Ko Te Tule Leʼo Pea Mo Te Réveillez-vous!—Ko Te ʼu Nusipepa ʼo Te Moʼoni
1 Ko te alatike ʼo Te Tule Leʼo ʼo te ʼaho 1 ʼo Sanualio 1994 ʼi te pasina 22, ʼe ina fakamanatuʼi mai kia tatou ko ʼatatou ʼu nusipepa neʼe tā “ ʼo ʼuhiga mo te ʼu meʼa ʼe ʼaoga moʼoni ki te hahaʼi.” ʼE tou mahino ki tonatou maʼuhiga pea ʼe tou loto ke lahi tatatou tufa te ʼu nusipepa ʼaia. Lolotoga te ʼu māhina ko ʼApelili pea mo Maio, ʼe tufa anai te ʼu nusipepa ʼaia e lua, ʼo feiā aipe mo te ʼu kaupepa lalahi, gata pe ki te kaupepa lahi ʼaē L’école ke ʼaua naʼa fakaʼaogaʼi ʼi te ʼu māhina ʼaia.
2 Ko te gāue faka mafola ʼe ina foaki mai he faigamālie moʼo tufa ʼo te ʼu nusipepa ʼaia. Ko te fagonogono faigamālie pea mo te ʼu ʼaʼahi fakapotopoto, ʼe ko te faʼahi ʼaia ʼe tufa tuʼumaʼu ai te ʼu nusipepa. Ko te fai faka mafola ʼi te ala pea mo te ʼaʼahi ʼi te ʼu pilō gāue ʼaē ʼi totatou telituale ʼe ko he tahi ʼu faʼahi lelei moʼo hikihiki ʼo tatatou tufa te ʼu nusipepa.
3 Te ʼu Manatu Ke Palalau Kiai: Ko te alatike ʼo te ʼaho 1 ʼo ʼApelili ʼe talanoa ki te ʼu manatu ʼaenī “Ko He Mālama ʼe Lelei Age—Ko He Misi Pe Koa Ia?” pea mo te alatike ʼaē “Kua Ōvi Mai—Te Mālama ʼe Lelei Age!” Ko te faʼahi ʼaenī ʼe mahino ia ʼe ʼalutahi mo te fakatuʼutuʼu ʼa te ʼu nusipepa, ʼaē ko te kalagaʼi ʼo te Puleʼaga ʼo te ʼAtua. Ko te alatike ʼaē ʼe hoa mai kiai ʼe ina fakaʼosi ʼaki, ʼo ina fakahā peʼe feafeaʼi anai te tuʼu moʼoni ʼo te palatiso heʼegata ʼo mulimuli ki te pule ʼa Kilisito Sesu.—Luka 23:43.
4 “Kofea ʼAē ʼe Feala Ai Hakotou Maʼu He Takitaki ʼe Tau Mo Te Falala?” ko te fehuʼi ʼe talanoa kiai te alatike ʼo Te Tule Leʼo ʼo te ʼaho 15 ʼo ʼApelili. Ko te ʼu nusipepa ʼo Maio ʼe talanoa ai ki te manatu ʼaenī ʼo lahi ake ʼi te ʼu alatike ʼaenī “ ʼE Foaki Katoa Atu Koa e te Lotu Te ʼu Meʼa ʼAē ʼe ʼAoga Kia Koutou?” pea “He Koʼe Koa ʼe Tonu Ke Lau Te Tohi-Tapu?” ʼE tonu anai ke kamata hatatou ʼu palalau ʼo faigafua mo te hahaʼi ʼaē ʼe nātou fakasiosio ʼe mole he ʼuhiga pea ʼe mole hanatou fakatuʼutuʼu ʼi tonatou maʼuli.
5 Fakatuputupu Te Tufa ʼo Te ʼu Nusipepa: Ko te alatike ʼo te ʼaho 1 Sanualio ʼe tuʼu ʼi ai te ʼu manatu e fā ʼo ʼuhiga mo te fakatuputupu ʼo te tufa ʼo te ʼu nusipepa. Neʼe fakaloto mālohiʼi tatou (1) ke tou mahino lelei ki ʼatatou ʼu nusipepa. Mokā ʼe tou lau ʼatatou ʼu nusipepa, ʼe tonu anai ke tou fakakaukauʼi peʼe ko te ʼu alatike fea ʼaē ʼe feala ke lave ʼaupito ki te hahaʼi ʼi totatou telituale. Koia, kapau ʼe ia tatou tuʼumaʼu he ʼu nusipepa, e lagi ʼe feala hatatou tufa ki te hahaʼi ʼaē ʼe kaugā gāue mo tatou, ki ʼotatou ʼu vāhaʼa fale, ki te ʼu tagata faiako, ki te ʼu kaugā ako, peʼe ki te ʼu hahaʼi fai fakatau.
6 Neʼe fakamanatuʼi mai kia tatou (2) ke tou fai he palalau ʼe faigafua hatatou mahino ki ai. Ke tou fili he puani ʼaoga e tahi, pea mo talanoa ʼaki he ʼu palalau fakanounou. Kapau ʼe feala hakotou fakalotoʼi he tahi ke ina toʼo te nusipepa, ʼe feala pe ke “palalau” te ʼu nusipepa ʼaia kia ia ʼaē ʼe palalau mo koutou peʼe ko niʼihi ʼi te loto fale.
7 Ko te tahi meʼa ʼe ʼaoga (3) ko te fakahā ʼo te ʼu alatike ʼaē ʼe feʼauga ki te hahaʼi. ʼE lelei hatatou fakakaukauʼi he ʼu alatike kehekehe—ko he alatike ki te kau tūpulaga, ko he tahi ki te ʼu tagata, pea mo he tahi ki te ʼu fafine.
8 Pea, ʼe ʼaoga (4) ke fai he fakatuʼutuʼu takitokotahi ʼo ʼuhiga mo te tufa ʼo te ʼu nusipepa. Logope la te mole hinoʼi mai e te kokelekasio te lahi ʼo te ʼu nusipepa ʼaē ke tufa, ʼe feala ke fai hatatou fakatuʼutuʼu takitokotahi. Ko te faʼahi ʼaenī e lagi feala ke lahi ai totatou uga ke tou fiafia ʼi te tufa ʼo te ʼu nusipepa. Kapau ʼe fua lelei tatatou tufa te ʼu nusipepa, e lagi feala ke tou fakatuputupu ke lahi age.
9 ʼE tou loto ke ʼiloʼi e ʼihi te Puleʼaga ʼo te ʼAtua. Tou fakaʼaogaʼi te fealagia fuli moʼo tufa ʼo te ʼu nusipepa ko te tokoni lelei ʼaia moʼo logologo ʼo te logo ʼo te Puleʼaga.—Mat. 10:7.