ʼE Koutou Lau Koa Te ʼu Nusipepa?
1 Ko te taumatuʼa misionea ʼi Afelika neʼe nā ʼui fēnei ʼo ʼuhiga mo tatatou ʼu nusipepa: “Ko Te Tule Leʼo ʼe tokoni mai kia māua ke ma mālohi ʼi te faʼahi fakalaumālie ʼi tomā telituale. ʼE ma maʼu he fakaloto mālohi ʼi te ʼu Tule Leʼo fuli.” ʼE feiā koa takotou leleiʼia te ʼu nusipepa? ʼE koutou holi mālohi koa mo koutou ke koutou lau te ʼu nusipepa ʼaia?
2 ʼE lahi ʼaupito te temi ʼaē ʼe fakaʼaogaʼi moʼo teuteuʼi te ʼu alatike ʼaē ʼe feala ke tou lau pe ʼi he ʼu kiʼi minuta. ʼI takotou ʼiloʼi te faʼahi ʼaia, ʼe koutou lau fakavilivili pe anai koa te ʼu alatike, ʼo koutou vakaʼi pe te ʼu paki, peʼe koutou lau pe anai koa te ʼu alatike ʼaē ʼe koutou leleiʼia? ʼE ko he agapoto anai mo kapau ʼe mole gata ʼaki pe tatatou fai te faʼahi ʼaia. ʼE tonu ke tou fakatuʼutuʼu he temi moʼo lau pea mo sivi fakalelei te ʼu alatike fuli ʼaē ʼe tou maʼu ʼi te ʼu nusipepa. Ko Te Tule Leʼo ʼe ko te nusipepa tāfito ʼaē ʼe tou maʼu ai te meʼa kai fakalaumālie ʼi tona temi totonu. Ko te Réveillez-vous! ʼe ina foaki mai he ʼu alatike lelei pea ʼe lahi te ʼu meʼa kehekehe ʼaē ʼe talanoa kiai. Ko te ʼu meʼa ʼaē ʼe tou ako ʼi tatatou lau te ʼu nusipepa, ʼe mole gata ʼaki pe tanatou fakamālohiʼi tatou ʼi te faʼahi fakalaumālie, kae ʼe nātou toe tokoni foki kia tatou ke tou poto age ʼi te minisitelio. Kapau ʼe tou lau tuʼumaʼu te ʼu nusipepa, pea ʼe tou holi anai ke tou fakahā te ʼu nusipepa ki te hahaʼi.
3 Te ʼu Puleʼaki Moʼo Hikihiki Tatatou Lautohi: ʼE feala koa ke koutou hikihiki takotou lautohi ke koutou lava lau te ʼu nusipepa fuli? Koʼeni he ʼu tokoni e lua neʼe fua lelei ki te tokolahi. (1) Koutou fai hakotou polokalama ki te lautohi. Kapau ʼe koutou taupau minuta e 10 peʼe 15 ʼi te ʼaho fuli moʼo lautohi, pea ʼe koutou punamaʼuli anai ʼi te tuʼuga meʼa ʼaē ʼe feala ke koutou lau ʼi te vāhaʼa pe e tahi. (2) Koutou fai he fakatuʼutuʼu ke koutou ʼiloʼi pe koteā te ʼu alatike ʼaē kua ʼosi koutou lau. ʼE lagi feala ke koutou fakaʼiloga ʼi te kamata ʼo te ʼu alatike fuli ʼaē kua koutou ʼosi lau. Kapau ʼe mole koutou fai te faʼahi ʼaia, pea ʼe lagi galo anai kia koutou he ʼu alatike pe ko he nusipepa katoa. ʼE maʼuhiga ke koutou maʼu he faʼahiga fai ʼe koutou leleiʼia ʼo ʼuhiga mo takotou lautohi, pea ke koutou pipiki maʼu kiai.—Vakaʼi ia Filipe 3:16.
4 Ko te “tagata kaugana agatonu mo poto” neʼe mulimuli lelei ki te ʼu fetogi ʼaē neʼe hoko ʼi totatou temi, ʼo ina tā he ʼu alatike ʼe talanoa ki te ʼu meʼa ʼaē ʼe ʼaoga moʼoni ki te hahaʼi. (Mateo 24:45) Ei, ʼe malave te ʼu nusipepa ki totatou maʼuli. Ko tatatou tuputupu ʼi te faʼahi fakalaumālie ʼe fakalogo tāfito ki te lelei ʼo tatatou ʼu agamāhani ʼi te lau ʼo te ʼu meʼa faka teokalatike. Kua ʼamanaki ke hoko he tapuakina fakalaumālie lahi maʼa nātou ʼaē ʼe nātou fakatuʼutuʼu he temi moʼo lau te ʼu nusipepa fuli.