16.

Ko Te ʼu Nusipepa ʼe Nātou Lagolago Te Moʼoni

3. Koteā te tupuʼaga tāfito ʼo te malave ʼo Te Tule Leʼo pea mo te nusipepa Réveillez-vous! ki te ʼu loto ʼo te hahaʼi?

³ Ko Sehova “ko te ʼAtua ʼo te moʼoni.” (Pesalemo 31:5) Ko tana Folafola, te Tohi-Tapu, ko te tohi ʼo te moʼoni. (Soane 17:17) Ko te hahaʼi ʼaē ʼe nātou kumi moʼoni te ʼAtua ʼe nātou tali te moʼoni. (Vakaʼi ia Soane 4:23, 24.) ʼAki te agatonu pea mo te moʼoni ʼo te ʼu nusipepa ʼaia e lua, ko te tahi ʼaenā tupuʼaga ʼo te malave ʼo Te Tule Leʼo pea mo te nusipepa Réveillez-vous! ki te loto ʼo te hahaʼi ʼe lauʼi miliona hahaʼi ʼaē ʼe nātou lau. ʼIo, neʼe kamata tā Te Tule Leʼo moʼo fakahā ia te taupau maʼu ʼaē ʼo te ʼu moʼoni ʼo te Tohi-Tapu.

4, 5. (a) Koteā te tupuʼaga ʼaē neʼe tā ai e C. T. Russell Te Tule Leʼo? (b) Neʼe feafeaʼi te fakaʼaogaʼi e te “kaugana agatonu mo poto” ia Te Tule Leʼo?

⁴ ʼI te taʼu 1876, neʼe kaugā gāue ia Charles T. Russell pea mo Nelson H. Barbour, ʼi Rochester, ʼi New York. Neʼe foaki e Russell te falā moʼo toe fakahaʼele ia te tā ʼo te nusipepa faka lotu ʼaē ʼa Barbour ko te Messager du matin ʼi te māhina fuli, ko Barbour ʼaē neʼe pule kae ko Russell ia ʼaē neʼe tokoni kiai. Kae hili kiai te taʼu e tahi vaelua, ʼi te nusipepa Messager ʼo te māhina ʼo ʼAukusito 1878, neʼe tohi e Barbour te alatike ʼe fakafisi ia ki te sakilifisio faitotogi ʼaē ʼo te mate ʼa Kilisito. Ko Russell, ʼaē neʼe tūpulaga age ia Barbour ia taʼu lagi e 30, neʼe ina tali ʼi te alatike ʼaē neʼe hoa mai ki te alatike ʼaia, ʼo ina fakahā ai tana lagolago ʼaē ki te totogi, ʼo ina tohi fēnei “ko te akonaki maʼuhiga ʼaia ʼo te Folafola ʼo te ʼAtua.” (Mateo 20:28) Logope la tana faiga ʼaē ke ina fakaliliu te fakakaukau ʼa Barbour ʼaki te Tohi-Tapu, neʼe fakatuʼutuʼu leva ia Russell ke mavae ʼosi ia ʼi te tā ʼaē ʼo te nusipepa Messager. ʼI te numelo ʼo Sūnio 1879, neʼe mole toe tuʼu ai te higoa ʼo Russell he neʼe mole kei kaugā gāue ia mo Barbour. Hili kiai te māhina, ʼi te taʼu 27 ʼo Russell neʼe ina tā te nusipepa Le Phare de la Tour de Sion, Messager de la Présence de Christ (ʼi te temi nei ko Te Tule Leʼo ʼe ina kalagaʼi te Puleʼaga ʼo Sehova), ʼaē talu mai tona kamata tā neʼe lagolago aipe ia ki te moʼoni ʼo te Tohi-Tapu, ohage pe ko tana lagolago ʼaē ki te totogi.

⁵ ʼI te lolotoga ʼo te ʼu taʼu e 114 kua hili, ko te fakatuʼutuʼu ʼa Te Tule Leʼo, ohage ko he tagata fai lao faiva, ke liliu ia ko te puipuiʼaga ʼo te ʼu moʼoni pea mo te ʼu akonaki ʼo te Tohi-Tapu. ʼAki te fakatuʼutuʼu ʼaia neʼe ina maʼu ai te falala ʼa te toko miliona hahaʼi ʼe nātou leleiʼia Te Tule Leʼo. ʼE kei lagolago mālohi nei ki te totogi. (Vakaʼi te numelo ʼo te ʼaho 15 ʼo Fepualio 1991, fakafalani.) Pea ʼe kei fakaʼaoga ia ko te meʼa gāue tāfito ʼa “te kaugana agatonu mo poto” pea mo te Kolesi Pule moʼo fakahā ʼo te Puleʼaga ʼo Sehova ʼaē ka fakatuʼu pea ka ina tufa anai te meʼa kai fakalaumālie “ ʼi tona temi totonu.”—Mateo 24:14, 45.

6, 7. Neʼe koteā te fakatuʼutuʼu ʼo te nusipepa ʼaē ko te L’Âge dʼOr, pea koteā ʼaē ʼe hā ʼaki mai ʼi te tali ʼaē e te hahaʼi fakakaukau ʼo tana logo?

⁶ Pea e feafeaʼi ki te nusipepa Réveillez-vous!? Talu mai te kamata tā ʼaē ʼo te nusipepa Réveillez-vous! neʼe toe kau mo ia ki te lagolago ʼaē ʼo te moʼoni. Neʼe ʼuluaki higoa ia ko te L’Âge dʼOr, neʼe tā te nusipepa ʼaia ke tufa ki te kaugamālie. ʼO ʼuhiga mo tona fakatuʼutuʼu, ko te ʼuluaki numelo ʼaē neʼe tā ʼi te ʼaho 1 ʼo ʼOketopeli 1919, neʼe ina ʼui fēnei: “ ʼAki te mālama ʼo te poto Fakaʼatua ʼe fakatuʼutuʼu te nusipepa ʼaia ke ina fakamatalatala te ʼuhiga totonu ʼo te ʼu meʼa ʼaē ʼe hoko ʼi totatou temi pea ʼaki he ʼu fakamoʼoni ʼe mole maʼu he ʼu fakafihi kiai pea mo fakatupu fia logo kiai, ʼe fakahā e te nusipepa ki te hahaʼi fakakaukau, ko te malamanei ka ina vave maʼu anai te ʼu tapuakina lahi.” Neʼe tali e te hahaʼi fakakaukau te logo ʼo te L’Âge dʼOr. ʼI te ʼu temi fualoa, neʼe lahi age tona tufa ʼi Te Tule Leʼo.b

⁷ Kae ko te pāui ʼa Te Tule Leʼo pea mo te Réveillez-vous! ʼe mole gata ʼaki pe tanā talanoa ʼaē ki te ʼu moʼoni ʼo te ʼu akonaki pea mo fakamahinohino te ʼuhiga faka polofeta ʼo te ʼu ʼaluʼaga ʼo te malamanei. Tāfito la ʼi te ʼu taʼu e hogofulu tupu ʼaenī kua hili, ko ʼatatou nusipepa neʼe malave ki te loto ʼo te hahaʼi ʼuhi ko te tahi tupuʼaga.

Ko Te ʼu Alatike ʼe Tautonu Pea ʼe Malave Ki Te Maʼuli ʼo Te Hahaʼi

8. ʼO mulimuli pe ki te meʼa ʼaē neʼe hoko, koteā te tohi ʼaē neʼe fai e Suta, ʼo ina fakaloto mālohiʼi ai ia nātou ʼaia ʼo ʼuhiga mo te ʼu fakahala feafeaʼi ʼi te kokelekasio?

⁸ Hili ia taʼu e 30 ki te mate pea mo te toe fakatuʼuake ʼo Sesu Kilisito, ko te tagata faitohi ʼo te Tohi-Tapu ko Suta neʼe felāveʼi mo te fihifihia faigataʼa. Ko te ʼu tagata aga heʼeʼaoga pea mo aga fakamanu neʼe nātou fakakaugā ki te kau Kilisitiano. Neʼe fakatuʼutuʼu ia Suta ke faitohi ki tona ʼu kaugā fagona Kilisitiano ʼo ʼuhiga mo te akonaki faka Tohi-Tapu—ko te hāofaki ʼaē ʼe maʼu e te kau Kilisitiano fakanofo fuli. Kae ʼaki te laumālie maʼoniʼoni neʼe maʼuhiga age ia kia ia ke ina fakaloto mālohiʼi ia nātou ʼaē ʼe faitohi kiai, ke nātou tekeʼi te ʼu fakahala fakatupu tuʼutāmaki ʼaē ʼi te kokelekasio. (Suta 3, 4, 19-23) ʼO mulimuli pe ki te meʼa ʼaē neʼe lolotoga hoko neʼe foaki e Suta te tokoni ʼaē ʼe ʼaoga ki te fihifihia ʼo tona ʼu tēhina Kilisitino.

9. Koteā te meʼa ʼe tonu ke tou fai moʼo fakahā te ʼu alatike ʼaē ʼe feʼauga lelei ʼi ʼatatou ʼu nusipepa?

⁹ ʼO toe feiā pe ko te teuteuʼi ʼo he ʼu alatike ʼe tautonu ʼi ʼatatou ʼu nusipepa ʼe ko he toe meʼa faigataʼa. Ko te ʼu temi ʼe fetogi, ʼo toe feiā pe mo te hahaʼi—ko te ʼu meʼa ʼaē ʼe ʼaoga kia nātou pea mo te ʼu meʼa ʼaē ʼe nātou holi kiai ʼe mole kei tatau ia mo te ʼu meʼa ʼaē neʼe nātou holi kiai kua hili nei kiai taʼu e hogofulu. Mole heʼeki faʼa fualoa, neʼe ʼui e te taupau feʼaluʼaki ʼo fēnei: “ ʼI taku liliu ʼaē ko te Fakamoʼoni ʼi te ʼu taʼu 1950, ko tamatou ako ʼaē ʼo te Tohi-Tapu mo te hahaʼi neʼe talanoa pe ki te ʼu akonaki—neʼe mātou akoʼi nātou ke nātou mahino ki te Tahitolu, te ʼifeli, te nefesi, pea mo ʼihi ʼatu ʼu meʼa. Kae ʼi te temi nei, ʼaki te lahi ʼaupito ʼaē ʼo te ʼu fihifihia pea mo te ʼu faigataʼaʼia ʼaē ʼe tau mo te hahaʼi ʼi tonatou maʼuli, ʼe ʼaoga age ia ke tou akoʼi nātou peʼe feafeaʼi te maʼuli.” Koteā tona tupuʼaga?

10. He koʼe koa ʼe mole tonu ke tou punamaʼuli ʼi te hoko ʼaē ʼo te ʼāʼāsili ʼo te maveuveu ʼo te ʼu meʼa ʼa te tagata talu te taʼu 1914?

¹⁰ ʼO ʼuhiga mo “te ʼu ʼaho fakamuli,” neʼe fakakikite e te Tohi-Tapu, ʼo fēnei: “Ko te kau tagata agakovi pea mo te kau malualoi ʼe nātou ʼāʼāsili tuputupu pe anai ki te kovi.” (2 Timoteo 3:1, 13) Koia ʼaē, ʼe mole tonu ke tou punamaʼuli ai ki te ʼāʼāsili ʼaē ʼo te maveuveu ʼo te ʼu meʼa ʼa te tagata talu te kamata ʼo te temi fakaʼosi ʼaē mai te taʼu 1914. ʼI te kua nounou ʼo te temi ʼo Satana, ʼe ina tuku fuli tona ʼita ki te malamanei. (Fakahā 12:9, 12) Ko tona fua, ko te ʼu aga fakapotopoto pea mo te ʼu koloā faka famili kua kehekehe age ʼosi ia mo te ʼu meʼa ʼaē ʼo te ʼu temi kua hili kiai taʼu e 30 peʼe 40. Tokolahi te hahaʼi ʼe mole kei nātou tokakaga ki te ʼu meʼa faka lotu ohage ko tona fai ʼaē ʼi te ʼu taʼu e hogofulu tupu ʼaē kua hili. ʼI te ʼāʼāsili ʼaē ʼo te fakapō, ko te hahaʼi kua nātou fai te ʼu puleʼaki neʼe mole heʼeki feiā ʼi te ʼu taʼu ʼaenī e 20 peʼe 30 kua hili.—Mateo 24:12.

11. (a) Koteā te ʼu faʼahiga meʼa ʼaē ʼe tuʼaniaʼi e te hahaʼi, pea neʼe koteā te tali ʼa te kalasi ʼa te kaugana agatonu mo poto ʼo ʼuhiga mo te ʼu meʼa ʼaē ʼe ʼaoga? (b) Koutou fakahā he alatike ʼi Te Tule Leʼo peʼe ʼi te nusipepa Réveillez-vous! neʼe malave ki tokotou maʼuli.

¹¹ Koia ʼaē ʼe mole fakapuna’maʼuli ai, ko te ʼu meʼa ʼaē ʼo ʼuhiga mo te loto, pea faka sosiale, pea mo faka famili, ʼe ko he ʼu faʼahi ʼe hoha kiai te hahaʼi. ʼAki te lototoʼa, ko te kalasi ʼo te kaugana agatonu mo poto neʼe ina tā te ʼu alatike ʼaoga ʼi Te Tule Leʼo pea mo te nusipepa Réveillez-vous! ʼo ʼuhiga mo te ʼu meʼa ʼe ʼaoga moʼoni ki te hahaʼi pea neʼe malave tāfito ki tonatou ʼu maʼuli. Fakatokagaʼi te ʼu faʼahiga faʼifaʼitaki ʼaenī.

12. (a) He koʼe koa ʼi Te Tule Leʼo ʼo te taʼu 1980 neʼe tā te ʼu alatike ʼo ʼuhiga mo te tāmai peʼe ko te faʼe ʼe maʼuli tokotahi? (b) Neʼe koteā te fakamālo neʼe fai e te tuagaʼane ʼo ʼuhiga mo te ʼu alatike ʼaē ʼe talanoa ki te ʼu famili ʼe maʼuli tokotahi ai te tāmai peʼe ko te faʼe?

¹² Te ʼu meʼa faka famili. ʼI te tala ʼaē e te ʼu logo ʼo te malamanei te lahi ʼaupito ʼaē ʼo te ʼu loto fale ʼe hala tāmai peʼe ko te faʼe, ko te ʼu alatike ʼe fēnei tona ʼu kupu “E feafeaʼi te taupau tokotahi ʼo tana ʼu fānau?” neʼe tā ʼi te numelo ʼo te ʼaho 15 ʼo Tesepeli 1980 ʼi Te Tule Leʼo (fakafalani). Neʼe ko te ʼu fakatuʼutuʼu e lua ʼo te ʼu alatike: (1) ko te tokoni ki he tāmai peʼe ko he faʼe ʼe maʼuli tokotahi ʼi te famili ʼo ʼuhiga mo te ʼu fihifihia ʼe tau mo ia (2) ko te tokoni ki niʼihi ke nātou mahino lelei ʼo feala kia nātou ke nātou fakahā tonatou “ ʼofa kāiga” pea mo tanatou “tokakaga” fakalelei ki te ʼu tāmai peʼe ko te ʼu faʼe ʼaē e tokotahi ʼi te ʼu famili. (1 Petelo 3:8; Sake 1:27) Tokolahi te kau lautohi neʼe nātou faitohi moʼo fakahā tanatou loto fakafetaʼi ʼaē ki te ʼu alatike. Neʼe tohi e te faʼe ʼe mole ʼi ai hona ʼohoana, ʼo fēnei: “Neʼe ʼau tagi ʼi taku sio ʼaē ki te alatike, pea ʼi taku lolotoga lau ʼaē ʼo te alatike, neʼe ʼau fakamālo kia Sehova ʼi tana tā te alatike ʼi tona temi tonu.”

13. Koteā te talanoa loloto ʼo ʼuhiga mo te lotovaivai ʼo te loto neʼe tā ʼi te nusipepa Réveillez-vous! 1981, pea koteā te palalau neʼe fai e te tahi ʼe ina lau te nusipepa ʼaia?

¹³ Te ʼu meʼa ʼaē ʼi te loto. Ko te alatike ʼo ʼuhiga mo te lotovaivai neʼe talanoa ʼi Te Tule Leʼo pea mo te nusipepa Réveillez-vous! talu te ʼu taʼu 1960. (1 Tesalonika 5:14) Kae ko te manatu foʼou pea mo ʼaoga neʼe talanoa kiai te alatike ʼe fēnei tona kupu “Ko takotou ʼu meʼa moʼo tauʼi ʼo te lotovaivai!” ʼi te nusipepa Réveillez-vous! ʼo te ʼaho 8 ʼo Tesepeli 1981. Ko te ʼu tohi fakamālo mai te ʼu potu fuli ʼo te kele neʼe maʼu e te Sosiete Watch Tower. Neʼe tohi e te tuagaʼane, ʼo fēnei: “ ʼE feafeaʼi koa haku fakamatalatala te ʼu manatu ʼaē ʼi toku loto? Ko toku taʼu 24, pea ʼi te ʼu taʼu e hogofulu ʼaenī kua hili neʼe ʼau tāu mo te ʼu temi lotovaivai. Kae ʼi te temi ʼaenī kua ʼau ōvi ai kia Sehova, ʼe ʼau fakamālo ʼi tana foaki mai te ʼu alatike ʼofa ʼe talanoa ʼo ʼuhiga mo te ʼu meʼa ʼe ʼaoga ki te hahaʼi lotovaivai, pea ko he faʼahi ia neʼe ʼau fia fakahā atu kia koutou.”

14, 15. (a) Neʼe talanoa feafeaʼi tatatou ʼu nusipepa ʼo ʼuhiga mo te fakaʼalikiʼi ʼo te tamaliki? (b) Koteā te ʼu alatike ʼaē neʼe malave ki te tagata heka hōsi ʼi Ositalalia?

¹⁴ Te ʼu meʼa faka sosiale. Neʼe fakakikite e te Tohi-Tapu ʼi “te ʼu ʼaho fakamuli” ko te hahaʼi “ ʼe kaumeʼa pe anai mo nātou totonu, . . . heʼeʼofa, . . . heʼe fakatatāʼofi, fekai, mole manako ki te meʼa ʼaē ʼe lelei.” (2 Timoteo 3:1-3) Koia ʼaē, ʼe mole tonu ai ke tou punamaʼuli, ko te fakaʼalikiʼi ʼo he tamasiʼi ʼe fai ʼi te potu fuli pe ia ʼaho nei. Ko te faʼahi ʼaia neʼe talanoa fakahagatonu kiai Te Tule Leʼo ʼo te ʼaho 1 ʼo Sanualio 1984 (fakafalani) ʼi te alatike “Ko te tokoni kia nātou ʼaē neʼe tau mo te fakaʼalikiʼi e honatou kāiga totonu”. Taʼu e valu ki muli age, ʼi te nusipepa Réveillez-vous! ʼo te ʼaho 8 ʼo ʼOketopeli 1991, ko te alatike “Ko te ʼu tamaliki: neʼe fakaʼalikiʼi ʼi te ʼu felāveʼi fakasino” neʼe talanoa fakahagatonu ki te faʼahi ʼaia ke ina tuku ai he mālama pea mo he falala ki te kau vikitima, pea neʼe ina toe fakamālamaʼi niʼihi ʼi te faʼahi fakalaumālie pea mo fakaʼatamai ke feala hanatou foaki he tokoni. Ko te ʼu alatike ʼaia neʼe lahi ʼaupito tona ʼu tali ʼi te hisitolia ʼo tamatou sulunale mai te kau lautohi. Neʼe tohi e te tahi neʼe ina lau, ʼo fēnei: “Ko te meʼa neʼe ina fakamālōlōʼi ʼaupito ʼau, ko te ʼu manatu fakaloto mālohi pea mo te ʼu vaega ʼo te Tohi-Tapu ʼaē ʼo te ʼu alatike ʼaia. Ko te ʼiloʼi ʼaē ko Sehova ʼe mole ina tukugakoviʼi ʼau ʼe ko he meʼa fakaloto mālohi ia. Ko te ʼiloʼi ʼaē neʼe mole ʼau tokotahi neʼe ko he meʼa fakafimālie ʼaia.”

¹⁵ Ko te tagata heka hōsi ʼi Melbourne, ʼi Ositalalia, neʼe telefoni mai mamaʼo ki te filiale ʼo te Watch Tower ʼi Sydney, moʼo fakahā tana fehiʼa ʼaupito ʼaē ki te gaohi koviʼi ʼo te ʼu hōsi. Neʼe ina ʼui neʼe ina lau pe te alatike ʼo te nusipepa Réveillez-vous! ʼo te ʼaho 8 ʼo Malesio 1993, ʼo ʼuhiga mo te “Fakaʼalikiʼi—Ko Te Tuʼutāmaki ʼo te Fafine” pea neʼe punamaʼuli ʼosi ia ʼi tana sio ʼaē ʼe ʼi ai te ʼu faʼahiga nusipepa feiā ʼe tā. Neʼe ina fai tana ʼu fehuʼi ia minuta e 30 pea neʼe fiafia ʼi tana fagono ki te ʼu tali ʼaē neʼe foaki age.

16. E feafeaʼi hakotou fakahā takotou leleiʼia tamatou ʼu nusipepa?

¹⁶ E feafeaʼi kia koutou? Neʼe malave koa ki tokotou maʼuli he alatike neʼe tā ʼi Te Tule Leʼo peʼe ko te nusipepa Réveillez-vous!? Kapau ʼe koutou ʼio, ʼe mahino ia ʼe koutou fakafetaʼi lahi ʼo ʼuhiga mo tamatou ʼu nusipepa. E feafeaʼi koa hakotou fakahā ʼe koutou loto fakafetaʼi? Mokā ʼe koutou lau te ʼu numelo fuli. ʼE feala ke koutou vaevae te ʼu sulunale maʼuhiga ʼaia ʼaki hakotou kau ki tona tufa. E feafeaʼi te fakahoko ʼo te faʼahi ʼaia?

Vaevae Te ʼu Nusipepa ʼAia Mo Niʼihi!

17. Koteā te meʼa ʼe feala ke fai e te ʼu kokelekasio moʼo fakatuputupu ʼo te tufa ʼo te ʼu nusipepa?

¹⁷ ʼUluaki, ʼe ʼi ai te meʼa ʼe feala ke fai e te ʼu kokelekasio fuli. Neʼe ʼui e te alatike ʼo te Informateur (ʼi te temi nei Te Minisitelio ʼo te Puleʼaga) ʼo te māhina ʼo ʼOketopeli 1952: “Ko te fakatuʼutuʼu lelei moʼo tufa ʼo te ʼu nusipepa, ko tona fai ʼaē ʼi te ʼu ʼapi pea mo te ʼu koloā. Pea ʼe hinoʼi e te Sosiete ko te ʼu ʼaluʼaga ʼaē ʼe tufa ai te ʼu nusipepa ʼe ko he koga tuʼumaʼu ʼo te ʼaho Tufa ʼo te ʼu nusipepa.” Ko te tokoni ʼaia kei ʼaoga pe ia ʼaho nei. ʼE feala ke fakatuʼutuʼu te ʼu kokelekasio ki he ʼaho Tufa Nusipepa, ko te ʼaho ʼaia ʼe fakatuʼu tāfito moʼo fakahā ʼo te ʼu nusipepa. E lahi te ʼu kokelekasio, ko te ʼu Moeaki ʼe faka ʼuhiga anai ia ko he temi lelei. Ei, ke fakatuʼu e te ʼu kokelekasio fuli he ʼaho makehe peʼe ko he ʼu afiafi moʼo fakahā ʼo te ʼu nusipepa—ʼi te ʼu ʼapi, ʼi te ʼu koloā, ʼi te ʼu ala gāue, pea mo nātou ʼaē ʼe tuku kiai te ʼu nusipepa. Koteā te tahi age meʼa ʼe feala ke koutou fai, kau faka mafola ʼo te Puleʼaga moʼo tokoni ki te tuputupu ʼo te tufa ʼo te ʼu nusipepa?

18, 19. (a) Koteā ʼaē ka tokoni ai kia koutou ke koutou tufa te ʼu nusipepa ʼaē ko Te Tule Leʼo pea mo te Réveillez-vous! mokā ʼe koutou mahino lelei kiai? (b) Koteā ʼaē ʼe tonu ai ke koutou fai he ʼu palalau nounou pea mo matatonu mokā ʼe koutou tufa te ʼu nusipepa? (c) Koteā ʼaē ʼe ʼiloga ai te maʼuhiga ʼo te maʼu ʼo te ʼu nusipepa ʼi te ʼu ʼapi ʼo te hahaʼi?

¹⁸ Ko te ʼuluaki meʼa lelei ko te mahino lelei ki “Te Tule Leʼo” pea mo te nusipepa “Réveillez-vous!” Koutou lau fakatomuʼa te ʼu nusipepa. Kapau neʼe koutou lau te ʼu alatike fuli, koutou fakakaukau fēnei, ‘Ko ai koa anai ʼe ʼaoga kiai te alatike ʼaenī?’ Koutou fakakaukauʼi he ʼu faʼahiga palalau ʼe feala anai ke koutou fai moʼo uga tana fia toʼo ʼo te alatike. ʼO mole gata ʼaki pe takotou lagolago ki te ʼaho Tufa Nusipepa, he koʼe koa ʼe mole koutou ʼave haʼele ia koutou he ʼu nusipepa ke feala hakotou tuku ki niʼihi ʼi te ʼu temi faigamālie fuli—mokā koutou folau peʼe fai fakatau, peʼe koutou fai palalau mo ʼokoutou ʼu vāhaʼa fale, kaugā ako, peʼe ko te kau faiako?

¹⁹ Ko te lua tokoni, ke koutou fai he palalau ʼe faigafua hakita mahino kiai. Neʼe ʼui ʼi Te Tule Leʼo ʼo te ʼaho 15 ʼo Maio 1957 (fakafalani), ʼo fēnei: “Ko te palalau fakanounou pea mo matatonu ʼe lelei mokā tou tufa te ʼu nusipepa. Ko te fakatuʼutuʼu ke tuku ni ʼu nusipepa e lahi. Ko te ʼu nusipepa ʼe nātou ‘palalau’ anai.” Ko ʼihi kau faka mafola neʼe nātou maʼu te ʼu fua lelei ʼi tanatou puke he manatu mai te alatike, pea mo nātou talanoa fakanounou pe kiai, pea fakahā age te ʼu nusipepa. ʼI tanatou kua tuku ki he tahi, ʼe feala pe ke “palalau” te ʼu nusipepa ʼaia ki niʼihi ʼi te loto fale. Ko te taʼahine kei finemui ʼe ako ʼi te univelesitē ʼi Ilelani neʼe ina lau te numelo ʼo Te Tule Leʼo ʼo te ʼaho 1 ʼo Sepetepeli 1991 (fakafalani), ko he nusipepa neʼe toʼo e tana tāmai ʼi te tagata Fakamoʼoni. Ko te ʼu alatike ʼo ʼuhiga mo te felogoi pea mo ʼihi ʼu alatike neʼe nātou fakatupu tana fia ʼiloʼi. ʼI tana lau ʼaia ʼo te nusipepa, neʼe telefoni ia ki te kau Fakamoʼoni, ʼo mulimuli pe ki te numelo telefoni ʼaē ʼe tuʼu ʼi te kaupepa telefoni. Mole tuai kiai pea neʼe kamata leva tana ako ʼo te Tohi-Tapu, pea neʼe papitema ʼi te Fakatahi Faka Tisitilike “Akonaki Fakaʼatua” neʼe fai ʼi te māhina ʼo Sūlio 1993. ʼIo, tou faiga ke tou tuku te ʼu nusipepa ʼi te ʼu ʼapi, koga meʼa ʼe feala ke nātou “palalau” ai ki te hahaʼi! Ko te taupau feʼaluʼaki neʼe ina tuku te tahi tokoni fakanounou fēnei: “Toʼo mai ki tuʼa takotou ʼu nusipepa mai ʼakotou ʼu kato.” Pea kapau ko te meʼa ʼaē ʼe koutou talanoa kiai ʼe mole fia logo ia kiai, e lagi ko te paki ʼo te takafi ʼe ina faka fealagia anai ke koutou tuku te nusipepa.

20, 21. (a) E feafeaʼi hakotou fakahā te ʼu nusipepa ʼaē ʼe feʼauga ki te hahaʼi mokā koutou tufa? (b) Koteā te meʼa ʼe feala ke koutou fai ke lahi ai takotou tufa ʼo te ʼu nusipepa ʼi te māhina fuli?

²⁰ Ko te tolu tokoni, ko te fakahā ʼo te ʼu alatike ʼaē ʼe feʼauga ki te hahaʼi. (Vakaʼi ia 1 Kolonito 9:19-23.) Koutou teuteuʼi he ʼu kiʼi palalau nounou. ʼE ʼi ai koa he alatike ʼe koutou fakafuafua ʼe fia logo anai kiai he tagata, pea mo he tahi ʼe fia logo anai kiai he fafine. ʼO ʼuhiga mo te kau tūpulaga, ʼe feala ke koutou fakahā te alatike “Ko te ʼu fehuʼi ʼa te kau tūpulaga . . .” ʼI te temi ʼaia ʼe koutou popoto ai ʼi takotou fai te tufa nusipepa. ʼO mole gata ʼaki pe te ʼaho Tufa Nusipepa, ʼe feala ke koutou maʼu he ʼu faigamālie ʼi te ʼu afiafi moʼo tufa te ʼu nusipepa ʼi te ʼu ʼapi.

²¹ Ko te fā tokoni, ke fai he fakatuʼutuʼu takitokotahi. Ko te alatike “ko te ʼu nusipepa ʼe nātou taki ki te ala ʼo te maʼuli,” neʼe tā ʼi Te Minisitelio ʼo te Puleʼaga ʼo te māhina ʼo Maio 1984, neʼe ʼui fēnei: “Lagi ʼe fakatuʼutuʼu anai he tahi ʼe faka mafola ke ina tuku he ʼu nusipepa e hogofulu ʼi te māhina, peʼe lagi ʼo mulimuli pe ki te ʼu faigamālie; ʼe feala ke fakatuʼutuʼu te kau pionie ke nātou tuku he ʼu nusipepa e 90 ʼi te māhina. ʼIo, ko ʼihi kau faka mafola ʼe fua lelei tanatou tufa, ʼe nātou fakatuʼutuʼu ke nātou fakatuputupu anai tanatou tufa ʼo te ʼu nusipepa. Ko ʼihi kau faka mafola ʼuhi heʼe nātou mahahaki, peʼe ko te telituale ʼaē ʼe nātou faka mafola ʼe mole faʼa lelei, peʼe ko ʼihi age ʼu ʼaluʼaga, ʼe nātou fakatuʼutuʼu pe ke nātou tuku he ʼu nusipepa fakafeauga. Kae ko te gāue ʼa te ʼu tēhina ʼaia ʼe toe maʼuhiga pe kia Sehova. (Mat. 13:23; Luka 21:3, 4) Ko te meʼa ʼaē ʼe maʼuhiga ke tou fai hatatou ʼu fakatuʼutuʼu takitokotahi.”

22. E feafeaʼi koa hakita fakahā tokita loto fakafetaʼi ʼaē kia Sehova ʼaki ʼatatou ʼu nusipepa ʼaē ʼe feʼauga lelei ki te moʼoni?

²² ʼE tou fakafetaʼi ʼi te haga ʼa Sehova, te “ ʼAtua ʼo te moʼoni,” ʼo fakaʼaogaʼi te kaugana agatonu mo poto pea mo tona Kolesi Pule ke nā tuku mai kia tatou te ʼu nusipepa ʼaoga ʼaia! (Pesalemo 31:5) ʼO mulimuli pe ki te finegalo ʼo Sehova, ko te ʼu nusipepa ʼaia ʼe tokoni aipe ki te hahaʼi ʼo ʼuhiga mo te ʼu meʼa ʼaē ʼe ʼaoga kia nātou. ʼE hoholo anai pe tanatou lagolago ʼaē ki te ʼu lekula tāfito ʼa Sehova ʼo ʼuhiga mo te aga ʼaē ʼe tonu ke fai. ʼE hoholo anai tanatou fakahā te akonaki totonu. Pea ʼe nātou haga valoki aipe ke tokagaʼi te fakahoko ʼo te lea faka polofeta ʼaē ʼe ina fakaʼiloga totatou temi ohage ko te temi ʼaē ka pule ai te Puleʼaga ʼo te ʼAtua pea ko te finegalo ʼo te ʼAtua ʼe hoko anai ʼe mole ʼi ai hona fakatatau ʼaki te tuputupu ʼo te kau atolasio moʼoni ʼa Sehova. (Mateo 6:10; Fakahā 11:15) ʼE ko he koloā ia ʼe mole he totogi ʼe tāu kiai tatatou maʼu ʼo Te Tule Leʼo pea mo te nusipepa Réveillez-vous! Tou faigaʼi te ʼu fealagia fuli ke tou vaevae mo te hahaʼi ʼe agavaivai te ʼu nusipepa maʼuhiga ʼaia ʼaē ʼe malave ki te maʼuli ʼo te hahaʼi pea ʼe nātou lagolago te ʼu moʼoni ʼo te Puleʼaga.

[Nota ʼi te lalo pasina]

Koteā Takotou Tali?

◻ Koteā ʼaē ʼe ʼiloga ai ko Te Tule Leʼo pea mo te nusipepa Réveillez-vous! ʼe moʼoni?

◻ Neʼe malave feafeaʼi Te Tule Leʼo pea mo te nusipepa Réveillez-vous! ki te maʼuli ʼo te hahaʼi?

◻ Koteā te meʼa ʼe feala ke fai e te ʼu kokelekasio moʼo tuputupu te tufa ʼo te ʼu nusipepa?

◻ Koteā te ʼu tokoni ʼe feala ke tokoni kia koutou ke koutou tufa he ʼu nusipepa e lahi?

[Talanoa ʼo te pasina 22]

Ko Te ʼu Alatike Neʼe Malave Ki Te Maʼuli ʼo Te Hahaʼi

Talu mai fualoa, tokolahi te kau lautohi neʼe nātou faitohi moʼo fakahā tanatou fakamālo ki te ʼu alatike ʼaoga ʼaē neʼe tā ʼi Te Tule Leʼo pea mo te nusipepa Réveillez-vous! Ko te lisi ʼaē ki lalo ko he ʼu kiʼi talanoa ʼi te ʼu talanoa lahi ʼaē neʼe malave ki niʼihi neʼe nātou lau te nusipepa ʼaenī. Ko tokotou maʼuli neʼe fetogi koa ʼi te ʼu alatike ʼaenī peʼe ʼi ʼihi age alatike?

Te Tule Leʼo

“Koutou tali te tokoni ʼa te ʼAtua moʼo fakafimālieʼi ʼakotou ʼu hāla ʼe fufū” (ʼAho 15 ʼo ʼApelili 1985, fakafalani)

“Tou fakahā te aga faka lotu ki ʼatatou ʼu mātuʼa kua matutuʼa” (ʼaho 1 ʼo Sūnio 1987, fakafalani)

“Ko te ako ʼe ʼi ai tona ikuʼaga” (ʼAho 1 ʼo Novepeli 1992)

Réveillez-vous!

“ ʼE feala ke koutou tauʼi te lotovaivai!” (ʼAho 8 ʼo Tesepeli 1981)

“Mokā mate he tahi ʼe koutou ʼofa mamahi kiai . . .” (ʼAho 22 ʼo Sūlio 1985)

“Koutou puipui takotou ʼu fānau!” (ʼAho 8 ʼo ʼOketopeli 1993)

[Paki ʼo te pasina 23]

ʼI Kanata—ʼe faka mafola ʼi te ʼu ʼapi ʼaki te ʼu nusipepa

[Paki ʼo te pasina 24]

ʼI Myanmar—ʼe tufa te ʼu nusipepa ʼaē ʼe ina hinoʼi te ala ki te maʼuli